Kapatawadan kan mga Kasalan Bago Pa Itao an Pantubos

An satong mga kasalan mapapatawad paagi sana sa atang na pantubos ni Jesus na binayadan paagi kan saiyang dugo. (Efe. 1:7) Alagad, sinasabi kan Bibliya: “Pinapatawad [nin Diyos] an mga kasalan na nangyari kan nakaaging panahon mantang siya nagpapahiling nin pagkamatinios,” buot sabihon, bago itinao ni Jesus an pantubos. (Roma 3:​25, nota sa ibaba) Paano ni Jehova nagibong mapatawad an mga kasalan bago itao an pantubos asin kasabay kaiyan nagdadanay man giraray sa saiyang perpektong pamantayan nin hustisya?

Sa pagmansay ni Jehova, an pantubos garo man sana naibayad na kan oras na nagdesisyon siya na itao an “gikan” na maligtas sa mga tawong mapahiling nin pagtubod. (Gen. 3:15; 22:18) Siguradong marhay an Diyos na sa itinalaan niyang panahon, gikan sa buot na itatao kan saiyang bugtong na Aki an pantubos. (Gal. 4:4; Heb. 10:​7-10) Mantang si Jesus yaon digdi sa daga bilang representante nin Diyos, igwa siya nin awtoridad na patawadon an mga kasalan bago pa man itao an pantubos. Ginibo niya iyan ta aram niya na mababayadan kan atang na itatao niya an mga kasalan kan mga may pagtubod.​—Mat. 9:​2-6.