Sairisay an Kaiwal nin Diyos?

An panginot na kaiwal nin Diyos iyo si Satanas na Diyablo. Saro siyang espiritung linalang na nagrebelde ki Jehova. Padagos na kinakalaban ni Satanas an Diyos asin nanriribok na marhay sa mga tawo. Maraot si Satanas. Dai siya nagsasabi nin totoo asin saro siyang paragadan.​—Juan 8:44.

An ibang espiritung mga linalang uminiba ki Satanas sa saiyang pagrebelde sa Diyos. Inaapod sinda kan Bibliya na mga demonyo. Arog ni Satanas, an mga demonyo kaiwal nin mga tawo. Gustong-gusto nindang kulgan an mga tawo. (Mateo 9:​32, 33; 12:22) Lalaglagon ni Jehova si Satanas asin an saiyang mga demonyo sagkod lamang. Halipot na panahon na sana an natatada para sa sainda na manribok sa mga tawo.​—Kapahayagan 12:12.

Kun gusto mong magin katuod nin Diyos, dapat na dai mo paggibuhon an gusto ni Satanas na gibuhon mo. Si Satanas asin an mga demonyo anggot na marhay ki Jehova. Mga kaiwal sinda nin Diyos, asin gusto nindang magin kaiwal ka man nin Diyos. Dapat na pumili ka kun siisay an gusto mong paugmahon​—si Satanas o si Jehova. Kun gusto mo nin buhay na daing katapusan, dapat na pilion mo an paggibo kan kabutan nin Diyos. Dakul na pangloloko saka pamamaagi si Satanas para dayaon an mga tawo. Dakul na tawo na an naloko niya.​—Kapahayagan 12:9.