Sarong Kinaban na Igwa kan Gabos na Solusyon

“An paglaom na idinigson nagpapasakit sa puso, tara kahoy nin kabuhayan an naootob na pagmawot.”—Talinhaga 13:12, The Jerusalem Bible.

AN PAGLAOM sa mga solusyon sa mga problema nin tawo nadigson sa laog nin anom na ribong taon, asin minilyon an biyong namondo huli kaiyan. Alagad an maootob na pagmawot magigin kahoy nin buhay. Nagigin tama an mga tataramon nin Jesus: “Tingagan an saindong mga payo huli ta an saindong kaligtasan naghaharani na.” (Lucas 21:28) An kinaban na igwa kan gabos na solusyon harani na.

Minsan siring, dai boot niatong sabihon an kinaban nin katawohan siring sa pagka-areglar ngonyan. (Mateo 12:32, King James Version) Imbes, an kinaban na igwa kan gabos na solusyon sarong bagong sistema nin mga bagay, inaapod sa Biblia na “bagong mga langit asin sarong bagong daga.” Boot sabihon ni apostol Pedro an satuyang aldaw sa pag-abot kaiyan. Nagsambit sia kan matubig na pagkalaglag kan maraot na kinaban sa kaaldawan ni Noe asin kan malaad na mga paghokom na mapara kaining presenteng kinaban nin maraot na katawohan, asin dangan nagsambit sia kun ano an masunod: “Alagad igwa nin bagong kalangitan asin sarong bagong daga na satong hinahalat oyon sa saiyang panuga.” Paagi kaini boot niang sabihon an Mesianikong Kahadean nin Dios sa kalangitan asin an maimbod na mga sakop sa daga. “Asin huli kaini,” kita sinigurado, “katanosan an mag-eerok.”—Isaias 65:17; 2 Pedro 3:5-13.

Ngonyan, kaipuhan akoon na an kadaklan sa mga kaiwal nin tawo ngonyan mapanlaglag sa sadiri. Yaon sa saindang kapangyarihan na haleon an kadaklan sa mga nakariribaraw na ini, alagad maririsang gayo na mayo sa saindang sadiring boot an isagibo ini. Anong presenteng problema, halimbawa, an dai mapasiring sa pagsagibo kan ipinagboot ni Jesus na mamotan an saimong kataed siring sa saimo man sana o gibohon sa iba siring sa boot mo na gibohon nin iba sa saimo? (Mateo 7:12; 22:39) Isipon na sana kun ano an nagigibo nin tawo ngonyan! Daing ralaban, daing gotom, daing kadahasan, daing krimen, daing polusyon, daing droga, asin dakol na iba pang kaiwal matatapos man.

Maski pa, an ibang mga kaiwal matada. Kumusta an natural na mga tendensia nin tawo na magkasala? (Salmo 51:5) Asin an paggurang? Asin an kagadanan mismo? Alagad an importante iyo ini: An trabaho dai kaya kan kapangyarihan nin tawo na gibohon iyan. Kaipuhan kaiyan an “kapangyarihan na lihis sa ordinaryo” para sa katawohan. Kaipuhan kaiyan an kapangyarihan nin Dios.—2 Corinto 4:7.

Tatapuson kaiyan ining presenteng gurang na “mga langit” asin “daga” asin sa tabang kaiyan an ipinanugang “bagong mga langit asin sarong bagong daga.” Risahon an mga tataramon na ipinasabong ki apostol Juan na isurat dapit sa pagbagong ini: “Asin naheling ko an bagong langit asin bagong daga; huli ta nakalihis na an dating langit asin an dating daga . . . Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.”—Kapahayagan 21:1, 4.

Alagad dakol na mga sinserong mga tawo ngonyan nadedepisilan na akoon an paglaom na ini. Garo marahayon iyan na magkatotoo. Orog na, nadaya kan bako-makasiensiang mga teoriya asin daing pagtubod na mga klero na ipinagilid an paglalang asin inako an ebulusyon, an saindang pagtubod sa Biblia nawara. Minsan siring, kaipuhan ninda na girumdomon an duwang bagay: (1) An tawo dai makakapagsabi kan ngapit, asin (2) kaya kan Biblia asin nangyayari. An kakayahan kan Biblia na gibohon ini sarong patotoo na iyan hale sa Dios, siring na an Isaias 46:9, 10 nagsasabi: “Mayo na nin ibang Dios, ni siisay man na kabaing ko; an Saro na nagpapaisi kan mangyayari sa huri poon sa kapinonan, asin kan mga bagay na dai pa nahahaman poon pa kan kasuanoy.”

Nagtao si Jesus nin kompositong tanda na magpapamidbid kan panahon kan saiyang presensia asin kan katapusan kaining sistema nin mga bagay: mga guerra mundial, mga gotom, mga peste, dai mapamugtak na mga tawo, katakotan sa maabot, panbilog na kinaban na paglamag sa saiyang mga saksi, alagad an saindang paghuhulit kan maogmang bareta kan Kahadean nin Dios sa bilog na daga asin saindang pagpatanid sa nagdadangadang na katapusan kaining maraot na kinaban. (Mateo, kapitulo 24; Marcos, kapitulo 13; Lucas, kapitulo 21) An tandang iyan, ihinula labi nang 19 siglo an nakaagi, ngonyan naheheling.

