Humiro Tolos Sono sa “Tanda”!
“Magpuka kamo, huli ta dai nindo aram an aldaw ni an oras.”—MATEO 25:13, Byington.
1. Taano ta magigin kamangmangan an magin kapareho kan mangmang na mga daraga sa parabola ni Jesus?
SA LIWANAG kan nagdadangadang na panahon nin dakulang kaogmahan asin prosperidad para sa kinaban nin binalukat na katawohan, kanigoan kadakulang kamangmangan nanggad na magin kapareho kan limang mangmang na daraga sa parabola ni Jesus! Sinda naghiro nin huri na asin dai nakalaog sa “kahadean kan kalangitan.” An mga mangmang na idto dai naghiro bilang mga ilawan sa panahon na kinakaipuhan. (Mateo 25:1-12) Kun “an maogmang baretang ini kan kahadean” ikahulit na “sa bilog na ineerokan na daga para sa pagpatotoo” asin panahon na para sa “katapusan,” mawawara na sainda an oportunidad na makikabtang sa dai na maootrong pribilehiyo nin paglilingkod na iyan.—Mateo 24:14.
2, 3. (a) Paagi sa anong sadol tinapos ni Jesus an parabola manongod sa sampulong daraga? (b) Taano ta napapanahon pa an sadol na iyan, asin kun siring an grupong ‘madonong na daraga’ kaipuhan na perming igwa kan ano?
2 Iyan an dahelan na tinapos ni Jesu-Cristo an saiyang parabola sa sadol na ini: “Kaya magpuka kamo, huli ta dai nindo naaaraman an aldaw ni an oras.”—Mateo 25:1-13.
3 An mga tataramon na idto kan Nobyong si Jesu-Cristo napapanahon na gayo, nangorogna ngonyan, na 71 na taon na an nakalihis poon kan magpoon an “pagtatapos kan palakaw nin mga bagay.” Dawa sa huring petsang ini dai aram kan natatada sa grupong ‘madonong na daraga’ an aldaw o oras na an “tata” pipintoan sa orog pang oportunidad na makalaog sa langitnon na Kahadean tanganing makaibanan kan Nobyo na katipan ninda. Marahay na an mga naghihingoa na patunayan na sinda madonong na daraga perming igwa kan espirituwal na lana. Sa paggibo kaiyan pinasisirang ninda an liwanag paagi sa pagpalakop kan “maogmang baretang ini kan kahadean” para sa pagpatotoo sa bilog na daga, sa gabos na nasyon, sagkod na dumatong “an katapusan.”—Mateo 24:14; Marcos 13:10; Kapahayagan 14:6, 7.
An “mga Karnero” Asin “mga Kanding” Pinagbubulagbulag Ngonyan
4. Sono sa tala ni Mateo, anong ultimong parabola ni Jesus an dapat na maotob bilang kabtang kan “tanda” kan Saiyang “presensia”?
4 Bago dumatong an “katapusan” sa “pagtatapos kan palakaw nin mga bagay,” kaipuhan na mangyari an saro pang gibohon nin pagbubulagbulag sa mga tawo asin magserbing kabtang kan “tanda” na nagpaparisa na kita nasa “panahon kan katapusan.” (Daniel 12:4) Ini an kaotoban kan parabola ni Jesus manongod sa mga karnero asin kanding, na paagi kaiyan tinatapos ni Mateo an saiyang tala manongod sa dakulang hula ni Cristo dapit sa “tanda” kan Saiyang dai naheheling na “presensia” asin kan “pagtatapos kan palakaw nin mga bagay.”
