Pagtabang sa Iba na Sumamba sa Dios
“Kun . . . may lumaog na dai nin pagtubod o tawong ordinaryo, . . . an mga hilom kan saiyang puso nahahayag, kaya sia malaob asin masamba sa Dios.”—1 CORINTO 14:24, 25.
1-3. Paano an dakol sa Corinto natabangan na magkamit kan pag-oyon nin Dios?
SA SAIYANG ikaduwang pagbiyahe bilang misyonero, si apostol Pablo nag-istar sa siudad nin Corinto sa laog nin saro may kabangang taon. Duman sia ‘nasibot na gayo sa tataramon, na nagpapatotoo.’ Na may anong resulta? “An kadaklan sa mga taga-Corinto na nagpakadangog nagpoon na magtubod asin mabautismohan.” (Gibo 18:5-11) Sinda “pinakangbanal . . . , na inapod na magin mga banal.”—1 Corinto 1:2.
2 Kan huri si Apolos nagsongko sa Corinto. Bago kaini, tinabangan sia ni Priscila asin Aquila na masabotan “nin mas tama an dalan nin Dios,” kaiba an manongod sa bautismo. Kaya sia nagin Kristiano na igwa kan marahay na boot o pag-oyon nin Dios. (Gibo 18:24–19:7) Tinabangan man ni Apolos an mga taga-Corinto na dati “ilinalagalag pasiring sa mga pulang ladawan.” (1 Corinto 12:2) Posible na an mga tawong ini tinokdoan kan Biblia sa saindang harong; puwede man sindang makanood paagi sa pag-atender sa mga pagtiripon na Kristiano.—Gibo 20:20; 1 Corinto 14:22-24.
3 An resulta kan siring na pagtotokdo iyo na an dakol na dating ‘mga dai nin pagtubod asin tawong ordinaryo’ nadagka sa tunay na pagsamba. Seguradong nakakokontentong maheling an mga lalaki asin babae na nag-ooswag pasiring sa bautismo asin pag-oyon nin Dios! Sagkod ngonyan ini nakakokontento pa.
Pagtabang sa ‵mga Dai nin Pagtubod Asin Tawong Ordinaryo’
4. Sa anong mga paagi na an dakol ngonyan natatabangan arog kaidto sa Corinto?
4 An mga Saksi ni Jehova ngonyan nagkukuyog man sa pagboot ni Jesus na “gumibo kamo nin mga disipulo sa mga tawo kan gabos na nasyon, na bautismohan nindo sinda.” (Mateo 28:19, 20 ) Pakatanoman kan mga banhi nin katotoohan sa nag-aakong mga puso, sinda minabuwelta asin binabaribian an mga ini. (1 Corinto 3:5-9; Mateo 13:19, 23) An mga Saksi nag-oopresir nin libreng semanal na pag-adal sa Biblia tanganing masimbag an mga hapot nin mga tawo asin makanood sinda nin mga katotoohan sa Biblia. An mga tawong iyan iniimbitaran man na umatender sa lokal na mga pagtiripon nin mga Saksi ni Jehova, kun paanong an mga “dai nin pagtubod” kan enot na siglo nag-atender sa Corinto. Alagad ano an maninigong magin punto-de-vista nin mga Saksi ni Jehova sa mga tawo na nag-aadal sa Biblia asin nag-aatender sa mga pagtiripon?
5. Ano an basihan sa Kasuratan para sa pagmamaan sa pakikiiba sa nagkapirang tawo?
5 Naoogma kitang maheling na sinda minadolok sa Dios. Pero, ginigirumdom niato na sinda bako pang bautisadong nagtutubod. Girumdomon man an duwang leksion na basado sa sinusundan na artikulo. (1 ) An mga Israelitas nagmaan sa dayong mga nakikiistar na, minsan ngani kaiba kan banwaan nin Dios asin nagkukuyog sa pirang pagboot, bakong tinuring mga proselito, mga tugang sa pagsamba. (2 ) An mga Kristianong taga-Corinto na nakikiiba sa ‘mga dai nin pagtubod asin tawong ordinaryo’ nagmamaan Huli sa mga tataramon ni Pablo: “Dai kamo makipagsakal na bakong timbang sa mga dai nagtutubod. Huli ta anong pakikiiba igwa an katanosan asin katampalasanan?”—2 Corinto 6:14.
