Magplano Na Ngonyan na Mag-auxiliary Payunir!

1. Taano ta maninigo kitang gumibo nin mga pasohan para sa maabot na taon?

¹ Dapat kitang gumibo nin mga pasohan kun boot niatong umoswag sa espirituwal. Anong personal na mga pasohan an ginibo na nindo para sa maabot na taon? An sarong marahayon na pasohan iyo an pag-auxiliary payunir. Mantang an nakakagayagayang aktibidad na ini parateng nagkakaipo nin pagplano antes pa, ngonyan na an marahay na panahon na ponan an pagplano. Taano ta dapat konsideraron an pag-auxiliary payunir bilang sarong pasohan?

2. Taano ta dapat na pag-isipan an pag-auxiliary payunir bilang sarong pasohan?

² An pag-auxiliary payunir nagpapangyari sa sato na mapaglingkodan “nin lubos pa” an satong langitnon na Ama paagi sa paggamit nin mas dakol na oras sa ministeryo. (1 Tes. 4:1) Mantang iniisip-isip niato an gabos na ginibo ni Jehova para sa sato, pinapahiro kita kan satong puso na “magdolot sa Dios nin atang nin pag-omaw.” (Heb. 13:15; 1 Juan 4:9, 10) Siempre, an pag-auxiliary payunir nagkakaipo na gumibo nin mga pagsasakripisyo nin panahon asin kosog. Aram na marhay ni Jehova an satong indibiduwal na mga kamugtakan asin an personal na mga pagsasakripisyo na ginigibo niato tangani na mapaglingkodan sia. (Heb. 6:10) Nagtatao sa sato nin dakulang kagayagayahan an pakaaram na nakakapaogma kita ki Jehova paagi sa satong pagpapagal.—1 Cron. 29:9; Isa. 65:14.

3, 4. Paano kita nakikinabang sa pag-auxiliary payunir?

³ Mga Pakinabang: Mientras na orog nindong ginigibo an sarong bagay, sa parate iyan nagigin mas pasil asin orog na nakakagayagaya. An paggamit nin mas dakol na oras sa ministeryo gigibohon kamong mas relaks sa harong-harong. Magigin kamong mas eksperto sa pagpoon nin mga pakikipag-olay asin sa paggamit kan saindong Biblia. Mientras na orog nindong ipinapakipag-olay an saindong pagtubod, nagigin mas makosog iyan. An dakol na dai nagkokondukta nin pag-adal sa Biblia nakapagpoon nin pag-adal mientras na nag-o-auxiliary payunir.

⁴ An pag-auxiliary payunir tibaad iyo man an magin pan-engganyar na kaipuhan tangani na bagohon an satong aktitud kun an paglilingkod niato nagigin mekanikal na sana. An sarong dating regular payunir na nakamate na sobra an pagpapahalaga nia sa sekular na trabaho nagdesisyon na mag-auxiliary payunir sa laog nin sarong bulan. Sia nagsabi: “Dai ako makapaniwala kun gurano nanggad ako napakosog sa espirituwal kan sarong bulan na iyan! Naggibo ako nin mga areglo tangani na dagos-dagos na makapag-auxiliary payunir, na nagmotibar sa sako na magin regular payunir giraray.”

5. Paano niato madadaog an nagkapirang komun na olang sa pag-auxiliary payunir?

⁵ Daogon an mga Olang: Nag-aalangan an nagkapira na mag-aplay sa pag-auxiliary payunir huli ta an saboot ninda kulang sinda nin abilidad bilang mga parahulit. Kun ini an nakakapugol sa saindo, girumdomon na kaya kamong tabangan ni Jehova. Minsan ngani si Moises “maluway sa ngoso asin maluway sa dila,” ginamit sia ni Jehova sa pag-otob kan Saiyang kabotan. (Ex. 4:10-12) Kun igwa kamo nin mga problema sa salud o sibot an iskedyul nindo, dai tolos pagpalimanlimanan an posibilidad na makapag-auxiliary payunir. An pag-abot sa kahagadan na oras tibaad mas pasil kisa iniisip nindo. An 50 oras sa sarong bulan nangangahulogan nin promedyo na mayo pang duwang oras kada aldaw. Tibaad magin posible an pag-auxiliary payunir paagi sa paggibo nindo nin rasonableng iskedyul. Kun sibot an iskedyul nindo, tibaad puede nindong ibalyo sa ibang bulan an nagkapirang aktibidad na bakong mahalagang marhay. Nahimo nin nagkapira na may bilog na panahon na trabaho na tuboson an panahon na makapag-auxiliary payunir paagi sa pagbakasyon nin saro o duwa sanang aldaw.—Col. 4:5.

