An Karatan Asin Pagsakit—Paano Iyan Matatapos?
AN MAPAIT na mga inagihan parateng minapapait sa boot. Alagad ano kun may makatanosan na dahelan sa kasakitan nin tawo? Nasa isip iyan, ipagpadagos niato an kasaysayan manongod ki Job. Pakalihis nin tolong hampangan sa mapait na debate, nagtaram an sarong barobata na an ngaran Eliu. Sinabihan nia si Job: “Ika nagsabi, ‘An sakong katanosan labi kisa sa Dios.’” Iyo, si Job nagin paslo asin nagpapakangmatanos. “Uya!” sabi ni Eliu. “Sa bagay na ini dai ka nagin tama, an simbag ko sa saimo; huli ta an Dios labi nanggad sa magagadanon na tawo.”—Job 35:2; 33:8-12.
An Dios nagtao nin abundang ebidensia na sia marahay. (Gibo 14:17; Roma 1:20) Kaya an pagkaigwa daw nin karatan dahelan na angaton an karahayan nin Dios? An simbag ni Eliu: “Harayo sa tunay na Dios na gumibo nin maraot, asin sa Makakamhan sa gabos na gumibo nin bakong makatanosan!”—Job 34:10.
An Dios—Dai daw nin Kapangyarihan Tumang sa Karatan?
Kun siring, posible daw na an Dios talagang dai nin igong kapangyarihan na makilabot para ki Job o para sa siisay pa man? Al kontraryo! Gikan sa makangingirhat na bagyo, an Dios ngonyan nagtaram para sa saiya man sana, na mapuwersang pinatutunayan an saiyang pagigin makakamhan sa gabos. “Haen ka kan lalangon ko an daga?” an hapot nia ki Job. Tara, imbes na limitado, inaapod nia an saiyang sadiri na an Saro na kayang kontrolon an kadagatan asin pamahalaan an kalangitan asin an nabubuhay na mga linalang dian.—Job 38:4, 8-10, 33; 39:9; 40:15; 41:1.
Totoo, dai ipinaliwanag nin Dios ki Job kun taano ta itinogot nia na ini magsakit. Alagad ta “maninigo daw na makisuway an sarong parahanap nin sala sa Makakamhan sa gabos?” an hapot nin Dios. “An totoo, hahalean mo daw nin halaga an sakuyang hustisya? Sasabihon mo daw na ako maraot tanganing ika magin tama?” (Job 40:2, 8) Kun siring, kanigoan kadakulang kapangahasan na ibasol sa Dios an mga problema sa kinaban o magkompuwesto nin pilosopikong mga pagdepensa para sa saiya! Arog kan napahirong gibohon ni Job, an mga siring marahay na ‘bawion’ an saindang nagkakakinontrahan na mga teoriya.—Job 42:6.
Mga Isyu na Kaipuhan na Husayon
Dai aram ni Job na an saiyang mga pagsakit may labot sa nagkapirang darakulang isyu na pinalataw dai nahaloy pakalalanga sa tawo. Kan panahon na idto an sarong rebeldeng espiritung linalang na inaapod Satanas (“Paratumang”) dinara an tawo sa pagkakasala. Pinagbotan nin Dios si Adan asin Eva na likayan an pagkakan sa “kahoy nin pakamidbid kan marahay asin maraot.” Kaipuhan na igalang ninda an diretso nin Dios na iyo an magsabi kun ano an marahay o maraot para sa sainda. Alagad, an Paratumang nagtanom nin mga pagduda sa isip ni Eva, na sinasabi: “Ano totoo na an Dios nagsabi na dai kamo magkakan sa gabos na kahoy kan tatamnan?” Sumunod kinontra nia an Dios: “Siertong dai kamo magagadan. Huli ta naaaraman nin Dios na sa mismong aldaw na kamo kumakan kaiyan mabubuklat an saindong mga mata asin kamo magigin arog nin Dios.”—Genesis 2:17; 3:1-5.
An mapagbalobaging mga tataramon ni Satanas nagpalataw nin darakulang isyu: Putikon daw an Dios kan ibugtak nia an padusang kagadanan para sa pagkakan sa ipinangangalad na bunga? Dawa pa, ano an katanosan nia na halean nin independensia an saiyang mga linalang asin ipasunod sa sainda an saiyang mga pamantayan? Bako daw na sia paslong Dios, na ipinangunguri an marahay sa saiyang mga linalang? Posible daw na marahay an independensia sa Dios?
An paggadan sa mga rebelde dai kutanang magigibo kundi magpalataw nin dugang pang mga hapot. Solamente paagi sa pagtogot na magpadagos an independensia sa Dios sa laog nin supisyenteng panahon na mapatutunayan—nin makasaro para sa bilog na panahon—na an iinalok na independensia ni Satanas imbitasyon sa kapahamakan. Iyo, “an bilog na kinaban namumugtak sa kapangyarihan kan maraot,” si Satanas na Diablo, bakong sa kapangyarihan nin Dios. (1 Juan 5:19) An helang, inhustisya, ekonomikong kaoripnan, kakologan sa puso—ini gabos bunga kan pagpili nin tawo sa independensia sa Dios asin pagpasakop ki Satanas! Asin sa ibong nin ano man na teknolohikong pag-oswag, an mga kamugtakan sa kinaban nagpapadagos na grumabe—na parateng huli sa modernong teknolohiya.
Minsan siring, an pagtogot nin Dios sa gabos na dai ikaladawan na kasakitan na ini dai minagibo sa saiya na biko. Al kontraryo, an kabikoan nin tawo “minapalataw sa katanosan nin Dios.” (Roma 3:5) Paano?
