Napahamak si Dina

NAHIHILING mo kun sairisay ining pigpapasyaran ni Dina? Mga babayi ining taga Canaan. Mauugma daw kaini an saiyang ama na si Jacob? Tanganing masimbag ini, isip-isipon mo giraray kun ano an paghiling ni Abraham asin ni Isaac sa mga babaying taga Canaan.

Habo baga ni Abraham na makaagom si Isaac nin taga Canaan, bakong iyo? Habo man ni Isaac asin Rebeca na makaagom si Jacob nin Canaanita. Aram mo an dahilan?

An mga taga Canaan baga kaya nagsasamba sa mga diyos-diyosan. Bako sindang maray na magin agom, asin bako man sindang maray na magin amigo o amiga. Kaya, sigurado kita na dai nanggad mauugma si Jacob na nakikipagbarkada an saiyang aki sa mga babaying ini.

Napahamak man nanggad si Dina. Nahihiling mo sa ritrato an lalaking taga Canaan na pigmamasdan si Dina? Sekem an pangaran niya. Sarong aldaw, kan magpasyar si Dina sa lugar kan mga barkada niya, kinua siya ni Sekem saka pinirit na makidurog saiya. Sala ini dahil mga mag-agom sana an puwedeng magdurog. An maraot na ginibo ni Sekem ki Dina nagresulta sa mas grabeng problema.

Kan maisihan kan mga tugang ni Dina an nangyari, angguton sinda. An duwa sainda, si Simeon saka si Levi, nagkua nin espada tapos naglaog sa siyudad saka binigla an kalalakihan duman. Nag-iba sainda an iba pang tugang ninda, tapos ginadan ninda si Sekem saka su gabos na lalaki sa siyudad. Naanggot si Jacob sa maraot na ginibo kan mga aki niya.

Ta’no ta nangyari an gabos na problemang ini? Nagpuon iyan sa pakikipagbarkada ni Dina sa mga tawong dai nagsusunod sa mga pagbuot nin Diyos. Siyempre, dai niyato gustong magin amigo sinda, bako?