Sararo sa Irarom nin Bandera nin Pagkamoot

“Orog sa gabos, magkaigwa nin makosog na pagkamoot sa lambang saro.”—1 PEDRO 4:8.

1. Anong klaseng pagkamoot an naheheling niato sa banwaan nin Dios ngonyan, asin ano an ibinabalangibog kan linahidan na mga Kristiano magpoon kan 1922?

NAHEHELING daw niato an siring na pagkamoot sa tahaw kan banwaan nin Dios ngonyan? Iyo nanggad! Ini pagkamoot na nasisentro sa pagmidbid asin pagsuportar sa soberaniya ni Jehova, kun paanong iyan sinuportaran ni David. Nangorogna poon kan taon 1922, an linahidan na mga tugang ni Jesu-Cristo, “an Aki ni David,” nagbabalangibog sa bilog na daga na an Kahadean nin Dios harani na asin na an mga parasorog sa mapan-aping palakaw ni Satanas napapaatubang sa paglaglag kan nombradong Hokom nin Dios, si Jesu-Cristo.—Mateo 21:15, 42-44; Kapahayagan 19:11, 19-21.

2. Taano ta maaapod si David na ‘sarong lalaki na nasosonoan kan puso ni Jehova’?

² Si David ‘sarong lalaki na nasosonoan kan puso ni Jehova.’ Ini risa sa saiyang pagkamoot ki Jehova asin sa Saiyang katanosan—mga ugale na minsan an kobardeng si Hadeng Saul nag-admitir na yaon ki David—iyo, sa mga kuwalidad nia na pagigin daing takot, bilog na pusong debosyon ki Jehova, marahay na pangengenot, asin mapakumbabang pagpapasakop sa teokratikong areglo.—1 Samuel 13:14; 16:7, 11-13; 17:33-36; 24:9, 10, 17.

3. Ano an saboot ni Jonatan ki David, asin taano?

³ Pagkatapos na madaog nia si Goliat, si David nagbuwelta ki Saul. Kaidto naglataw an saro pang namomoot sa katanosan. Sia si Jonatan, matuang aki ni Hadeng Saul. “Asin nangyari na, pakatapos tolos [ni David] na magtaram ki Saul, an mismong kalag ni Jonatan nagin dayupot sa kalag ni David, asin namotan sia ni Jonatan na siring sa saiyang sadiring kalag.” (1 Samuel 18:1) Imbes na sa-laman na kapusoan asin tibay sa paggamit nin lagpitaw, an odok sa pusong hinahangaan ni Jonatan iyo an malaad na kaigotan ni David na halean nin kalanghadan an ngaran nin Dios, an saiyang kadaihan nin kapasloan, an saiyang bilog na pagsarig ki Jehova.—Ikomparar an Salmo 8:1, 9; 9:1, 2

4. Ano an ginibo ni Jonatan bilang pagmidbid sa pagigin linahidan ni David na magin hade?

⁴ Minsan ngani si Jonatan mas matua ki David nin mga 30 anyos, nakasaro sia kan hoben na guerrerong ini sa nagdadanay na bogkos nin pagkakatood. “Asin si Jonatan saka si David naggibo nin tipan, huli sa pagkamoot nia sa saiya nin siring sa saiyang kalag. Siring man, hinuba ni Jonatan an daing takyag na pan-ibabaw na gubing na sulot nia asin itinao iyan ki David, siring man an saiyang mga gubing, pati an saiyang espada asin an saiyang pana patin an saiyang habay.” (1 Samuel 18:3, 4) Pambihira nanggad ining pagpapaheling nin pagmidbid ni Jonatan! Si Jonatan kutana an eridero ni Saul. Pero sia nagpahayag nin mainit, may prinsipyong pagkamoot ki David asin nin pagpasakop sa saiya bilang an saro na linahidan na magin hade, an saro na nangongorog na desidido na suportaran an ngaran asin soberaniya ni Jehova.—2 Samuel 7:18-24; 1 Cronica 29:10-13.

