Hapot
◼ Taano ta kaipuhan an marahay na paghusgar sa paggamit nin telepono tanganing madangog an mga pagtiripon kan kongregasyon?
Para sa mga indibiduwal na kun beses dai makaatender sa mga pagtiripon kan kongregasyon sa Kingdom Hall huli sa helang o iba pang dai malilikayan na kamugtakan, may nagkapirang kongregasyon na naggibo nin areglo tanganing madangog ninda sa harong an pagtiripon paagi sa telepono. Kaipuhan an marahay na paghusgar asin maingat na pag-organisar tanganing masierto na an mamomoton na probisyon na ini nagagamit kan mga talagang nangangaipo kaiyan. Huli kaini, bobooton kan kamagurangan na nag-aasikaso sa siring na areglo na organisaron asin subaybayan an paggamit kaiyan tanganing “an gabos na bagay mangyari sa disente asin aregladong paagi.”—1 Cor. 14:40.
Seseguradohon kan kamagurangan na tinatawan nin prioridad an mga parahayag sa kongregasyon na igwa nin pabalikbalik na helang o kamatean o dai makahale sa harong. Puede man na makinabang sa probisyon na ini asin iiba sa bilang nin mga nag-atender an sarong parahayag na temporaryong may helang o nabaldado, o an sarong nag-ooswag na inaadalan sa Biblia na tibaad dai makahale sa harong. Kun mayo nin igong linya nin telepono para sa mga talagang nangangaipo kaiyan, tibaad puedeng gumibo nin ibang areglo, arog baga nin pagrekord kan pagtiripon para sa sainda.
Siempre, dai mapapantayan an mga pakinabang kun kita personal na presente sa satong mga pagtiripon. An satong direktang pakikiasosyar sa mga tugang niato nagbubunga nin “pagparinigonan nin boot” asin nakakatabang sa mga bagohan na orog na masabotan kun taano ta kaipuhan na mag-atender. Kun kita presente sa satong mga pagtiripon, mas dakol an nanonodan niato sa mga demonstrasyon, an kamagurangan makakatao sa sato nin personal na tabang, asin direkta niatong naeeksperyensiahan an mainit na pagkamoot kan kasararoan nin magturugang. Tunay nanggad an namatean nin sarong may edad nang tugang na babae na, pakatapos na may magkugos sa saiya kan sia paluwas sa Kingdom Hall, sia nagsabi: “Daing makakagibo kaini sa saimo kun nagdadangog ka sana sa telepono!”—Roma 1:11, 12.
Arog ni Ana “na dai noarin man nagpapalta sa templo,” ngonyan, dakol sa satong mga may edad na an regular sa Kristianong mga pagtiripon sagkod na itinotogot kan saindang salud asin kamugtakan. (Luc. 2:36, 37) Minsan ngani ginagamit an telepono kun kaipuhan, iyan dai ninda ibinibilang na kombenyenteng alternatibo sa pag-atender sa mga pagtiripon sa Kingdom Hall. Bilang pag-arog sa saindang marahay na halimbawa, logod na padagos niatong ikaogmang marhay an paghihingoa na personal na magin presente sa satong mga pagtiripon mantang sinasamba niato an satong dakulang Dios, si Jehova.—Sal. 95:1-3, 6; 122:1.