“Ano an Maninigo Kong Gibohon?”
1 Bilang sarong hoben na nagdadangadang sa pagkanasa edad na, tibaad ihapot mo, ‘Ano an maninigo kong gibohon sa sakong buhay?’ Boot kan Kristianong mga hoben na pahiwason an saindang paglilingkod ki Jehova sa ministeryo. Alagad paano mo ini magigibo mantang pinoponan mong gibohon an mga paninimbagan sa pagkanasa edad na, na kabale an pagsustento sa saimong sadiring materyal na mga pangangaipo? Tibaad bakong pasil an paghanap kan simbag.
2 An nagkapirang hoben nahahadit kun inoobserbaran ninda an kamugtakan sa ekonomiya kan kinaban asin an mga prediksion para sa ngapit. Naghohorophorop sinda: ‘Maninigo ko daw na ipagpadagos an dugang pang sekular na edukasyon? Maninigo daw akong lumaog tolos-tolos sa bilog na panahon na paglilingkod?’ Tanganing magibo an tamang desisyon, kaipuhan na sadiosan na simbagon nin saro an hapot na ini, ‘Ano an sakong pangenot na interes sa buhay?’ Dapat niang siyasaton an saiyang mga motibo.
3 Ano an kinultibar mo bilang pangenot sa saimo durante kan saimong pagkahoben? Ika daw interesado sana sa paghanap nin pinansial na bentaha, o talaga daw na gusto mong gamiton an saimong buhay sa pagpalakop kan intereses kan Kahadean? An titulo sa unibersidad dai naggagarantiya nin kapangganahan sa malalaogan na mga trabaho. Bilang pagpipilian, dakol an nagkaigwa nin abilidad sa trabaho paagi sa sarong bokasyonal o teknikal na edukasyon sa eskuelahan, o halipot na terminong mga kurso sa kolehio na nagkakaipo nin pinakakadikit na panahon asin pagkadusay.
4 Magkompiar sa Panuga ni Jehova: An sarong mahalagang marhay na bagay na dapat konsideraron iyo an pag-asegurar ni Jehova Dios na susustentohan nia an mga ineenot sa buhay an intereses kan Kahadean. (Mat. 6:33) Ini bakong daing pakinabang na panuga. Dakol na tugang na lalaki na nag-aadal sa Paadalan sa Ministeryal na Pagsasanay an may mga titulo sa kolehio bago pa makanood kan katotoohan. Alagad ano an saindang ginigibo para sa sekular na trabaho? Pipira sanang gayo an nagpapadagos sa karera na dian sinda inedukar. Dakol an nasa mga trabahong pagtao nin serbisyo, na pinaninigoan na marhay an saindang pinansial na mga pangangaipo mientras na nagpapayunir. Paagi sa pagpahiwas kan saindang aktibidad sa ministeryo, sinda nag-aako nin mga bendisyon na labi nanggad sa ano man na halaga nin kuarta.
5 Sa pagdesisyon sa kun ano an maninigo mong gibohon pagkagradwar sa haiskul, tirotimbangon an gabos na bagay asin maingat na siyasaton an saimong mga motibo. Para sa timbang na punto de vista sa saimong mga pagpipilian, estudyaran an impormasyon na arog kan nagluwas sa Marso 8, 1998 Awake!, pahina 19-21. Makipag-olay sa saimong mga magurang, sa kamagurangan, sa saindong paraataman sa sirkito, asin mapangganang mga payunir sa saindong lugar. Tatabangan ka kaiyan na gumibo nin madonong na desisyon manongod sa kun ano an maninigo mong gibohon sa saimong buhay.—Ecl. 12:1, 13.