6. Taano ta kapakipakinabang na ipamibi an pag-auxiliary payunir?

⁶ Kun Paano Iyan Magigibo: Kun dai nindo segurado na makakapag-auxiliary payunir kamo, ipamibi an saindong kamawotan. (Roma 12:11, 12) Arangon ki Jehova na logod suportaran an mga paghihingoa nindo na pahiwason an saindong ministeryo. Matatabangan nia kamong gumibo nin madonong na mga desisyon mapadapit sa kun paano nindo ibabagay an saindong iskedyul. (Sant. 1:5) Kun kulang kamo kan pagmawot na iyan, arangon ki Jehova na logod tabangan kamong makanompong nin kaogmahan sa paghuhulit. (Luc. 10:1, 17) Kun sa pagmate nindo mayo kamo nin kakayahan, makimaherak ki Jehova para sa kosog nin boot.—Gibo 4:29.

7. Paano an pag-aplikar kan Talinhaga 15:22 tibaad magpangyari sa sarong miembro kan pamilya na mag-auxiliary payunir?

⁷ Pag-olayan bilang pamilya an pasohan na mag-auxiliary payunir. (Tal. 15:22) Tibaad puedeng mag-auxiliary payunir an sarong miembro kan pamilya paagi sa suporta nin iba pa sa pamilya. Halimbawa, puedeng magsarosaralida na ibanan kan mga miembro kan pamilya an auxiliary payunir kun banggi o sa katapusan kan semana. Puede sindang tumabang sa mga gibohon na sa parate inaasikaso kan auxiliary payunir. Dugang pa, ipakipag-olay sa iba pa sa kongregasyon, nangorogna sa mga may kaagid na kamugtakan, an kamawotan nindo na magpayunir. Puede ining magprodusir nin orog na entusiasmo asin dagdag na suporta.

8. Arin na mga bulan an puede nindong pilion tangani na mag-auxiliary payunir?

⁸ Helingon an kalendaryo para sa 2007, asin determinaran kun noarin kamo puedeng makapag-auxiliary payunir. Kun kamo nagtatrabaho nin bilog na panahon o nag-eeskuela, tibaad boot nindong pag-isipan an mga bulan na igwa nin ekstrang Sabado, ekstrang Domingo, o piesta opisyal. An Marso asin Hunyo may limang Sabado, saka an Abril asin Hulyo may limang Domingo. An Setyembre asin Disyembre pareho may limang bilog na katapusan kan semana. Tibaad boot nindong pag-isipan an mga bulan na parateng marahay an kamugtakan nin panahon. Tibaad boot nindong pag-isipan na magpayunir durante kan bulan na nakaiskedyul an paraataman sa sirkito na maglingkod sa kongregasyon nindo. Oras na mapili na nindo an mga bulan na boot nindong mag-auxiliary payunir, ponan nang isurat an iskedyul na magpapangyari sa saindo na maabot an kahagadan na oras.

9. Ano an magigibo niato kun dai puedeng mag-auxiliary payunir?

⁹ Tibaad pakatapos nindong maingat na ‘kuentahon an gastos,’ dai pa kamo puedeng mag-auxiliary payunir durante kan maabot na mga bulan. (Luc. 14:28) Minsan siring, puede pa man giraray nindong papagdanayon an espiritu nin pagpapayunir. Padagos na gibohon an gabos na magigibo nindo sa ministeryo, na kompiado na naoogma si Jehova kun itinatao nindo sa saiya an pinakamakakaya nindo. (Luc. 21:1-4) Tibaad magbago an kamugtakan nindo, asin makapag-auxiliary payunir kamo sa ngapit. Mientras tanto, puede kamong magin mapagsuportar asin nakakaparigon sa boot sa mga nakakapaglingkod sa paaging ini. Tibaad puede pa ngani nindong ibagay an saindong iskedyul tangani na makapakikabtang sa ministeryo kaiba ninda nin saro pang aldaw durante kan semana.

10. Taano ta maninigo na igwa kita nin pakamate nin pag-apura?

¹⁰ An banwaan ni Jehova igwa nin pakamate nin pag-apura. May gibohon kita na dapat mahaman—an paghuhulit kan maogmang bareta. Kalabot an buhay nin mga tawo, asin nainaan na an panahon na natatada. (1 Cor. 7:29-31) An pagkamoot sa Dios asin sa kapwa mapahiro sa sato na gibohon an bilog na makakaya niato sa ministeryo ngonyan na taon. Paagi sa paghihingoa asin marahay na pagplano, tibaad puede kamong makapag-auxiliary payunir.