Dai Nindo Waraon an Saindong Pagkamoot kan Enot
1 An pinamuraway na si Jesus naghatol sa kongregasyon sa Efeso kan enot na siglo: “Igwa ako nin laban saimo, na binayaan mo an saimong pagkamoot kan enot.” (Kap. 2:4) Minalataw na dakol an nawaran kan saindang enot na pagkamoot ki Jehova. Kan nanonodan niato kaidto an katotoohan, napatalubo niato an makosog na pagkamoot sa Dios asin kapwa, asin ini an nagpahiro sa sato na ibalangibog na may kaigotan an satong bago pa sanang makua na paglaom. Ano an maolang sa sato na mawaran kan satong pagkamoot kan enot asin mawaran nin kaigotan sa ministeryo?
2 Personal na Pag-adal Asin Pag-atender sa Pagtiripon: Ano an dahelan na kita nakapatalubo nin pagkamoot sa Dios asin kapwa kan enot niatong manodan an katotoohan? Bako daw na an gabos na nanodan niato manongod ki Jehova sa satong pag-adal kan Kasuratan? (1 Juan 4:16, 19) Kun siring, tanganing an satong pagkamoot “paorog nang paorog na umabunda,” dapat na padagos niatong ilaog sa isip an tamang kaaraman, na kinokotkot “an harararom na bagay nin Dios.”—Fil. 1:9-11; 1 Cor. 2:10.
3 An pagpapadanay nin marahay na kaugalean sa personal na pag-adal puedeng magin depisil talaga sa huring mga aldaw na ini na pano nin dakol na kahaditan asin disturbo. (2 Tim. 3:1) Dapat na mag-iskedyul kita nin panahon na ilaog sa isip an espirituwal na kakanon. Mahalagang marhay man an regular na pag-atender sa mga pagtiripon kan kongregasyon, nangorogna ta ‘naheheling niato na an aldaw harani na.’—Heb. 10:24, 25.
4 An Ministeryo: An maigot na pakikikabtang sa ministeryo nakakatabang sa sato na papagdanayon an satong enot na pagkamoot sa Dios. Mantang ihinuhulit niato an maogmang bareta, ipinapagirumdom niato sa satong sadiri an mamomoton na mga panuga ni Jehova, asin nakakatabang ini sa sato na papagdanayon na makosogon an satong paglaom asin buhay an satong pagkamoot. An pagtotokdo kan mga katotoohan sa Biblia nagkakaipo na kita magsiyasat tangani na iyan masabotan niato nin malinaw, asin nagpapakosog ini kan satong pagtubod.—1 Tim. 4:15, 16.
5 Si Jehova an maninigo na mag-ako kan gabos na bagay, pati kan satong pagkamoot. (Kap. 4:11) Dai pagtogotan na lumuya an pagkamoot nindo. Papagdanayon na makosog an saindong enot na pagkamoot paagi sa maigot na personal na pag-adal sa Biblia, regular na pag-atender sa pagtiripon, asin maigot na pagpahayag sa iba kun ano an namomotan nindong marhay.—Roma 10:10.