Si Cristo Bilang Arogan nin mga Hoben
1 Pakatapos nin pag-orolay sa Biblia sarong kinabanon na hoben an nagsabi: “Ako huminanga sa dinamikong personalidad ni Jesu-Cristo. Uya an sarong lider na puede kong tubodon.” An kaparehong tataramon dai puedeng ipanongod minsan kiisay na prominenteng persona sa nasyon o mga eroe sa karawat o aling-alingan. An pinangangaptan nindang kinabanon na mga pamantayan asin bakong sa Kristianong paagi nin pamumuhay minadiskualipikar sainda bilang arogan niato.—Sal. 146:3, 4.
2 An mga hoben makaseseguro na kun sinda gumibo nin pagtubod ki Jesu-Cristo, sinda karnero nin Dios patin midbid asin inaataman ni Jesus. (Juan 10:14, 15, 27) An mga hoben na nagsusunod ki Cristo bilang saindang Arogan may bendisyon.
3 Sarong tugang na lalaki na naglilingkod sa Bethel sa Brooklyn an igwa kan pribilehiong ini bilang pasohan poon pa kan sia walong taon pa sana. Sia pinakosog na mansayon an paglingkod sa Bethel bilang praktikal na paagi na maarog an halimbawa ni Cristo kun sia dakula na. An saiyang mga magurang, pati na an nagbibiyaheng mga paraataman, dayaday na ipinatanaw sa saiya an pasohan na ini. Tanganing tabangan sia na magpreparar, pinakosog ninda an aki na magmahigos arog kan nagtatrabaho sa Bethel, na nagtatrabaho sa harong, nagtatabang sa pagmantener kan Kingdom Hall, asin pinaooswag an kakayahan nia sa ministeryo. Pakalihis nin dakol na taon na paglilingkod sa Bethel, sia nagpapasalamat na nagmaigot siang arogon an halimbawa ni Cristo mantang sia nagdadakula.
4 Dai pinagmaigotan ni Jesus na kamtan an sarong kinabanon na karera; pinili nia an ministeryo. Sarong hoben na tugang na babae an nagmawot na magpayunir pakatapos maggradwar sa eskuelahan alagad nagduduwaduwa huli ta mayo siang marahay na trabahong por ora. Nagparaisip-isip sia: ‘Primero mahanap ako nin trabaho, dangan itatao ko an aplikasyon ko sa pagpayunir.’ Ipinaheling kan sarong magurang sa kongregasyon na mientras na mas haloy siang naghahalat, magigin mas kawiliwili an pambilog na panahon na trabaho, huli ta mayo na siang dahelan na dai iyan akoon. Sia nagsaysay: “Namibi ako ki Jehova para sa paggiya kan saiyang espiritu.” Tolos-tolos na nagpalista sia bilang auxiliary payunir asin sa huri sia nagin regular payunir. Dai nahaloy pakalihis kaiyan, nakanompong sia nin marahay na trabaho na kaoyon kan saiyang iskedyul bilang payunir.
5 May kapusoan na ihinayag ni Jesus an mensahe kan Kahadean sa gabos. (Mat. 4:23) An hoben na mga Kristiano puede man na makanood na magin mapuso sa paghuhulit, na dai nagigibong takoton nin iba. Sarong 14-anyos na Saksi an nagreport: “Gabos na yaon sa eskuelahan nakaaaram kan kamugtakan ko bilang sarong Kristiano. . . . Aram nindang marhay iyan na kun makanompong ako nin sarong kaeskuela mantang nagpapartisipar sa ministeryo, dai ako nakakamate nin pagkasopog. Sa parate an mga kaeskuela ko naghihinanyog, asin sa dakol na beses sinda minaako nin literatura.”
6 An paghorophorop sa mga halimbawa ni Jesus puedeng tumabang sa mga hoben na gumibo nin madonong na mga desisyon manongod sa saindang ngapit. An saiyang halimbawa nagpapakosog sainda na ‘girumdomon an saindang Dakulang Kaglalang’ paagi sa pagpaheling nin kaigotan sa paglilingkod ki Jehova. (Ecl. 12:1) Arog ni Cristo Jesus, kinukultibar ninda “an pagkamoot kan Ama,” na nagdadara nin mga bendisyon na mas marahay kisa ano man na itinatangro kan kinaban. Imbes na “maagi sana,” makalalaom sinda na ‘magdanay sagkod lamang.’—1 Juan 2:15-17.