Ipinahayag na Matanos “Para sa Buhay”

“Paagi sa sarong gibo nin pagpapakangmatanos an bunga . . . iyo an pagpapahayag sa sainda na matanos para sa buhay.”—ROMA 5:18.

1. Sairisay an nagugutom asin napapaha sa katanosan, asin paano maootob an saindang kamawotan?

“MAOGMA an mga nagugutom asin napapaha sa katanosan, huli ta sinda mababasog.” (Mateo 5:6) An pagkapahang iyan sa katanosan biyong mapapanigoan bako sanang para sa mga makakasadiri sa “kahadean kan kalangitan” kundi para man sa mga “magmamana kan daga.” (Mateo 5:10; Salmo 37:29) An duwang grupong ini igwa kan paglaom na ipinahayag ni apostol Pedro kan sia sumurat: “Igwa nin bagong kalangitan asin sarong bagong daga na satong hinahalat oyon sa saiyang [sa Dios] panuga, asin dian an katanosan an magdadanay.” (2 Pedro 3:13) Iyo, si Jehova Dios may ipinanugang matanos na bagong langitnon na gobyerno, “an kahadean kan kalangitan,” asin matanos na “bagong daga,” o sosyedad nin tawo sa sarong paraisong daga.

2. Ano an relasyon sa pag-oltanan ni Jehova, kan katanosan, asin kan satong paglaom sa matoninong na Bagong Areglo?

² Alagad ano man nanggad an boot sabihon kan matanos na bagong kalangitan asin matanos na bagong daga? Iyan nangangahulogan na an bagong langitnon na gobyerno asin an katawohan sa daga na paghahadean kaiyan kaipuhan na magmidbid sa pamantayan nin Dios sa tama asin sala. Si Jehova iyo “an pinag-eerokan nin katanosan.” (Jeremias 50:7) An katanosan iyo an mismong pasisikadan kan saiyang soberaniya, o trono sa uniberso. (Job 37:23, 24; Salmo 89:14) Tanganing magkaigwa nin katoninongan sa uniberso, kaipuhan na midbidon kan mga linalang ni Jehova an saiyang diretso na mag-establisar kan mga pamantayan para sa kun ano an matanos asin kun ano an maraot. Kabaliktaran, an paglaom niato sa matanos na Bagong Areglo nasasarig sa pag-otob ni Jehova sa saiyang mga pamantayan.—Salmo 145:17.

3. Huli sa lubos na katanosan ni Jehova, ano an hapot na minasabong sa isip?

³ Kaya minalataw an hapot kun paanong an banal asin matanos na Dios na si Jehova puwedeng magkaigwa nin relasyon sa maraot na mga parakasala. (Ikomparar an Isaias 59:2; Habacuc 1:13.) Paano sia, mantang nagdadanay na maimbod sa saiyang halangkaw na mga pamantayan nin katanosan, makakapili sa mga parakasala kan mga makikikabtang sa matanos na maggogobyernong “bagong kalangitan” asin maaako bilang mga katood an mga magigin kabtang kan matanos na “bagong daga”? Tanganing masimbag ini, kaipuhan na masabotan niato an katokdoan sa Biblia na pagpapakangmatanos, o pagpapahayag na matanos.

Sarong Maheherakon na Areglo nin Pag-atribuwir

4. Taano an makasalan na katawohan ta dakulaon an utang sa Dios, asin taano ta dai niato mababayadan sa satong sadiri an utang na ini?

⁴ Sa Kasuratan, an mga kasalan ibinabaing sa utang. (Helingon an Mateo 6:12, 14; 18:21-35; Lucas 11:4.) An gabos na tawo parakasala asin, kun siring, dakulaon an utang sa Dios. “An ibinabayad nin kasalan kagadanan.” (Roma 6:23) Mantang sinda “ipinabakal sa kaoripnan nin kasalan” kan saindang apoon na si Adan, an saiyang mga gikan mayong maginibo tanganing mabayadan an magabat na utang na ini. (Roma 7:14) Solamente an kagadanan kan nagkautang an makakapara dian, “huli ta an nagadan nakabutas na sa saiyang kasalan.” (Roma 6:7) Mayo nin marahay na mga ginibo sa panahon nin pagkabuhay nin sarong parakasala an makakabalukat sa iwinara ni Adan, ni makapagtatao man saiya nin matanos na kamugtakan sa atubang nin Dios.—Salmo 49:7, 9; Roma 3:20.

