Report kan mga Parabalangibog kan Kahadean

Tinawan nin Komendasyon an mga Eskuwelang Saksi

KAMO daw, bilang estudyante sa eskuwelahan, nasosopog na magtaram para sa saindong pagtubod? An mga eksperyensia sa ibaba nagpapaheling na an mga aking Saksing ini dai natakot na ipagdepensa an saindang Kristianong pagtubod asin tinawan nin komendasyon huli kaiyan.

◻ Sa sarong eskuwelahan sa Australia, an mga estudyante inasignaran na sumurat nin essay manongod sa Navidad, alagad an maestro nagsabi sa sarong 11 anyos na Saksi: “Aram ko na saro ka sa mga Saksi ni Jehova, kaya dai ka makasusurat manongod sa mga selebrasyon nin Navidad. Puwede kang sumurat nin ibang essay manongod sa ‘Kasaysayan nin Navidad.’” Ginibo kan sadit na tugang na babae an essay, na ginagamit an angay na impormasyon hale sa mga publikasyon kan Sosyedad asin iba pang reperensia. Sa pagngalas kan klase, an maestro nagkomento na an impormasyon ekselente asin tama sa kasaysayan. “Sa gabos na essay na naresibi ko, an saimo an pinakamarahay sa klase,” sabi kan maestro. Bilang resulta, an aking Saksi nakapasakamot nin sarong pulyetong School, 15 magasin, sarong librong Youth, asin duwang librong Mabuhay Sagkod Lamang sa saiyang maestro asin kaklase.

◻ Sa saro pang eskuwelahan sa Australia, an walong aking Saksi inasikaso nin sarong karibay na maestra kada hapon sa ultimong tolong semana kan klase, ta dai sinda nakikikabtang sa mga aktibidad sa Navidad. Kan huri sia nagkomento sa ina kan pira sa mga aki: “Sadit sana an nagin kabtang ko. Dakol na maestro an naglaog asin kinumusta ako. Sinabi ko sa sainda: ‘Ano man an iniisip nindo manongod sa saindang relihiyon asin sa dai ninda pag-ayon sa nagkapirang aktibidad, ini an pinakamarahay na grupo nin mga aki na inasikaso ko.’” Pakalihis nin pirang semana kan matagbuan sa pagharongharong, sia nagsabi: “Kulibat palan, ano iinestorya nindo an isinabi ko manongod sa mga aki sa eskuwelahan? Boot kong maaraman iyan nin gabos.”

◻ Hale sa Estados Unidos an eksperyensiang ini nin sarong 17 anyos na nasa ultimo anyo na sa haiskul na an klase sa ley purong an orolay manongod sa mga diretso may koneksion sa libertad sa relihiyon asin pagigin siblag kan Iglesya asin Estado. An duwa sa mga kaso manongod sa mga Saksi ni Jehova asin sa isyu sa dugo. An hoben na tugang na babae narisa na an report na pinag-oolayan may kinakampihan asin bakong makatanosan kun manongod sa mga katotoohan kan Biblia sa dugo asin sinabi nia iyan sa maestro. An simbag nia tawan sia kan oportunidad na magpahayag sa klase. Bago an saiyang pahayag, an mga estudyante naghona na an mga hokoman tama an desisyon sa pagpirit sa mga Saksi na salinan nin dugo kontra sa kagustohan ninda. Alagad pakatapos na madangog an basado sa Bibliang argumento, an klase sararong nagboto tumang sa mga desisyon kan hokoman. An tugang niato naogma kan dakol sa mga estudyante an nagdolok sa saiya asin naghagad nin dugang na impormasyon manongod sa mga tinutubod nin mga Saksi ni Jehova. Ngonyan sinasabi nia na mas naaapresyar nia na an eskuwelahan iyo an saiyang espesyal na teritoryo.

Iyo, kamong mga nag-eeskuwela igwa nin pambihirang teritoryo. Basta kamo may oportunidad, ipagpadagos an maboot na pagtabang sa saindong mga kaklase na maaraman an makangangalas na katuyohan nin Dios, asin mag-aako kamo nin komendasyon bako sanang sa iba kundi ki Jehova mismo!—Job 40:14.