5. Ano an minidbid ni Jonatan mapadapit sa teokratikong pakikilaban?

⁵ Si Jonatan mismo saro man na parapakilaban para sa katanosan. Sia nagsabi na “bakong mapawot ki Jehova na magligtas paagi sa dakol o paagi sa kadikit.” Taano? Huli ta minidbid ni Jonatan na perming kaipuhan na hagadon an banal na paggiya para sa kapangganahan sa teokratikong pakikilaban. Kan si Jonatan dai tinutuyo na nakaginibo nin pagkakasala na huli kaiyan sinentensiahan sia ni Saul na magadan, mapakumbaba niang inako an paghokom. Marahay sana ta binalukat sia kan banwaan.—1 Samuel 14:6, 9, 10, 24, 27, 43-45.

Pagpapahayag nin Maimbod na Pagkamoot

6. Paano an maimbod na pagkamoot ni Jonatan nagtabang ki David?

⁶ Si Saul nauri sa kabantugan ni David bilang guerrero asin naghingoa na gadanon sia; alagad ta tuminabang an maimbod na pagkamoot ni Jonatan! An tala nagsasabi: “Kun manongod ki Jonatan, an aki ni Saul, sia namoot nin makuri ki David. Kaya sinabihan ni Jonatan si David, na an sabi: ‘Si Saul na sakuyang ama nagmamawot na ipagadan ka. Kaya ngonyan mag-ingat ka, tabi, sa aga, asin mag-erok ka sa hilom asin magtago ka.’” Sa okasyon na idto, napabahaw ni Jonatan an boot ni Saul, kaya naligtas si David. Alagad ta an orog pang mga kapangganahan ni David sa ‘pakikilaban tumang sa mga Filisteo patin paglugad sa sainda na kanigoan an nagadan’ nakapukaw liwat sa kaanggotan ni Saul. Nagdesisyon liwat sia na gadanon si David, kaya si David nagdulag.—1 Samuel 19:2-10.

7. Kan makaolay ni Jonatan an dulag na si David, ano an isinabi ninda sa lambang saro sa pagpatunay liwat sa tipan?

⁷ Pag-abot nin panahon, nakaolay kan dulag na si David si Jonatan, na nagsabi: “Ano man an sabihon kan saimong kalag gigibohon ko para sa saimo.” Pinatunayan liwat kan duwa an sarong tipan sa atubangan ni Jehova, asin si David nanuga na noarin man dai nia puputolon an mamomoton na kabootan sa pamilya ni Jonatan—sarong panuga na maimbod niang inotob. “Kaya si Jonatan suminumpa giraray ki David huli sa pagkamoot nia sa saiya; huli ta sia namoot sa saiya nin siring sa pagkamoot nia sa saiyang sadiring kalag.”—1 Samuel 20: 4-17; 2 Samuel 21:7.

8. Taano si Jonatan asin David ta hilom na nagtagbuan sa sarong oma, asin ano an nangyari sa okasyon na idto?

⁸ Si Hadeng Saul nagin marigon sa desisyon nia na gadanon si David. Tara, tinugda pa ngani ni Saul nin budyak an sadiri niang aking si Jonatan kan ini magtaram apabor ki David! Kaya hilom na tinagbo ni Jonatan si David sa sarong oma. “Kun manongod ki David, . . . naglaob sia sa daga asin duminoko nin makatolo; asin naghadokan sinda asin naghinibian, sagkod na uminorog an paghibi ni David. Asin si Jonatan nagsabi ki David: ‘Lakaw sa katoninongan, mantang kita suminumpa, kitang duwa, sa ngaran ni Jehova, na sinasabi, “Mamugtak logod si Jehova sa pag-oltanan niato asin sa pag-oltanan kan sakuyang banhi asin kan saimong banhi sagkod lamang.”’” Kaya nagsuwayan sinda, asin si David nagin dulag sa kapatagan nin Zif.—1 Samuel 20:41, 42.

9, 10. (a) Paano pinakosog ni Jonatan si David sa seguro ultimong pagkakahelingan kan duwa? (b) Kan si Jonatan asin Saul magadan kan mga Filisteo, anong panambitan an ginibo ni David, asin paano nia iyan tinapos?