5. Noarin mangyayari an pagbubulag sa mga tawo na siring sa mga karnero asin kanding?
5 Helinga ngonyan an ihinula ni Jesus manongod digdi, siring sa nasusurat sa Mateo 25:31-46. Pinonan nia an parabola sa pagsabi: “Kun an Aki nin tawo magdatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubang nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.” Ano an masunod? Ipinagpadagos ni Jesus:
6. Ano an sasabihon kan Pastor-Hade sa mga nasa saiyang too?
6 “Dangan an hade masabi sa mga yaon sa saiyang too, ‘Madia, kamong mga benendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban. Huli ta ako nagutom asin pinakakan nindo ako; napaha ako asin pinainom nindo ako. Estranghero ako asin inistimar nindo ako; huba, asin ginubingan nindo ako. Naghelang ako asin inataman nindo ako. Nabilanggo ako asin dinumanan nindo ako.’
7. Ano an ihahapot kan mga tawong matanos, arog-karnero, asin ano an isisimbag kan Hade?
7 “Dangan an mga matanos masimbag sa saiya sa mga tataramon, ‘Kagurangnan, kasuarin mi ika naheling na nagugutom asin pinakakan ka, o paha, asin pinainom ka? Kasuarin mi ika naheling na estranghero asin inistimar ka, o huba, asin ginubingan ka? Kasuarin mi ika naheling na naghehelang o nabibilanggo asin dinumanan ka?’ Asin sa pagsimbag an hade masabi sa sainda, ‘Sa katotoohan sinasabi ko sa saindo, Huli ta ginibo nindo iyan sa saro sa pinakasadangoton kan sakong mga tugang, ginibo nindo iyan sa sako.’”
8. (a) An mga arog-kanding dai naghiro tolos tanganing gibohon an ano? (b) Kaya saen sinda isosobol kan Hade bakong arog kan mga matanos, arog-karnero?
8 An “mga kanding” dai minahiro tolos sono sa “tanda.” Dai ninda ginigibo an mga ginigibo kan grupong “karnero.” Kaya mababasa niato: “Dangan masabi man sia sa mga nasa saiyang wala, ‘Rumayo kamo sa sako, kamong mga isinumpa, pasiring sa daing katapusan na kalayo na inandam para sa Diablo asin sa saiyang mga anghel. Huli ta ako nagutom, alagad ta dai nindo ako pinakakan, asin ako napaha, alagad ta dai nindo ako pinainom. Estranghero ako, alagad ta dai nindo ako inistimar; huba, alagad ta dai nindo ako ginubingan; naghelang asin nabilanggo, alagad ta dai nindo ako inataman.’ Dangan sinda man masirimbag na nagsasabi, ‘Kagurangnan, kasuarin mi ika naheling na nagugutom o napapaha o estranghero o huba o naghehelang o nabibilanggo asin dai mi ika pinaglingkodan?’ Dangan sia masimbag sa sainda na nagsasabi, ‘Sa katotoohan sinasabi ko sa saindo, Mantang dai nindo iyan ginibo sa saro kan mga sadangoton na ini, dai nindo iyan ginibo sa sako.’ Asin an mga ini maduman sa pagkapara na daing katapusan, alagad an mga matanos sa buhay na daing katapusan.”
9. Ikakaogma nindo an pakagibo nin ano sa panahon kan presenteng kaotoban kan parabola ni Jesus manongod sa “mga karnero” asin “mga kanding”?
9 Posible na kamo nakikikabtang sa pag-otob sa makahulang ilustrasyon na ini. Narisa daw nindo an marahay na mga bagay na sinabi ni Jesus? Ginibo daw nindo an siring sa saiyang “mga tugang”? Maogma nanggad kamo kun kamo naghiro bilang sarong “karnero” dapit sa sainda!
10. Paano ipinaheling ni Jesus an pagkakalaen kan saiyang “mga tugang” sa mga ilinadawan kan “mga karnero” asin “mga kanding,” asin ano an pasisikadan sa Biblia para kaini?