6. Paano an mga “dai nin pagtubod” “nasasagwe” kan mga pagtiripon, asin anong klase an pagsagweng iyan?
6 Kaya minsan ngani inaako niato an ‘mga dai nin pagtubod asin tawong ordinaryo,’ aram niato na dai pa ninda naaabot an mga pamantayan nin Dios. Arog kan ipinaririsa kan Biblia sa 1 Corinto 14:24, 25, an mga tawong iyan tibaad kaipuhan na ‘siyasaton nin maingat,’ ‘sagweon’ pa ngani, kan saindang nanonodan. An siring na pagsagwe bakong hudisyal; dai sinda pinaaatubang sa komite hudisyal kan kongregasyon ta bako pa man sindang bautisadong miembro kaiyan. Imbes, bilang resulta kan saindang nanonodan, an mga bagohan na ini nakokombensir na kinokondenar nin Dios an ano man na paslo asin inmoral na gibo.
7. Anong dugang na pag-oswag an bobooton na magibo nin dakol na disipulo asin taano?
7 An dakol na dai pa bautisado tibaad pag-abot nin panahon gustong magin bako sanang mga paraatender sa pagtiripon bilang interesadong mga nag-aadal. An mga tataramon na ini ni Jesus nagpapaheling kun taano: “An disipulo bakong halangkaw sa saiyang paratokdo, alagad an gabos na natokdoan sa sangkap na paagi makaaarog sa saiyang paratokdo.” (Lucas 6:40) Naheheling kan inaadalan sa Biblia na an saiyang paratokdo ibinibilang na kaipuhan an ministeryo sa langtad asin nagkakamit nin kaogmahan dian. (Mateo 24:14) Kaya, may nagtatalubong pagtubod, an saro na nakakanood nin mga katotoohan sa Biblia asin nag-aatender sa mga pagtiripon tibaad isapuso an mga tataramon na: “Abaang gayon sa ibabaw kan kabukidan kan mga bitis kan nagdadara nin maogmang bareta, an nagbabalangibog nin katoninongan, an nagdadara nin maogmang bareta dapit sa orog karahay, an nagbabalangibog nin kaligtasan.” (Isaias 52:7; Roma 10:13-15) Minsan ngani bako pang bautisado, tibaad booton niang magin parahayag kan Kahadean na nakikiasosyar sa kongregasyon nin mga Saksi ni Jehova.
8, 9. (a) Ano an maninigong gibohon kun boot nin inaadalan sa Biblia na makikabtang sa ministeryo sa publiko? (b) Kun an duwa sa kamagurangan nakikipag-olay sa sarong nagpaplanong magin parahayag asin sa nagtotokdo sa saiya, ano an gigibohon ninda? (c) Anong paninimbagan an inaako nin bagong parahayag?
