Ibalangibog an Katalingkasan!
AN IKALIMANG BILYON na tawo sa daga sinasabing namundag kan Hulyo 7, 1986. Anong klaseng ngapit an aatubangon kan ikalimang bilyon na tawong ini, asin sa katotoohan kan gabos na tawo? May posibilidad daw na an binilyon na tawo magkamit nin tunay na katalingkasan? May kasarigan niatong sinasabi na igwa. Alagad ano an sasaboton niato sa terminong “katalingkasan”? Iyan daw nangangahulogan nin lisensia na gibohon an ano man na gusto nin saro? Dai, huli ta arog kan isinurat kan nobelistang Ingles na si Charles Kingsley kan ika-19 siglo: “May duwang klaseng katalingkasan, an falso na dian an saro libreng gibohon an gusto nia, asin an tunay na dian sia libreng gibohon an maninigo.”
An tawo magkakamit sana nin tunay na katalingkasan paagi sa paggibo kan “maninigo.” Asin ano an maninigo niang gibohon? Kan si Jesus yaon digdi sa daga, sinabi nia sana na may duwang darakulang togon—an enot, kamotan an Dios sa bilog na puso, kalag, isip, asin kosog, asin an ikaduwa, kamotan an kapwa nin siring sa sadiri. (Marcos 12:29-31) An tunay na katalingkasan makakamtan sana kan mga talagang nagpapaheling nin siring na tunay na pagkamoot—pagkamoot sa Dios asin sa kapwa.—Juan 8:31, 32.
An kinaban daw ngonyan nagpapaheling kan siring na pagkamoot? Makamomondo, dai. Kun mayo nin pagkamoot, an falsong katalingkasan an nangingibabaw. Iyan nagtatao nin paslo, independienteng espiritu. Iyan nag-iinsister sa ‘paggibo sa gusto,’ na daing pagmangno sa Dios o kataed. An espiritung ini bako sanang nasa mga indibiduwal kundi pati sa mga komunidad, rasa, asin nasyon. Sagkod na nagpapadagos an kaisipan na ako nguna, seguradong maluya an pundasyon para sa ano man na katalingkasan, ano man na katoninongan, ano man na kaogmahan sa dagang ini. Girumdoma, si Jesus nagsabi, “Mamotan mo an saimong kataed siring sa saimo man sana.” An pagkamoot sa kataed kaipuhan sa pagkakamit nin tunay na katalingkasan.
An organisasyon nin Naciones Unidas pinorma tanganing tawan nin katalingkasan an katawohan paagi sa pagsalida kan “katoninongan asin katiwasayan” sa damat nin guerra. Sa ika-40 anibersaryo kaiyan, iprinoklamar kan NU an 1986 na Internasyonal na Taon nin Katoninongan. Alagad ini daw nagin proklamasyon nin katalingkasan na may seguradong garantiya sa katoninongan? Naputol daw an grabeng gastos sa mga armas (na ngonyan nagkakakantidad nin labing $1,000 bilyon kada taon)? Nainaan daw an terorismo asin pagbomba sa mga sakayan? Nagpondo na daw an garadanan huli sa relihiyon sa Northern Ireland, Tahaw na Sirangan, asin Asia? An relihiyosong mga namomoon minalaog sa politika asin dakol an sinasabi manongod sa katoninongan. Alagad an sarampati nin tunay na katoninongan garo baga naglayog na nin harayoon asin dai na kayang aboton kan NU asin kan mga relihiyon sa kinaban.
Igwa daw nin grupo ngonyan na tinalikdan na an madahas, ako ngunang mga ugale kan kinaban? Igwa nanggad! An ihinulang “Prinsipe nin Katoninongan,” si Jesu-Cristo, tiniripon an mga mamomoton sa katoninongan ‘hale sa gabos na tribo, tataramon, banwaan, asin nasyon.’ (Isaias 2:3, 4; 9:6, 7; Kapahayagan 5:9; 7:9) Ikinaoogma ninda na an Kahadean nin Dios paagi ki Cristo madali nang paraon an gabos na karatan asin itao an lakop sa dagang paraiso na may katoninongan, na dian an tunay na katalingkasan an mangyayari. An grupong ini midbid bilang mga Saksi ni Jehova. (Daniel 2:31-35, 44; Isaias 43:10, 12; 65:17-25) Sararo, an mga Kristianong ini nakikakabtang sa maogmang pagbalangibog na ipinanganino kan mga kabtang kan areglo nin Jubileo sa suanoy na Israel. Sa kada saro kan 200 asin labi pang kadagaan sa bilog na kinaban, maogma nindang kinukuyog an pagboot nin Dios: “Ibalangibog an katalingkasan sa daga sa gabos na nag-eerok dian.” (Levitico 25:10) Nabasa na daw nindo asin kinuyog an maogmang kurahaw na iyan?