‘Sa Torrengbantayan Ako Nagtitindog’

“Asin sia kuminurahaw na garo leon: ‘Sa torrengbantayan, O Jehova, ako danay na nagtitindog kun aldaw, asin yaon ako sa sakuyang pinagbabantayan sa gabos na banggi.’”—ISAIAS 21:8.

1, 2. (a) Ano an pasohan ni Charles T. Russell? (b) Paano makatatabang an mga babasahon sa Biblia tanganing maotob an saiyang pasohan?

AN SARONG matatakton sa Dios na 21 anyos na lalaki na nag-iistar sa amihanan-sirangan nin Estados Unidos may misyon. Katuyohan nia na ibuyagyag an falsong mga katokdoan nin relihiyon kan saiyang kaaldawan, nangorogna an doktrina nin daing sagkod na pagpasakit asin kapaladan. Siring man, boot niang ipagdepensa an katotoohan manongod sa pantubos asin an katuyohan saka paagi kan pagdatong ni Cristo. Paano nia gigibohon gabos ini? Paagi sa pagpasirang kan liwanag kan Tataramon nin Dios, an Banal na Biblia, sa relihiyosong mga paniniwala.—Salmo 43:3; 119:105.

² Si Charles T. Russell, an enot na presidente kan Watch Tower Society, an tawong iyan, asin nagdesisyon sia kan 1873 na magpublikar nin relihiyosong babasahon bilang paagi na matawan nin atension an liwanag kan katotoohan sa Biblia. Sa sinserong mga parabasa, ipaheheling kan mga babasahon na iyan an mga diperensia kan mga katokdoan kan Kakristianohan. An ano man na natatagong depekto sa doktrina dai makadudulag sa makosog na liwanag kan Biblia. (Efeso 5:13) Kadungan kaiyan, pasisirangan kan babasahon na ini an ‘marahay na katokdoan’ tanganing pakosogon an pagtubod kan mga parabasa. (Tito 1:9; 2:11; 2 Timoteo 1:13) May arogan daw an kaigotan para sa katotoohan sa Biblia na nagmotibar ki Russell sa saiyang paghihingoa?—Ikomparar an 2 Hade 19:31.

An Enot na mga Kristiano:Mga Paradepensa sa Tataramon nin Dios

3. Paano si Cristo Jesus nagtao kan halimbawa sa pagdepensa sa katotoohan?

³ Ipinagdepensa kan mga Kristiano kan enot na siglo an paggamit sa Tataramon nin Dios sa tahaw kan mga Judio asin Hentil. Sinda nagtindog na garo nasa sarong torrengbantayan, na ipinaiisi an katotoohan sa gabos na gustong magdangog. (Mateo 10:27) An saindang Poon, si Jesu-Cristo, an nagtao kan arogan. Sabi nia: “Ako namundag dahel kaini, asin dahel kaini ako napadigdi sa kinaban, tanganing ako magpatotoo sa katotoohan.” (Juan 18:37) Minsan ngani sangkap, nagsayuma siang magsarig sa sadiri niang kadonongan o personal na mga opinyon. Imbes, an saiyang mga katokdoan gikan sa saiyang Superyor na Paratokdo, si Jehova Dios. “Dai ako naggigibo nin ano man sa sakong sadiring kabotan,” an sabi nia sa sarong grupo nin mga Judio. “Kundi siring sa pagkatokdo sa sako kan Ama itinataram ko an mga bagay na ini.” (Juan 8:28; helingon man an Juan 7:14-18.) Sono sa tala kan mga Ebanghelyo manongod sa saiyang ministeryo sa daga, si Jesus nagkotar (o nagpahayag nin kaagid na mga ideya) gikan sa mga kabanga kan mga libro kan Hebreong Kasuratan.—Lucas 4:18, 19 (Isaias 61:1, 2); Lucas 23:46 (Salmo 31:5).