⁹ Mamomoton, padagos na pinakosog ni Jonatan si David. Arog kan sabi kan tala: “Si Jonatan na aki ni Saul tuminindog asin nagduman ki David sa Hores, tangani na mapakosog nia an saiyang kamot manongod sa Dios. Asin sia nagsabi sa saiya: ‘Dai ka matakot; huli ta dai ka makukua kan kamot ni Saul na sakuyang ama, asin ika maghahade sa Israel, asin ako magigin ikaduwa sa saimo; asin iyan naiisihan ni Saul na sakuyang ama.’ Dangan an duwa naggibo nin tipan sa atubangan ni Jehova.”—1 Samuel 23:15-18.

¹⁰ Minalataw na idto an ultimong pag-oolay ni David asin kan maimbod niang katood na si Jonatan. Kan huri, kan si Jonatan asin Saul pareho nagadan sa pakikilaban sa mga Filisteo, si David naggibo nin sarong panambitan, “An Pana.” Dian nagpahayag sia nin paggalang ki Saul bilang an linahidan ni Jehova alagad tinapos nia an saiyang awit sa mga tataramon na: “Si Jonatan ginadan sa saimong mga kalangkawan! Nagmomondo ako manonongod sa saimo, tugang kong Jonatan, nagin kang marahayon sa sakuya. An saimong pagkamoot sa sako orog na makangangalas kisa pagkamoot nin mga babae. Napukan an makokosog asin napara an mga hamo sa pakikilaban!” (2 Samuel 1:18, 21, 25-27) Linahidan kaidto sa ikaduwang beses si David, bilang hade sa Juda.

Mga Katimbang sa Modernong Aldaw

11, 12. (a) Anong klaseng pagkamoot an ipinaheling ni David asin Jonatan? (b) Ano an ipinanganino kan makosog na pagkaminootan ni David asin Jonatan?

¹¹ Mantang “an gabos na Kasuratan ipinasabong nin Dios asin kapakipakinabang para sa pagtokdo,” ano an manonodan niato sa kasaysayan ni David asin Jonatan? (2 Timoteo 3:16) Maririsa niato na igwa nin pagkamoot na “orog na makangangalas kisa pagkamoot nin mga babae.” Totoo, an “pagkamoot nin mga babae” puwedeng magin magayon asin nakakokontento kun iginagalang an mga pagboot ni Jehova manongod sa pag-agom. (Mateo 19:6, 9; Hebreo 13:4) Alagad ta si David asin Jonatan itinao an halimbawa nin mas marahay pang kabtang nin pagkamoot, kaoyon sa pagboot na: “Dangoga, O Israel: Si Jehova na satuyang Dios sarong Jehova. Asin kamotan mo si Jehova na saimong Dios sa bilog mong puso asin sa bilog mong kalag asin sa bilog mong kosog.”—Deuteronomio 6:4, 5.

¹² Si David asin Jonatan nagkakasaro sa pagpapahayag kan pagkamoot na iyan mantang sinda nakikipaglaban tanganing haleon sa ngaran ni Jehova an gabos na langhad na ibinugtak dian kan Saiyang mga kaiwal. Sa paggibo kaini, pinatalubo man ninda an “makosog na pagkamoot sa lambang saro.” (1 Pedro 4:8) An pag-iba-iba ninda sa bagay na ini labi pa ngani sa pagboot na nasa Levitico 19:18: “Kamotan mo an saimong kapwa nin siring sa saimo man sana.” Tunay nanggad, iyan anino kan klase nin pagkamoot na ipinaheheling sa “bagong togon [ni Jesus], na kamo magkaminorootmootan; siring sa pagkamoot ko sa saindo, na kamo man magkaminorootmootan.” An pagkamoot ni Jesus mapagsakripisyo bako sanang sa saiyang lubos na pagpasakop sa kabotan ni Jehova kundi siring man sa saiyang pagigin andam na “itao an saiyang kalag dahel sa saiyang mga katood.”—Juan 13:34; 15:13.

Sarong “Aripompon” na Sararo

13. Anong grupo nin mga parabalangibog kan Kahadean an naglataw partikularmente magpoon kan 1935, asm may anong pakikisumaro sa sainda an linahidan na mga Kristiano?

