Dalawon Liwat an mga Nagpaheling nin Interes
1 An satong pasohan kun nagpapaheling nin interes an mga tawo iyo na tabangan sindang makanood nin orog pa manongod ki Jehova asin sa saiyang Aki. Minsan ngani makanonood sinda nin orog pa paagi sa pagbasa ninda mismo, pero kaipuhan ninda an tabang niato tanganing magkamit nin tamang kaaraman. Huli kaini, dapat kitang gumibo nin mga pagdalaw liwat sa sainda.
2 Kun pinag-olayan nindo kan enot nindong pagsongko an petsa kan pagkamundag ni Jesus, puede nindong ponan an pagdalaw liwat nindo paagi sa pagsabi:
◼ “Kan nakaagi kong pagdigdi, hineling niato an ilustrasyon na ini manongod ki Jesus kan sia mamundag, digdi sa kapitulo 5 kan librong ini. Narisa daw nindo na an mga tawo parateng nag-iisip ki Jesus magsalang bilang sarong omboy o sarong lalaking naghihingagdan sa sarong harigi? Ano sa paghona nindo an katongdan ni Jesus ngonyan? [Pasimbagon.] Digdi sa kapitulo 133 sa enot na parapo ilinaladawan kaiyan si Jesus bilang sarong Guerrero-Hade na nagtutukaw sa trono nin Dios. [Basahon an Kapahayagan 11:15.] Dai na mahahaloy hahaleon nia sa daga an karatan asin eestablisaron an mga kamugtakan na ipinaheling sa ilustrasyon sa pahina 2 kan kapitulong ini. Tanganing magkamit nin buhay na daing katapusan, kaipuhan niato an tamang kaaraman dapit ki Jesus asin sa saiyang Ama. [Basahon an Juan 17:3.] Tibaad puede niatong magkaibang pag-olayan nin orog pa an libro sa masunod kong pagsongko.”
3 Kun minabalik liwat kamo tanganing ipadagos an saindong pag-orolay manongod sa huring mga aldaw, puede nindong sabihon:
◼ “Kan huri kong pagdigdi, napag-olayan niato an manongod sa [ano man na nangyari]. Luminataw an hapot na kun taano an mga bagay na ini ta nangyayari ngonyan. Nagigirumdoman daw nindo an sinabi ni Jesus? [Pasimbagon.] Iyo, an mga bagay na ini ebidensia na nasa huring mga aldaw na kita. An dugang pang ebidensia itinatao digdi sa 2 Timoteo 3:1-5. [Basahon asin pag-olayan an manlaenlaen na punto.] Kun boot nindo, puede niatong magkaibang repasohon an dugang pang mga punto digdi sa kapitulo 111 kan librong iwinalat ko saindo.” [Basahon asin pag-olayan an pirang parapo, dangan iareglo na bumalik sa masunod na semana para sa orog pang pag-orolay.]
4 Kun minadalaw liwat kamo tanganing songkoon an sarong magurang na nahahadit dapit sa mga problema sa pamilya, puede nindong sabihon ini:
◼ “Aram ko na kamo, bilang sarong magurang, gusto an pinakamarahay para sa saindong mga aki. Mantang imposible na lipodan sinda sa gabos na bagay na maraot, kaipuhan nindo sindang tokdoan kun paano makapanggagana sa mga problema sa buhay. Sa paghona nindo paano iyan puedeng gibohon? [Pasimbagon.] An saro sa pinakaimportanteng bagay na puedeng gibohon nin mga magurang iyo an pagkaigwa nin panahon kaiba an saindang mga aki. Ginibo ini ni Jesus, siring sa nasusurat sa Lucas 18:15-17. [Basahon.] Nanompongan nin dakol na magurang na an pagkaigwa nin nagkapirang minuto kada aldaw tanganing magbasa kaiba kan saindang mga aki nin sarong kapitulo sa librong ini, na The Greatest Man Who Ever Lived, kapakipakinabang na marhay sa pagtao nin amay na pagsasanay sa saradit na aki. Kun boot nindo, maoogma akong tabangan kamo na gibohon ini.”
5 Bendisyonan logod ni Jehova an satong mga paghihingoa na itao an kaaraman manongod ki Jehova asin sa saiyang Aki paagi sa epektibong mga pagdalaw liwat ngonyan na Disyembre.