4. Tumao nin mga halimbawa sa kun paano ginamit ni Jesus an Tataramon nin Dios sa pagtotokdo kan katotoohan.

⁴ Dawa pakalihis kan saiyang kagadanan asin pagkabuhay liwat, ginagamit pa ni Cristo an Tataramon nin Dios sa pagtotokdo kan katotoohan. Halimbawa, kan si Cleopas asin an saiyang kaiba nagbabaklay hale sa Jerusalem pasiring sa Emaus, tinabangan ni Jesus an mga disipulong idto na mangatanosan sa Kasuratan. An tala nagsasabi: “Asin magpoon ki Moises asin sa gabos na propeta ipinaliwanag nia sa sainda an mga bagay manongod sa saiya sa bilog na Kasuratan.” (Lucas 24:25-27) Paghaloyhaloy kan aldaw man sanang idto, si Jesus nagpaheling sa 11 apostol asin sa nagkapira niang disipulo tanganing pakosogon an saindang pagtubod. Paano? Paagi sa ekspertong paggamit sa Kasuratan. Si Lucas nagsurat: “Dangan binukas nia [ni Jesus] nin lubos an saindang isip tanganing masabotan an kahulogan kan Kasuratan, asin sia nagsabi sa sainda: ‘Sa paaging ini nasusurat na an Cristo magtitios asin bubuhayon hale sa mga gadan sa ikatolong aldaw.’”—Lucas 24:45, 46.

5. Kan Pentecostes 33 C.E., paano inarog ni Pedro an halimbawa ni Cristo sa paggamit sa Kasuratan?

⁵ Sa pag-arog sa Arogan kaiyan, kan taon 33 C.E. pinonan kan Kristianong kongregasyon an ministeryo kaiyan sa publiko na ginagamit an Kasuratan. An lugar: sarong natad sa luwas nin sarong harong sa Jerusalem. Kan madangog an hagobohob nin “makosog na doros” sa harong na ini, an rinibong Judio na taga-Jerusalem asin an mga peregrinong Judio nagrani sa lugar na ini asin nagtiripon. Si Pedro nagtindog sa enotan—nasa palibot nia an 11 pang apostol—asin sa makosog na tingog sia nagtaram: “Kamong mga taga-Judea asin kamo gabos na nag-oorontok sa Jerusalem, talastason nindo ini asin dangogon nindo an sakong mga tataramon.” Dangan sa pagdodoon kan “isinabi paagi ki propeta Joel” asin kan “isinabi ni David,” ipinaliwanag ni Pedro an milagro na nangyayari pa sana asin na “ginibo sia nin Dios na magin Kagurangnan asin Cristo, an Jesus na ini na saindong ipinako.”—Gibo 2:2, 14, 16, 25, 36.

6. (a) Ipaliwanag kun ano an nangyari sa katiriponan kan namamahalang grupo kan enot na siglo. (b) Paano ipinaaram sa mga kongregasyon an desisyon kan namamahalang grupo, asin may anong pakinabang?

⁶ Kan an enot na mga Kristiano nagkakaipo nin nagpapaliwanag na impormasyon manongod sa pagtubod asin gawe, ginamit man kan namamahalang grupo kan enot na siglo an Kasuratan. Halimbawa, sa katiriponan kan namamahalang grupo kan taon 49 C.E., si disipulo Santiago, na iyo an tsirman, isinentro an saindang atension sa mahalagang teksto na yaon sa Amos 9:11, 12. “Mga ginoo, mga tugang, dangoga nindo ako,” sabi nia. “Si Simeon nagsaysay nin lubos kun paanong an Dios sa enot na pangyayari nagtao kan saiyang atension sa mga nasyon tanganing kumua hale sa sainda nin sarong banwaan para sa saiyang ngaran. Asin digdi minaoyon an mga tataramon kan Mga Propeta, kun paanong nasusurat.” (Gibo 15:13-17) An bilog na grupo nag-oyon sa proposisyon ni Santiago dangan isinurat an saindang desisyon na basado sa kasuratan tanganing iyan ikapadara sa gabos na kongregasyon asin mabasa ninda. Ano an resulta? An mga Kristiano “nag-ogma sa pagpakosog,” asin “an mga kongregasyon nagpadagos na mapakosog sa pagtubod asin magdakol an bilang aroaldaw.” (Gibo 15:22-31; 16:4, 5) Kaya, an enot na kongregasyon Kristiano nagin “harigi asin tukod kan katotoohan.” Alagad kumusta man an modernong kasaysayan? Aarogon daw ni C. T. Russell asin kan kairiba niang mga estudyante sa Biblia an marahay na halimbawang ini kan enot na siglo? Paano ninda ipagdedepensa an katotoohan?—1 Timoteo 3:15.

An mga Magasin na Harayo an Pananaw

7. (a) Ano an katuyohan kan Zion’s Watch Tower? (b) Siisay an linaoman kaiyan para sa pagsuportar?