¹³ An linahidan na mga Kristiano na kabilang sa “sadangoton na aripompon” iyo an nag-agi sa pinakamasakit na kabtang kan pakikilaban sa modernong Goliat. Alagad, poon kan 1935 inibanan sinda nin mga parabalangibog kan Kahadean na kabilang sa saro pa asin mas dakulang “toril.” An mga “ibang karnerong” ini nakasaro kan natatada pang linahidan na mga “karnero” sa “sarong aripompon” na sakop kan “sarong pastor,” “an Aki ni David,” sa superlatibong bogkos nin mamomoton na pagkasararo—kapareho kan sa pag-oltanan ni Jonatan asin David.—Lucas 12:32; Juan 10:16; Ezequiel 37:24.

14. Ano an katimbang kan mga pagprobar ni Saul na gadanon Si David, asin kan mamomoton na pagpamidind ni Jonatan na sia nasa lado ni David?

¹⁴ Mantang an grupong Jonatan na ini nagpopoon na dumakol tanganing magin dakulang kadaklan, puminotok an Guerra Mundial II, kaya an mga linahidan asin an saindang kairiba pareho nabalo nin makuri. Mga taon idto nin maringis na paglamag, na sa parate sa sutsot kan klero. Ini katimbang kan mga pagprobar ni Saul na gadanon an linahidan na si David asin, sa huri, si Jonatan kan ini mamomoton na magpamidbid na nasa lado ni David. Kanigoan kakosog na pagkamoot sa lambang saro an ipinaheling kan mga grupong David asin Jonatan kan panahon na idto! An ilustrasyon ni Jesus sa Mateo 25:35-40 parateng nagkaigwa nin literal na kaotoban.a

15. (a) Anong gawe kan mga Saksi an kabaliktaran sa ginigibo kan modernong grupong Saul? (b) Ano sa satong aldaw an tibaad katimbang kan “maraot na espiritu hale ki Jehova” na nakaribok ki Hadeng Saul?

¹⁵ An pagdadanay sa integridad kan mga Saksi ni Jehova kabaliktaran nanggad kan gawe kan modernong grupong Saul! An mga Saksi, na “bakong kabtang kan kinaban,” nagkuyog sa pagboot ni Jesus na “magkaminorootmootan” sa bilog na kinaban. (Juan 15:17-19) Sa ibong na kampi, sa duwang guerra mundial an klero nin Kakristianohan sa man-ibong-ibong na lado namibi sa saindang “dios” para sa kapangganahan, mantang an minilyon na soldados ginagadan kan saindang mga karelihiyon na tagaibang nasyon. An “maraot na espiritu hale ki Jehova” na nakaribok ki Saul katimbang kan resulta kan pagbubo kan mga anghel sa mga damat nin Kapahayagan kapitulo 8. Malinaw na an klero nin Kakristianohan mayo kan banal na espiritu ni Jehova.—1 Samuel 16:14; 18:10-12; 19: 10; 20:32-34.

16. (a) Paano ginamit kan klero an duwang guerra mundial tanganing apihon an banwaan ni Jehova? (b) Sa nakaaagi pa sanang mga taon, taano ta masasabi na an modernong Saul sige-sige sa pagpersegir sa banwaan nin Dios?

¹⁶ Kan 1918 ginamit kan klero an krisis kan guerra na kombensiron an politikal na mga kapangyarihan sa Estados Unidos na gumibo nin aksion tumang sa responsableng mga opisyales kan Watch Tower Society asin sa katapustapusi ibilanggo sinda. (An mga estudyanteng ini sa Biblia kan huri biyong napatunayan na daing sala.) Kaidtong ikaduwang guerra mundial, an mga Saksi ni Jehova pinagbawalan sa sakop kan mga kapangyarihan na Axis asin sa kadaklan na nasyon kan British Commonwealth, sa parate bilang resulta nin relihiyosong pamimirit. Halimbawa, helinga an yaon digding kopya nin sarong surat na ipinadara kan Arsobispo nin Sydney (na kan huri nagin kardinal) bago pagbawalan an mga Saksi ni Jehova sa Australia. Kan an pagprohibir labanan sa Halangkaw na Korte nin Australia, an huwes na nagbibista, si Huwes Starke, inapod iyan na “bakong makatanosan, kapritso sana asin mapan-api.” An pagprohibir hinale kan Hunyo 14, 1943, asin an gobyerno kuwenintahan nin danyos. Sa mas nahuhuring mga taon, an relihiyosong pamimirit sa nagkapirang gobyerno sa Aprika asin Asia nagbunga nin daing herak na pan-aapi sa mga Saksi ni Jehova. Kaya an modernong Saul—an klero nin Kakristianohan—sige-sige sa pagpersegir sa banwaan nin Dios.

