Paano Magtatao nin Katoninongan an Dios? Asin Noarin?

“Poon sa pagpopoon nin sibilisasyon, an pangenot na institusyon nin Tawo iyo an mga estado . . . Noarin man dai nagkaigwa nin saro sanang estado na nakasasakop sa bilog na nabubuhay na kapag-arakian nin katawohan sa bilog na globo.”

“Perming igwa nin kadakol na estado . . . asin an pagbanggaan kan mga iyan iyo an pinonan kan mga guerra na nagin saro sa mga helang nin sibilisasyon.”

“An panglobong kamugtakan nin lokal na soberanong mga estado sa presenteng panahon daing kakayahan na magmantener sa katoninongan.”—Arnold Toynbee, Mankind and Mother Earth.

SA LIWANAG kan mga tataramon sa itaas, ano an saro sa pangenot na kaolangan sa pagkaestablisar nin katoninongan? Iyan an pagkabaranga kan katawohan sa soberanong mga estado. Sa simpleng pagtaram, iyan an nasyonalismo.

An historyador na si Arnold Toynbee nagsasabi na an nasyonalismo iyo an “pinakamakapangyarihan asin pinakamaraot sa tolong despues-Kristianong ideolohiya kan Solnopan. [An iba, sono ki Toynbee, iyo an ‘pankinaban na komunismo’ asin ‘pankinaban na kapitalismo.’] . . . An nasyonalismo mga nobenta porsiento kan relihiyon nin mga nobenta porsiento kan bilog na rasa nin tawo.” Pero an nasyonalismo pinagbaranga an katawohan sa laog nin rinibo nang taon. Kaya paano mahahale kan Dios nin katoninongan an damat na ini sa daga?

Basihan Para sa Pagliwat

Sa sekretong paagi an pagliwat nangyayari na. An banhi nin katoninongan asin kaisipan na lihis sa nasyonal na linderos itinatanom na sa isip nin minilyon na tawo sa bilog na kinaban. Paano daw iyan nahihimo? Paagi sa lakop sa daga na gibong pagtotokdo kan mga Saksi ni Jehova. An relihiyosong grupong ini nagpaheling paagi sa rekord kaiyan na iyan daing interes sa politika—biyong neutral sa politikal asin nasyonalistikong mga isyu. An paninindogan na ini basado sa pagsunod sa mga katokdoan ni Cristo, na basado man sa pundamental na katotoohan na “an Dios pagkamoot.”—1 Juan 4:8.

Si Jesus nagsabi: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.” Sia nagsabi man: “Padagos na mamoot sa saindong mga kaiwal asin ipamibi idtong mga naglalamag saindo.” (Juan 13:35; Mateo 5:44) Huli sa mga tataramon ni Jesus, paano pa an mga tunay niang parasunod mag-aadal sa pakikipaglaban? Paano pa sinda maoongis asin mangagadan huli sa bakong rasonableng basihan na nasyonalismo? Tunay na dai puwede!

Iyan an dahelan na an mga Saksi ni Jehova ngonyan minakompuwesto na nin sarong lakop sa kinaban na kasararoan nin magturugang na nag-aandam para sa buhay sa sarong bagong areglo digdi sa daga sakop kan langitnon na Kahadean nin Dios. Sinda nabubuhay na pruweba na posible na tokdoan an mga tawo tanganing sinda mabuhay na may pakipagkatoninongan sa saindang pagtaraed na hale sa gabos na rasa asin tribo patin tataramon. Sa sarong sentido, sinda minakompuwesto na nin sarong organisadong grupo na dian kaiba an mga representante kan bilog na katawohan sa bilog na kinaban. Ngonyan pa an minilyon na Saksi asin an saindang kairiba ‘dinaragopdop na an saindang mga minasbad na magin tarom nin arado asin an saindang mga budyak na magin mga sanggot.’ Nagsasayuma sindang kumapot nin armas tumang sa saindang kapwa o mag-adal sa pakikipaglaban.—Isaias 2:4.

Harani Na an Darakulang Pagkaliwat

Kaidtong labi nang 2,500 na taon an nakaagi an Biblia nagsasabi manongod sa mga pangyayari sa panahon kan katapusan: “An Dios nin kalangitan mapatindog nin sarong kahadean na dai noarin man malalaglag. . . . Iyan an maronot asin matapos kan gabos na ining [nagririribal na politikal na] kahadean, asin iyan magdadanay sagkod lamang.” (Daniel 2:44) Ini an mismong Kahadean na itinokdo sa mga Kristiano na ipamibi sa Pamibi kan Kagurangnan. Ipinaiisi kan mga Saksi ni Jehova an Kahadean na iyan, asin aram ninda na an Dios dai masusudya sa pagtao kaiyan huli ta “dai mangyayaring magputik an Dios.”—Hebreo 6:18; Tito 1:2.

Tanganing an Dios makapagtao nin katoninongan sa daga, kaipuhan an saro pang dakulang pagkaliwat—pagkaliwat sa espirituwal na paghade. Si Satanas kaipuhan na mahale. Iyan an saro sa mga dahelan na si Cristo Jesus kinaipuhan na magadan bilang sarong martir, “tanganing paagi sa saiyang kagadanan mapara nia an saro na igwa kan kapangyarihan na magtao nin kagadanan, an boot sabihon, an Diablo.” (Hebreo 2:14) Kaoyon sa hula sa Kapahayagan, si Satanas madali nang paontokon. Dangan dai na magkakaigwa nin politikal na mga hade na naimpluwensiahan nia na magpaluwas nin nagsusutsot nin guerra na propaganda. An mamomoton sa katoninongan na mga tawo makakadolok na sa Dios nin katoninongan para sa paghade asin katrangkilohan.—Kapahayagan 20:1-3.

Sa sarong magayon na bisyon, naheling ni Juan an bagong langitnon na gobyernong ini na naghihiro manongod sa daga, asin nakadangog sia nin sarong tingog hale sa langit na nagsabi: “Uya! An tabernakulo nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. . . . Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:1-4.

Kamo man puwedeng makanompong nin katoninongan minsan ngonyan, asin nin sangkap na katoninongan sa ngapit, paagi sa pag-aram sa mga katuyohan nin Dios manongod sa katawohan asin sa magayon, minsan ngani inaabusong, dagang ini.

[Blurb sa pahina 12]

An banhi nin katoninongan asin kaisipan na lihis sa nasyonal na linderos itinatanom na sa isip nin minilyon na tawo sa bilog na kinaban