Kamo “Sarong Panteatrong Dadalanon”!
1 Si apostol Pablo nagsurat: “Kami nagin sarong panteatrong dadalanon sa kinaban, asin sa mga anghel, asin sa mga tawo.” (1 Cor. 4:9) Ano an boot sabihon kaini, asin paano iyan maninigong makaapektar sa sato sa satong ministeryo ngonyan?
2 Para sa sarong taga Corinto, an mga tataramon na “sarong panteatrong dadalanon” posibleng marhay na nagpagirumdom kan pantapos na aktibidad sa sarong kompetisyon nin mga gladiador sa Roma, na dian ipinaparada an kondenadong mga tawo sa atubangan nin rinibong nagdadalan bago gadanon sa maringis na paagi. Kaagid kaiyan, namasdan kan dakol na nagdadalan—mga tawo sagkod anghel—an mga pagdusa na inagihan nin mga Kristiano kan enot na siglo huli sa pagpatotoo sa Kahadean. (Heb. 10:32, 33) An saindang pagdadanay na may integridad nakaapektar sa dakol na nagmamasid, kun paanong iyo man an pakatagal niato sa presenteng panahon na arena. Para kiisay kita sarong dadalanon?
3 Sa Kinaban Asin sa mga Tawo: Kun beses an media nagpupublikar nin mga bareta manongod sa mga aktibidad kan banwaan ni Jehova. Minsan ngani inaapresyar niato an marahay na mga bareta na totoo asin imparsial sa pagtokar sa satong gibohon, inaantisipar man niato an maraot na mga bareta na palalakopon kan mga nagbabalobagi sa sato sa panapanahon. Minsan siring, dapat na padagos niatong irekomendar an satong sadiri bilang mga ministro nin Dios “paagi sa maraot na bareta asin marahay na bareta.” (2 Cor. 6:4, 8) Para sa sadiosan an puso na mga nagmamasid nagigin malinaw na kita an tunay na mga disipulo ni Jesu-Cristo.
4 Sa mga Anghel: Minamasdan man kita kan espiritung mga linalang. Nagheheling an Diablo asin an saiyang mga demonyo—alagad may “dakulang kaanggotan,” na hinihingoang paontokon an “gibohon nin pagpatotoo ki Jesus.” (Kap. 12:9, 12, 17) An fiel na mga anghel nin Dios nagheheling asin naggagayagaya kun may dawa sarong parakasala na nagsosolsol. (Luc. 15:10) Maninigo na magpakosog sa sato na maaraman na an pagmansay kan mga anghel sa satong ministeryo pinakaimportante, kapakipakinabang na gibohon sa daga ngonyan!—Kap. 14:6, 7.
5 Kun may nakakaatubang kamong pagtumang o iniisip nindo na mayo nin nakukuang resulta an saindong ministeryo, girumdomon na kamo an sentro nin unibersal na atension. Dakol an ihinahayag kan fiel na pakatagal nindo. Pag-abot nin panahon, an saindong “marahay na pakilaban kan pagtubod” magpapangyari sa saindo na ‘mangapot nin marigon sa buhay na daing katapusan.’—1 Tim. 6:12.