17. (a) Paano inatubang kan mga Saksi ni Jehova an nagpapadagos na mga pamimirit nin politika asin relihiyon? (b) Ano an ipinaheheling kan lakop sa kinaban na pagkasararo kan mga Saksi?

¹⁷ Sa mga taon nin 1980, paano inatubang nin mga Saksi ni Jehova an nagpapadagos na pamimirit nin politika asin relihiyon? Tara, kun paanong inatubang ni David si Goliat, asin ni David saka Jonatan si Hadeng Saul! Sinda daing takot asin determinado na magdanay sa integridad mapadapit sa isyu nin soberaniya, huli ta aram ninda na manggagana an Kahadean nin Dios. (Daniel 2:44) Sa atubang nin paglamag, sinda sararo, na nagpapakinosogan sa internasyonal na bogkos nin pagkamoot na noarin man dai pa naheling kan kinaban. Bilang mga neutral sa panahon nin guerra, dai ninda pinabobolos an dugo kan saindang mga kapagtubod sa ibang nasyon. (Miqueas 4:3, 5) Kaya saindang ipinaheheling na sinda an grupo na sinasabi ni Jesus kan sia magsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) Bilang lakop sa kinaban na kasararoan nin magturugang, an mga Saksi ni Jehova ‘nagsolog nin pagkamoot, an sangkap na bogkos nin pagkasararo,’ bogkos na dai naoolang nin gabos na rasyal, sa-tribo, asin nasyonal na mga linderos.—Colosas 3:14.

Pagpaheling nin “Makosog na Pagkamoot”

18. (a) Ano an katimbang ngonyan kan pagkamoot ni Jonatan ki David, asin paano ini naririsa? (b) Ano an ibinunga sa bilog na kinaban kan dai nakikikompromisong paninindogan kan grupong David?

¹⁸ Girumdoma na “an mismong kalag ni Jonatan nagin dayupot sa kalag ni David, asin namotan sia ni Jonatan na siring sa saiyang sadiring kalag.” Kanigoan kamakangangalas kan nagin katimbang kaini sa “huring mga aldaw” na ini! (2 Timoteo 3:1, 14) Sa bilog na kariribokan na daing kamanungdanan sa madahas na panahon na ini, may sarong grupo, an mga Saksi ni Jehova, na nagpadanay sa mamomoton na pagkasararo na lakop sa kinaban. Bilang neutral na mga Kristiano, saindang iginalang an saindang Kaglalang bilang Soberanong Kagurangnan sa bilog na katawohan. (Salmo 100:3) A, an modernong Refaim—an politikal na mga paryentes ni “Goliat”—tibaad dai mag-ontok sa pagduhagi sa espirituwal na Israel. (2 Samuel 21:21, 22) Asin an modernong Saul—an klero nin Kakristianohan—tibaad magpadagos na magtao nin problema sa mga grupong David asin Jonatan. (1 Samuel 20:32, 33) Alagad ta “ki Jehova an ralaban.” Bilang Soberanong Kagurangnan, kakamtan nia an ultimong kapangganahan para sa saiyang maimbod na mga lingkod. Sa pakamasid sa dai nakikikompromisong paninindogan kan grupong David, an minilyon—sa gabos na nasyon—kan grupong Jonatan, kaiba pati an dating mga paralamag, uminiba sa sainda sa irarom kan ‘bandera nin pagkamoot’ ni Cristo.b—1 Samuel 17:47; Awit ni Salomon 2:4.

19, 20. (a) Ano an nagkapira sa tampok na mga kabtang kan aktibidad nin mga Saksi na ipinaheheling kan tsart sa pahina 4-7 kan Enero 1, 1989 Torrengbantayan? (b) Ano an rikas kan pagtalubo nin mga Saksi sa laog kan dekada nin 1979-88? (c) Taano ta masasabi na an mga Saksi sarong banwaan na tunay na sararo sa bilog na kinaban, asin kun siring anong hapot an minalataw?

