Hanapon an mga Maninigo
1. Paano niato ipinapaheling an pagpahalaga sa pribilehio na maglingkod sa ministeryo?
1 Durante kan ministeryo ni Jesus naghingoa siang marhay na itao sa mga mahoyo an nakakarangang maogmang bareta. (Isa. 61:1, 2) Bilang mga embahador asin representante na kasalida ni Cristo, may mahalagang pribilehio kita ngonyan na arogon sia sa satong daing kapagalan asin lubos na paghanap sa mga maninigo sa satong teritoryo.—Mat. 10:11; 2 Cor. 5:20.
2. Paano ipinaheling ni Pablo an pagigin madaling makibagay, asin ano an mga resulta kaiyan?
2 Magin Madaling Makibagay: Kinatodan ni apostol Pablo na magduman, enot sa gabos, sa sinagoga tanganing maghulit sa mga Judio asin proselito. (Gibo 14:1) Sa Filipos, sia asin si Silas naghanap nin mga tawo kun saen ‘iniisip ninda na igwa nin lugar na pamibian.’ Pinonan ninda na maghulit sa sarong grupo nin mga babae, asin an saro sa sainda, si Lidia, inako tolos an katotoohan.—Gibo 16:12-15.
3. Apuera sa pagharongharong sa satong teritoryo, ano pang mga oportunidad nin paglilingkod an puede niatong gibohon?
3 Apuera sa saindong mga teritoryo sa pagharongharong, puede man daw kamong maghulit sa mga tawo sa terminal, parke, opisina, matawong tinampo, komersial na lugar, asin shopping center sa saindong teritoryo? Tibaad puede kamong magpatotoo sa guardiadong mga subdibisyon asin apartment paagi sa pagsurat o telepono. An pagigin mapagmasid asin madaling makibagay sa nagbabagong mga situwasyon sa saindong teritoryo makakatabang sa saindo na magin “dakol an ginigibo sa gibohon kan Kagurangnan.”—1 Cor. 15:58.
4. Kun limitado an teritoryo kan satong kongregasyon, ano an iba pa na puedeng gibohon niato?
4 An dakol na parahayag nagkaigwa nin oportunidad na pahiwason an saindang ministeryo paagi sa pagbalyo sa ibang kongregasyon sa sadiri nindang nasyon o sa ibang nasyon. An iba nag-adal nin ibang lenguahe tanganing maghulit sa mga hale sa ibang nasyon.
5. Ano an maninigong magin pagmansay niato sa panahon na kinabubuhayan niato, asin ano an maninigong determinado niatong gibohon?
5 Dapat na girumdomon niato gabos na “an oma iyo an kinaban.” (Mat. 9:37; 13:38) Huling harani na an katapusan kan maraot na sistemang ini nin mga bagay, dapat na maingat na turotimbangon nin lambang saro an saiyang situwasyon, mga talento, oportunidad, asin posibilidad tanganing pahiwason an saiyang ministeryo. Sinisierto sa sato ni Jehova na kun eenoton niato an intereses kan Kahadean, bebendisyonan nia an satong sinserong mga paghihingoa na mapahiwas an satong ministeryo.—Mat. 6:33.