An mga Payunir Nagkakamit nin Abundang Bendisyon
1. Ano an nagmomotibar sa dakol na magpayunir?
1 Kan nakaaging taon, labing sarong milyon an promedyo kan bilang nin parahayag na naglingkod bilang auxiliary o regular payunir sa bilog na kinaban. Taano ta ginibo ninda ini? ‘Huli ta nag-abot na an oras kan paghokom nin Dios.’ Mayo na nin ibang gibohon ngonyan na mas apurado kisa sa pagbalangibog kan “daing katapusan na maogmang bareta.”—Kap. 14:6, 7.
2. Ano an nakakatabang sa dakol na magpayunir?
2 Kun Paano Makakapagpayunir: Huling “nainaan na an panahon na natatada,” pinagmamaigotan kan mga payunir na papagdanayon na simple an saindang buhay. (1 Cor. 7:29, 31) Hinihingoa ninda na inaan an saindang mga gastos tanganing kadikit na panahon sana an saindang gagamiton sa sekular na trabaho. (Mat. 6:19-21) Dakol an nakapagpayunir huli sa pagigin mapagsakripisyo asin pagsarig ki Jehova. Puede daw kamong magpayunir? Taano ta dai hapoton an mapangganang mga payunir kun paano ninda nagigibo iyan? Maglingkod kaiba ninda sa ministeryo asin maggayagaya man arog ninda. Repasohon niato an nagkapirang bendisyon na nakakamtan nin dakol na payunir.
3-5. Anong mga bendisyon an nakakamtan nin mga payunir?
3 Mga Bendisyon Asin Kagayagayahan: “Sarong tunay na bendisyon an pagkaigwa kan kakayahan na gamiton an Tataramon nin katotoohan nin Dios sa tamang paagi,” an sabi nin sarong hoben na payunir. “Ngonyan, kun naghaharongharong ako, nakakaisip ako nin mga teksto na angay sa lambang kagharong.”—2 Tim. 2:15.
4 An pagpapayunir nakakatabang man sa mga hoben na makanood kun paano madonong na gagamiton an panahon, kun paano babadyeton an kuarta, asin kun paano pakikiibanan an mga tawo. Dakol an nagkakaigwa nin orog na espirituwal na pananaw sa buhay huli sa pagpapayunir.—Efe. 4:13.
5 An nakakalabi gayod sa gabos na bendisyon nin pagpapayunir iyo na nakakatabang iyan sa sato na magin mas dayupot ki Jehova. An sarong tugang na babae na nakaeksperyensia nin grabeng mga kadepisilan nagsabi: “An dayupot na relasyon ki Jehova na napatalubo ko sa pagpapayunir nakatabang sa sako na atubangon an gabos na iyan. Nakatabang iyan sa sako na itao an sakong kosog asin panahon sa mga paagi na nungka kong hinona na magigibo ko.”—Gibo 20:35.
6. Taano ta an Setyembre ekselenteng panahon na pag-isipan na magpayunir?
6 Puede daw Kamong Magpoon sa Setyembre? An kapinonan nin bagong taon nin paglilingkod iyo an ekselenteng panahon na pag-isipan na magregular payunir. Naglilingkod daw kamo bilang auxiliary payunir, na naggagamit nin 50 oras kada bulan? Puede daw kamong magdagdag nin 20 pang oras kada bulan tanganing magin regular payunir? Dati daw kamong payunir, alagad nagpondo huli sa nagkapirang problema? Itinotogot na daw kan mga kamugtakan nindo ngonyan na magpayunir giraray poon sa Setyembre? Dinadagka niamo an gabos na maingat na pag-isipan an bagay na ini asin, kun posible, ‘tuboson’ an panahon sa ibang aktibidad asin gamiton iyan tanganing makapagpayunir durante kan 2010 na taon nin paglilingkod!—Efe. 5:16.