¹⁹ Puwede nindong repasohon an naghihiwas na aktibidad kan minilyon na mga Saksing ini paagi sa pagheling kan tsart sa pahina 4-7 kan Enero 1, 1989 na Torrengbantayan. Sa laog kan dekada nin 1979-88, an bilang nin mga parahulit kan maogmang bareta kan napatindog nang Kahadean nin Dios nagdakol magpoon sa 2,186,075 sagkod sa 3,592,654, 64.3-porsientong pag-oswag. Sa bilog na kinaban, an mga ini mga tawong talagang sararo sa saro sanang pagtubod, sa saro sanang paglilingkod sa Dios, asin sa saro sanang dai nagliliwatliwat na debosyon sa moral na mga prinsipyo kan Biblia. Sa dayupot na internasyonal na grupong ini aplikado ngonyan an mga tataramon ni Jesus: “Kun otobon nindo an sakong mga togon, magdadanay kamo sa sakong pagkamoot, kun paanong ako nag-otob sa mga togon kan Ama asin nagdanay sa saiyang pagkamoot.”—Juan 15:10; ikomparar an 1 Corinto 1:10.

²⁰ Minsan ngani sinda naghuhulit sa labing 200 na laen-laen na tataramon, an mga saksing ini ni Jehova nagtataram kan “malinig na tataramon” nin katotoohan mantang sinda naglilingkod sa Dios nin “daramay.” Digdi, inaarog ninda an mamomoton na halimbawa ni David asin Jonatan. (Sofonias 3:9; 1 Samuel 20:17; Talinhaga 18:24) Kun kamo dai pa nakikisaro sa banwaan nin Dios, dai daw nindo mamawoton na magin kabtang kan modernong grupong Jonatan? Puwede nindong gibohon iyan na pasohan, asin an mga Saksi ni Jehova magpapaheling nin makosog na pagkamoot sa pagtabang saindo na maabot iyan.

[Mga Nota sa Ibaba]

Mga Hapot sa Pagrepaso

◻ Paano nagpahayag si Jonatan nin maimbod na pagkamoot ki David?

◻ Anong kiaseng pagkamoot an ipinanganino kan pagkaminootan ni David asin Jonatan?

◻ Paano an kiero nin Kakristianohan guminawe na kapareho ni Hadeng Saul kan persegiron nia si David?

◻ Ano ngonyan an nakaaagid sa pagkamoot ni Jonatan ki David?

◻ Ano an ipinaheheling kan pagkasararo nin mga Saksi sa bilog na kinaban?

[Kahon sa pahina 11]

St. Mary’s Cathedral

Sydney

August 20, 1940.

The Rt. Hon. W. M. Hughes, M.H.R.,K.C.,

Attorney General,

CANBERRA.

Dear Mr. Hughes:

(TRADUKSION KAN SURAT)

Pinasasalamatan ko an saimong surat kan petsa 9 kan satuyang presenteng panahon manongod as mga Pagprotesta na iinatubang sa saimo ni Mr. Jennings, M.P.

Siyempre. nasasabotan ko na kaipuhan na gibohon mo an pinakadakulang pagmamaan na mahihimo sa siring kadelikadong bagay na manongod dian iinatubang an mga pagprotesta.

Alagad, kun an solamenteng pagduda mo gikan sa bagay na an mga tawong ini naghihingako na nagpapalakop kan mga doktrina nin Kristianismo, may dakulang paggalang na isinusuherir ko na an saimong paghusgar sa paggibo ninda kaini ibasar, bakong sa paghihingako ninda, kundi sa mga katunayan. Para sa mga katunayan. isinusumitir ko an sadiri nindang mga babasshon asin an sadiri nindang mga tataramon saka gibo, na pinatutunayan kan Pulisya ken New South Wales, Mas dipisil na imahinaron an malabi pa digdi kakontra sa Kristianismo.

An Hepe kan Pulisiya sa N.S.W. nagpahayag kan saiyang paglaom na an mga autoridad kan Commonwealth ideklarar na ilegal na grupo an nasabing sosyedad tangani na an Pulisiya mskagibo nin mas epektibong aksion mapadapit dian

With every good wish, I remain,

Yours faithfully,

ARCHBISHOP OF SYDNEY