⁷ Kan Hulyo 1879 namundag an pangenot na instrumento ni Russell para sa pagpaliwanag kan Biblia—an Zion’s Watch Tower and Herald of Christ’s Presence. Isinabi kan enot na luwas kaiyan an nobleng katuyohan kan magasin: “Arog kan ipinaririsa kan ngaran kaiyan, an katuyohan kaiyan magin bantayan na gikan dian an mga bagay na interesante asin kapakipakinabang ikapaisi sa ‘sadangoton na aripompon,’ asin bilang an ‘Herald of Christ’s Presence,’ magtao kan ‘karne sa igong panahon’ sa ‘pamilya nin pagtubod.’” An pagsarig sa makakamhan sa gabos na Dios an pasisikadan kan magasin. An ikaduwang luwas kaiyan nagsabi: “Kami nagtutubod na an nagsusuportar sa ‘Zion’s Watch Tower’ iyo si JEHOVA, asin mantang ini an kamugtakan iyan noarin man dai makililimos ni makikimaherak sa mga tawo sa paghagad nin suporta. Kun Sia na nagsasabi: ‘An gabos na bulawan asin pirak sa kabukidan sadiri ko,’ dai na makatao kan kinakaipuhan na pondo, sasaboton mi na iyan na an panahon na ipondo an pagpublikar.”

8. Ipaliwanag an pagtalubo kan An Torrengbantayan sa liwanag kan Isaias 60:22 asin Zacarias 4:10.

⁸ An Zion’s Watch Tower, na ngonyan The Watchtower (sa Bicol, An Torrengbantayan), labi nang 107 taon na padagos na ipinupublikar. Iyan nag-oswag poon sa bulanan na magasin nin 6,000 na kopya na iniimprenta sa sarong tataramon sagkod sa duwa-kada-bulan na magasin na may 12,375,000 na kopya na nasa 103 na tataramon.—Ikomparar an Isaias 60:22; Zacarias 4:10.

9. Taano ta angay an titulong Watch Tower?

⁹ An titulo, Watch Tower, tama an pagkapili ni Russell. An termino na parateng ginagamit sa Hebreong Kasuratan para sa termino sa Ingles na “watchtower” nangangahulogan “bantayan” o “puwesto sa pag-obserbar,” na gikan dian pasil na maheling nin sarong bantay an kaiwal sa harayo asin makatao nin patanid sa nagdadangadang na peligro. Kaya angay nanggad, sa enot na 59 taon nin pagpublikar kaiyan, an tutub igwa kan mapan-angat na kotasyon na ini hale sa Isaias 21:11, 12, King James Version: “Bantay, Anong Mangyayari Kun Banggi?” “Madatong an Aga.”

10. Siisay an naglilingkod bilang bantay sono sa Isaias 21:11, asin anong mensahe an saiyang ipinaiisi?

¹⁰ An ibinugtak na bantay sa hula ni Isaias nakatalaan na umabante sa harani nang panahon. Sa tahaw kan lakop na maraot na kadikloman kan daga, maogmang ipinaisi ni Russell an maogmang bareta manongod sa nagdadangadang na “aga.” An Milenyal na Paghade ni Jesu-Cristo na may katoninongan iyo an tema nin sarong maogmang bareta. Alagad ta bago umabot an “aga,” an grupo na naglilingkod bilang bantay—an natatada sa espirituwal na Israel ngonyan—mapusong nagpapatanid manongod sa nangyayari sa “banggi,” na maabot sa pinakamadiklom sa “ralaban kan dakulang aldaw nin Dios na Makakamhan sa gabos” sa Har–Magedon.—Kapahayagan 16:14-16.

11, 12. (a) Paano ipinaheheling kan mga tataramon sa Isaias 21:8 na an grupong bantay maimbod asin alisto? (b) Paagi sa anong ahensia minaabot an bareta ngonyan, asin paano iyan ilinalakop sa pangenot na paagi?

¹¹ Bago kaini, sa Isaias 21:8, iiniintrodusir kita sa maimbod na bantay na ini paagi sa mga tataramon na ini: “Asin sia kuminurahaw na garo leon: ‘Sa torrengbantayan, O Jehova, ako danay na nagtitindog kun aldaw, asin yaon ako sa sakuyang pinagbabantayan sa gabos na banggi.’”