5. Paano si Jehova nagtao nin kaginhawahan sa makasalan na katawohan mantang iginagalang pa man giraray an saiyang sangkap na hustisya?

⁵ Paano si Jehova makapagtatao nin kaginhawahan para sa makasalan na mga tawo na dai ikinokompromiso an saiyang mga pamantayan sa katanosan? An simbag nagtatampok kan kadonongan asin dai na kutana maninigong pagkaherak ni Jehova. Magayonon an pagkapaliwanag kaini ni apostol Pablo sa saiyang surat sa mga taga-Roma. Sia nagsurat: “Iyan bilang daing bayad na regalo na sinda [an mga parakasala] ipinapahayag na matanos paagi sa saiyang dai na kutana maninigong pagkaherak huli sa pagkabutas paagi sa pantubos na binayadan ni Cristo Jesus. Ibinugtak sia nin Dios bilang dolot na pantubos paagi sa pagtubod sa saiyang dugo. Ini para sa pagpahayag kan saiyang sadiring katanosan, huli ta saiyang ipinatatawad an mga kasalan na nangyari kan mga nakaagi mantang an Dios nagtitios; tanganing ipaheling an saiyang sadiring katanosan sa presenteng panahon, tanganing sia magin matanos minsan pa kun saiyang ipinahahayag na matanos an tawo na igwa nin pagtubod ki Jesus.”—Roma 3:24-26.

6. (a) Paano naotob an mga pamantayan ni Jehova sa hustisya paagi sa pag-atang ni Cristo, asin sa siring si Jehova andam na gibohon an ano? (b) Paano ikakaatribuwir nin Dios an katanosan sa saro na may pagtubod?

⁶ Paagi sa saiyang dai na kutana maninigong pagkaherak, inako ni Jehova an atang ni Jesus manongod sa mga gikan ni Adan. (1 Pedro 2:24) Idto sarong kapantay sa halaga, o katimbang, na atang ta, bilang sangkap na tawo, binalukat ni Jesus an iwinara kan sangkap na tawong si Adan. (Helingon an Exodo 21:23; 1 Timoteo 2:6.) Mantang napanigoan na an hustisya, si Jehova mamomoton na andam na ‘paraon’ an mga kasalan na sinisingil sa “tawo na igwa nin pagtubod ki Jesus.” (Isaias 44:22; Gibo 3:19) Kun an tawong iyan magdanay na maimbod, bako sana na si Jehova dai na ‘sinisingil sa saiya an saiyang mga kasalan’ kundi sa aktuwal Sia nag-aatribuwir nin katanosan sa saiya. (2 Corinto 5:19) Paagi sa maheherakon na areglong ini nin pag-atribuwir, ‘dakol an nagin matanos.’ (Roma 5:19) Ini sarong kabtang nin pagpapakangmatanos, an akto nin Dios na paagi kaiyan an saro ibinibilang na daing kasalan. (Gibo 13:38, 39) Siisay an mga pinakangmatanos, o ipinahayag na matanos, sa panahon kan palakaw na ini nin mga bagay?

144,000 na “mga Banal”

7. Sa anong paagi na si Cristo ipinahayag na matanos, asin kun siring ano an nagin posible?

⁷ Naturalmente, si Cristo mismo dai nagkaipo nin pag-atribuwir nin katanosan, ta sia talagang matanos. (1 Pedro 3:18) Huling nagmaimbod sagkod sa kagadanan bilang sangkap na tawo (“an huring Adan”) asin iinatang an saiyang diretso na mabuhay digdi sa daga, si Jesus binuhay liwat kan saiyang Ama, si Jehova. Si Jesus “ipinahayag na matanos sa espiritu,” an boot sabihon, ipinahayag na matanos sa sadiri niang merito asin binuhay liwat bilang “espiritung nagtatao nin buhay.” (1 Corinto 15:45; 1 Timoteo 3:16) Paagi sa saiyang pagkagadan bilang atang, itinao nia an basihan na si Jehova makapag-atribuwir nin katanosan sa mga lalaki asin babae na may pagtubod.—Roma 10:4.

