Makahulogan na mga Pagtiripon Para sa Paglilingkod sa Langtad
1 Sa Lucas 10:1-11, igwa nin rekord manongod sa sarong pakipagtipon ni Jesus kaiba kan 70 disipulo sa pag-andam sainda para sa paglilingkod sa langtad. Nagtao sia nin instruksion sa pag-organisar sainda, pag-andam kun ano an saindang sasabihon, asin pag-atubang sa depisil na mga situwasyon. Makakanood kita paagi sa pagsiyasat sa rekord na ini.
2 Malinaw na an gabos na 70 disipulo presente para sa pagtiripon kaiba ni Jesus. Dakol na oras an nasasayang sa mga pagtiripon para sa paglilingkod kun an iba ugale nang mag-abot nin huri. Huli sa pag-abot ninda nin huri parateng nagkakaipong organisaron giraray an mga grupo asin asignasyon sa teritoryo. Nagkacausa ini na maatraso an bilog na grupo.
3 Tinawan ni Jesus an grupo nin espisipikong topiko na gagamiton, arin na baga, “an kahadean nin Dios.” (Luc. 10:9) Iinasignar kita na ihulit an iyo man sanang mensahe, asin parate tang inaapresyar an mga suhestion manongod sa kun ano an sasabihon. Puwedeng gamiton kan nangengenot an librong Reasoning, na igwa nin labing 40 introduksion na magagamit. An pagrepaso sa saro o duwa sa mga ini makakatabang sa sato na magtaram na may orog na kompiansa sa mga pinto.
4 Bako sanang sinabihan ni Jesus an saiyang mga disipulo kun ano an itataram kundi sinabihan nia sinda kun paano iyan itataram. (Luc. 10:5, 6) Itinatampok an mga demonstrasyon sa Pagtiripon sa Paglilingkod kada semana na nagpapaheling sa sato kun paano niato epektibong ikapahahayag an satong sadiri. Tibaad repasohon kan nangengenot an iinatubang kan nakaaging pagtiripon. An halipot na demonstrasyon nin sarong simpleng pag-atubang makakatabang sa sato na organisaron an satong isip asin itaram an mga iyan.
5 Tinokdoan man ni Jesus an saiyang mga disipulo dapit sa saindang personal na paggawe. (Luc. 10:7, 8) Puwede man na tawan kita kan nangengenot nin direktang instruksion sa pagtabang sa sato na malikayan an ano man na puwedeng makaparayo kan atension sa satong gibohon. Puwedeng patanidan nia kita manongod sa paggrupogrupo sa mga kanto kan kalye o pagsayang nin panahon sa pakikidiskutiran sa mga paratumang. Puwede nia kitang pagirumdomon kan pangangaipo na magkaigwa nin tamang house-to-house record. Tibaad kaipuhan kan mga magurang an pagirumdom dapit sa maingat na pag-asikaso sa saindang mga aki.
6 An 70 disipulo nakikooperar sa mga instruksion ni Jesus asin pakatapos “nagbuwelta na may kaogmahan.” (Luc. 10:17) Kun naghihimate kita sa paggiya na inaako niato sa mga pagtiripon para sa paglilingkod, makakalaom man kita nin nagdadakol na kagayagayahan sa paghuhulit kan mensahe nin Kahadean.—Gibo 13:48, 49, 52.