8 Kun maaraman kan Saksi na nangengenot sa pag-adal sa Biblia na an inaadalan boot nang makikabtang sa paglilingkod sa langtad, puwede nia iyan na ipakipag-olay sa nangengenot na paraataman, na mag-aareglo na an duwa sa kamagurangan kaolayon an inaadalan sa Biblia asin an nagtotokdo sa saiya. Naoogma an kamagurangan kun may bagohan na boot na maglingkod sa Dios. Dai ninda lalaoman na sia igwa kan sokol nin kaaraman na yaon sa mga bautisado na asin nag-oswag na sa katotoohan, na sa sainda orog an hinahagad. Pero, bobooton kan kamagurangan na seguradohon na bago an bagohan makikabtang sa ministeryo sa langtad kaiba kan kongregasyon, sia may kaaraman na sa mga katokdoan kan Biblia asin iinoyon na an saiyang buhay sa mga prinsipyo kan Biblia. Kaya may marahay na dahelan na an duwa sa kamagurangan kaolayon an nagpaplanong magin parahayag asin an Saksi na nangengenot sa pag-adal.a
9 Ipaaaram kan duwang magurang sa inaadalan na kun sia kuwalipikado na asin makikabtang na sa paglilingkod sa langtad, sia puwede nang tumao nin report sa paglilingkod sa langtad asin gigibohan na sia nin Congregation’s Publisher Record card. Ini magpapaheling kan saiyang pag-ayon sa teokratikong organisasyon nin mga Saksi ni Jehova asin kan saiyang pagpapasakop dian. (Ini totoo man sa gabos na nagtatao nin report sa paglilingkod sa langtad.) Maninigong iiba man sa orolay an hatol kan Biblia, arog kan sinasabi sa pahina 98 asin 99 kan Organized to Accomplish Our Ministry!’b Kaya, ini angay na panahon na an inaadalan kumua nin personal na kopya kan librong iyan.
10. (a) Paano an sarong dai pa bautisadong parahayag nagpapadagos na umoswag, asin may anong pasohan? (b) Taano ta ginigibo an pagliliwat sa terminong “inooyonan na kaiba”? (Helingon an nota sa ibaba.)
10 An tawo na nakuwalipikar na dai pa bautisadong parahayag kan maogmang bareta pasiring na sa direksion na magin “tawo na igwa kan marahay na boot.”c (Lucas 2:14) Minsan ngani sia dai pa nagdusay asin nabautismohan, ngonyan ikarereport na nia an saiyang paghuhulit kaiba kan minilyon na aktibo sa bilog na daga na ‘nagbabalangibog kan tataramon nin Dios.’ (Gibo 13:5; 17:3; 26:22, 23) Puwedeng ianunsiar sa kongregasyon na sia bagong dai pa bautisadong parahayag. Sia maninigong magpadagos na nag-aadal sa Biblia, nakikikabtang sa mga pagtiripon, iinaaplikar an saiyang nanonodan, asin ihinihiras iyan sa iba. Dai mahahaloy, bobooton niang gibohon an tangga nin Kristianong bautismo, sa siring nagigin inooyonan nin Dios asin ‘natandaan’ para sa kaligtasan.—Ezequiel 9:4-6.
Tabang Para sa Saro na Nagkasala
11. Ano an pagtratar kan kongregasyon sa mga bautisadong nagkasala?
11 Sa sinusundan na artikulo, pinag-olayan niato an mga probisyon kan kongregasyon sa pagtabang sa siisay man na bautisadong Kristiano na nakaginibo nin magabat na kasalan. (Hebreo 12:9-13) Asin nasabotan niato sa Biblia na kun an bautisadong nagkasala habong magsolsol, tibaad kaipuhan na itiwalag sia kan kongregasyon asin likayan na an ano man na pakikiiba sa saiya. (1 Corinto 5:11-13; 2 Juan 9-11; 2 Tesalonica 2:11, 12) Alagad, ano an mga gigibohon kun an sarong dai pa bautisadong parahayag magkasala nin magabat?
12. (a) Taano ta tatawan man nin maheherakon na tabang an dai pa bautisadong parahayag na nagkasala? (b) Paano an prinsipyo sa Lucas 12:48 konektado sa paninimbag sa kasalan?