10 Ipinaheling ni Jesus an pagkakalaen kan saiyang espirituwal na “mga tugang” asin kan mga napatutunayan na siring sa karnero o kanding. Sa panahon kan kaotoban kan parabolang ini, an saiyang “mga tugang” iyo an mga nag-arog sa saiya paagi sa biyong pagdusay kan saindang sadiri sa Dios. Kapareho ni Jesus, sinda nagtao nin pampublikong patotoo kaini paagi sa pagpabautismo sa tubig. Dugang pa, si Jehova, an Ama ni Hadeng Jesu-Cristo, nagin saindang langitnon na Ama paagi sa pagpaniakia sa sainda kan Saiyang banal na espiritu asin sa siring ginigibo sindang espirituwal na “mga tugang” kan saiyang Aki. Ini nagtatao sainda nin oportunidad na magkaigwa nin lugar sa langitnon na Kahadean kaiba kan saindang Matuang Tugang, si Jesu-Cristo, an “Hade nin mga hade asin Kagurangnan nin mga kagurangnan.” (Kapahayagan 19:16) Sa bagay na ini nasusurat manongod sa saiya: “Huli ta sia na nagpapakangbanal asin an mga pinapakangbanal anan gikan sa saro, asin huli kaini dai sia nasosopog na apodon sindang ‘mga tugang,’ arog kan saiyang sinasabi: ‘Ipahahayag ko an saimong ngaran sa sakong mga tugang; sa tahaw kan kongregasyon oomawon ta ka paagi sa pag-awit.’” (Hebreo 2:11, 12) Digdi an Salmo 22:22 iinaaplikar sa pinamuraway na Aki nin Dios, si Jesu-Cristo.
11. Dakol pa daw an espirituwal na “mga tugang” ni Jesus digdi sa daga, asin anong grupo, o “kongregasyon,” an kinokompuwesto ninda?
11 Igwa pa ngonyan sa daga nin natatada sa espirituwal na “mga tugang” na iyan kan natutukaw na sa tronong si Hadeng Jesu-Cristo. Bilang sarong grupo, o “kongregasyon,” sinda minakompuwesto sa “maimbod asin madonong na oripon” na ihinula ni Jesus sa saiyang hula dapit sa “pagtatapos kan palakaw nin mga bagay.” Sia nagsabi: “Siisay man nanggad an maimbod asin madonong na oripon na pinaniwalaan kan saiyang kagurangnan kan saiyang mga domestiko, tanganing magtao sainda kan saindang kakanon sa igong panahon? Maogma an oripon na iyan kun sa pagdatong kan saiyang kagurangnan makua siang naggigibo nin siring. Sa katotoohan sinasabi ko sa saindo, Paniniwalaan nia sia kan gabos niang sadiri.”—Mateo 24:45-47.
12. (a) Poon kan 1919 an grupong “oripon” nagin lataw na gayo sa paggibo kan ano? (b) Anong mga “sadiri” an ipinaniwala sa “oripon”? (c) An “oripon” na nasa paghiro ngonyan kabtang nin ano?
12 An mga katunayan sa kasaysayan minasimbag sa hapot ni Jesus dapit sa kun siisay an “oripon” na ini. “An kongregasyon” na naglilingkod bilang an “oripon” kompuwesto kan saiyang itinao-nin-Dios na “mga tugang” na yaon pa sa daga. Iyan iyo man sana an grupong ‘madonong na daraga.’ Poon kan 1919 an “oripon” na ini nagin lataw na gayo sa pagtao nin preskong espirituwal na kakanon hale sa Biblia sa “mga domestiko” kan harong kan Kagurangnan, na ginigibo iyan sa panahon na pinaka-“igo” para kaiyan. Kaya, pinaniwalaan kan dai naheheling na Kagurangnan an masasarigan na grupong “oripon” na ini “kan gabos niang sadiri” na espirituwal. Ini nangorognang totoo may koneksion sa paghuhulit kan “maogmang baretang ini kan kahadean” sa bilog na daga, na saiyang pinaghahadean. Sagkod ngonyan nag-ooswag an paghuhulit na ini kan Kahadean! An “maimbod asin madonong na oripon” na nasa paghiro sarong lataw na kabtang kan “tanda” na nagpapaheling sato kun ano nang panahon ngonyan.
