Pagpauswag kan Satong Kakayahan sa Ministeryo—Sanayon an mga Tinutukduan na Magkaigwa nin Marahay na Rutina sa Pag-adal

Kun Taano ta Mahalaga: Tanganing umuswag sa espirituwal an mga tinutukduan sa Bibliya, dapat na pag-adalan ninda bako sana an panginot na mga katukduan kan Tataramon nin Diyos. (Heb. 5:12–6:1) Bakong madali an pag-adal. Kaipuhan diyan na mahiling ta an koneksiyon kan bagong mga impormasyon sa dati ta nang aram pati na an praktikal na tabang kaiyan. (Tal. 2:1-6) Kun makakanuod sindang mag-research, masisimbag ninda an mga hapot sa Bibliya gamit an mga publikasyon ta. An maigot na paghihinguwang iaplikar an mga nanunudan ninda makakatabang para matagalan ninda an maabot na mga pagbalo huli sa pagigin Kristiyano.—Luc. 6:47, 48.

Kun Paano Gigibuhon:

Iduon an kahalagahan nin paghagad kan tabang ni Jehova sa pamibi bago an kada pag-adal.—Juan 14:26; 1 Cor. 2:10.
Sa puon pa sana, dagkahon na an tinutukduan na paghandaan an pag-aadalan nindo. Ipahiling saiya an personal mong kopya, asin tukduan siya na kuritan o markahan sana an importanteng mga tataramon.
Tabangan siyang magsimbag sa sadiri niyang tataramon. Dai paggibuhon na basta sana hapot-simbagan an pag-adal, na direktang binabasa kan tinutukduan an simbag sa publikasyon.
Dagkahon an saindong tinutukduan na magbasa nin sarong kabtang kan Bibliya aroaldaw. Ipahiling saiya an iskedyul sa pagbasa sa Bibliya na nasa jw.org/bcl, na may praktikal na suhestiyon kun paano iyan gigibuhon. Kaipuhan an determinasyon asin pagmamaigot para mabasa an Bibliya aroaldaw, pero sulit man an resulta kaiyan.—Sal. 1:2, 3.
Ipahiling sa tinutukduan mo kun paano niya makukua an simbag sa mga hapot sa Bibliya gamit an Watchtower Library o Watchtower ONLINE NA LIBRARYA. Tabangan siyang magin pamilyar sa mga mnemonic symbol kan mga publikasyon na parating ginagamit sa mga pagtiripon sa kongregasyon.

Purbaran Ini Ngunyan na Bulan:

Pagkatapos kan sarong subtema o kapitulo, haputon an tinutukduan mo sa Bibliya kun ano an mga nanudan niya. Kun mayo kang tinutukduan, praktison kun paano sasabihon sa halipot an sarong teksto sa Bibliya o sarong parapo sa An Torrengbantayan para masmasanay kang intindihon an binabasa mo.