12 Si Judas nagsadol na pahelingan nin pagkaherak an linahidan na mga Kristiano na nagkaigwa nin mga pagduda o naholog sa mga kasalan kan laman, basta sinda nagsosolsol. (Judas 22, 23; helingon man an 2 Corinto 7:10.) Kun siring, bako daw na orog na maninigong pahelingan nin pagkaherak an nagkasalang dai pa bautisado na nagpapaheling nin pagsolsol? (Gibo 3:19) Iyo, huli ta an saiyang espirituwal na pundasyon bako pang gayong marigon, asin mas limitado an kabatidan nia sa Kristianong pamumuhay. Tibaad dai pa nia nanodan an kaisipan nin Dios manongod sa nagkapirang bagay. Dai pa sia nag-aagi sa serye nin pakikipag-olay sa kamagurangan sa Biblia bago pabautismo, asin dai pa sia naglaog sa seryosong tangga nin pagpabautismo sa tubig. Dugang pa, si Jesus nagsabi na “sa tinawan nin dakol, dakol man an sisingilon.” (Lucas 12:48) Kaya, dakula an linalaoman sa mga bautisado na, kaiba nin mas dakol na kaaraman asin bendisyon, may espesyal na paninimbagan.—Santiago 4:17; Lucas 15:1-7; 1 Corinto 13:11.
13. Kun nagkasala an sarong dai pa bautisadong parahayag, ano an gigibohon kan kamagurangan tanganing makatabang?
13 Kaoyon sa hatol ni Pablo, an mga tugang na may espirituwal na kuwalipikasyon boot na tabangan an siisay man na dai pa bautisadong parahayag na guminibo nin sala bago nia iyan maaraman. (Ikomparar an Galacia 6:1.) Puwedeng pakiolayan kan kamagurangan an duwa sa sainda (tibaad an mga nakipag-olay sa saiya kan enot) na pagmaigotan na itanos sia kun boot niang patabang. Gigibohon ninda iyan, bakong Huli sa pagmawot na sagweon sia nin estrikto, kundi sa maheherakon na paagi asin sa espiritu nin kahoyoan. (Salmo 130:3) Sa kadaklan na kaso, an Makakasuratan na hatol asin praktikal na mga suhestion igo na tanganing gibohon an pagsolsol asin magiyahan sia sa tamang dalan.
14, 15. (a) Ano an puwedeng gibohon kun talagang nagsosolsol an nagkasala? (b) Anong limitadong nagpapaliwanag na komento an ikatatao sa nagkapirang kaso?
14 An duwang magurang magtatao nin paggiya na angay sa situwasyon kan nagkasalang dai pa bautisado. Sa nagkapirang kaso, puwede nindang iareglo na sa laog nin kadikit na panahon an nagkasala dai iiba sa Teokratikong Paadalan sa Pagmiministro o dai togotan na magkomento sa mga pagtiripon. O tibaad sabihan nia sinda na dai makikabtang sa ministeryo sa publiko kaiba kan kongregasyon sagkod na madugangan pa an saiyang espirituwal na pag-oswag. Dangan sasabihan sia ninda na puwede na giraray siang makikabtang sa ministeryo sa langtad. Kun an pagkakasala dai nagdara nin maraot na dangog asin dai nagtao nin peligro sa kalinigan kan aripompon, dai na kaipuhan na patanidan an kongregasyon paagi sa ano man na paisi.
15 Alagad ano kun maheling kan duwang magurang na an tawo may tunay na pagsolsol, pero aram nin dakol an kasalan? O ano kun sa huri maaraman nin dakol an pagkakasala? Ano man sa kasong ini, puwede nindang impormaran an Komite sa Paglilingkod kan Kongregasyon, na mag-aareglo nin simpleng paisi, na arog kaini: “An sarong bagay na kalabot si . . . inasikaso na, asin sia nagpapadagos na maglingkod bilang dai pa bautisadong parahayag kaiba kan kongregasyon.” Kapareho sa gabos na siring na bagay, puwedeng determinaran kan grupo nin kamagurangan kun baga marahay na sa ngapit tumao nin Makakasuratan na pahayag na may hatol manongod sa pagkakasalang nagibo.
16, 17. (a) Anong duwang situwasyon an puwedeng magin basihan nin Laen na paisi? (b) Paano an paising ini?
