An “Holocaust”—Iyo, Iyan Talagang Nangyari!

MAKANGANGALAS, may nagkapira na nagsasabi na an “Holocaust” dai nangyari siring sa pagkasaysay dian sa modernong kasaysayan. Sa saiyang publikasyon na Did Six Million Really Die? The Truth at Last, si Richard Harwood nagsasabi: “An sinasabi na an 6 milyones na Judio nagadan kaidtong Ikaduwang Guerra Mundial, bilang direktang resulta nin opisyal na palakaw nin pagpoho nin Alemania, biyong daing basihan.”

Kaya minalataw an mga hapot: Ipinagboot daw kan mga Nazi an pagpoho sa mga Judio kaidtong Guerra Mundial II? Talaga daw na may apat sagkod anom na milyon na Judio na nagadan sa mga kampo de konsentrasyon? Igwa daw nin mga bagay na arog nin mga gas chamber na an boot sabihon mga kuwarto na duman ginagadan an mga bilanggo paagi sa nakaiilong gas? O an mga ini daw pagbiribid sa kasaysayan nin Alemania?

May mga historyador na rebisyonista na nagsabi na an mga pangyayaring ini dai nangyari. Sinda nangangatanosan na, sa pinakadakol, pira sanang ribong Judio an nagadan asin na an mayoriya ibinalyo sa ibang nasyon.

An bago pa sanang kaso sa husgado sa Canada nagtampok kan kontrobersiang ini. An sarong Aleman na dayo sa Canada idinemanda huli sa “may pakaaram na pagpublikar nin falsong impormasyon na posibleng makadanyar sa sosyal asin rasyal na pagpahunod” sa pagdehar na an “Holocaust” nangyari, an bareta kan The Globe and Mail nin Toronto, Canada. An resulta 15-bulan na sentensia sa bilanggoan asin pagprohibir sa pagpublikar kan saiyang rebisyonistang mga opinyon manongod sa “Holocaust.”

Sa West Germany an sarong ley sa antidifamacion liniwat kan 1985 tanganing togotan pati an mga bakong Judio na ikeha “an siisay man na nan-iinsulto, nagbabalobagi, nagtutugodtugod o nagmemenus sa mga tawo na ‘nawaran kan saindang buhay bilang biktima kan Sosyalista Nasyonal o iba pang tiraniko o despotikong gobyerno.’” An epekto kan ley iyo na “ginigibo kaiyan na sarong kasalan na may padusa an pagdehar sa paggadan sa mga Judio sa mga kampo de konsentrasyon kaidtong diktadurang Nazi,” sabi kan Hamburger Abendblatt.

An pagdehar sa “Holocaust” inaapod nin kadaklan na “kaputikan sa Auschwitz.” An Auschwitz (ngonyan Oświȩcim) iyo an maringison na kampo de konsentrasyon sa Polandia na duman ginibo kan mga Nazi an lagduan na paggadan. Sono sa mga bareta sa West Germany, an konserbatibong mga ekstremista nagprobar na itago o deharan an mga pangyayaring ini asin kun siring nagluwas an terminong “kaputikan sa Auschwitz.”

Emigrasyon o Pagpoho?

An pagkaigwa ngonyan nin minilyon na Judio na gikan sa Europa nagpapatunay na dai nahimo kan mga Nazi na laglagon an mga Judio sa Europa. Na dakol na Judio an nakadulag sa planong pagpoho sa mga kampo de konsentrasyon pinatutunayan kan historyador na si William L. Shirer, na nagsurat sa saiyang librong 20th Century Journey—The Nightmare Years 1930-1940: “Bakong gabos na Judio sa Austria nagadan sa mga kampo asin bilanggoan na Nazi. Dakol na Judio an tinogotan na magbayad tanganing makabutas sa pagkabihag asin magduman sa ibang nasyon. Sa parate, an ibinabayad ninda an bilog nindang kayamanan. . . . Seguro haros kabanga sa 180,000 na Judio sa Vienna an nakabakal kan saindang libertad bago nagpoon an ‘Holocaust.’” An palakaw na ini nangorognang ipinaotob kan mga taon nin 1930.

Minsan siring, ipinaliliwanag ni Shirer na minsan ngani inestablisar an Opisina sa Emigrasyon nin mga Judio, sa pamamahala ni Reinhard Heydrich, “kan huri iyan magigin ahensia bakong nin emigrasyon kundi nin pagpoho, asin iyo an mag-oorganisar kan sistematikong paggadan sa labing apat na milyon na Judio.” An “ultimong solusyon” na ini pinamahalaan ni Karl Adolf Eichmann, na sa katapustapusi binitay sa Israel huli sa saiyang mga naginibong krimen kan guerra.

