Katoninongan Asin Katiwasayan—Paagi sa Kahadean nin Dios

“AN MGA Katuyohan kan Naciones Unidas iyo an: 1. Mapagdanay an internasyonal na katoninongan asin katiwasayan.”—Charter of the United Nations.

Ini minsan paano marahayon na katuyohan. Alagad arog kan sabi na niato, an mga resulta kan nakaaging 40 taon nagpapaheling na dai nahimo kan Naciones Unidas na ‘mapagdanay an internasyonal na katoninongan asin katiwasayan.’ Ni may magigin epekto man an pagdeklarar kaiyan sa 1986 bilang “Internasyonal na Taon nin Katoninongan.”a

Saro sana an paagi na an nagdadanay na katoninongan asin katiwasayan dadarahon sa dagang ini—paagi sa Kahadean nin Dios sa kamot ni Jesu-Cristo. Ini an tunay na gobyerno sa langit na itinokdo ni Jesus sa saiyang mga parasunod na ipamibi. (Mateo 6:9, 10) Alagad taano iyan ta magigin mapanggana mantang nasudya an Naciones Unidas? Sa simpleng pagtaram: An Kahadean nin Dios magigin mapanggana huli sa mismong mga dahelan na an Naciones Unidas dai nagin mapanggana.

Labi sa Kadonongan nin Tawo an Kaipuhan

Sa nakaaging luwas kan magasin na ini, nasabihan na an sarong dahelan na an Naciones Unidas nakatalagang masudya iyo na an Dios dai nagtao sa tawo kan kadonongan o diretso na pamahalaan an sadiri. (Jeremias 10:23) Kaya, mayo nin organisasyon na gibo nin tawo, minsan pa gurano karahay kan intension, na makapagtatao nin katoninongan asin katiwasayan.

Al kontraryo, si Jesu-Cristo, an nombradong Hade kan Kahadean nin Dios, perming nagpapaheling nin kadonongan na mas halangkaw sa tawo. (Mateo 13:54) An sarong pangenot na halimbawa iyo an saiyang bantog na Sermon sa Bukid. (Mateo, kapitulo 5 sagkod 7) Dian ipinaliwanag nia kun paano makakanompong nin tunay na kaogmahan, huhusayon an mga iriwal, lilikayan an seksuwal na inmoralidad, asin magkakaigwa nin tiwasay na ngapit. Bako daw rasonable na an hade na igwa nin siring na kadonongan asin pakasabot sa naturalesa nin tawo makakaaram kun paano magkakaigwa nin katoninongan asin katiwasayan?

Labi pa dian, an hararom na pagmansay ni Jesus nadugangan pa kan saiyang milagrosong kakayahan na mabasa an puso nin mga tawo asin maaraman an saindang tunay na motibo asin mga pangangatanosan sa irarom kan saindang boot. (Mateo 9:4; Marcos 2:8) Horophoropa kun ano an kahulogan kaiyan: An saro sa dakulang kaolangan sa katoninongan asin katiwasayan ngonyan iyo an pagdiskompiar. Huli sa dai pakaaram kan iniisip asin motibo nin lambang saro, an mga tawo asin nasyon parateng nagigin diskompiado. An pagdiskompiar na iyan nagigin kaolangan sa katoninongan. Alagad para sa hade na “nakakabasa sa puso nin mga tawo,” iyan bakong problema nanggad.—Juan 2:25, Knox.

Paghale sa mga Kaiwal na Mas Makapangyarihan sa Tawo

An saro pang dakulang dahelan na an mga paghihingoa kan Naciones Unidas na magtao nin katoninongan nakatalagang masudya iyo an impluwensia kan “poon kan kinaban na ini,” si Satanas na Diablo. (Juan 12:31) Sia asin an saiyang mga demonyo nakakaaram na sinda igwa na sana nin “halipot na panahon” bago sinda haleon. Huling desidido na magtao nin kasakitan sa daga, inolang ninda an katoninongan paagi sa pagbaranga sa katawohan sa politika asin sa nasyonalidad.—Kapahayagan 12:9-12.

Siisay an makakahale sa mga parasutsot na iyan nin guerra na mas makapangyarihan sa tawo? An Biblia minasimbag, si Jesu-Cristo, an saro na inaapod Miguel, na, kaiba an saiyang mga anghel, pinalayas si Satanas asin an saiyang mga demonyo sa langit. Kaya mababasa niato: “Asin naheling ko an sarong anghel [si Jesus] na naghihilig hale sa langit na igwa kan liyabe kan bungaw asin sarong dakulang kadena sa saiyang kamot. Asin dinakop nia an dragon, an enot na halas, na iyo an Diablo asin Satanas, asin . . . ihinolog nia sia sa bungaw asin pinintoan nia idto patin sinelyohan idto sa ibabaw nia.” (Kapahayagan 20:1-3) Kaya si Satanas hahaleon. Sa panahon sanang iyan magigin posible na magkamit nin buhay na may tunay na katoninongan asin katiwasayan.