16 Paminsanminsan, an dai pa bautisadong parahayag na nagkasala habong kumuyog sa mamomoton na tabang. O tibaad magdesisyon an sarong dai pa bautisadong parahayag na habo na niang magpadagos na umoswag pasiring sa bautismo, asin sinabi nia sa kamagurangan na habo na niang ibilang sia bilang parahayag. Ano an dapat na gibohon? An pagtitiwalag dai ginigibo mapadapit sa mga siring na sa katunayan dai man nagin inooyonan nin Dios. An areglo nin pagtitiwalag sa habong magsolsol na mga parakasala aplikado sa mga “inaapod na tugang,” sa mga bautisado. (1 Corinto 5:11) Alagad ini daw nangangahulogan na dai na iintindihon an pagkakasala? Dai.
17 An kamagurangan may paninimbagan na ‘pastoran an aripompon nin Dios na nasa saindang pangataman.’ (1 Pedro 5:2) Kun madeterminaran nin duwang magurang na nag-oopresir na tumabang na an nagkasalang dai pa bautisado habong magsolsol asin dai na kuwalipikadong magin parahayag, iimpormaran ninda an tawo.d O kun an sarong dai pa bautisado magsabi sa kamagurangan na habo na niang midbidon bilang parahayag, aakoon ninda an saiyang desisyon. Arin man sa kasong ini, angay na itao kan Komite sa Paglilingkod kan Kongregasyon an sarong simpleng paisi sa angay na panahon, na sinasabing “Si . . . bako nang parahayag kan maogmang bareta.”
18. (a) Pakalihis nin siring na paisi, ano an gigirumdomon nin mga Kristiano sa personal na pagdedesisyon kun ano an igagawe? (b) Kaipuhan daw na biyong likayan an mga dai pa bautisado na nagkasala kan nakaagi?
18 Pakalihis kaiyan ano na an magigin pagheling nin mga Saksi sa tawong iyan? Bueno, kan enot sia sarong “dai nin pagtubod” na nag-aatender sa mga pagtiripon. Dangan sia nagmawot asin nakuwalipikar na magin parahayag kan maogmang bareta. Bako nang siring an kamugtakan, kaya sia saro na naman na kinabanon. Dai hinahagad kan Biblia na likayan nin mga Saksi an pakipag-olay sa saiya, ta bako man siang tiwalag.e Pero, an mga Kristiano mag-iingat sa siring na kinabanon na dai nagsasamba ki Jehova, arog kan ginibo nin mga Israelitas mapadapit sa dai tinuring mga dayong nakikiistar. An pag-iingat na ini nakatatabang na maprotehiran an kongregasyon sa ano man na “kadikit na lebadura,” o nakararaot na elemento. (1 Corinto 5:6) Kun sa huring panahon magpahayag sia nin tunay na pagmawot na adalan sia sa Biblia, asin garo baga oyon man digdi an kamagurangan, tibaad iyan makatabang saiya na maapresyar giraray kun gurano kadakulang pribilehiyo na sambahon si Jehova kaiba kan Saiyang banwaan.—Salmo 100.
19. Paano an kamagurangan makatatao sa pribado nin dugang pang tabang sa nagkapirang kaso?
19 Kun maheling kan kamagurangan na an sarong tawong arog kaini grabeng peligro sa aripompon, puwede nindang patanidan sa pribado an mga nasa peligro. Halimbawa, an dating parahayag tibaad sarong barobata na naholog sa pagbuburat o inmoralidad. Sa ibong kan paisi na bako na siang dai pa bautisadong parahayag, tibaad probaran niang makiamigo sa mga barobata sa kongregasyon. Sa situwasyon na iyan, kakaolayon kan kamagurangan sa pribado an mga magurang kan mga namemeligro, asin tibaad an mga barobata man. (Hebreo 12:15, 16; Gibo 20:28-30) Sa pambihira nanggad na kaso nin saro na nanriribok o madahas, puwede siang sabihan na dai sia puwedeng umatender sa mga pagtiripon asin na an ano man na pagprobar na lumaog ibibilang na paglapas.