13. Poon kasuarin tinipon sa atubang kan Hade an “gabos na nasyon,” asin kasuarin pinonan na tiponon kan “oripon” an “mga karnero” sa Saiyang too?
13 Sa mga miembro kan grupong “oripon” na an matanos na “mga karnero” naggibo nin marahay na mga bagay. An simbolikong mga karnero asin kanding mga tawo hale sa gabos na nasyon na tinatawan kan patotoo manongod sa Kahadean. Kaya, bilang ipinagrerepresentar kan mga karnero asin kanding na iyan, “an gabos na nasyon” tiniripon sa atubangan kan Hade na nagtutukaw sa saiyang langitnon na trono poon kan matapos an Mga Panahon nin mga Hentil kan 1914. Kaoyon sa ihinulang pagtipon na iyan, mahalagang mangnohon an taon 1935. An Watch Tower Bible and Tract Society, na ginagamit kan grupong “oripon,” igwa kaidto nin mga 49 sangang opisina sa bilog na daga. Kan taon na idto an atension kan “oripon” espisipikong itinorohok sa daganon na mga arog-karnero, sa katuyohan na tiponon sinda sa too kan nagsasakop nang si Hadeng Jesu-Cristo. Kaya, an mga ini na hale sa gabos na nasyon nagin mas haraning kaasosyar kan grupong “oripon.”
14. Sa liwanag kan Juan 10:16, ano an nagin bagong punto-de-vista manongod sa mga matanos na arog-karnero, asin pirang sangang opisina kan Watch Tower Society an naglilingkod sa sainda ngonyan?
14 An mga matanos, arog-karnerong idto dai na sana tatawan nin pankagabsan na klasipikasyon na “mga tawo na may marahay na boot.” (Lucas 2:14, Douay Version) Sinda dai na ibibilang na sarong bakong depinido, bakong organisadong grupo nin mga tawong matatakton sa Dios hale sa gabos na nasyon—garo baga nalalagalag na karnero. Si Jesus nagsabi na sia matipon nin “ibang karnero” asin gigibohon sindang magin “sarong aripompon” kaiba kan natatada sa grupong “oripon.” (Juan 10:16) An pagtipon sa “ibang karnero” poon kaidto sarong lataw na kabtang kan “tanda” sa “pagtatapos kan palakaw nin mga bagay.” Asin tanganing mapaglingkodan sinda an Watch Tower Society igwa na ngonyan nin 95 sangang opisina.
An Napapanahon na Paghiro Sono sa “Tanda” Binalosan
15. Tanganing ‘manahon an kahadean,’ anong mga kahagadan an kaipuhan na maotob kan “mga karnero”?
15 Sono sa parabola ni Jesus, an matanos na “mga karnero” kaipuhan na makaotob sa nagkapirang kahagadan sa panahon kan “pagtatapos kan palakaw nin mga bagay.” Kaipuhan na saindang midbidon asin akoon an espirituwal na “mga tugang” ni Cristo na minakompuwesto sa grupong “maimbod asin madonong na oripon.” An “mga karnero” kaipuhan man na gumibo nin marahay sa grupong “oripon,” na bisitahon pa ngani sinda kun sinda daing hustisyang nabibilanggo. Ini kaipuhan na gibohon kan “mga karnero” tanganing magkamit kan bendisyon kan langitnon na Ama asin agdahon sinda ni Hadeng Jesu-Cristo na ‘manahon ninda an kahadean na inandam para sa sainda poon pa kan lalangon an kinaban.’—Mateo 25:34.
16. Sa mga tataramon na “manaha nindo an kahadean,” inaagda kan Hade an “mga karnero” na lumaog sa ano, na nakaligtas sa anong “ralaban”?