Sarong “Aki” nin Dios

An nakaagi niatong luwas nagsabi nin ikatolong dahelan kun taano an Naciones Unidas ta noarin man dai makapagtatao nin katoninongan asin katiwasayan: Iyan aki kan kinaban na ini asin, bilang siring, iyan nagmamana sa mga kaluyahan, karatan, asin kabikoan na nasa mga nasyon na miembro kaiyan.

Sa nakakaginhawang kalaenan, an Kahadean na magtatao nin katoninongan asin katiwasayan ilinaladawan sa Kapahayagan 12:5 na sarong “aki” nin Dios. An hade dian nagpapaheling kan mga karakteristiko nin Dios. Helinga an iba sa nakaaagyat na mga kuwalidad na ipinaheling kan hade kaiyan, si Jesu-Cristo: mapagsakripisyong pagkamoot (Juan 15:12, 13); init asin pakikidamay (Mateo 9:10-13; Lucas 7:36-48); kapakumbabaan (Juan 13:3-5, 12-17); pagkaherak (Marcos 6:30-34); simpatiya (Hebreo 2:17, 18; 4:15); karigonan para sa katanosan (Isaias 11:4, 5). Dai daw kamo maoogma na magpasakop sa siring na Hade?

Kaoyon kan “Bagong Daga”

An huring dahelan na an Naciones Unidas noarin man dai magigin mapanggana sa pagtao nin katoninongan ipinarisa kan mga tataramon kan dating Sekretaryo-Heneral Dag Hammarskjöld na, kan 1953, nagsabi: “An pinakadakulang paglaom mi iyo na kami togotan na ikaligtas an daan na daga.” Kun nasa isip nia an pagpreserbar sa pankinaban na palakaw na ini nin mga bagay, kun siring an mga paghihingoang iyan na iligtas an “daan na daga” nakatalagang masudya. Taano?

Primero, an “daan na daga” na ini kompuwesto nin gibong-tawong mga gobyerno. An indibiduwal na mga gobyerno nagtotokdo nin nasyonalismo, na nakakabanga sa tawo; an nasyonalismo nagdodoon kan intereses nin sarong nasyon imbes na hanapon an pankagabsan na ikakarahay nin gabos na nasyon. An pansadiring interes na ini nakakaraot sa ano man na paghihingoa kan Naciones Unidas na magtao nin katoninongan. Arog kan isinabi nin sarong editoryal sa Britanong peryodiko na The Guardian: “Mantang mayo ni saro sa mga miembrong nasyon an andam na isakripisyo an sadiring interes kaiyan para sa ikakarahay kan kagabsan, an paglaom sa reporma kadikiton. An solamenteng tunay na trabaho kan Asamblea [Heneral kan Naciones Unidas] magserbing sarong pansokol sa panglobong opinyon. An programa kaiyan pano nin mga isyu na pinagdebatihan sa laog nin mga taon na kakadikit kun igwa man nin pag-oswag pasiring sa pagkaresolber.”

Alagad igwa nin mas makosog pang dahelan kun taano an mga paghihingoa kan Naciones Unidas na iligtas an “daan na daga” ta daing kamanungdanan: Iyan tumang sa mga katuyohan nin Dios. Taano man? Sa pagheling nin Dios an “daan na daga” dai puwedeng magkaigwa nin reporma. An panahon nagdadangadang na an isinabing katuyohan nin Dios maootob. Arog kan pagkaladawan dian ni apostol Juan: “Naheling ko an bagong langit asin bagong daga; huli ta nakalihis na an dating langit asin an dating daga.” (Kapahayagan 21:1) Sa paghale sa mga gobyernong gibo nin tawo, hahaleon kan Kahadean nin Dios an nakakabangang nasyonalismo. Kasalihid kaiyan an sarong “bagong daga,” sarong matanos na sosyedad nin tawo, maoswag sa pagsakop nin saro sanang langitnon na gobyerno, an Kahadean nin Dios. Sa panahon sanang iyan na an katawohan magkakamit nin tunay na katoninongan asin katiwasayan sa bilog na kinaban.

‘Pagdaragopdop sa Minasbad na Magin mga Tarom nin Arado’

Na ini realistikong paglaom pinatutunayan kan mga tataramon nin sarong hula sa Biblia na iinukit sa lanob na kaatubang kan Naciones Unidas. Dian iyan nagsasabi: “Dadaragopdopon ninda an saindang mga minasbad na magin mga tarom nin arado. Asin an saindang mga budyak na magin mga sanggot: an nasyon dai mabingat nin minasbad tumang sa nasyon. Asin dai na sinda mag-aadal sa pakilaban.”—Kinotar sa Isaias 2:4.