8, 9. (a) Sairisay an enot na nakinabang sa pag-atribuwir nin katanosan, asin taano? (b) Sairisay an minakompuwesto sa “bagong kalangitan,” asin ano an saindang paghahadean?

⁸ Makatanosan sana, an mga pinipili ni Jehova na kumompuwesto sa matanos na “bagong kalangitan,” o gobyerno kan Kahadean sa pagsakop ni Hadeng Jesu-Cristo, iyo an enot na lubos na nakikinabang sa maheherakon na areglong ini sa palakaw na ini nin mga bagay. Ilinaladawan kan libro ni Daniel an seremonya sa kalangitan na paagi kaiyan si Cristo, an Aki nin tawo, nag-ako kan “paghade asin kamahalan patin kahadean,” tanganing “an mga banwaan, mga nasyon asin mga tataramon [sa daga] gabos maglingkod sa saiya.” Dangan ipinaheling ni Daniel na “an kahadean asin an paghade” itinao man sa “mga banal kan Kaharohalangkawe,” si Jehova.—Daniel 7:13, 14, 18, 27; ikomparar an Kapahayagan 5:8-10.

⁹ An kabilangan kan “mga banal” na pinili tanganing maghade kaiba kan Korderong si Jesu-Cristo sa langitnon na Bukid nin Sion ipinahayag na 144,000, na “binakal hale sa katawohan.” (Kapahayagan 14:1-5) An mga ini, kaiba ni Cristo, iyo an minakompuwesto sa matanos na “bagong kalangitan” kan bagong palakaw nin mga bagay ni Jehova.

Ibinilang na Matanos—Paano Asin Taano?

10. (a) Arin na libro sa Biblia an pinakamalinaw manongod sa pagpapakangmatanos, asin kiisay iyan isinurat? (b) Sairisay an sa pangenot napapalabot sa katokdoan kan Biblia manongod sa pagpapakangmatanos?

¹⁰ An libro sa Biblia na siertong iyo an pinakamalinaw manongod sa pagpahayag nin Dios sa mga tawo na matanos iyo an surat ni Pablo sa mga taga-Roma. Interesante nanggad, ipinadara nia an surat na ini sa mga “inapod na magin mga banal.” (Roma 1:1, 7) Ini an nagpapaliwanag kun taano an katokdoan manongod sa “pagpapakangmatanos,” o pagpapahayag na matanos, arog kan ipinaliwanag ni Pablo, ta ginagamit may koneksion sa 144,000 na “mga banal.”

11. Ano an relasyon kan pagtubod, mga gibo, asin pagpapakangmatanos?

¹¹ An pinakapunto kan pangangatanosan ni Pablo sa Mga Taga-Roma iyo na an Judio o Hentil pareho dai magkakaigwa nin matanos na kamugtakan sa atubang nin Dios paagi sa mga gibo, baga man ini ginibo tanganing makapaoyon sa Pagboot ni Moises o huli sana sa paggalang sa nasa naturalesa nang moral na pagboot. (Roma 2:14, 15; 3:9, 10, 19, 20) An Judio asin Hentil ikakapahayag sanang matanos basado sa pagtubod sa pantubos na atang ni Cristo. (Roma 3:22-24, 29, 30) Minsan siring, an hatol sa huring mga kapitulo kan Roma (12-15) nagpapaheling na an siring na pagtubod kaipuhan na suportado nin diosnon na mga gibo, arog kan ipinaliliwanag man ni Santiago. (Santiago 2:14-17) An mga gibong iyan nagpapatunay sana na an pinakangmatanos na Kristiano igwa kan pagtubod na kahagadan para sa pagpapakangmatanos nin Dios.

12, 13. (a) Taano an 144,000 na “mga banal” ta kaipuhan na ipahayag na matanos? (b) Ano an ginigibo ninda sa mga diretso sa buhay na saindang inaako?

¹² Pero, huli sa anong makosog na dahelan na an mga Kristiano na “inapod na magin mga banal” kaipuhan na ipahayag na matanos? Digdi minalaog an ikaduwang kabtang nin pagpapakangmatanos, arin na baga, an pagpapahayag nin Dios na an sarong tawo angay na mabuhay bilang Saiyang sangkap na aking tawo. Huli sa magigin katongdan ninda sa matanos na “bagong kalangitan,” an 144,000 kaipuhan na talikdan asin isakripisyo sagkod lamang an ano man na paglaom sa buhay na daing katapusan digdi sa daga. (Salmo 37:29; 115:16) Sa sentidong ini sinda nagagadan bilang atang. Sinda ‘nagnanamit nin kagadanan na kabaing kan ki Cristo.’—Filipos 3:8-11.