¹² Imahinaron sa saindong isip an sarong bantay na nasa halangkaw na torre, na nakaduko, na nangangalagkalag sa harayo kun aldaw, naghihingoang makamaan sa kadikloman kun banggi—perming alisto. Igwa na kamo kan pangenot na ideya na itinatao kan termino sa Hebreo para sa “torrengbantayan” (mits·pehʹ) siring sa pagkagamit sa Isaias 21:8. Huling mapagbantay nanggad an bantay, siisay na may toltol na isip an magdududa sa saiyang makosog na paisi? Siring man ngonyan, an grupong bantay naghingoa paagi sa pagsiyasat sa Kasuratan tanganing aramon kun ano an itinatagama ni Jehova para sa palakaw na ini nin mga bagay. (Santiago 1:25) Dangan itinatao kan bantay na ini an mensaheng iyan nin makosog asin daing takot, sa pangenot paagi sa mga pahina kan An Torrengbantayan. (Ikomparar an Amos 3:4, 8.) An magasin na ini dai noarin man masibog sa pagdepensa sa katotoohan huli sa takot!—Isaias 43:9, 10.

13. Anong kapadis na magasin an naglataw kan 1919, asin ano an kaagid na katuyohan kaiyan?

¹³ Kan Oktubre 1, 1919, naglataw sa kinaban an bagong magasin: The Golden Age.a Gagamiton kan grupong bantay an instrumentong ini bilang kapadis kan An Torrengbantayan. Minsan ngani an mga artikulo kaiyan dai magpapaliwanag sa mga tema sa Biblia nin arog kararom sa An Torrengbantayan, patatanidan kaiyan an katawohan manongod sa falsong mga katokdoan nin relihiyon, sa nagdadangadang na kalaglagan kan presenteng maraot na palakaw nin mga bagay, asin sa masunod na bagong daga nin katanosan. Iyo, iyan man magdedepensa kan katotoohan!

14. Ano an katuyohan kan Consolation, asin sa huri kan Awake!?

¹⁴ Pakalihis nin desiotsong taon an ngaran kan The Golden Age sinalidahan nin Consolation. “An bagong ngaran nagrerepresentar sa katotoohan,” sabi kan luwas nin Oktubre 6, 1937. An Consolation nagin Awake! sa luwas na Agosto 22, 1946. Sa luwas na iyan ini nanuga: “An integridad sa katotoohan an magigin pinakahalangkaw na katuyohan kan magasin na ini.” Sagkod ngonyan, dai iyan nasudyaanan sa panugang iyan. Pambihira nanggad, an Torrengbantayan asin Awake! (sa Bicol, Magmata!) dinadara nin halangkaw an bandera nin katotoohan tanganing maheling nin gabos. Sa paggibo nin siring, an mga magasin na iyan nagsusunod sa dalan na pinonan kan enot na kongregasyon Kristiano.—3 Juan 3, 4, 8.

An Torrengbantayan Asin Magmata!: Mga Paradepensa sa Katotoohan

15. (a) Anong paagi nin pagtao nin espirituwal na kakanon ngonyan an nakaaagid kaidtong enot na kongregasyon Kristiano? (b) Apuwera sa pagkotar sa mga bersikulo sa Biblia, ano pa an kaipuhan? Tumao nin mga halimbawa.

¹⁵ An grupong “maimbod asin madonong na oripon,” an “bantay,” ginagamit ngonyan an magasin na Torrengbantayan sa irarom kan pagdirehir kan Namamahalang Grupo kan mga Saksi ni Jehova bilang an mayor na instrumento kaiyan sa pagtao nin espirituwal na “kakanon sa igong panahon.” (Mateo 24:45) Ini pag-arog sa kongregasyon kan enot na siglo, na isinurat an nagpapaliwanag na impormasyon manongod sa doktrina asin moral tanganing “basahon sa gabos na tugang.” (1 Tesalonica 5:27) Poon sa kapinonan an Torrengbantayan saro nang magasin na naggagamit kan Biblia asin nagtotokdo kan Biblia. Halimbawa, an enot na luwas kan Zion’s Watch Tower nagkotar o nagsitar sa labing 200 na teksto hale sa kisuerra 30 libro sa Biblia. Alagad labi pa an kaipuhan kisa pagkotar sana nin mga teksto sa Biblia. An mga tawo nagkakaipo nin tabang tanganing masabotan iyan. An Torrengbantayan perming nagpapaoswag sa pagkasabot sa Biblia. Poon 1892 sagkod 1927 an kada luwas igwa nin semanal na babasahon sa Biblia asin nin paliwanag sa sarong pangenot na teksto sa kada babasahon. Para sa ibang halimbawa, helingon an tsart na may titulong “Makasaysayan na mga Artikulo sa Torrengbantayan, Dekada por Dekada.”

16, 17. Ano an ginibo kan enot na editor kan An Torrengbantayan tanganing maseguro na an magasin na ini perming magdedepensa kan katotoohan sa Biblia?

