Paano Niato Matatabangan an mga Agom na Bakong Saksi?
1 Dakol na lingkod ni Jehova an may agom na makikatood sa mga Saksi asin interesado sa kongregasyon alagad napopogolan na magin mga lingkod nin Dios. An sarong agom na lalaki nag-admitir: “An ideya na magharongharong sarong dakulang balakid para sa sako.” An iba tibaad igwa nin bakong sono sa Kasuratan na mga kaugalean na kaipuhan nindang paglabanan, o tibaad namamatean ninda na dai ninda noarin man kayang otobon an sibot na teokratikong iskedyul kan saindang agom. Paano niato sinda matatabangan?
2 Magpaheling nin Personal na Interes: An pagkaigwa nin personal na interes sa iba asin pag-obserbar sa mga kahaditan ninda tibaad magbukas kan dalan na sinda maghimate sa katotoohan sa Biblia. (Fil. 2:4) An mga dati bakong kapagtubod kan saindang agom parateng nasasambitan an mamomoton na interes na ipinaheling nin iba. “Si Jose, sarong magurang sa kongregasyon, nagpaheling nin espesyal na pagmakolog sa sako,” an paliwanag kan agom na lalaki na kinotar kasubago. “Sa heling ko an saiyang pagparigon sa boot an sa katapustapusi nagpangyari sa sako na pumoon na mag-adal nin seryoso.” Nagigirumdoman nin saro pang agom na lalaki na an nagdadalaw na mga tugang na lalaki naghingoang makipag-olay manongod sa mga pinagkakainteresan nia. “Nagpoon akong helingon an pagtubod [kan sakong agom] sa biyong laen na punto de vista,” an sabi nia. “An saiyang mga katood intelihenteng gayo na kayang makipag-olay manongod sa manlaenlaen na tema.”—1 Cor. 9:20-23.
3 Magtao nin Praktikal na Tabang: An mga agom na bakong Saksi tibaad mapahiro man nin maboot na tabang na itinatao sa sainda. (Tal. 3:27; Gal. 6:10) Kan maraot an kotse nin sarong agom na lalaki na daing pagtubod, tinabangan sia nin sarong hoben na Saksi. “Talagang hinangaan ko iyan,” an paggirumdom nia. An saro pang tugang na lalaki bilog na aldaw na tinabangan an agom na daing pagtubod nin sarong tugang na babae sa pagtogdok nin kudal sa saiyang solar. Mantang nagtatrabaho asin nag-oolay-olay, napatalubo ninda an pagigin magkatood. Pakalihis nin duwang semana, dinolok kan agom an tugang na lalaki asin nagsabi: “Panahon nang gumibo ako nin nagkapirang pagbabago sa sakong buhay. Puede daw na adalan mo ako sa Biblia?” Sia marikas na nag-oswag asin ngonyan bautisado nang Saksi.
4 Mantang padagos niatong hinahanap an mga maninigo sa satong teritoryo, padagos na tabangan niato an mga agom kan mga kapagtubod niato.—1 Tim. 2:1-4.