An Baha—Sarong Patanid kan Suanoy

SA HALAWIG na kasaysayan nin katawohan, kadakol kan natural na mga kalamidad na arog kagrabe o mas grabe pa sa pagputok kan Mount St. Helens. Alagad mayo nin makakaagid sa dakulaon na Baha kan aldaw ni Noe. Dakulaon asin nakakalaglag nanggad an Bahang idto kaya iyan nagwalat nin dai mapaparang impresyon sa katawohan sa bilog na globo.

May 150 laen-laen na osipon manongod sa Baha hale sa dakol na laen-laen na kabtang kan daga, kaiba na an Babilonya, Roma, India, Australia, asin Amerika. Minsan ngani an mga osipon na ini nagkakaralaenlaen sa detalye, sa kagabsan nagkakaoroyon iyan manongod sa moral na dahelan kan Baha, lakop sa globong paglaglag sa katawohan, asin pagkaligtas nin sarong pamilya sa sarong dahong o bangka. Solamente an lakop sa globong kalamidad an makapagwawalat nin lakop asin dai nawawarang impresyon na arog kaini.

An sarong iskolar sa Biblia nagsurat: “An pagkaoroyon kan mga kasaysayan na ini dai maninigaran na garantiya na an tradisyon bakong imbento sana; an osipon na bakong totoo pan-indibiduwal, bakong unibersal; kaya an tradisyon na iyan may makasaysayan na basihan; iyan resulta nin sarong pangyayari na talagang nangyari sa mga panahon na hoben pa an katawohan.” Alagad taano an kalamidad na iyan kan suanoy ta sarong patanid sa kapag-arakian na nabubuhay ngonyan?

Nangorognang mahalaga sato na mangnohon an mga kamugtakan na nagbunga kan Baha. An pagkakaagid kaiyan sa mga kamugtakan ngonyan sa kinaban minagibo sa Baha na makahulogan sa sato. Uya an pagkaladawan kan kasaysayan sa libro sa Biblia na Genesis sa mga kamugtakan na iyan: “Naheling ni Jehova na an karatan nin tawo labi-labi na sa daga asin an tendensia kan mga kaisipan kan saiyang puso danay na sa karatan na sana. Kaya hineling nin Dios an daga asin, uya! iyan maraot, huli ta rinaot nin gabos na laman an daga.”—Genesis 6:5, 12.

An kinaban nin katawohan nagkaigwa nin lakop na pagbagsak sa moral, na an tendensia kan mga kaisipan kaiyan perming maraot. Bilang resulta, “an daga napano nin kadahasan.” (Genesis 6:11) An buhay biyong idinusay sa pagpanigo sa materyal asin seksuwal na mga horot. Inapod ni Jesu-Cristo an atension digdi kan sia magsabi: “Kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na magdatong an baha asin iinanod sinda gabos, magigin siring man kaiyan an presensia kan Aki nin tawo.” (Mateo 24:38, 39) An solamenteng interes ninda panigoan an mga horot nin laman.

Itinao ni Noe an patanid bago pa sa laog nin dakol na taon, alagad ta an kapag-arakian na idto habong maniwala dian. Dai pa sinda noarin man nakaagi sa siring na baha. Kaya huling an mga bagay pareho kan dati, an patanid dai dinangog. “Dai sinda nagmangno.” Daing halaga sainda na an patanid hale sa saindang Kaglalang paagi ki Noe.

Alagad ta an Dios nagsabi ki Noe: “Nagdatong na para sa sako an katapusan kan gabos na laman, huli ta an daga pano nin kadahasan huli sainda; asin uya lalaglagon ko sinda kaibahan kan daga.” (Genesis 6:13) Kan dumatong an Baha, si Noe asin an saiyang pamilya naligtas huli ta sinda nagdangog sa patanid asin nagkuyog sa mga instruksion nin Dios. Alagad taano ta maninigo kitang magkaigwa nin espesyal na interes sa gabos na ini?

Kaagid na mga Kamugtakan

Arog kan kaaldawan bago an Baha, nagin nang dalan nin buhay an kadahasan nangorogna poon kan Guerra Mundial I. An politikal na kadahasan sa tahaw nin mga nasyon nagbunga kan pinakamapanlaglag asin pinakamakatatakot na mga guerra sa kasaysayan nin tawo. An kadahasan nakaabot sa mga siudad, sa mga tinampo, asin sa mga harong; isinasapeligro pa ngani kaiyan an mga biyahero. Dugang pa, an telebisyon, mga pelikula, asin nobela may madahas na tema an kadaklan.