An mga kampo de konsentrasyon bako sanang iyo an paagi nin pagpoho sa ibinilang kan mga Nazi na hababa-sa-tawo asin menus na mga rasa. Yaon man an kinatatakotan na Einsatzgruppen (Espesyal na Grupong Aksion), mga grupong parapoho na minalaog kasunod kan minalaog na hukbo “asin an solamenteng katuyohan iyo an lagduan na paggadan sa mga Judio. . . . Kasunod na gayo kan nag-aabanteng hukbo tanganing daing gayong makadulag sa sainda, an Einsatzgruppen daing herak na binadil, binayoneta, sinolo, pinasakitan, pinagpukpuk sagkod na magadan o ilinobong na buhay an haros kabangang milyon na Judio sa enot na anom na bulan kan kampanya.”—Hitler’s Samurai—The Waffen-SS in Action, ni Bruce Quarrie.

Masakit daw na tubudon an bilang na iyan? Iyan bale mayo pang sarong ginadan kada aldaw kan kada miembro kan grupong may 3,000 na miembro. Kan makaabot sa mga teritoryong Sobyet an espesyal na grupong aksion na ini, an parsial na mga napierde sa kagadanan nagtatao kan bilang na “labing 900,000, na mga dos tersio sana kan total na bilang nin mga biktimang Judio sa pabarobalyong mga kampanyang ini.”—The Destruction of the European Jews, ni Raul Hilberg.

Nagtuga an Sarong Komandante

Ano an patotoo kan mismong mga may kabtang sa mga paggadan sa mga kampo de konsentrasyon? Si Rudolf Höss, dating komandante sa kampo sa Auschwitz nagreklamo: “Tubodon nindo ako, bakong perming maogma na maheling an garo bukid na mga tambak nin mga bangkay asin maparong an daing ontok na pagsolo.’ Sia nagpahayag man nin “dai makapaniwalang pag-disaprobar na an mga Jewish Special Detachment (Sonderkommandos) nagusto, bilang karibay kan halipot na paglawig pa kan sainda mismong buhay, na tumabang sa paggadan sa mga karasa ninda.” (The Face of the Third Reich, ni Joachim C. Fest, pahina 285) Idinugang pa kan Aleman na autor na si Fest: “An iba sa may kinakampihan na perpeksionistang pag-orgolyo kan eksperto minaluwas sa kapahayagan ni Höss: ‘Sa kagustohan kan Reichsführer kan SS [si Heinrich Himmler], an Auschwitz nagin an kadarudakulaing sentro sa pagpoho sa tawo sa gabos na panahon,’ o kan sabihon nia na may pagkakontento kan mapangganang paraplano na an mga gas chamber kan saiyang kampo may kapasidad na sampulong doble kisa yaon sa Treblinka.”

Sa saiyang autobiograpiya isinurat ni Höss: “Dai ko aram, saro akong ngipon sa kadena kan dakulang makina nin pagpoho kan Ikatolong Reich.” “An Reichsführer SS [si Himmler] nagpadara nin laen-laen na may haralangkaw na ranggong lider kan Partido asin opisyal kan SS sa Auschwitz tanganing personal nindang maheling an paagi nin pagpoho sa mga Judio. Gabos sinda naghangang gayo sa saindang naheling.”a

Minsan siring, malinaw na sinda apektado kan pagkakalaen kan mga tataramon na “an ultimong solusyon sa problemang Judio” asin kan makatatakot na katunayan kaiyan sa mga gas chamber. Kan hapoton kun paano nia iyan natagalan, si Höss nagsimbag: “An sakuyang dai naliliwat na simbag iyo na an matagas na determinasyon sa pagkuyog mi sa mga pagboot ni Hitler makakamtan sana paagi sa pagpogol sa gabos na emosyon nin tawo.”

Kaya, si Höss, an sadistikong butang parasunod, daing pag-alangan na nag-admitir na an “Holocaust” sarong katunayan asin na sia saro sa mga guminibo kaiyan bilang komander kan kampo sa Auschwitz.