16 Mantang an “mga karnerong” ini bakong an espirituwal na “mga tugang” kan Hade, dai nia sinda inaagda na tumukaw sa langitnon na mga trono asin maghade kaiba nia sa laog kan espesyal na sangribong taon kan saiyang paghade. Sa saiyang mga tataramon na “manaha nindo an kahadean,” inaagda nia sinda na lumaog sa panahon kan Kahadean pagkatapos na malaglag nia an gabos na maraot na kahadean kan kinaban na ini sa “ralaban kan dakulang aldaw nin Dios na Makakamhan sa gabos” sa Har–Magedon. (Kapahayagan 16:13-16) An dakol sa mga arog-karnero na nabubuhay ngonyan makaliligtas sa ralaban na iyan nin gabos na ralaban asin malaog sa Sangribong Taon na Paghade ni Cristo na dai na magagadan.
17. Paano kinakaolay kan Hade an “mga karnero,” asin paano sia nagkaigwa nin bagay na ikakapamana sa sainda?
17 Kaya kinakaolay ni Hadeng Jesu-Cristo an “mga karnerong” ini na garo baga saiyang mga aki na uminabot na an panahon na lumaog sa mana gikan sa saiya. Paagi sa saiyang pagkagadan bilang sangkap na tawo tanganing magtao nin pantubos na atang para sa bilog na katawohan, isinuko nia an gabos na paglaom na personal na mag-erok sa daganon na Paraiso. (Lucas 23:39-43) Sa bagay na ini si Jesus, “an huring Adan,” bakong arog kan “enot na tawong si Adan” na nagkasala asin iwinara an daganon na Paraiso para sa gabos niang aki. Kaya an binuhay liwat na si Jesu-Cristo, na nagigin an “Amang Daing Katapusan” kan bilog na tinubos na kinaban nin katawohan, may ikakapamana sa mga arog-karnerong ini sa daga. (1 Corinto 15:45; Isaias 9:6, 7) An pamilya nin tawo gikan sa “enot na tawong si Adan,” kaiba an gabos niang paglaom asin oportunidad sa Paraiso. Alagad an nawarang Paraisong iyan ibabalik paagi sa Kahadean nin Dios sa kamot kan “huring Adan,” si Jesu-Cristo.
18. Sa anong sentido na an sakop kan Kahadean “inandam para sa [mga karnero] poon pa kan lalangon an kinaban”?
18 Kaidto sanang sinda pinalayas na sa enot na Paraiso na si Adan asin Eva nagkaigwa nin mga aki. An ikaduwa nindang aki, an matanos na si Abel, ginadan kan saindang matuang aki, si Cain. Kaya an saindang aking si Set ibinilang na kasalihid ni Abel. Sa pagkamundag kan aking iyan, nalalang an kinaban nin katawohan. Alagad bago kaini, kan an mga magurang kan kinaban nin katawohan palayason sa Paraiso, ginibo ni Jehova Dios an saiyang maheherakon na panuga manongod sa sarong “banhi” na malugad, o maronot, sa payo kan simbolikong Halas, si Satanas na Diablo. An “banhing” iyan magigin hadeng Banhi, asin ini may labot sa sarong Kahadean, sono sa katuyohan asin patienot na pananaw nin Dios. (Genesis 3:15) Kaya kun si Satanas na Halas asin an saiyang banhi haleon na, an mga tinubos sa katawohan malaog sa pamamahala kan Kahadean sa daga, na sakop kan langitnon na gobyerno kan mapangganang Banhi na maronot sa Halas asin sa saiyang banhi. Sa paaging ini “an kahadean” na ‘mamanahon’ kan mga arog-karnero sa saindang Amang Daing Katapusan, si Jesu-Cristo, iyo an sakop kan Kahadean na “inandam para sa [sainda] poon pa kan lalangon an kinaban.”
19. Magkakaigwa nin anong klaseng kapinonan an palakaw nin mga bagay digdi sa daga paka-Armagedon?
19 Mantang an simbolikong mga kanding paparaon sa Armagedon, an nakaligtas na “mga karnero” matao nin matanos na kapinonan sa palakaw nin mga bagay sa sarong Paraisong daga paka-Armagedon. Manongod digdi, si Jesus nagsabi: “An mga [arog-kanding na ini] maduman sa pagkaparang daing katapusan, alagad an mga matanos sa buhay na daing katapusan.”—Mateo 25:46.
