An Dakulang Baha—Sairisay an Nagdangog? Sairisay an Dai?

An kadaklan na tawo kan panahon ni Noe maraot an ginigibo. Genesis 6:5

Nagkaigwa nin mga aki si Adan asin Eva, asin duminakul an mga tawo sa daga. Pag-abot nin panahon, may mga anghel na uminiba ki Satanas sa pagrebelde.

Nagbaba sinda sa daga asin nagsulot nin pisikal na hawak tanganing mag-agom nin mga babayi. An mga babaying ini nagkaigwa nin maiisog saka makukusog na aking lalaki na nakakalabi an kakayahan kisa sa normal na tawo.

Napano an kinaban nin mga tawong naggigibo nin maraot. Sinasabi kan Bibliya na “grabe na an karatan kan tawo sa daga asin na an kaisipan saka an pagmawot kan puso kaini pirmi na sanang maraot sa gabos na panahon.”

Nagdangog si Noe sa Diyos asin naggibo nin arka. Genesis 6:13, 14, 18, 19, 22

Marahay na tawo si Noe. Sinabihan ni Jehova si Noe na gagadanon Niya an mga maraot paagi sa dakulang baha.

Sinabihan man nin Diyos si Noe na maggibo nin dakulang barko, na inaapod na arka, asin ilaog diyan an pamilya niya saka an gabos na klase nin hayop.

Pinatanidan ni Noe an mga tawo manungod sa maabot na Baha, pero dai sinda nagdangog. An nagkapira pigngirisihan si Noe; an iba naanggot saiya.

Kan matapos an arka, ilinaog diyan ni Noe an mga hayop.