Ilustrasyon Manungod sa mga Trabahador sa Ubasan

Kasasabi pa sana ni Jesus sa mga nagdadangog sa Perea na “dakul na naiinot an mahuhuri asin dakul na nahuhuri an maiinot.” (Mateo 19:30) Idinuon niya ini paagi sa sarong ilustrasyon manungod sa mga trabahador sa sarong ubasan:

“An Kahadian kan kalangitan nakakaagid sa kagsadiri nin sarong ubasan na nagluwas nin amay na aga tanganing maghanap nin mga matrabaho sa saiyang ubasan. Pagkatapos na magkauyon sinda kan mga trabahador sa tangdan na sarong denario para sa sarong aldaw, pinaduman niya sinda sa saiyang ubasan. Kan magluwas man siya kan mga ikatulong oras, may mga nahiling siyang nakatindog sa saudan na daing trabaho; asin sinabi niya sa mga iyan, ‘Kamo man, magduman kamo sa ubasan, asin babayadan ko kamo nin tamang tangdan.’ Kaya nagduman sinda. Sa giraray, nagluwas siya kan mga ikaanom na oras saka kan ikasiyam na oras asin arog man kaiyan an ginibo niya. Ultimo, kan mga ika-11 oras, nagluwas siya asin may mga nanumpungan siyang nagtuturutirindog, asin sinabi niya sa sainda, ‘Taano ta maghapon kamong nakatindog digdi na daing trabaho?’ Nagsimbag sinda, ‘Dai man kayang nagkukua sa samong magtrabaho.’ Sinabi niya sa sainda: ‘Kamo man, magduman kamo sa ubasan.’”—Mateo 20:1-7.

Posibleng marhay na si Jehova Diyos an naisip kan mga nagdadangog kan madangog ninda an “Kahadian kan kalangitan” asin an “kagsadiri nin ubasan.” Sa Kasuratan, ilinaladawan si Jehova na kagsadiri nin sarong ubasan, na nagrerepresentar sa nasyon nin Israel. (Salmo 80:8, 9; Isaias 5:3, 4) An mga nasa irarom kan tipan na Katugunan iinagid sa mga trabahador sa ubasan. Pero, an ilustrasyon ni Jesus bakong manungod sa nakaaging panahon, kundi, sa sarong sitwasyon kan panahon niya.

An mga lider nin relihiyon, arog kan mga Fariseo na kasuarin pa sanang nagpurbar ki Jesus dapit sa tema na diborsiyo, an inaasahan na maigot na naglilingkod sa Diyos. Arog sinda nin mga nagtatrabaho nin bilog na aldaw na nag-aasang mag-ako nin sarong denario, na iyo an tangdan para sa sarong aldaw na pagtrabaho.

Iniisip kan mga saserdote asin kan iba pang kabilang sa grupong ini na mas dikit an paglilingkod sa Diyos kan ordinaryong mga Judio, arog nin por ora sanang mga trabahador sa ubasan nin Diyos. Sa ilustrasyon ni Jesus, sinda an mga kinuang magtrabaho “kan mga ikatulong oras” (alas nuwebe nin aga) o kan bandang udto saka kan hapon na—kan ikaanom, ikasiyam, asin kan huri kan ika-11 oras na (alas singko nin hapon).

An mga lalaki saka babayi na nagsurunod ki Jesus ibinibilang na “mga tawong isinumpa.” (Juan 7:49) Haros sa bilog nindang buhay, an iba sa sainda mga parasira, an iba mga trabahador. Dangan kan huring kabtang kan 29 C.E., isinugo si Jesus kan “kagsadiri kan ubasan” para apudon an hamak na mga tawong ini tanganing magtrabaho sa Diyos bilang mga disipulo ni Cristo. Sinda an mga ‘nahuri’ na sinambit ni Jesus, an mga nagtrabaho sa ubasan kan ika-11 oras.

Tinapos ni Jesus an ilustrasyon paagi sa pagsaysay kun ano an nangyari kan matapos na an bilog na aldaw na pagtrabaho: “Kan banggi na, an kagsadiri kan ubasan nagsabi sa katiwala niya, ‘Apuda an mga trabahador asin bayadan mo sinda kan saindang tangdan, puon sa pinakahuring nagtrabaho sagkod sa pinakainot.’ Kan su mga nagpuon na magtrabaho sa ika-11 oras mag-abot, an kada saro sa sainda binayadan nin sarong denario. Kaya kan mag-arabot su mga pinakainot na nagtrabaho, naghuna sinda na mas dakula an mareresibi ninda, alagad pati sinda binayadan nin tigsararong denario. Pagkaresibi kaiyan, nagpuon sindang magreklamo sa kagsadiri kan ubasan asin nagsabi, ‘Ining mga pinakahuri saro sanang oras na nagtrabaho; pero ipinantay mo sinda sa samo na nagparapagal nin maghapon asin nagkabaralad sa grabeng init!’ Alagad sinabi niya bilang simbag sa saro sa sainda, ‘Amigo, dai akong ginigibong salá sa saimo. Uminuyon ka baga sa sako sa tangdan na sarong denario, bako? Kuanon mo an saimo asin maghali ka. Gusto kong tawan ining pinakahuri nin pareho kan sa saimo. Dai daw ako nin deretsong gibuhon an gusto ko sa mga pagsadiri ko? O an saimong mata daw maurihon huling marahay ako?’ Sa arog kaining paagi, an mga nahuhuri maiinot, asin an mga naiinot mahuhuri.”—Mateo 20:8-16.

Tibaad inisip-isip kan mga disipulo an manungod sa huring kabtang na iyan kan ilustrasyon. Sa paanong paagi “mahuhuri” an Judiong mga lider nin relihiyon, na ibinibilang an sadiri na ‘nainot’? Asin paano “maiinot” an mga disipulo?

Baga man ibinibilang kan mga Fariseo asin nin iba pa na “nahuhuri” an mga disipulo, sinda “maiinot,” an buot sabihon, tatawan nin bilog na bayad. Pagkagadan ni Jesus, isisikwal an daganon na Jerusalem, kaya mapili an Diyos nin bagong nasyon, an “Israel nin Diyos.” (Galacia 6:16; Mateo 23:38) Kan magtaram si Juan Bautista dapit sa maabot na bawtismo sa banal na espiritu, ipinapanungod niya iyan sa mga makompuwesto sa bagong “Israel nin Diyos.” An mga “nahuhuri” iyo an maiinot na mag-ako kan bawtismong iyan asin tatawan nin pribilehiyong magin mga saksi ni Jesus “sa pinakaharayong parte kan daga.” (Gibo 1:5, 8; Mateo 3:11) Kun nasabutan kan mga disipulo an dakulang pagbabago na idinuduon ni Jesus, puwedeng inasahan ninda na mapapaatubang sinda sa grabeng kaanggutan kan mga lider nin relihiyon, na iyo na an “nahuhuri.”