An Punto-de-Vista kan Biblia

An Pagkagadan nin Sarong Aki—Taano ta Itinotogot Iyan nin Dios?

AN DAKOL na nagmomondong magurang nakagiginhawa na manodan na dai kinua nin Dios an saindang aki sa kagadanan, siring kan itinotokdo nin ibang relihiyon.a Alagad, an nakakapapensar na katotoohan na ini nagdadanay: An Dios may kapangyarihan na olangon an kagadanan. Pero, itinotogot nia iyan na magpadagos.

Kaya kun magadan an aki, tibaad mag-agrangay an mga magurang sa labi-labing kamondoan, “Taano ta itinogot ini nin Dios na mangyari?” An kagadanan, huli man sa aksidente, helang, o kadahasan, garo perming bakong makatanosan sa maringison na paagi. An kagadanan nin aki garo orog pa ngani. Sa sarong sementeryo an lapida sa lolobngan nin sarong aki nasusuratan kan mamondong protestang ini: “Saditon, magayonon, madalion.”

An Kaglalang Nagmamakolog Saindo

Paano ikinatotogot nin Dios an siring na kakologan? Kun kasuarin sana nagadanan kamo nin aki, daing paliwanag, gurano man karasonable, an magpapangyaring basta na sana mahale an kolog kan pagkawarang iyan. Sa panahon kan Biblia, maski an mga tawong may marigon na pagtubod nagsakit huli sa bakong makatanosan na mga trahedya sa buhay asin naghapot sa Dios kun taano ta itinogot nia an siring na mga pangyayari. (Ikomparar an Habakuk 1:​1-3.) Pero may mga simbag sa Biblia na sa igong panahon makararanga sa sato.

Enot aramon na habo nin Dios na magadan an saindong aki. An Dios dai naoogma maski sa kalaglagan nin mga maraot, orog pa sa kagadanan nin aki. (Ikomparar an 2 Pedro 3:9.) Sierto nanggad, mamondo siang gayo kun may nagadan na aki. Total, namamatean sana niato an trahedya kan kagadanan huli ta namomoot kita, nakikidamay sa mga biktima kaiyan. Asin namomoot kita huli sana ta linalang kita sa ladawan nin Dios. Kita nagpapaheling kan sangkap na abilidad nin Dios na mamoot, maski ngani maluya an pinakakaya ta. (Genesis 1:26; 1 Juan 4:8) An Biblia nagsisierto sato na an Dios nababasa an pinakahararom na mga kamatean kan satong puso, binilang an mismong buhok sa satong payo, nakaaaram maski kun maholog an dignos hale sa kahoy. Kaya, inaapod siang “an Ama nin maboot na mga pagkaherak.”​—2 Corinto 1:3; Mateo 10:29-31.

Malinaw, kun siring, na habo nin Dios na magadan an arin man sa saiyang intelihenteng mga linalang. Sia may katuyohan na haleon an kagadanan, halonon iyan sagkod lamang. (Isaias 25:8) Pero kun siring kaiyan an pagmate nia, taano ta itinotogot nia an kagadanan sa presente, nangorogna kan mga aki?

Kan Nagpoon an Kagadanan

Itinotogot nin Dios na magadan an mga aki sa iyo man sanang rason na itinotogot niang magadan an mga adulto. An kagadanan pinili ni Adan, bakong nin Dios. Maski bago magrebelde si Adan asin si Eva tumang sa saindang Kaglalang sa Eden, kapwa ninda aram nin lubos na an Dios nagtalaan nin penalidad na kagadanan huli sa kasalan. Kun dai ninda piniling magin bakong maimbod sa Dios, buhay pa kutana sinda ngonyan. Pero may kamangmangan nindang iinapon an pinakamahalagang pamana na ikapamamana ninda kutana sa mga gikan ninda​—an katanosan sa sangkap, daing sagkod na buhay sa daga. Oras na nagkasala sinda, bako na sindang sangkap. An ikapamamana sana ninda sa mga gikan ninda iyo an kasalan asin kagadanan.​—Genesis 3:​1-7; Roma 5:12.

