Hapot

◼ Inaaprobaran daw kan “maimbod asin mapagmansay na oripon” an independienteng mga grupo nin mga Saksi na nagtitiripon tanganing magpartisipar sa pagsiyasat o pagdebate dapit sa Kasuratan?—Mat. 24:45, 47.

Dai nanggad. Pero, sa manlaenlaen na parte kan kinaban, may pirang asosyado sa satong organisasyon na nagbilog nin mga grupo tanganing gumibo nin independienteng pagsiyasat sa mga tema na may koneksion sa Biblia. An nagkapira naggibo nin independienteng panggrupong pag-adal sa Biblikong Hebreo asin Griego tanganing siyasaton an pagkaeksakto kan New World Translation. Sinisiyasat kan iba pa an mga tema sa siensia na may koneksion sa Biblia. Naggibo sinda nin mga Web site asin chat room sa katuyohan na magrinibayan asin magdebate kan saindang mga opinyon. Nagkaigwa man sinda nin mga komperensia asin naggibo nin mga publikasyon tanganing ipresentar an mga nadiskobre ninda saka idagdag iyan sa mga itinatao sa satong Kristianong mga pagtiripon asin literatura.

Sa bilog na daga, an banwaan ni Jehova nag-aako nin bastanteng espirituwal na pagtotokdo asin pagparigon sa boot sa mga pagtiripon kan kongregasyon, asamblea, patin kombension, saka paagi sa mga publikasyon kan organisasyon ni Jehova. Paagi sa paggiya kan saiyang banal na espiritu saka basado sa saiyang Tataramon nin katotoohan, itinatao ni Jehova kun ano an kaipuhan tanganing an gabos sa banwaan nin Dios “dayupot na magkasararo sa saro sanang isip asin sa saro sanang paghonahona” patin magdanay na ‘marigon sa pagtubod.’ (1 Cor. 1:10; Col. 2:6, 7) Siertong nagpapasalamat kita sa espirituwal na mga probisyon ni Jehova sa huring mga aldaw na ini. Huli kaini, dai inaaprobaran kan “maimbod asin mapagmansay na oripon” an ano man na literatura, mga pagtiripon, o Web site na dai ginibo o dai inorganisar sa pangangataman kaiyan.—Mat. 24:45-47.

Kaomaw-omaw na gustong gamiton nin mga indibiduwal an saindang kakayahan sa pag-iisip bilang pagsuportar sa maogmang bareta. Minsan siring, mayong personal na aktibidad an maninigong irayo an atension sa ginigibo ni Jesu-Cristo paagi sa saiyang kongregasyon sa daga ngonyan. Kan enot na siglo, nagpatanid si apostol Pablo manongod sa pagigin imbuelto sa nakakapagal asin nakakaubos nin dakol na panahon na mga pinag-oolayan, siring kan “mga pagsusog nin ginikanan, na mayo man nin pakinabang, kundi nagtatao sana nin mga hapot para sa pagsiyasat imbes na magwaras nin ano man na bagay nin Dios mapadapit sa pagtubod.” (1 Tim. 1:3-7) Maninigong magmaigot an gabos na Kristiano na ‘isikwal an sa lolong na pagparakuestion asin mga pagsusog nin ginikanan patin mapait na paglalaban saka iriwal dapit sa Ley, ta an mga iyan daing pakinabang asin daing kamanungdanan.’—Tito 3:9.

Para sa mga nagmamawot na gumibo nin dugang pang pag-adal sa Biblia asin pagsiyasat, irinerekomendar niamo na siyasaton ninda an Insight on the Scriptures, “All Scripture Is Inspired of God and Beneficial,” asin an iba pa niatong publikasyon, arog baga kan mga nagtotokar kan mga hula na yaon sa mga libro sa Biblia na Daniel, Isaias, asin Kapahayagan. Nagtatao an mga ini nin abundang impormasyon para sa pag-adal sa Biblia asin paghorophorop, na paagi kaiyan puede kitang “mapano kan tamang kaaraman sa . . . kabotan [nin Dios] sa bilog na kadonongan asin espirituwal na pakasabot, tanganing maglakaw na angay ki Jehova sa katuyohan na lubos na makapaogma sa saiya mantang [kita] padagos na namumunga sa lambang marahay na gibo asin nag-ooswag sa tamang kaaraman dapit sa Dios.”—Col. 1:9, 10.