¹³ Ngonyan, kaoyon sa prinsipyo na nasa Pagboot ni Moises, an ano man na atang na idinodolot ki Jehova kaipuhan na dai nin kanawayan. (Levitico 22:21; Deuteronomio 15:21) An 144,000 na “mga banal” inaapod na “mga matanos na ginibong sangkap.”—Hebreo 12:23.

Inampon Bilang Espirituwal na mga Aki

14, 15. (a) Anong pagkaliwat kun dapit sa kasalan an inaagihan kan 144,000? (b) Sa anong paagi na sinda binubuhay liwat sa “kabagohan nin buhay”?

¹⁴ Mantang nabubuhay pa sa laman, an “mga matanos” na ini minaagi sa simbolikong kagadanan. Si apostol Pablo nagpapaliwanag: “Mantang kita nagadan kun dapit sa kasalan, paano pa kita magpapadagos na mabuhay dian? O dai daw nindo naaaraman na kita gabos na nabautismohan dian ki Cristo Jesus nabautismohan sa saiyang kagadanan? Kun siring kita ilinobong kaiba nia paagi sa satong bautismo sa saiyang kagadanan, tangani na, kun paanong si Cristo binuhay hale sa mga gadan paagi sa kamurawayan kan Ama, kita man lumakaw sa kabagohan nin buhay . . . huli ta naaaraman niato na an satong daan na pagkatawo ipinako kaiba nia, tangani na an satong makasalan na hawak gibohon na gadan, tangani na kita dai na magpadagos na oripon nin kasalan. Huli ta an nagadan nakabutas na sa saiyang kasalan.”—Roma 6:2-7.

¹⁵ Sa saindang pagkabuhay bilang tawo, an 144,000 na “mga banal,” na kadikit na sanang natatada an nagdadanay sa daga sa panahon na ini kan katapusan, ‘nagagadan kun dapit sa kasalan.’ Pagkatapos kan saindang simbolikong kagadanan, an mga “inapod na magin mga banal” binubuhay liwat sa “kabagohan nin buhay.” Huli ta sinda ipinahayag nang matanos, puwede na sindang paniakion ni Jehova paagi sa saiyang espiritu na magin saiyang espirituwal na “mga aki.” Sinda ‘namumundag giraray’ asin inaampon bilang “mga aki nin Dios.” (Juan 3:3; Roma 8:9-16)a Sinda nagigin espirituwal na mga Israelita asin pinalalaog sa bagong tipan.—Jeremias 31:31-34; Lucas 22:20; Roma 9:6.

Mga Paramana sa Pagkasaserdote Asin Pagkahade

16. An 144,000 na “mga banal” nagigin paramana sa ano?

¹⁶ Bilang inampon na espirituwal na “mga aki” nin Dios, an 144,000 na “mga banal” nagigin man mga ‘paramana.’ (Galacia 4:5-7) Si Pablo nagsurat sa mga kapwa nia pinaniaki sa espiritung Kristiano: “Kun siring, kun kita mga aki, kita man mga paramana: mga paramana nin Dios, alagad kapwa mga paramana ni Cristo, basta kita iribang magtios tangani man kitang iribang mapamuraway.” (Roma 8:17) Ano an minana ni Cristo? Ginibo sia ni Jehova na Hade-Saserdote “sono sa orden ni Melquisedec sagkod lamang.” (Hebreo 6:19, 20; 7:1) Bilang “kapwa mga paramana” ni Cristo, an pinaniaki sa espiritung mga Kristiano linalahidan man ni Jehova bilang espirituwal na mga saserdote. (2 Corinto 1:21; 1 Pedro 2:9) Dugang pa, an saro sa ultimong katuyohan kan pagpahayag sa sainda ni Jehova na matanos iyo na sinda sa huri ‘maghade sa buhay paagi sa sarong tawo, si Jesu-Cristo.’—Roma 5:17.

