Iinaaplikar daw Nindo an Saindong Nanodan sa Serye kan Pansirkitong Asamblea kan 2001?
1 Natapos pa sana niato an serye kan pansirkitong asamblea para sa 2001, na nagkaigwa kan temang, “Kamotan an Dios—Bakong an mga Bagay kan Kinaban,” basado sa 1 Juan 2:15-17. Nagigirumdoman daw nindo an pangenot na mga punto sa programa? Paano nindo nahimong iaplikar an hatol sa personal o bilang sarong pamilya? An minasunod repaso kan pira sanang kabtang kan programa asin kun paano kita makikinabang dian.
2 “Pagkamoot sa Dios an Nagmomotibar sa Sato sa Satong Ministeryo”: Ipinaheling kan pahayag na ini kan Sabadong aga na, dawa ngani an pagkamoot sa kapwa asin pagkatakot sa Dios mga bagay na nagmomotibar sa satong ministeryo, an pagkamoot ki Jehova an pinakamapuersang motibasyon. An pagkamoot ki Jehova nakatatabang sa sato na mapangganahan an negatibong mga saboot, siring baga kan pagkamasusupgon, pagkatakot sa tawo, o ano man na iba pang olang sa satong paghuhulit na may pagkapusoan. (Gibo 4:29, 31) An siring na pagkamoot nagpapahiro sa sato na mag-auxiliary payunir o magregular payunir kun kaya niato, asin minomotibar kita na magpatotoo nin impormal sa gabos na nanonompongan niato. Kaipuhan na pataluboon niato an satong pagkamoot ki Jehova tanganing nungka iyan na lumuya.—Kap. 2:4.
3 “Mga Namomoot ki Jehova, Ikaongis Nindo an Maraot”: Ipinaheling kan pahayag na ini kan Sabadong hapon, basado sa Salmo 97:10, na huli sa minanang pagkabakong sangkap asin impluwensia kan kinaban ni Satanas, parateng mas madaling kamotan an maraot kisa ikaongis iyan asin kamotan an marahay. Minsan siring, an satong relasyon sa Dios depende sa satong pagkaongis sa kun ano an ikinaoongis nia. (Tal. 6:16-19) Bako sanang kaipuhan tang ikaongis an malinaw na maraot kundi siring man an natatagong mga sala, siring baga kan pagpalabilabi sa inomon na de alkohol, bakong mamomoton na pagtratar sa satong agom o mga aki, bakong mabining gubing, asin nakararaot na pag-aling-aling.
4 “Sunodon an Nakalalabing Marhay na Dalan nin Pagkamoot”: An pahayag na ini, basado sa 1 Corinto 12:31 sagkod 13:8, nagdodoon na, kun mayo nin pagkamoot, mayong kamanungdanan an gabos na iba pang balaog asin abilidad na tibaad yaon sa sato. Nangorognang totoo ini sa pagpapadanay nin katoninongan asin pagkasararo sa mga kongregasyon. Sa siring pinagirumdom kita na mapasensiang tioson an mga pagkabakong sangkap nin iba, likayan an kapasloan asin kompetisyon, asin dai magpalakop nin nakadadanyar na tsismis. Minomotibar kita kan pagkamoot na magdanay na maimbod sa organisasyon nin Dios asin ipinamimidbid kita kaiyan bilang mga disipulo ni Cristo.—Juan 13:34, 35.
5 “Mga Bagay kan Kinaban—Paano Niato Minamansay Iyan?”: An simposium na ini kan Domingong aga kinobrehan an tolong punto sa 1 Juan 2:15-17: (1) “An mawot kan laman,” na puedeng magin dahelan na kita gumamit nin dakol na panahon sa dibersion asin pag-aling-aling. Siring kan mag-agom sa demonstrasyon, repasohon niato an satong paggamit nin panahon asin helingon kun puedeng gibohon na simple an satong buhay tangani na enoton an intereses kan Kahadean. (2) “An mawot kan mga mata” madaling makadaya sa sato, siring ki Eva na nadaya. An mga mata dinadagdagan an paghidaw kan puso. Kaipuhan kitang magmaan sa pagmawot nin materyal na mga bagay kaya nangungutang kita tangani na magkaigwa kaiyan. (3) “An pagpaabaw-abaw kan kaya sa buhay.” Puede ining ikapaheling paagi sa pagpasikat nin sono sa moda na gubing o pagmawot nin maluhong mga bagay. Kaya marahay na siyasaton an satong sadiri tangani na maheling kun ineenot niato an paglilingkod sa Dios.
6 “Pinoprotehiran Kita kan Pagigin Bakong Kabtang kan Kinaban”: An 2 Corinto 6:14-17 nagpapaheling kun paano an nagkapirang paniniwala asin kaugalean puedeng magin dahelan na kita haboan nin Dios. Ipinaheling kan pahayag na ini kan Domingo na an satong pagigin bakong kabtang kan kinaban pinagdadanay na simple an satong buhay asin mayo nin komplikadong mga problema. Iniingatan kan neutral na paninindogan niato an pagkasararo kan organisasyon. An pagkaigwa nin dakol na gigibohon sa paghuhulit asin pagtotokdo proteksion man sa sato. Kita napoprotehiran sa mga helang sa pisikal na puedeng bunga nin inmoralidad, pagdodroga, asin tabako. Kita napoprotehiran man sa apostatang kaisipan, na puedeng hilohon kita sa espirituwal.—Deut. 29:18.
7 “Mga Panuga nin Dios sa mga Namomoot sa Saiya”: An ultimong pahayag na ini nagpaheling na an ipinanugang mga bendisyon ni Jehova nakadadagdag nin kaogmahan sa ginigibo niato aroaldaw. Paagi sa pagsabwag nin abunda kita nag-aani man nin abundang mga bendisyon paagi sa mga eksperyensia asin nadugangan na kagayagayahan. (2 Cor. 9:6) Kun kita matinao asin nagsusuportar sa gibohon kan Sosyedad sa bilog na kinaban asin sa mga nangangaipo, babalosan kita ni Jehova nin mga bendisyon.—Mal. 3:10.
8 Linalaoman niato na an pagrepasong ini maanimar sa gabos na magin bakong mga paradangog sana, kundi mga paraotob man, kan nadangog niato sa pansirkitong asamblea.—Sant. 1:22.