An saro pang pagkakaagid iyo an modernong pamumuhay. An pagpanigo sa seksuwal asin materyalistikong mga horot iyo an nababangkagan kan presenteng kapag-arakian. Sa bilog na daga, naheheling niato an moral na pagbagsak na nagbunga nin garo epidemyang mga helang na ikinakaolakit sa seksuwal na paagi. An pagsambay, pagsasaro, asin homoseksuwal na mga relasyon uso. Kapareho kan kapag-arakian bago an Baha, an presenteng kapag-arakian namomoot sa mga kasingawan nin laman asin materyal na mga rogaring nin labi sa pagkamoot kaiyan sa Dios.

Mantang an Dios “nakolgan” kan labi-labi karaot na gibo kan mga tawo bago kan Baha, bako daw rasonableng isipon na arog man kaiyan an mamamatean nia ngonyan sa maraot na gawe na lakop sa bilog na kinaban? Bako daw na an ginibo nia sa kinaban kan aldaw ni Noe maninigong magin patanid sa presenteng kapag-arakian? Bako daw rasonableng isipon na magkakaigwa sia kan konklusyon na kapareho kan maheheling niato sa Genesis 6:5-7? Kan maheling nin Dios an karatan kan katawohan, “nakolgan an saiyang puso. Kaya si Jehova nagsabi: ‘Paparaon ko an mga tawo na linalang ko sa ibabaw nin daga.’” Paagi sa pinasabngan na mga parasurat sa Biblia, ipinahayag nin Dios na gigibohon nia an kaparehong paghokom sa mapagpanganang kapag-arakian na nabubuhay ngonyan. Iyan nagdadangadang sa pinakagrabeng kapahamakan sa kasaysayan nin tawo.

An Huring mga Aldaw

Sa pagtanaw sa satong panahon, ilinaladawan kan pinasabngan na parasurat kan ikaduwang surat ki Timoteo sa Biblia an lapang kamugtakan nin mga bagay na naheheling niato ngonyan sa bilog na kinaban. Sa kapitulo 3, bersikulo 1 sagkod 4, sia nagsasabi: “Alagad aramon mo ini, na sa huring mga aldaw maabot an delikadong mga panahon na masakit pakibagayan. Huli ta an mga tawo magigin mamomoton sa sainda man sana, mamomoton sa pirak, maabhaw, mapalangkaw, mga paralanghad, masumbikal sa mga magurang, dai tataong magbalos, bakong maimbod, dai nin pagkamoot, dai maoyonan, mga parapakaraot, mayong pagpopogol sa sadiri, maringis, mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan ki sa magin mamomoton sa Dios.”

Si Jesu-Cristo naghula man manongod sa huring mga aldaw kan palakaw na ini nin mga bagay. Sa saiyang hula sia nagtaram manongod sa grabeng kadahasan na naheling niato poon kan Guerra Mundial I, na an sabi: “Huli ta an nasyon matindog tumang sa nasyon asin an kahadean tumang sa kahadean.” (Mateo 24:7) Sia nagtaram man manongod sa katampalasanan na lakop ngonyan asin sa pagkatakot nin mga tawo sa maabot. “Huli sa pag-orog nin katampalasanan,” sabi ni Jesus, “an pagkamoot nin dakol malipot.” (Mateo 24:12) Sia nagsabi man na an mga tawo magigin “nalulunosan huli sa takot asin paghalat sa mga bagay na maabot sa ineerokan na daga.”—Lucas 21:26.

An mga tataramon na “huring mga aldaw” may kahulogan para sa presenteng kapag-arakian na ini na kapareho sa nagin kahulogan kaiyan para sa kapag-arakian bago kan Baha—katapusan kan nagdodominar na kabtang kan palakaw na iyan nin mga bagay nin tawo. Sa 2 Tesalonica 1:8, 9, an pinasabngan na parasurat sa Biblia na si Pablo nagsasabi na, paagi ki Jesu-Cristo, an Dios mamamalos “sa mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan silot nin daing sagkod na pagkalaglag hale sa atubang kan Kagurangnan asin sa kamurawayan kan saiyang kakosogan.”