17. (a) Minsan ngani ipinahayag na matanos, ano an kaipuhan na gibohon nin linahidan na mga Kristiano aroaldaw? (b) Paano ninda inaako an saindang balos?

¹⁷ Mantang nasa daga pa, an mga linahidan na Kristianong ini, minsan ngani ipinahayag na matanos, kaipuhan pa man giraray na paglabanan an saindang makasalan na mga tendensia. (Roma 7:15-20) Kaipuhan ninda an dugo ni Cristo na linigan sinda sa saindang aroaldaw na mga kasalan nin pagkabakong sangkap. (1 Juan 1:7; 2:1, 2) Kun sinda nagdadanay na maimbod sagkod sa katapusan kan saindang daganon na buhay, sinda literal na nagagadan asin binubuhay liwat “sa dai nalalapa asin daing digta patin dai napaparang mana” bilang kabtang kan matanos na “bagong kalangitan.”—1 Pedro 1:3, 4; 2 Pedro 3:13.

“Naghahalat Para sa Kapahayagan kan mga Aki nin Dios”

18, 19. (a) Ano an hinahalat kan mga tawong “linalang”? (b) Paanong ‘mahahayag’ an “mga aki nin Dios,” asin taano an mga tawong “linalang” ta nabubuhay na may odok na paglaom digdi?

¹⁸ Paano an gabos na ini nakakaapektar sa mga—mas dakol ki sa 144,000 na espirituwal na “mga aki nin Dios”—nagugutom asin napapaha sa katanosan alagad an paglaom magmana kan daga? Manongod sa sainda, si apostol Pablo nagsurat: “Huli ta an odok na paglaom kan linalang naghahalat para sa kapahayagan kan mga aki nin Dios. Huli ta an linalang ipinasakop sa kasayangan . . . basado sa paglaom na an linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.”—Roma 8:19-21.

¹⁹ An “linalang” na mga tawo na an paglaom mabuhay sagkod lamang sa sarong paraisong daga nabubuhay na may “odok na paglaom” sa panahon—na ngonyan harani na—na si Hadeng Jesu-Cristo asin an binuhay liwat na “mga aki nin Dios” ‘mahayag’ sa paglaglag sa presenteng maraot na palakaw nin mga bagay asin pakalihis kaiyan maghahade bilang mga hade asin saserdote “sa laog nin sangribong taon.” (Kapahayagan 20:4, 6) Sa laog kan Milenyal na Paghade ni Cristo, an mga tawong “linalang mismo bubutasan man hale sa kaoripnan nin kalapaan.”

20. Ano an ipaliliwanag sa minasunod na artikulo?

²⁰ Kun paano an mga tawo na nabubuhay sa matanos na “bagong daga” sa katapustapusi magkakamit kan “mamuraway na katalingkasan kan mga aki nin Dios,” asin kun paano an katokdoan sa Biblia manongod sa pagpapakangmatanos nakakaapektar sa sainda minsan ngonyan, ipaliliwanag sa minasunod na artikulo.

[Nota sa Ibaba]

Manonongod sa pagpahayag nin Dios sa mga tawo na matanos—

◻ Ano an boot sabihon kan Biblia sa matanos na bagong kalangitan asin sarong matanos na bagong daga?

◻ Taano an katawohan ta kaipuhan na ikatanos sa pagheling ni Jehova?

◻ Paano napanigoan an mga pamantayan ni Jehova sa katanosan?

◻ Taano an 144,000 ta iyo an enot na ipinahayag na matanos, asin ano an ginigibo ninda sa mga diretso sa buhay na inako ninda?

◻ Ano an minamana kan 144,000 kaiba ni Cristo?

[Kahon sa pahina 16]

Igwa nin duwang kabtang an pagpapakangmatanos, o an pagpapahayag na matanos:

(1) An pagbilang nin Dios sa tawo na daing kasalan

(2) An pagpahayag nin Dios sa tawo na sangkap asin angay sa daing katapusan na buhay sa daga

An 144,000 na linahidan na mga Kristiano ipinahayag na matanos sa duwang kabtang na ini. Saindang iinaatang an saindang mga diretso sa buhay bilang tawo asin sinda pinapaniaki bilang espirituwal na “mga aki” na inapod na magin mga hade asin saserdote kaiba ni Cristo sa “bagong kalangitan”