Hapot Hali sa mga Parabasa

Kun an sarong lalaki asin sarong babayi na bakong mag-agom magdamlag na magkaibanan na mayo man nin balidong mga dahilan, iyan daw sarong ebidensiya nin pagkakasala na nangangaipong aksiyunan nin hudisyal na komite?

Iyo, kun mayo nin nagpapagian na mga ebidensiya, mabilog nin hudisyal na komite basado sa makusog na sirkumstansiyal na ebidensiya na sinda nakakomiter nin seksuwal na imoralidad.—1 Cor. 6:18.

Maingat na sinisiyasat kan grupo nin kamagurangan an lambang sitwasyon tanganing maaraman kun dapat na magbilog nin hudisyal na komite. Halimbawa: Magkailusyon daw sinda? Natawan na daw sinda dati nin sadol dapit sa paggawi ninda sa kada saro? Anong mga sitwasyon an nagin dahilan kaya magdamlag sindang nag-ibanan? Pinagplanuhan daw nindang gibuhon iyan? May ibang opsiyon daw kuta sinda, o igwa daw nin nagpapagian na mga ebidensiya, tibaad mga dai inaasahan na pangyayari o totoong emerhensiya na huli kaiyan mayo sindang ibang magigibo kundi an mag-ibanan nin magdamlag? (Par. 9:11) Sain nagturog an kada saro sa sainda? Huling magkakalain an lambang sitwasyon, tibaad may iba pang mahalagang mga bagay na ikokonsiderar an mga elder.

Pagkatapos na makonsiderar kan grupo nin kamagurangan an gabos na impormasyon, dedeterminaran ninda kun baga dapat na magbilog nin hudisyal na komite.