Pero tibaad iniisip nindo: ‘Mantang mahalon nanggad an kabayadan, taano ta itinogot nin Dios na magkasala si Adan asin si Eva? O taano ta dai nia pinogolan an saindang rebelyon bago ninda ikinapamana an kagadanan asin kasakitan sa saindang mga aki​—asin sa satong mga aki?’

Kalabot an Sarong Unibersal na Isyu

Itinogot nin Dios na magmasumbikal an enot niatong mga magurang ta bako nia nanggad intension na maglalang nin kinaban nin mga robot, mga linalang na naglilingkod sana sa Dios huli ta dinisenyo sinda na gibohon an siring. Arog sa siisay man na magurang, boot nin Dios na an saiyang mga aking tawo magkuyog saiya huli sa mga kamatean nin pagsarig asin pagkamoot, bakong sa kapiritan. Sia nagtao ki Adan asin ki Eva nin igong rason na magsarig asin mamoot saiya, pero sinda dai nagkuyog asin isinikwal an saiyang pamamahala.​—Genesis 1:​28, 29; 2:​15-17.

Taano ta dai ginadan nin Dios an mga rebelde kaidto asin duman mismo? Sinabi na nin Dios an saiyang katuyohan na an daga sarong aldaw magigin lubos na ineerokan nin mga gikan ni Adan asin ni Eva. Nungka siang nasudyang otobon an saiyang mga katuyohan. (Isaias 55:​10, 11) Pero an mas mahalaga, sarong nagdedeterminar na isyu an pinalataw sa Eden. An Dios daw may katanosan na mamahala sa tawo, asin an Saiyang paagi daw an pinakamarahay, o mapamamahalaan daw nin tawo an saiyang sadiri nin mas marhay?

An solamenteng matanos na paagi sa paghusay sa isyu na daing pagduwaduwa iyo an pagtogot sa tawo na mamahala mismo. An kasaysayan sinimbag an isyu sa makatatakot na paagi. An makamomondong mga resulta kan pamamahala nin tawo gabos nasa palibot niato​—kinaban na dian lakop an kagadanan nin inosenteng mga aki, na haros dai na naririsa sa tahaw nin kadakoldakol na iba pang karatan. Kun dai na nin iba, an anom na ribong taon nin pamamahala nin tawo nagpatunay kaini: An ideya na mapamamahalaan nin tawo an saiyang sadiri na mayo an Dios mas maraot pa kisa makamomondong salang paghona; iyan grabeng kaputikan. Sagkod na an tawo namamahala na mayo an Dios, an tawo mabubuhay asin magagadan sa kakologan.

Si Jehova, an mamomoton, matanos na Dios, may mas madonong na pinili. Kun paanong itinotogot nin sarong magurang na magsakit an namomotan na aki sa makolog na operasyon huli sa maogma asin makosog na ngapit kan aki, an Dios nagtogot na an tawo magkaigwa nin kasakitan kan pamamahala sa sadiri para sa daing sagkod na ngapit nin tawo. Asin kun paanong an kolog kan operasyon dai nagdadanay sagkod lamang, an pamamahala nin tawo asin an pagkadaing hustisya kaiyan matatapos sa dai na mahahaloy.

Kun mamahala na an Kahadean nin Dios na daing pagtumang sa dagang ini, minilyon na kaakian an bubuhayon liwat asin sasabaton hale sa mga gadan. Siring sa mga magurang na an mga aki binuhay liwat ni Jesus kan enot na siglo C.E., kadakol an sa panahon na iyan makakamate “nin labi-labing kaogmahan.” (Marcos 5:42; Lucas 8:56; Juan 5:28, 29) Asin kun an bilog na katawohan sa katapustapusi ibinalik na sa sangkap na kamugtakan na iwinara ni Adan asin ni Eva, dangan nungka na magagadan pa an siisay man​—pati an mga aki!—​Kapahayagan 21:​3, 4.

[Nota sa Ibaba]

[Blurb sa pahina 23]

Minilyon na kaakian an bubuhayon liwat asin sasabaton hale sa mga gadan