Nagtutubod Daw an mga Saksi ni Jehova sa Creationism?

Dai. Nagtutubod an mga Saksi ni Jehova na linalang kan Diyos an gabos na bagay. Pero dai kami uyon sa creationism. Taano? Huling dakul sa tinutubod kan mga creationist kontra sa itinutukdo kan Bibliya. Hilingon an duwang halimbawang ini:

1. An lawig kan anom na aldaw sa paglalang. Iniinsistir kan nagkapirang creationist na an lawig kan kada aldaw sa anom na aldaw sa paglalang literal na 24 oras. Pero sa Bibliya, an tataramon na “aldaw” puwedeng nanunungod sa sarong huruhalawig na panahon.—Genesis 2:4; Salmo 90:4.

2. Edad kan daga. Itinutukdo kan nagkapirang creationist na an edad kan planetang daga pirang ribong taon pa sana. Pero uyon sa Bibliya, an daga asin an uniberso nag-eksister na bago pa an anom na aldaw na paglalang. (Genesis 1:1) Huli kaiyan, bakong kontra an mga Saksi ni Jehova sa mapagtitiwalaan na pagsiyasat kan mga siyentista na nagsasabi na an edad kan daga tibaad binilyon na taon na.

Maski ngani nagtutubod kaming mga Saksi ni Jehova sa paglalang, bako nanggad kaming kontra sa siyensiya. Nagtutubod kami na magkauyon an tunay na siyensiya asin an Bibliya.