Sa Values and Violence in Auschwitz, libro na enot na napublikar sa Polaco, an paratradusir, si Catherine Leach, nagsasabi na 3,200,000 na Judiong Polaco an nawaran nin buhay huli sa mga lagduan na paggadan, pagpasakit, asin pagkaoripon sa mga kampo de konsentrasyon. Sabi nia: “An ‘holocaust’ sa mga Judio nin Europa nangyari sa teritoryong Polaco.”

Kagadanan Paagi sa Paglamos

An kagadanan puwedeng mangyari sa dakol na paagi sa mga kampo—pagkagutom, helang, sarong bala sa liog, gas chamber, pagpukpuk, pagbitay, gilotina, asin paglamos. An paglamos sarong espesyal na paagi.

An parasurat na si Terrence Des Pres nagpapaliwanag: “An totoo iyo na an mga bilanggo sistematikong pinaaagi sa ati. Sinda an tuyong mga punteriya nin pagsalakay paagi sa odo. . . . An mga bilanggo sa mga kampong Nazi haros nalalamos sa sadiri nindang odo, asin an totoo an kagadanan paagi sa odo uso. Sa Buchenwald, halimbawa, an mga kasilyasan daing takop na mga bobon na otso metros an laba, kuwatro metros an rarom asin kuwatro metros an lakbang. . . . An mga bobon mismong ini, na perming naglilipwas, hinahalean nin laog kun banggi nin mga bilanggo na an kasangkapan sana sa pagtrabaho saradit na balde.” An sarong nakaheling mismo nagsasaysay: “An lugar mahalnas asin madiklom. Sa treinta katawong nadedestino, mga sampulo an nahoholog sa bobon sa panahon kan trabaho kada banggi. An iba dai tinotogotan na sapodon an mga biktima. Kun tapos na an trabaho asin dai nang laog an bobon, saka sana sinda tinotogotan na haleon an mga bangkay.”

Dakol pang patotoo an makokotar tanganing patunayan na an pagpoho nagin kabtang kan palakaw na Nazi mantang padakol nang padakol na nasyon sa Europa an nasasakopan. An listahan nin mga publikasyon sa temang ini daing katapusan, asin nakapangigirabo an patotoo nin mga nakaheling mismo, kaiba an ebidensia sa retrato. Alagad eksperyensia sana daw nin mga Judio an “Holocaust”? Kan sakopon nin mga Nazi an Polandia, mga Judio sana daw an gusto nindang gadanon?

[Nota sa Ibaba]

[Blurb sa pahina 5]

“An mga bilanggo [na ibinalyo sa mga kampo nin pagtrabaho] nakaligtas kutana sa grabeng kasakitan kun sinda idiniretso sa mga gas chamber sa Auschwitz.”—Rudolf Höss, komandante sa Auschwitz

[Blurb sa pahina 6]

‘Tubodon nindo ako, bakong perming maogma na maheling an garo bukid na mga tambak nin mga bangkay asin maparong an daing ontok na pagsolo.’—Rudolf Höss

[Blurb sa pahina 8]

“Abot nang abot an mga tawo, perming dakol, na dai kayang gadanon kan samong mga pasilidad. . . . Dai na iyan kaya kan mga gas chamber.”—Franz Suchomel, opisyal nin SS

[Kahon sa pahina 6]

Bayad sa Pruweba

“An premyong $50,000 na iinopresir para sa ‘pruweba’ na ginadan nin mga Nazi paagi sa nakaiilong gas an mga biktimang Judio sa mga kampo de konsentrasyon dapat na ibayad sa sarong nakaligtas sa Auschwitz sa irarom kan mga kondisyones nin sarong pag-areglo sa husgado, sabi ngonyan kan abogado kan nakaligtas.

“Inaprobaran ni Huwes Robert Wenke kan [Los Angeles] Superior Court an pag-areglo na naghahagad na an Institute for Historical Review bayadan si Mel Mermelstein, an nakaligtas sa Auschwitz. . . .

“An institute, na nagsasabi na an ‘Holocaust’ dai noarin man nangyari, dapat man na magbayad ki Mr. Mermelstein nin $100,000 para sa kolog asin sakit na itinao kan pag-opresir nin premyo, sabi kan abogado. . . .

“‘An panggagana ni Mr. Mermelstein sa kasong ini’ [sabi kan abogado, si Gloria Allred] ‘magtatao ngonyan nin klarong mensahe sa gabos na tawo sa bilog na kinaban na nagpoprobar na biribidon an kasaysayan asin tawan nin kakologan asin kasakitan an mga Judio na an mga nakaligtas sa “Holocaust” makikipaglaban paagi sa sistema legal tanganing protehiran an saindang sadiri asin ibindikar an katotoohan manongod sa saindang buhay.’”—The New York Times, Hulyo 25, 1985.