20. Paano niato malilikayan an salang pag-interpretar sa mga kabtang kan “tanda”?
20 Sa panahon kan “pagtatapos kan palakaw nin mga bagay” na ini poon kan matapos an Mga Panahon nin mga Hentil kan 1914, an “mga karnero” asin “mga kanding” nagkakalaen sa saindang pag-interpretar sa “tanda” kan “presensia” ni Jesus. Mantang kita daing duwa-duwa na nasa panahon nin paghokom, napakahalaga kan hapot na ini: Ano an kahulogan sa sato kan “tanda”? Kun sa sadiri ta sana, tibaad mapasala kita sa pag-interpretar sa mga kabtang kan “tandang” iyan. Kaya marahay na ihapot niato: Ano an sinasabi ni Jesu-Cristo na maninigong iparisa sa sato kan may dakol na kabtang na “tandang” ini? Sono sa saiya, iyan maninigong mangahulogan na an presenteng palakaw nin mga bagay madali nang matapos sa sarong “dakulang kahorasaan” na mas mapanlaglag ki sa panglobong Baha kan aldaw ni Noe.—Mateo 24:21.
21. (a) Minsan ngani nagdadangadang na an “dakulang kahorasaan,” taano ta maninigo kitang mag-ogma? (b) Ano an oportunidad asin posibilidad na yaon para sa grupong “mga karnero” ngonyan?
21 Alagad ta mag-ogma, huli ta an “tandang” ini nangangahulogan man na an Sangribong Taon na Paghade ni Jesu-Cristo harani na, madali nang pumoon pagkatapos na laglagon an palakaw nin mga bagay ni Satanas sa daga. (Lucas 21:28) Kun siring, sa proteksion nin Dios igwa kamo kan daing kaagid na oportunidad na makaligtas sa “dakulang kahorasaan” na iyan asin makalaog sa bagong palakaw nin mga bagay, na dian an katanosan mag-eerok sagkod lamang. Tunay na nasa atubangan nindo an posibilidad na dai noarin man magadan kundi mabuhay nin daing sagkod asin sa kaogmahan sa sarong paraisong daga na sakop kan unibersal na soberaniya ni Jehova Dios!
22. (a) Kun kita mahiro nin listo asin tama sono sa “tanda,” ano an gigibohon niato? (b) May koneksion sa “tanda,” paano mabibindikar si Jesu-Cristo?
22 Kaya baga man kita espirituwal na “mga tugang” ni Cristo o matanos na “mga karnero,” humiro kita sono sa “tanda” nin listo asin tama. Magkaigwa kita nin dugang pang kabtang sa pagkaotob sa lataw na kabtang kaiyan: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.” Sa siring dai kita nin ikatatakot kun dumatong na “an katapusan.” Imbes, magsusulwak an satong kaogmahan! Siring man, si Jesu-Cristo mabibindikar bilang an masasarigan na parahula kan may dakol na kabtang na “tanda . . . kan pagtatapos kan palakaw nin mga bagay.”—Mateo 24:3–25:46.
Masisimbag daw Nindo?
◻ Noarin pagbubulagbulagon an mga tawo siring sa mga karnero asin kanding?
◻ Puwede kamong magin maogma huli sa paggibo kan ano sa panahon kan kaotoban kan parabola ni Jesus manongod sa mga karnero asin kanding?
◻ Siisay an “mga tugang” saka “maimbod asin madonong na oripon” kan Hade?
◻ Tanganing ‘manahon an kahadean,’ anong mga kahagadan an dapat na maotob nin mga arog-karnero?
◻ Ano an gigibohon niato kun kita humiro nin listo asin tama sono sa “tanda” kan “presensia” ni Jesus?
[Blurb sa pahina 12]
Humiro tolos sono sa “tanda” kan “presensia” ni Jesus. An paggibo kaiyan puwedeng mangahulogan nin buhay na daing sagkod sa Paraiso