Mga Pamibi Para sa Katoninongan—Siisay an Naghihinanyog Dian?

ANO an ginigibo nin sarong Indian na Amerikano, na may koronang balukag, kaiba sa plataporma nin sarong pading Griego Ortodokso? Taano an Budhistang Dalai Lama ta kataed kan Arsobispo nin Canterbury? Ano an pagkakapareho nin sarong Judiong rabbi sa sarong metropolitano kan Rusong Iglesya Ortodokso? Asin taano man si Papa Juan Paulo II kan Iglesya Katolika ta nangengenot sa siring na katiriponan?

Kaidtong dai pa nahahaloy harayoon sa posibilidad na an papa makiiba sa mga namomoon kan ibang darakulang relihiyon sa saro sanang plataporma sa pamimibi. Pero, sa paghinanapos nin 1986, sa siudad nin Assisi sa Italia, nakiiba sia sa gabos na ibang relihiyon na ini sa pagselebrar kan “Pankinaban na Aldaw nin Pamibi Para sa Katoninongan.” An pagtiripon pinundar kan papa kaoyon kan pagdeklarar kan Naciones Unidas sa 1986 bilang Internasyonal na Taon nin Katoninongan.

Duman sa Assisi, nagkaigwa nin laen-laen na pamibi para sa katoninongan. Alagad ta siisay an naghinanyog dian? An Trinitaryong Dios daw kan Kakristianohan? O an Dios kan mga Judio? Si Allah kan mga Muslim? An Dakulang Tanggugurang Asin Nagraragubrob na Dagolgol kan mga animista? Naghinanyog daw sa mga pamibing ini an arin man sa mga dios na ini? Ngonyan na nahaloyhaloy na poon kan okasyon sa Assisi, hayag an mga simbag.

An Nangyari

An mga pamibi kan mga namomoon na idto sa relihiyon iyo an kulminasyon kan internasyonal na aldaw nin pamibi na ginibo sa Assisi sa Italia sentral kan Oktubre 27, 1986. May itinogdok na dakulang plataporma, na igwa sa likod kan terminong “KATONINONGAN” sa 14 tataramon. Nakatukaw sa halakbang na semisirkulo, na nasa tahaw an papa, an labing 60 namomoon sa darakulang relihiyon nagsarusalida sa pamimibi sa entablado. Isinapelikula nin mga kamera sa telebisyon an seremonya na sinasabing pinagheling nin 500 milyones katawo sa bilog na kinaban.

An mga enot na namibi iyo an mga Budhista, na naghagad nin “sarong oseano nin kaogmahan asin kagayagayahan.” Dangan an mga Hindu nag-arang nin “katoninongan sa gabos na linalang.” An mga Muslim namibi: “Pag-omawon an Dios, Kagurangnan kan Uniberso.”

“Tawe kami nin katoninongan,” an pakimaherak kan mga animistang Aprikano mantang sinda nag-aarang sa saindang mga dios. “Idinodolot mi an Pipa sa Dakulang Espiritu, sa Inang Daga,” sabi kan mga Amerikanong Indian mantang sinusupsup ninda an pipa nin katoninongan. “Tawe nin katoninongan an daga,” an hinagad kan mga Judio.

“Sa katoninongan asin pagkasararo makimaherak kita sa satong Kagurangnan na Dios,” an pamibi kan mga representanteng Katoliko, Anglikano, Luterano, asin Griego Ortodokso. An mga Sikh, Zoroastriano, Shintoista, asin Jain nag-arang man nin pan-unibersal na katoninongan.

An Okasyon Tinawan nin Kabantugan

Idto an enot na pangyayari, an komento kan prensa, na an haralangkaw an ranggong klero kan mga relihiyon sa kinaban nagtiripon sa saro sanang lugar tanganing mamibi. Sa dahelan na ini an katiriponan inapod na “makasaysayan na okasyon.”

An iba nagtubod na naotob duman an hula kan Biblia. Mantang an Assisi nasa sarong bolod, ibinilang ninda iyan na an simbolikong bukid kan Miqueas kapitulo 4, bersikulo 2. An sarong bareta nagsabi na an katiriponan sa Assisi “sarong pagtiripon na ihinula ni propeta Miqueas kaidtong 2,700 na taon na an nakaagi: ‘Sa [panahon kan] katapusan an bukid na namumugtakan kan templo kan Kagurangnan magigin an pinakahalangkaw . . . An gabos na banwaan magtitiripon sa ibaba kaiyan asin masarabi: Tumukad kita sa bukid kan Kagurangnan. Totokdoan nia kita kan dapat niatong gibohon.’”—Voce delle Contrade.

An babasahon na Il Sabato entusiastikong nagsabi: “Iyan an kaenot-enote na nangyari an siring poon kan Torre nin Babel. Kaidto, huli sa saindang kamawotan na maabot an kalangitan, an mga tawo nagkabaranga. Ngonyan, sa ngaran nin relihiyosong saboot na nagbubukas sa sainda sa balaog nin Dios, an katoninongan, an mga tawo nagkakasararo.”

Naglataw an Seryosong mga Hapot

Daing duwa-duwa na pambihira an pangyayari. Minsan siring, iyan nagpalataw nin lehitimong mga hapot. An diaryong La Nazione naghapot: “Naotob daw kan mensaheng idto an katuyohan kaiyan? Naabot daw kaiyan an puso kan kabangang bilyon na mga nagdalan? Nalabot daw kaiyan an garo gapong mga paninindogan kan mga, direkta o bakong direkta, iyo an nagdedeterminar asin nagdidirehir sa mga pangyayari asin sa kaaabtan kan kinaban?”

An naghohorophorop na mga tawo naghahapot nin iba pang nagsisiyasat na mga hapot: Inaako daw nin Dios an gabos na pamibi minsan ano an klase nin pagsambang ginigibo? Igo na daw na arangon an sarong bagay na dai siniseguro an punto-de-vista dian nin Dios? Napahiro daw kan pagtiripon na ini an mga tawo na maghingoa para sa katoninongan? Ano an itinotokdo sato kan nakaagi? Asin orog sa gabos, ano an sinasabi kan Kasuratan manongod sa kun paano magkakaigwa nin pankinaban na katoninongan?

Kaipuhan na ihapot man niato: An pagtiripon daw kan mga relihiyon kan kinaban na ini sa Assisi talagang sarong modernong Torre nin Babel?