Pagtabang sa mga Minor de Edad na Sumamba sa Dios
20. An Kristianong mga magurang nagtatao nin anong tabang sa saindang mga aki, asin may anong resulta?
20 Itinatao kan Biblia sa mga magurang an paninimbagan na tokdoan an saindang mga aki sa dalan nin banal na katotoohan. (Deuteronomio 6:4-9; 31:12, 13) Kaya, haloy nang sinasadol nin mga Saksi ni Jehova an mga pamilyang Kristiano na magkaigwa nin semanal na pag-adal sa Biblia. An Kristianong mga magurang maninigong sadolon an saindang mga aki na umoswag pasiring sa pagdusay asin bautismo asin sa siring kamtan an pag-oyon nin Dios. (Talinhaga 4:1-7) Naheheling niato sa mga kongregasyon an makaoogmang resulta—an ginatos na ribong arogan na mga barobata na namomoot ki Jehova asin gustong sumamba sa saiya sagkod lamang.
21-23. (a) Sa pangenot, ano an ginigibo sa pagkakasala nin sarong minor de edad? (b) Ano an kabtang kan kamagurangan sa kongregasyon sa siring na mga situwasyon?
21 An Kristianong mga magurang igwa man kan pangenot na paninimbagan na disiplinahon asin sagweon an saindang mga aki, na itinatao an ano man na restriksion o mamomoton na kastigo na pinaghohona nindang kaipuhan. (Efeso 6:4; Hebreo 12:8, 9; Talinhaga 3:11, 12; 22:15) Alagad, kun an sarong minor de edad na nakikiasosyar bilang dai pa bautisadong parahayag maholog sa magabat na pagkakasala, iyan maninigong tawan nin atension kan kamagurangan na ‘nagbabantay sa kalag’ kan aripompon.—Hebreo 13:17.
22 Sa pundamental, an siring na pagkakasala maninigong asikasohon arog kan sinasabi sa enotan kan artikulong ini. An duwa sa kamagurangan puwedeng iasignar na siyasaton an bagay. Halimbawa, puwede nindang ipakipag-olay nguna sa mga magurang (o sarong magurang) kun ano an nangyari, kun ano an kaisipan kan aki, asin kun anong mga paagi nin pagtatanos an ginibo. (Ikomparar an Deuteronomio 21:18-21.) Kun an situwasyon kontrolado na kan Kristianong mga magurang, an kamagurangan puwede na sanang makipag-olay sa sainda sa panapanahon tanganing tumao nin nakatatabang na hatol, mga suhestion, asin mamomoton na pagpakosog.
23 Alagad, kun beses iparirisa kan pakikipag-olay sa mga magurang na pinakamarahay na an kamagurangan kaolayon an nagkasalang minor de edad asin an mga magurang. Ginigirumdom an mga limitasyon asin tendensia nin mga barobata, pagmamaigotan kan kamagurangan na tokdoan na may kahoyoan an hoben pa, dai pa bautisadong parahayag. (2 Timoteo 2:22-26) Sa nagkapirang kaso, tibaad magin malinaw na sia dai na kuwalipikadong magin parahayag asin maninigong itao an angay na paisi.
24. (a) Dawa kun an sarong minor de edad nakikabtang sa magabat na kasalan, ano an angay na gibohon nin mga magurang, asin paano ninda ini magigibo? (b) Paano ini aplikado sa sarong minor de edad na natiwalag?
24 Pakatapos, ano an gigibohon nin mga magurang para sa saindang minor de edad na aki na nagkasala? May paninimbagan pa man giraray sinda sa saindang aki, minsan pa sia madiskuwalipikar bilang dai pa bautisadong parahayag o dawa pa sia matiwalag huli sa pagkakasala pakatapos na mabautismohan. Kun paanong padagos nia sindang tatawan nin pagkakan, gubing, asin istaran, kaipuhan na tokdoan asin disiplinahon sia ninda kaoyon sa Tataramon nin Dios. (Talinhaga 6:20-22; 29:17) Kun siring an mamomoton na mga magurang puwedeng mag-areglo na adalan sia sa Biblia, dawa kun sia tiwalag.f Tibaad makua nia an pinakanagtatanos na pakinabang sa pakikipag-adal ninda sa saiya nin solo. O tibaad magdesisyon sinda na puwede siang magpadagos na umiba sa pag-adal kan pamilya. Minsan ngani sia nalagalag, boot nindang maheling sia na nagbuwelta ki Jehova, arog kan aking gastador sa ilustrasyon ni Jesus.—Lucas 15:11-24.