Dai, an Naciones Unidas dai nakahimong olangon an mga nasyon sa ‘pagbingat nin minasbad’ tumang sa lambang saro. Minsan siring, igwa nin sarong banwaan na nagtatao nin buhay na ebidensia na sainda nang ‘dinaragopdop an saindang mga minasbad na magin tarom nin arado.’ Ipinaheling ninda an pagkasararo na dai naoolang nin mga linderos nin rasa asin nasyon. Minsan guranong pamimirit dai makakapirit sa mga Kristianong neutral na iyan na ‘magbingat nin minasbad’ tumang sa saindang kapwa. Siisay sinda? An mga Saksi ni Jehova.

Sarong halimbawa kan saindang simbag kun pinipirit na makikabtang sa mga guerra kan mga nasyon an nangyari sa sarong Saksi sa sarong nasyon sa Aprika na duman lakop an politikal na terorismo.

Tanganing makakua nin mga miembro para sa saindang hukbong gerilya, an mga terorista sa nasyon na ini dinudukot an mga lalaki dangan pinapipili sinda: Maglingkod sa teroristang hukbo o badilon. Sarong aldaw dinukot ninda an saro sa mga Saksi ni Jehova. An mga namomoon, na nag-iirinoman, pinapili sia. Sa pagbugtak sa atubangan nia nin duwang bote nin serbesa, itinokdo ninda an saro asin sinabi na iyan nagrerepresentar sa gobyerno, an saro sa saindang teroristang grupo. ‘Saen ka kampi?’ an hapot ninda sa saiya. An Saksi nag-isip-isip, asin sa pakaheling sa iba pang mga bote nin serbesa sa harani, kinua nia an saro asin ibinugtak iyan sa tahaw kan duwa, na an sabi: ‘Digdi ako.’ Idinugang nia: ‘Ako neutral, ta ako para sa Kahadean nin Dios.’ Pakalihis kaini, binugbug sia nin pirang beses. Dangan napiritan siang maglingkod bilang oripon sa kampo kan mga gerilya, na noarin man dai nia aram kun baga babadilon sia ninda o dai. Pakalihis nin walong bulan, nakadulag sia kan salakayon kan mga hukbo nin gobyerno an kampo.

Pinili pa nin mga Saksi ni Jehova an mabilanggo, patin an magadan, imbes na makikabtang sa mga guerra kan mga nasyon. Kaya, sa Nazi Alemania rinibo sa sainda an ibinugtak sa mga kampo de konsentrasyon huli ta habo nindang suportaran an maringis na pananakop na Nazi. Ginatos na Saksi an ginadan o nagadan sa mga kampo. Alagad ngonyan, mantang haloy nang nawara an mabangis na gobyernong Nazi, an mga Saksi ni Jehova nagdadakol sa Alemania asin sa bilog na daga.

Alagad taano ta nahihimo nindang ‘daragopdopon an saindang mga minasbad na magin tarom nin arado’? An sarong nagtatao nin ideya nasa introduksion kan Carta kan UNESCO, na nagsasabi: “Mantang an guerra minapoon sa isip nin mga tawo, sa isip nin mga tawo man kaipuhan na ibugtak an mga depensa nin katoninongan.”

Kaoyon dian, dapit sa mga ‘dinadaragopdop an saindang mga minasbad na magin tarom nin arado,’ an hula ni Isaias nagsasabi, “dai na sinda mag-aadal sa pakilaban.” Imbes, paagi sa pag-adal asin pag-aplikar kan Kasuratan, sinda ‘tinotokdoan sa mga dalan nin Dios asin naglalakaw sa saiyang mga dana.’ (Isaias 2:3, 4) Sa tabang kan saiyang banal na espiritu, saindang ‘binabago an saindang isip,’ na nagigin matoninong.—Roma 12:2, 18.

An malinaw na ebidensia na an mga Saksi ni Jehova ‘nadaragopdop na an minasbad na magin tarom nin arado’ nagpapatunay na an pagkabuhay sa katoninongan asin katiwasayan posible. An saindang presenteng pamumuhay nagpapaheling sa sadit na paagi kan gigibohon kan Kahadean nin Dios paagi ki Cristo sa bilog na daga sa harani nang ngapit.

Nagugustohan daw nindo an siring na paglaom? Maogmang ihihiras saindo kan mga Saksi ni Jehova an ebidensia na an Kahadean nin Dios madali nang magtao nin nagdadanay na katoninongan asin katiwasayan. Taano ta dai makipag-olay sa sainda sa saindong lugar o sumurat sa mga kagpublikar sa magasin na ini? Orog pang aramon kun paano kamo ‘makakapagdagopgop sa minasbad na magin tarom nin arado’ ngonyan, na may paglaom na sa dai na mahahaloy magkamit nin buhay sa sarong kinaban na mayo nin guerra.

[Nota sa Ibaba]