¹⁶ Paano papagdadanayon kan An Torrengbantayan an pagkapuro kan inimprentang mensahe kaiyan? An enot na editor kan magasin, si C. T. Russell, nagbugtak nin mga proteksion tanganing maseguro na an iniimprenta sa An Torrengbantayan iyo an katotoohan sono sa pagkasabot sa panahon na iyan. An saro sa mga proteksion na iyan sinasabi sa saiyang testamento na ginibo kan Hunyo 27, 1907. (Si Russell nagadan kan Oktubre 31, 1916.) An saiyang testamento nagsasabi:

“Ipinagboboot ko na an bilog na editoryal na pamamahala sa ZION’S WATCH TOWER mamugtak sa kamot nin sarong komite nin limang tugang, na sinasadol ko na magkaigwa nin dakulang pag-iingat asin kaimbodan sa katotoohan. An gabos na artikulo na lumuwas sa mga kolumna kan ZION’S WATCH TOWER magkakaigwa kan lubos na pag-aprobar kan kisuerra tolo sa komite nin lima, asin isinasadol ko na kun an ano man na aprobaran kan tolo aram o ipinamumugtak na kontra sa opinyon kan saro o duwa sa ibang miembro kan komite, an mga artikulong iyan sarayon nguna para sa paghorophorop, pamibi asin orolay sa laog nin tolong bulan bago ipublikar—tanganing sagkod sa mapupuwede an pagkasararo sa pagtubod asin an bogkos nin katoninongan mapagdanay sa editoryal na pamamahala sa babasahon.”

¹⁷ An lambang miembro kan Komite Editoryal, sono sa testamento ni Russell, kaipuhan na “lubos na maimbod sa mga doktrina kan Kasuratan” asin kaipuhan na ipaheling, bilang prominenteng mga ugale, “an kalinigan sa pamumuhay, pagigin malinaw sa katotoohan, kaigotan para sa Dios, pagkamoot sa mga tugang asin kaimbodan sa Paratubos.” Siring man, ibinugtak na kondisyon ni Russell na “sa ano man na paagi dai isasabi kun siisay an kagsurat sa laen-laen na artikulo na minaluwas sa magasin . . . tanganing an katotoohan mamidbid asin apresyaron sa sadiring halaga kaiyan, asin tanganing an Kagurangnan mas partikularmenteng mamidbid bilang an Payo kan iglesya asin Burabod kan katotoohan.”

18. Taano ta mababasa niatong may pagkompiar an Torrengbantayan asin Magmata!?

¹⁸ Sagkod sa aldaw na ini an Namamahalang Grupo nagsusunod sa kaagid na mga giya. An kada artitulo sa An Torrengbantayan asin Magmata! asin an lambang pahina, pati an mga ilustrasyon, sinisiyasat kan piniling mga miembro kan Namamahalang Grupo bago iyan imprentahon. Dugang pa, an mga minatabang sa pagsurat nin mga artikulo para sa An Torrengbantayan Kristianong kamagurangan na nakasasabot sa pagigin seryoso kan saindang asignasyon. (Ikomparar an 2 Cronica 19:7.) Minaubos sinda nin dakol na oras sa pagsiyasat sa Biblia asin iba pang reperensia tanganing maseguro na an isinusurat iyo an katotoohan asin na iyan maimbod na nagsusunod sa Kasuratan. (Eclesiastes 12:9, 10; 2 Timoteo 1:13) Bakong pambihira para sa sarong artikulo sa magasin—na tibaad basahon nindo sa laog nin 15 minutos—na mangaipo nin duwang semana sagkod sa labing sarong bulan tanganing andamon.

19. Ano an magigibo nindo tanganing ipagdepensa an katotoohan kan Biblia?

¹⁹ Kun siring, mababasa nindong may kompiansa an Torrengbantayan asin Magmata! Alagad orog pa dian an magigibo nindo. Entusiastiko nindong ikaaalok an magasin na ini sa iba tanganing sinda man makanood kan katotoohan asin makinabang sa pagdangog sa mga mensahe kan ‘bantay na nagtitindog sa torrengbantayan.’ (Isaias 21:8) Iyo, kaiba kan modernong bantay, kamo puwede man na magin paradepensa sa katotoohan kan Biblia.

[Nota sa Ibaba]

Nagigirumdoman Daw Nindo?

◻ Taano si C. T. Russell ta nagpoon na magpublikar nin mga babasahon sa Biblia?