[Kahon sa pahina 7]

Sachsenhausen—“Daing Peligrong Kampong Bilanggoan”?

An Sachsenhausen daw sa katunayan kampo sa pagpoho? O idto daw saro sanang “daing peligrong kampong bilanggoan”?

Simbag ni Max Liebster, Judiong biktima na nakaligtas sa Holocaust:

“An deklarasyon ko basado sa sakong personal na eksperyensia asin sa naheling ko sa kampong ini. Dai ko kaipuhan an pagklasipikar nin sarong tagaluwas tanganing maaraman kun ano an Sachsenhausen. Totoo, an mga parabareta asin an gobyernong Nazi nagsasabi na idto Schutzhaftlager, na ‘daing peligrong kampong bilanggoan.’ An minasunod na eksperyensia iyo na mismo an magtataram:

“Kan Enero 1940, kan dinadara ako kan Gestapo (sekretong pulis kan estado) hale sa Pforzheim pasiring sa bilanggoan sa Karlsruhe, sinabihan ako kan Gestapo na pasiring ako sa sarong kampo sa pagpoho. Pinagmuda ako kan Gestapo, na sinasabi: ‘Du Stinkjude wirst dort verecken, kommst nicht mehr zurück!’ (Ikang daing pakinabang na Judio. Magagadan kang garo hayop. Dai ka noarin man makakapuli!)

“An pagmaltrato pag-abot mi sa Sachsenhausen dai maiisip nin tawo. An mga Judio isinusugo sa sarong separadong kampo na nasa laog kan mayor na kampo. Mas grabe an kamugtakan ninda kisa iba. Halimbawa, an mga Judio mayo nin mga katre, kundi sako sana sa salog. An kuwartel piot na marhay na kaipuhan na humigda na garo mga sardinas, na an bitis nin saro yaon na sa payo kan saro. Pagkaaga, an mga gadan naghihigdang kataed kan buhay. Mayo nin medikal na pangataman sa mga Judio.

“Nabaretaan ko na an sakong ama nasa ikatolong kuwartel paghale samo. Nakua ko siang naghihigda sa likod kan tinambak na mga sako, an saiyang tabay gatok sa tubig asin an saiyang mga kamot nagyelo. Pagkagadan nia, kinaipuhan kong pasanon an saiyang bangkay pasiring sa krematoryo. Duman naheling ko an natatambak na mga bangkay na sobra sa kaya nindang soloon.

“Rinibo an nagadan sa Sachsenhausen huli sa makahayop na tratamiento. Para sa dakol na biktima mas grabe an magadan sa Sachsenhausen kisa sa mga kuwartong may nakaiilong gas sa Auschwitz.”

[Kahon sa pahina 8]

“Dai nin Dapat na Matada Ni Gira Ninda”

“Kan buksan an ultimong lagduan na lolobngan, namidbid ko an bilog kong pamilya. Si Nanay asin an sakong mga tugang na babae. Tolong tugang na babae kaiba an saindang mga aki. Yaon sinda gabos duman. Apat na bulan na sindang ilinobong, asin tiglipotan kaidto.” “Sinabihan kami kan namomoon sa Vilna Gestapo: ‘May nobenta mil katawong yaon dian, asin dai nin dapat na matada ni gira ninda.’”—Patotoo nin mga Judiong natadang buhay, si Motke Zaïdl asin Itzhak Dugin.

“Kan minaagi kami, binubukasan ninda an pinto kan mga kuwartong may nakaiilong gas, asin nagkahorolog an mga tawo na garo mga patatas. . . . Aroaldaw sanggatos na Judio an pinipili na gumuyod sa mga bangkay pasiring sa mga lagduan na lolobngan. Pagkabanggi an mga Ucrainiano dinadara an mga Judiong iyan sa mga kuwartong may nakaiilong gas o binabadil sinda. Aroaldaw! . . . Abot pa nin abot an mas dakol na mga tawo, perming dakol, na mayo kami nin pasilidad na gadanon. . . . Dai na kaya kan mga kuwartong may nakaiilong gas an karga.”—Franz Suchomel, opisyal kan SS (Unterscharführer), manongod sa enot niang impresyon sa kampo sa pagpoho sa Treblinka.

(An mga kotasyon na ini kinua sa mga pag-interbio sa dokumentaryong pelikula na Shoah.)