Hahaleon Na an Kasakitan—Sagkod Lamang!
“An gabos na linalang padagos na nag-aaragrangay asin nagtitios nin kolog sagkod ngonyan,” sabi ni apostol Pablo. (Roma 8:22) Iyo, an 6,000 na kapahapahamak na taon nin independensia nin tawo nagpatunay na totoo an sinasabi sa Jeremias 10:23: “Mayo sa tawong naglalakaw an kakayahan na giyahan an saiyang lakad.” Alagad, sa dai na mahahaloy, an Dios makatanosan na makikilabot asin poponan na giyahan an mga gibo-gibo nin tawo.
Mantang biyo nang nabuyagyag an kapahapahamak na resulta nin independensia nin tawo, puwede nang haleon nin Dios an gabos na ginigikanan nin kasakitan: mga guerra, helang, krimen, kadahasan—pati an kagadanan! (Salmo 46:8, 9; Isaias 35:5, 6; Salmo 37:10, 11; Juan 5:28, 29; 1 Corinto 15:26) Siring sa nadangog ni apostol Juan sa sarong langitnon na bisyon: “An Dios . . . papahidon an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:3, 4.
Interesante nanggad, tinapos nin Dios an mga kasakitan ni Job paagi sa pagsulit kan saiyang marahay na salud asin kayamanan asin pagbendisyon sa saiya nin dakulang pamilya. (Job 42:10-17) Kapareho kaiyan, an Biblia nanunuga sa sato: “An mga kasakitan sa panahon na ini daing halaga kun ititimbang sa kamurawayan na ipahahayag sa sato . . . An linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.” (Roma 8:18, 21) Kaya an karatan haros mapapara sa satong paggirumdom!—Ikomparar an Isaias 65:17.
Pagtios sa Karatan
Sagkod na umabot an katalingkasan na iyan, kaipuhan kitang magtios na mabuhay sa sarong maraot na kinaban, na dai linalaoman an Dios na iligtas kita sa personal na kalamidad. Si Satanas na Diablo nagtao nin falsong paglaom kan sugotan nia si Jesu-Cristo na tumagbang sa templo, na binibiribid an teksto kan Biblia sa Salmo 91:10-12, na nagsasabi: “Mayong kapahamakan na madatong saimo . . . Huli ta pagbobotan nia an saiyang mga anghel manonongod sa saimo, na bantayan ka.” Alagad si Jesus isinikwal an ano man na ideya na sia mag-aako nin milagrosong pisikal na proteksion. (Mateo 4:5-7) An ipinanunuga sana nin Dios bantayan an satong espirituwal na kapakanan.
Kun siring, an tunay na mga Kristiano dai “naaanggot tumang ki Jehova mismo,” dawa kun minaabot an makamomondong pangyayari. (Talinhaga 19:3) Huli ta “an panahon asin pagkanorongod nangyayari” man sa mga Kristiano. (Eclesiastes 9:11) Pero, bako man na dai na kitang paglaom. Igwa kita kan paglaom na mabuhay sagkod lamang sa sarong matanos na bagong kinaban, na duman mayo na an karatan. Permi kitang makakadolok ki Jehova Dios sa pamibi, huli ta sia nanunuga na tawan kita kan kadonongan na kaipuhan tanganing matagalan an ano man na pagbalo! (Santiago 1:5) Yaon man sa sato an pagsuportar nin mga kapwa Kristiano. (1 Juan 3:17, 18) Asin igwa kita kan kaaraman na an satong kaimbodan sa irarom nin pagbalo nagpapaogma sa puso ni Jehova!—Talinhaga 27:11.
Pero, an pagtagal sa karatan noarin man bakong pasil. Kaya, kun may rinaranga sa kasakitan, marahay na ‘makitangis sa mga tawong nagtatangis’—asin tumao nin praktikal na tabang. (Roma 12:15) Si Ana, na nasambitan sa kapinonan, natabangan na makabalik sa dati gikan sa kalamidad. Saro sia sa mga Saksi ni Jehova asin naheling nia na an saiyang mga kapwa Kristiano gustong-gustong tumabang, na inalokan sia nin temporaryong istaran. Minsan ngani kun beses sia nagmomondo, nakakanompong sia nin pailihan sa paglaom kan Biblia. “Aram ko na an sakong mga aki mabuwelta sa pagkabuhay liwat,” sabi ni Ana. Kaya an saiyang pagtubod sa Dios nin karahayan mas makosog kisa kasuarin pa man.
Kun kamo nag-aagi sa kasakitan, patabang sa mga Saksi ni Jehova manongod sa saindong mga hapot asin pagduda. Makukua man nindo sa sainda an librong Puwede Kamong Mabuhay Sagkod Lamang sa Paraiso Digdi sa Daga, na igwa kan nakatatabang na mga kapitulong “Taano ta Tinogotan nin Dios an Karatan?” asin “Kalabot Kamo sa Sarong Mahalagang Isyu.” Totoo, ngonyan may nangyayaring maraot sa marahay na mga tawo, alagad sa dai na mahahaloy iyan gabos maliliwat. Aramon an dugang pang mga detalye paagi sa paghanap sa mga Saksi ni Jehova sa saindong lugar o pagsurat sa mga kagpublikar sa magasin na ini.
[Mga ritrato sa pahina 9]
Sa matanos na bagong kinaban nin Dios, an karatan magigin na sanang napaparang memorya