◻ Paano an enot na mga Kristiano ipinagdepensa an katotoohan?

◻ Taano an terminong “Torrengbantayan” ta nasa titulo kan magasin na ini?

◻ Siisay an bantay sa modernong aldaw, asin anong instrumento an sa pangenot ginagamit nia tanganing pakosogon an saiyang tingog?

◻ Paano ipinagdedepensa kan An Torrengbantayan asin Magmata! an katotoohan sa Biblia?

[Tsart sa pahina 13]

Makasaysayan na mga Artikulo sa Torrengbantayan, Dekada por Dekada

1879: “An Dios Pagkamoot”—ipinagdepensa an pantubos na atang ni Jesus bilang basihan kan pagbalukat sa katawohan

1879: “Kun Taano ta Tinogotan an Karatan”—nagpaliwanag kun taano ta dai maheheling an presensia ni Jesu-Cristo

1880: “Sarong Hawak, Sarong Espiritu, Sarong Paglaom”—itinokdo an 1914 para sa pagtatapos kan Panahon nin mga Hentil

1882: “An Bayad sa Kasalan Kagadanan”—ibinuyagyag an doktrina nin daing sagkod na pagpasakit bilang pagnigar sa pagkamoot nin Dios

1885: “An Ebolusyon Asin an Edad nin Hotok”—ibinuyagyag na falso an teoriya nin ebolusyon

1897: “Ano an Sinasabi kan Kasuratan Manongod sa Espiritismo?”—nagtao nin pruweba sa demonikong ginikanan nin espiritismo

1902: “Enoton an Dios—An Saiyang mga Nombramiento”—idinoon an pagkuyog sa ley nin Dios sa laog kan pamilya asin sa negosyo

1919: “Mapalad an mga Daing Takot”—nagtao nin bagong buhay sa nagpopoon na organisasyon nin daing takot na mga parasamba

1925: “Pagkamundag kan Nasyon”—ipinaliwanag an mga hula na nagpapaheling na an Kahadean nin Dios namundag kan 1914

1931: “Sarong Bagong Ngaran”—poon kaidto an ngaran na Mga Saksi ni Jehova ipalalaen an tunay na mga Kristiano sa apostatang Kakristianohan

1935: “An Dakulang Kadaklan”—nagpaliwanag na ginigibo na an pagtipon sa mga mabubuhay sagkod lamang digdi sa daga

1938: “Organisasyon”—nag-introdusir nin tunay na teokratikong areglo sa tahaw kan mga Saksi ni Jehova

1939: “Neutralidad”—nagpakosog sa mga Saksi ni Jehova sa bilog na kinaban na makatagal sa mga kagipitan kan Guerra Mundial II

1942: “An Solamenteng Liwanag”—nagtao nin senyal na ipagpadagos an mapusong paghuhulit

1945: “Dai Natatanyog Para sa Tamang Pagsamba”—nagpaliwanag na an mga Kristiano dapat na lumikay sa pag-ako nin pagsasalin nin dugo

1952: “Pagpapadanay sa Organisasyon na Malinig”—nagpaliwanag na an pagtitiwalag nin mga kongregasyon sono sa Kasuratan

1962: “Pagpapasakop sa ‘Haralangkaw na Kapangyarihan’—Taano?”—nagtao nin mga dahelan sa limitadong pagpapasakop sa mga kapangyarihan nin tawo

1973: “Pagpapadanay kan Kongregasyon nin Dios na Malinig sa ‘Panahon kan Saiyang Paghokom’”—isinadol an pagsikwal sa paggamit nin tabako

1979: “Kaigotan Para sa Harong ni Jehova”—idinodoon liwat na an paghuhulit sa harong-harong pag-arog sa halimbawa kan mga apostol

1982: “Mga Namomotan, . . . Magdanay Kamo sa Pagkamoot nin Dios”—pinatanidan an mga Kristiano manongod sa mga paagi nin mga apostata

1983: “Paglakaw sa Kaibanan nin Dios sa Madahas na Kinaban”—sinierto na an mga Kristiano dapat na daing kabtang sa kadahasan

1984: “An Bagong Toril Para sa ‘Ibang Karnero’”—nagpaliwanag kun paano an daganon na grupong ini isinasaro sa mga kabilang sa “toril” kan bagong tipan

1987: “An Kristianong Jubileo Maabot sa Kulminasyon sa Milenyo”—nagpaliwanag kun paano an gabos na maimbod na Kristiano nagkakamit nin libertad asin buhay