Naheling kan mga nakaligtas sa Baha na an kapag-arakian bago kan Baha iinanod hale sa daga. An mga tawo asin an gabos na pinagsibotan ninda sa buhay mayo na. Magigin arog man kaiyan kun tapuson na kan banal na pamalos an presenteng madahas na kapag-arakian. “Dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian.”—Salmo 37:10.

Posible an Pagkaligtas

An pagkakaagid kan kapag-arakian bago kan Baha asin kan satong kapag-arakian bako sanang sa karatan kan mga tawo asin sa saindang pagkalaglag. Kun paanong may mga naligtas sa Baha, may mga maliligtas man sa katapusan kan presenteng palakaw nin mga bagay. An mga nakaligtas sa Baha mga mahoyo na dai namuhay nin arog kan kadaklan na tawo. Sinda mga mamomoton sa katanosan na makinuyog sa Dios asin nagdangog sa saiyang mga patanid. Sinasabi sato sa Genesis 6:8, 9: “Si Noe nakakua nin biyaya sa mga mata ni Jehova. . . . Si Noe matanos na tawo. Pinatunayan nia an saiyang sadiri na daing kasalan sa tahaw kan saiyang mga kapanahon.” Manongod sa saiya asin sa saiyang kairibang naligtas, si apostol Pedro nagsurat na an Dios “dai nag-alangan sa pagkastigo sa suanoy na kinaban, alagad ilinigtas si Noe, sarong parahulit nin katanosan, kaibanan nin pito pa kan pabahaan nia an kinaban nin maraot na mga tawo.”—2 Pedro 2:5.

Siniseguro sato kan mga propeta nin Dios na magkakaigwa nin dakulang kadaklan nin mga maliligtas sa nagdadangadang na banal na paglaglag sa presenteng palakaw nin mga bagay. Sinda man mga mahoyo na mamomoton sa katanosan asin arog ki Noe sa pagigin makinuyog sa mga instruksion nin Dios. Pakapaghula manongod sa kalaglagan kan mga maraot, an salmista nagsabi: “Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.”—Salmo 37:11; Kapahayagan 7:9, 13, 14.

Ihinula ni Jesus na an maogmang bareta kan Kahadean nin Dios ibabalangibog sa bilog na kinaban sa huring mga aldaw. Ini an paagi na an mga tawo sa daga na gusto sa katanosan tinitipon para sa kaligtasan. Ipinag-ilustrar ini ni Jesus sa saiyang parabola manongod sa pagbubulagbulag sa mga karnero asin kanding. Asin tinapos nia an parabola sa pagsabi na an arog-kanding na mga maraot “maduman sa pagkaparang daing katapusan, alagad an [arog-karnerong] mga matanos sa buhay na daing katapusan.”—Mateo 25:31-46.

Minsan ngani an Baha harayoon na sa satong aldaw, iyan malinaw na patanid sato na dai magbinongog. An rekord kaiyan isinurat, arog kan sabi kan Biblia, “sa pagtokdo sato.” (Roma 15:4) Iyan patanid tumang sa pamumuhay sa madahas, sensuwal, asin materyalistikong paagi kan kinaban na dai nagdadangog sa satong Kaglalang. Sia dai nagliliwat. Pinara nin Dios an kapag-arakian bago kan Baha huli sa karatan kaiyan. Sa kaparehong dahelan, paparaon nia an modernong kapag-arakian na ini asin an bilog na sistema kaiyan nin politikal na gobyerno, materyalistikong komersialismo, asin falsong relihiyon.

Tanganing makaligtas sa katapusan kan palakaw na ini nin mga bagay, kaipuhan na dangogon niato an patanid kan suanoy. Kaipuhan na patunayan niato na kita mga mamomoton sa katanosan, arog kan walong nakaligtas sa Baha. Asin para sa kaligtasan kaipuhan na kuyugon niato an hatol sa Sofonias 2:3: “Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”

[Ritrato sa pahina 7]

Kun paanong si Noe asin an saiyang pamilya nakaligtas sa Baha, kamo puwede man na makabilang sa maogmang mga makaliligtas sa katapusan kan palakaw na ini