An Makangangalas na Guramoy kan Kugita

An mga inhenyero sa robotics naggigibo nin mga kasangkapan tanganing tabangan an mga doktor na makaopera sa piot na mga parte sa laog kan hawak paagi sa mga teknik sa pag-opera na naggagamit nin saradit na gurot sagkod sa mapupuwede imbes na sarong dakulang gurot. An sarong inobasyon sa pamamaaging ini inarog ninda sa garo lastikong guramoy, o tentacle, kan kugita.

Pag-isipan: Gamit an walong garo lastikong guramoy kaini na napapalaba asin napapalipot, kaya kan kugita na kuanon, kaputan, asin gumluon an sarong bagay dawa sa sadit na espasyo. Dai lang nababari-bari kan kugita an saiyang mga guramoy sa ano man na direksiyon, kaya man kaiyan na patuugon an iba-ibang parte kan saiyang guramoy kun kaipuhan.

Naniniwala an mga parasiyasat na kun makakagibo nin robot na guramoy na malumoy asin garo lastiko, magigin kapaki-pakinabang iyan na marhay sa pag-opera na naggagamit nin saradit na gurot. Sa tabang kan kasangkapan na iyan, magigin posible na maoperahan sa simpleng paagi an mga pasyenteng nangangaipo kuta nin mas komplikadong operasyon.

Hilingon mantang naghihiro an garo lastikong mga guramoy kan kugita

Nakagibo na nin arog kaiyan na robot na guramoy asin ginagamit na iyan sa mga pag-akto nin aktuwal na operasyon. Kayang manipularon kan sarong parte kan limang pulgadang guramoy an malumoy na mga organo sa laog kan hawak paagi sa pag-alsa asin pagkapot sa mga iyan na dai nadadanyaran an mga iyan, mantang isinasagibo naman kan ibang parte an aktuwal na operasyon. Sigun ki Dr. Tommaso Ranzani, sarong miyembro kan team na naggibo kan kasangkapan, “naniniwala kami na an kasangkapan na ini iyo an magigin kapinunan para sa bago asin mas mahusay na mga bersiyon na may mas sopistikadong mga feature.”

Ano sa hiling mo? Resulta daw nin ebolusyon an guramoy kan kugita? O may nagdisenyo kaiyan?