Isentro an Saindong Isip sa mga Bagay na Nasa Itaas
1 Sa pagkomento sa kapag-arakian ngonyan asin sa pagmansay kaiyan sa ngapit, an sarong artikulo sa The New York Times kan Disyembre 31, 1994, nagsabi: “An mga tawo natatakot sa ngapit. Natatakot sinda kaiyan kun manongod sa mga trabaho, kun manongod sa helang, kun manongod sa ekonomiya, kun manongod sa mga situwasyon sa kinaban.” Saen man kita humeling, igwa nin pakamate nin pagkadaing kasegurohan dapit sa buhay. Minsan ngani kita bilang Mga Saksi ni Jehova napaaatubang sa mga problema na siring kan inaatubang ninda, pinangyayari kita kan satong pagtubod asin kompiansa sa siertong mga panuga kan Tataramon nin Dios na magkaigwa nin napalalaen na pagmansay sa buhay asin sa ngapit.—Isa. 65:13, 14, 17.
2 An satong paglaom sa marahay na ibubunga asin pagmansay na may siertong paglaom pinangyayari an dakol na tawong sadiosan an puso na maghinanyog sa mensahe na dinadara niato sa sainda. Dakol na indibiduwal na namomondo asin inaapi an nararanga na makipag-olay sa sato. Huling gusto ninda an saindang nadadangog, an iba minaoyon na pag-adalan an Biblia kaiba niato. Alagad, kun beses, tibaad boot ngunang pag-olayan kan mga tawo an dapit sa saindang personal na mga problema. Minsan ngani puedeng gamiton an kadikit na panahon sa paghinanyog sa personal na mga ikinahahadit nin saro, dai niato maninigong lingawan an satong katuyohan, na iyo an tokdoan sinda kan positibong mga katotoohan sa Tataramon nin Dios.
3 Boot nanggad niato na magin madinamayon sa mga nagagabatan. Nagtao si Jesus kan halimbawa kan sia magsabi siring sa nasusurat sa Mateo 11:28: “Madia kamo sa sako, kamo gabos na nagpapagal asin nagagabatan.” Boot niatong pakosogon an mga tawo sa kaparehong paagi. Pero, mangnoha, sa konklusyon kan bersikulo 28, si Jesus nagsabi: “Pagiginhawahon ko kamo.” Iyan an maninigong magin katuyohan niato. Ginigibo niato iyan paagi sa paghiras kan nakarerepreskong mga panuga gikan sa Tataramon nin Dios. An pagigin marahay na parahinanyog nagpapaheling kan satong personal na interes asin mahalaga sa pag-otob kan sugo sa sato na maghulit, na tinatabangan an iba na marealisar na an Kahadean an solamente na siertong remedyo sa gabos na problema nin katawohan.—Mat. 24:14.
4 An satong gibohon bakong propesyonal na mga eksperto sa salud. Imbes, siring sa ipinaliwanag ni Pablo sa 1 Timoteo 4:6, an satong gibohon sarong ministeryo nin “marahay na katokdoan,” mga katokdoan na nakukua sa Tataramon nin Dios. An mga igwa nin personal o emosyonal na mga problema tibaad kinakaipuhan na pakosogon na maglaom ki Jehova. Tokdoan sinda na “isentro an [saindang] isip sa mga bagay na nasa itaas”—mga bagay na konektado sa paglaom sa Kahadean. (Col. 3:2) Kun pinagdadanay nin mga tawo na nakasentro sa Tataramon nin Dios an saindang atension, maparirigon sinda bilang resulta kan mapuersang impluwensia kaiyan sa saindang buhay.—Heb. 4:12.
5 Kaya an satong pasohan tabangan an mga tawo na ikonsentrar an saindang pag-isip sa mga bagay na ‘matanos, malinig, makawiwili, asin inoomaw.’ (Fil. 4:8) Kun isesentro ninda an atension sa paglaom sa Kahadean, makaeeksperyensia man sinda kan kagayagayahan na kadungan kan pakaaram na pag-abot nin panahon reresolberan ni Jehova an gabos nindang problema paagi sa saiyang Kahadean.—Sal. 145:16.