Si apostol Pablo naghula na “sa mga huring aldaw maabot an delikadong mga panahon na masakit pakibagayan. Huli ta an mga tawo magigin mamomoton sa sainda man sana, mamomoton sa pirak, maabhaw, mapalangkaw, mga paralanghad, masumbikal sa mga magurang, dai tataong magbalos, bakong maimbod, dai nin pagkamoot, dai maoyonan, mga parapakaraot, mayong pagpopogol sa sadiri, maringis, mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan ki sa magin mamomoton sa Dios, na may porma nin diosnon na debosyon alagad nagpapainda sa kapangyarihan kaiyan; asin sa mga ini lumikay ka.” (2 Timoteo 3:1-5) Sarong sangkap na pagkaladawan nanggad kan satong mga aldaw!

Si Pedro naghula na “sa huring mga aldaw an mga para-olog-olog madatong na may pag-olog-olog na maglalakaw sono sa saindang mga horot asin magsasarabi: ‘Haen man ining ipinanugang presensiya nia? Tara, poon kan aldaw na an satong mga kag-anak magtorog sa kagadanan, an gabos na bagay pareho man sana kan kapinonan nin paglalang.’” (2 Pedro 3:3, 4) An mga paraduhagi talagang nagriribok, sa kaotoban kaining hula.

Al kontraryo sa saindang paghingko, an mga bagay dai nagpapadagos sa parehong paagi. Sa libro nin Kapahayagan, si Juan nagtaram kan panahon nin katapusan kun si Cristo dumatong asin magsakop bilang kaibang Hade kan Soberanong Kagurangnan asin Hadeng Jehova Dios; kun an mga nasyon magka-aranggot; kun an mga gadan hukoman asin an mga propeta asin an mga banal balosan; asin kun an Dios “maglaglag kan mga naglalaglag kan daga.” (Kapahayagan 11:15-18) Dai pa kasuarin man an daga naatian nin nakakalaglag, o an mga paraduhagi nagtutuya na hayagan, o na an moral na pagbagsak nakalakop na daing kasopganan, asin an kompositong tanda na itinao ni Jesus biyong naotob.

An mga kamugtakan kan kinaban na daing solusyon ihinula na mangyayari sa kapagarakian na ini. Ihinula man an pagkasudya kan mga nasyon na magkaigwa kan ano man na remedyo para kaiyan, “na dai aram kun ano an gigibohon.” Alagad an ‘bagong mga langit asin an bagong daga’ aram kun ano an gigibohon asin an maghahale kaiyan, asin tatapuson maski an impluwensia ni Satanas asin mismo an kagadanan.—Lucas 21:25; 2 Corinto 4:4; Hebreo 2:14.

Ihinula kan Biblia an mga kamugtakan na ngonyan nagpapasakit sa kapagarakian na ini, an mga kamugtakan na dian kaiyan ining kinaban daing solusyon. Naghula man iyan na ining presenteng mga kamugtakan magtatanda kan mga huring aldaw kaining presenteng kinaban. Minsan ngonyan, dakol na prominenteng iskolar asin mga sientista an nagpatanid na ining kinaban nagdadangadang sa katapusan kaiyan. An Biblia naghula pa kan tanda kan nagdadangadang na bagong sistema nin mga bagay. An mga hulang ini na isinurat ribo-ribong taon na an nakaagi asin ngonyan madale nang magpatunay kan banal na pagkapasabong kan Biblia—asin igwa pa nin dakol na pruweba sa pagkamasasarigan kan librong ini para sa mga igwa nin matang gustong helingon iyan asin mga talinga na gustong dangogon iyan.

An Biblia masasarigan, iyan ipinasabong, iyan iyo an libro na nagsasabi dapit sa sarong kinaban na igwa kan gabos na solusyon.

[Blurb sa pahina 8]

An mga paraduhagi nagriribok ngonyan

[Blurb sa pahina 8]

Dakol na pruweba para sa mga matang gustong helingon iyan asin mga talinga na gustong dangogon iyan

[Kahon sa pahina 7]

Ipinasabong na mga Solusyon sa mga Problema nin Tawo

Daing guerra. “Pinapaontok nia an mga ralaban.” “Dai na sinda mag-aadal sa pakilaban.”—Salmo 46:9; Isaias 2:4.

Daing gotom. “An daga mismo magtatao kan bunga kaiyan.” “Magkakaigwa nin kadakol-dakol na tipasi sa ibabaw kan daga.”—Salmo 67:6; 72:16.

Daing helang. “Mayo nin mag-eerok na masabi: ‘Naghehelang ako.’”—Isaias 33:24.

Daing polusyon. “Lalaglagon idtong mga naglalaglag kan daga.”—Kapahayagan 11:18.

Daing krimen. “Dai sinda magibo nin maraot o manraraot sa bilog na sakuyang banal na bukid.”—Isaias 11:9.

Daing maraot. “Kun manongod sa mga maraot, sinda popohoon sa daga.”—Talinhaga 2:22.

Daing paggurang. “An saiyang laman magigin mas malumoy kisa mga aki; mabalik sia sa mga aldaw kan saiyang kosog sa pagkaaki.”—Job 33:25.

Daing kagadanan. “An ugay nin Dios iyo an buhay na dai nin katapusan.” “An kagadanan mawawara na.”—Roma 6:23; Kapahayagan 21:4.

Dai nang Satanas. “Dinakop nia . . . si Satanas, asin ginapos nia sia sa laog nin sangribong taon.”—Kapahayagan 20:2.

Nagbago na an tawo. “Halea nindo an daan na pagkatawo . . . isolog nindo an bagong pagkatawo.”—Colosas 3:9, 10.

Sarong relihiyon. “Sarong Kagurangnan, sarong pagtubod, sarong bautismo.”—Efeso 4:5.

Sarong gobyerno. “Sa aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa ibang banwaan. Iyan an maronot asin matapos kan gabos na ining kahadean asin iyan magdadanay sagkod lamang.”—Daniel 2:44.