Si Jonas Asin an Dakulang Sira

HILINGA an lalaking nasa tubig. Makatakot an kamugtakan niya ano? Hahalunon na siya kan dakulang sira! Bisto mo siya? Siya si Jonas. Aramon ta kun paano ini nangyari saiya.

Si Jonas sarong propeta ni Jehova. Dai nahaloy pagkagadan ni propeta Eliseo, sinabi ni Jehova ki Jonas: ‘Magduman ka sa dakulang siyudad nin Nineve. Sobra na an mararaot na gibo kan mga taga duman, kaya gusto kong sawayon mo sinda.’

Pero habo ni Jonas na magduman. Nagsakay siya sa barko na an biyahe parayo sa Nineve. Dai naugma si Jehova sa pagdulag ni Jonas. Nagpaabot siya nin makusugon na bagyo kaya haros maglubog na an barko. Takuton an mga tripulante asin nag-arapod sinda sa mga diyos ninda para sa tabang.

Kan huri, nagtuga sainda si Jonas: ‘Si Jehova an sinasamba ko, an Diyos na guminibo kan langit asin daga. Dinulagan ko su ipinapagibo niya sako.’ Naghapot an mga tripulante: ‘Anong gigibuhon mi saimo para magpundo an bagyo?’

‘Iitsa nindo ako sa dagat, asin makalma iyan,’ an sabi ni Jonas. Habo iyan na gibuhon kan mga tripulante pero lalo pang nagkusog an bagyo. Kaya napiritan sindang ihulog si Jonas sa dagat. Nagpundo tulos an bagyo saka nagkalma an dagat.

Mantang nag-iirarom si Jonas sa tubig, hinalon siya kan dakulang sira. Pero dai siya nagadan. Tulong aldaw asin banggi siyang nasa tulak kan sira. Grabe su pagbasol ni Jonas ta dai niya sinunod an pagbuot ni Jehova na magduman sa Nineve. Aram mo daw kun anong ginibo niya?

Namibi si Jonas ki Jehova na tabangan siya. Kaya sinugo ni Jehova an sira na iluwa si Jonas sa marang daga. Pagkatapos, nagduman si Jonas sa Nineve. Ano an itinutukdo kaini sato? Iyo, importanteng sunudon ta an ano man na sabihon ni Jehova.