25. Taano an mamomoton na interes asin tabang ta itinatao sa mga “dai nin pagtubod” ngonyan?
25 An pasohan kan satong paghuhulit asin pagtotokdo tabangan an iba na magin maogmang mga parasamba sa tunay na Dios. An ‘mga dai nin pagtubod asin tawong ordinaryo’ sa Corinto napahirong ‘maglaob asin sumamba sa Dios, na sinasabi: “An Dios tunay nanggad na yaon sa saindo.”’ (1 Corinto 14:25) Nakaoogma nanggad na maheling ngonyan an padakol nang padakol na mga tawo na minadolok sa pagsamba sa Dios! Ini mamuraway na kaotoban kan kapahayagan kan anghel: “Kamurawayan sa Dios sa kaitaasan, asin sa daga katoninongan sa mga tawo na igwa kan marahay na boot [o, mga tawo na may pag-oyon nin Dios].”—Lucas 2:14.
[Mga Nota sa Ibaba]
a An saro sa mga magurang maninigo na miembro kan Komite sa Paglilingkod kan kongregasyon. An saro man puwedeng an magurang na pinakamidbid an inaadalan o an nagtotokdo, arog baga kan nangengenot sa Pag-adal sa Libro kan Kongregasyon.
b Ipinublikar kan Watchtower Bible and Tract Society of New York, Inc., 1983.
c Kaidto, an sarong dai pa bautisado na kuwalipikado nang makikabtang sa ministeryo sa langtad inaapod na “inooyonan na kaiba.” Minsan siring, an “dai pa bautisadong parahayag” mas tamang ngaran, nangorogna Huli sa ipinaririsa kan Biblia na an pag-oyon nin Dios resulta nin balidong pagdusay asin Kristianong bautismo.
d Kun an tawo dai kontento sa konklusyon na ini, puwede niang hagadon (sa laog nin pitong aldaw) na repasohon an bagay.
e Kan enot, an mga dai pa bautisado na nagkasala asin dai nagsolsol biyong linikayan. Minsan ngani, arog kan pagliliwat na nasa itaas, ini dai kaipuhan, an hatol sa 1 Corinto 15:33 maninigo pa man giraray na kuyogon.
f An tiwalag na mga paryentes na dai man kaiba sa harong maninigong trataron sono sa hatol kan Kasuratan na ipinaliwanag sa The Watchtower kan Abril 15, 1988, pahina 26-31; Setyembre 15, 1981, pahina 26-31 (sa Torrengbantayan kan Abril 1, 1982, pahina 13-18).
Nagigirumdoman daw Nindo?
◻ Ano an punto-de-vista nin mga Kristiano sa mga “dai nin pagtubod” na nag-aatender sa mga pagtiripon?
◻ Kun an sarong inaadalan sa Biblia boot na makikabtang sa paglilingkod sa langtad, ano an mga ginigibo kan kamagurangan, asin anong paninimbagan an inaako kan inaadalan?
◻ Ano an ginigibo kun makaginibo nin magabat na kasalan an sarong dai pa bautisadong parahayag?
◻ Paano matatabangan nin mga magurang asin kan kamagurangan sa kongregasyon an mga aking minor de edad na kaiba pa sa harong, dawa kun magkasala nin magabat an mga hobenes na iyan?
[Ritrato sa pahina 16]
An pagigin parahayag, minsan ngani dai pa bautisado, sarong mahalaga asin responsableng tangga pasiring sa pagkakamit kan pag-oyon nin Dios