Espiritismo—Taano ta Nag-oorog an Interes?
SI Frans harigi kan lokal na iglesyang Protestante. Kun may gigibohon para sa iglesya, sia an enot na minatabang. Si Wilhelmina matatakton man sa Dios. “Kaipuhan na magsimba ka,” an sabi nia, asin sia nagsisimba. Si Esther regular man na nagsisimba asin dai pinalilihis an aldaw na dai namimibi. An tolong ini may saro pang pagkakapareho: Sinda man patagolainan.
An tolong taga-Suriname na ini dai nasosolo. Sa bilog na kinaban, igwa nin nagkokosog na interes sa espiritismo. Horophoropa: Sa Estados Unidos sana, mga 30 magasin na igwa nin pinag-iribang sirkulasyon na labing 10,000,000 an dusay sa laen-laen na langtad nin misteryosong mga pangyayari. Mga 2,000,000 katawo sa Inglaterra an interesado sa iyo man sanang tema. An bago pa sanang surbey sa Netherlands nagpaheling na an mga naniniwala sa misteryosong mga pangyayari manonompongan sa mga nag-iistar sa darakulang siudad, edukadong mga tawo, asin mga hobenes. Dugang pa, arog kan mapatutunayan nin mga taga-Aprika, Asia, asin Latin Amerika, sa dakol na kadagaan an espiritismo nagin nang mahalagang kabtang kan buhay sa aroaldaw. Bakong makangangalas na an mga autor na si John Weldon asin Clifford Wilson nagkonklusyon sa saindang librong Occult Shock and Psychic Forces: “An dakol na komentarista garo baga naghohona na kita nasa panahon nin daing kaagid na pagkabuhay liwat nin okultismo.”
Iyo, an espiritismo asin okultismo—sa porma nin astrolohiya, hipnotismo, parasikolohiya, extrasensory perception, mahika, pag-interpretar nin mga pangatorogan, asin iba pa—nakaaakit sa gabos na klase nin tawo. Taano?
Primero, an ibang iglesya nin Kakristianohan nagkokonsinte asin nagtotogot pa ngani sa espiritismo. Isinusuherir ninda na an pakikomunikar sa mga espiritu saro sanang napapalaen na paagi nin pagrani sa Dios.
Bilang halimbawa, helinga si Izaak Amelo, 70 anyos na negosyante sa Suriname. Sa laog nin pitong taon sia sarong iginagalang na miembro kan konsilyo kan iglesya asin kadungan kaiyan bantog na patagolainan. Sinasabi nia sa paggirumdom: “Kada Sabado an bilog na konsilyo kan samong iglesya nagtitiripon sa luwas kan baryo tanganing makikomunikar sa mga espiritu. Magdamlag kami. Pagkaaga, binabantayan kan diakono an saiyang relo, asin sa mga ala singko, sinisenyasan nia kaming pumondo. Dangan kami nagkakarigos, nagbubulos, asin minadiretso sa simbahan—na tamang-tama an oras para sa pagsamba sa Domingong aga. Sa gabos na taon na idto an pastor noarin man dai nagsabi ni sarong tataramon nin pagkontra.”
Pakatapos na mapag-adalan an koneksion kan espiritismo asin kan mga iglesya sa Suriname, pinatunayan kan Olandes na si Propesor R. van Lier na an espiritismo ibinibilang nin dakol na “suplementaryong relihiyon.” Sa sarong pagsiyasat na bago pa sanang ipublikar kan Unibersidad nin Leiden, sinabi man nia na an espiritismo minimidbid na “sarong kabtang nin mahiwas na relihiyosong konstitusyon na dian iyan kataed nin Kristianismo.”
Alagad tibaad ihinahapot nindo, ‘An pag-ako daw kan mga iglesya nin Kakristianohan sa espiritismo sarong garantiya na iyan inooyonan nin Dios? Irarani daw kamo sa saiya kan pakikomunikar sa mga espiritu? Ano an aktuwal na sinasabi kan Biblia manongod sa espiritismo?’
[Ritrato sa pahina 3]
Nagigirumdoman ni Izaak Amelo an pakikikabtang kan bilog na konsilyo kan iglesya sa espiritistikong mga sesyon