Magpaheling nin Personal na Interes—Paagi sa Pagigin Maboot
1 Ginigirumdom an enot na beses na nakaolay nia an saro sa Mga Saksi ni Jehova, an sarong babae na haloy nang may salang paghona tumang sa mga Saksi nagsabi: “Dai ko talaga nagigirumdoman an pinag-olayan mi, alagad an nagigirumdoman ko kun gurano sia kaboot sa sako, asin kun gurano sia kamapag-istimar patin kamapakumbaba. Naakit talaga ako sa saiya bilang sarong tawo.” Idinodoon kan mga komentong ini an importansia kan pagpaheling nin sinserong personal na interes sa mga hinuhulitan niato.—Fil. 2:4.
2 An Pagkamoot Maboot: An sarong paagi na makakapaheling kita nin pagkamoot sa iba iyo an pagigin maboot. (1 Cor. 13:4) An tawong maboot nagpapaheling nin aktibong interes sa ikakarahay nin iba, na naghihingoang gumibo nin mga bagay na nakakatabang para sa sainda. Siempre, an paghuhulit mismo sarong akto nin kabootan. Alagad an tunay na pagmakolog niato sa mga tawo mababanaag bako sanang sa paghuhulit sainda. An bilog na paagi nin pagtratar niato sa mga tawo—an satong pagigin makikatood, an satong marahay na ugale, an paagi nin paghinanyog niato, an mga bagay na sinasabi niato asin kun paano niato iyan sinasabi, dawa an ekspresyon kan lalauogon niato kun nakikipag-olay sa iba—maghahayag na kita talagang may pagmakolog.—Mat. 8:2, 3.
3 An mamomoton na pagmakolog sa mga tawo mapahiro man sa sato na tumabang sa praktikal na mga paagi. Mantang naghuhulit sa harong-harong, an sarong payunir na tugang na lalaki pinahale tolos nin sarong may edad nang babaeng balo kan maaraman kaini na sia sarong Saksi. Sinabi kan balo na kan magtimbre an tugang, sia nahaloyhaloy nang nasa aroalsang hagyan sa kusina na naghihingoang salidahan an sarong bumbilya. “Delikado po para sa saimo na gibohon iyan nin solo,” an sabi kan tugang. Pinalaog sia kan balo. Sia an nagsalida kan bumbilya dangan naghale na sia. Kan dumalaw an aking lalaki kan balo pakalihis nin halipot na panahon tangani na kumustahon ini, sinabi kaini sa saiya an nangyari. Naghangang marhay an aki kaya naghingoa siang hanapon an tugang tangani na ipahayag an saiyang pag-apresyar. Ini nagbunga nin marahayon na pakikipag-olay, na nagresulta sa pag-ako kan aki nin pag-adal sa Biblia.
4 Paagi sa pagigin maboot, ipinapabanaag niato an pagkamoot ni Jehova sa mga tawo asin sinasamnohan an mensahe kan Kahadean. Kun siring, logod na pirme niatong ‘irekomendar an satong sadiri bilang mga ministro nin Dios . . . paagi sa kabootan.’—2 Cor. 6:4, 6.