Kamagurangan—Ingatan an Ipinaniwala Saindo
“Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki.”—GIBO 20:28.
1. Ano an kairiba sa ipinaniwala sa Kristiano?
SI Jehova Dios nagtao sa mga yaon sa saiyang daganon na organisasyon nin makangangalas na ipinaniwala. Alagad ano an ipinaniwala? Ini sarong bagay na igwa nin halaga na ipinaniwala sa sarong tawo na maninimbag. Kairiba sa ipinaniwala sa Kristiano “an arogan nin marahay na mga tataramon,” an katotoohan na itinao paagi sa Kasuratan asin ihinihiras kan “maimbod asin madonong na oripon” bilang “kakanon sa igong panahon.” (2 Timoteo 1:13, 14; Mateo 24:45-47) Kairiba sa ipinaniwalang ini an ministeryo na konektado sa katotoohan, na kaipuhan na ihulit sa laog asin sa luwas kan kongregasyon. (2 Timoteo 4:1-5) An mga parabalangibog kan Kahadean, kairiba an nombrado nin espiritu na kamagurangan, maninigong pahalagahan an ipinaniwalang ini bilang igwa nin pinakadakulang halaga.
2. Ano an dugang na ipinaniwala sa kamagurangan, asin ano an sinabi ni Pedro manongod kaini?
2 An Kristianong kamagurangan igwa nin dugang na ipinaniwala—an paninimbagan sa pagpapastor sa aripompon nin Dios. Manongod kaini, si apostol Pedro nagsurat: “Sa kamagurangan na lalaki dian sa tahaw nindo itinatao ko an sadol na ini, huli ta ako saro man na gurang na lalaki sa kaibanan ninda asin saksi sa mga kasakitan kan Cristo, may kabtang minsan sa kamurawayan na ihahayag: Pastoran an aripompon nin Dios na nasa saindong pangataman, bakong sa kapiritan, kundi sa sadiring boot; bakong huli sa pagkamoot sa madayang pakinabang, kundi may kaigotan; ni siring sa naghahade sa mga mana nin Dios, kundi magin mga halimbawa sa aripompon. Asin kun mahayag na an poon na pastor, aakoon nindo an dai napaparang korona nin kamurawayan.”—1 Pedro 5:1-4.
3. An Kristianong kamagurangan maninigong paghalean nin ano?
3 An Kristianong kamagurangan “maninigong magin siring sa pailihan sa doros asin taguan sa bagyo, siring sa mga sapa nin tubig sa sarong disierto, siring sa limpoy nin dakulang gapo sa mainit na daga. (Isaias 32:1, 2) Nangangahulogan ini na an kamagurangan maninigong magin paghahalean nin seguridad, katoninongan, asin karigonan kan aripompon nin arog karnerong mga lingkod nin Dios. “Orog kisa dati” an hinahagad sa kamagurangan, o mga katabang na pastor, kan aripompon huli ta sinda “ibinugtak na mamahala sa dakol.” (Lucas 12:48) Asin sierto nanggad na igwa nin mahalagang ipinaniwala sainda na maninigong ingatan.
Taano ta Ipinaniwala Saindo?
4. Taano ta kaipuhan an kadakol na gayong kamagurangan?
4 An pag-eksister kan labi sa 60,000 kongregasyon kan mga Saksi ni Jehova sa bilog na kinaban nangangaipo nin rinibong kuwalipikado sa espirituwal na mga lalaki tanganing mangataman sa aripompon nin Dios. Igwa nin kadakol na kamagurangan sa lambang nasyon, asin ini sarong dahelan nin paggayagaya. Sa bilog na kinaban igwa nin promedyong 60 parabalangibog kan Kahadean sa lambang kongregasyon. Kaya, igwa nin dakulang gayong gibohon para sa kamagurangan na kaipuhan na gibohon.—1 Corinto 15:58.
5. Sa anong basehan ipinaaabot an pribilehiyong maglingkod bilang magurang sa sarong lalaki?
5 Kun kamo sarong magurang, taano ta ipinaabot saindo an benendisyonan na pribilehiyong ini? Huli ta nagibo nindo an nagkapirang bagay, asin igwa kamo nin espirituwal na mga kuwalipikasyon. Bilang halimbawa, maninigong mahigos na napag-adalan nindo an Tataramon nin Dios. (Josue 1:7, 8) Maninigong maigot na nakikabtang kamo sa paglilingkod sa langtad, siring man sa pagtabang sa iba na magin mga parabalangibog kan Kahadean. Pakatapos na “baloon nguna kun baga angay,” maimbod kamong naglingkod bilang sarong ministeryal na lingkod. ‘Nagmawot’ kamo, o nagmaigot na magin kuwalipikado, na magin sarong magurang, na inaapresyar na an pagigin sarong paraataman “marahay na gibo.” (1 Timoteo 3:1, 10) Siring ki Timoteo, igwa kamo nin “marahay na patotoo kan mga tugang.” (Gibo 16:2) Kan irekomendar bilang sarong magurang, posibleng kamo pasado nang 20 anyos an edad o labi pa asin eksperyensiado na sa buhay. Iginagalang kamo kan kongregasyon bilang maygurang sa espirituwal, madaling dolokan na tugang na may kakayahan na magtao nin epektibong Makakasuratan na sadol asin nagdadanay sa pagigin kompidensial.—Talinhaga 25:9, 10.
Kun Paano Iingatan an Ipinaniwala Saindo
6, 7. An 1 Timoteo 4:13-15 nagtatao nin anong sadol tanganing matabangan an sarong lalaki na ingatan an ipinaniwala saiya bilang sarong magurang?
6 Iyo, kun kamo sarong magurang, igwa nin marahay na mga rason kaya ipinaniwala saindo an Kristianong pangangataman. Asin namatean nindo kun gurano kaogma na nagkapribilehiyo kamo! Alagad paano nindo iingatan an ipinaniwala saindo?
7 Sarong paagi tanganing maingatan an ipinaniwala saindo bilang sarong magurang iyo an pagigin positibo asin mahigos sa pangangataman kan saindong mga katongdan. Kita gabos igwa nin mga gibohon asin manlaenlaen na paninimbagan sa organisasyon ni Jehova. Kun siring, magdanay sa saindong pribilehiyo, asin magin kontento na ‘gumawe kamo bilang mas hababa.’ (Lucas 9:46-48; ikomparar an Hukom 7:21.) Mahalon an saindong mga pribilehiyo, asin nungka na ‘nagtatrabahong may hugakon na kamot.’ (Talinhaga 10:4) Dai mag-ontok, kundi sa tabang ni Jehova, mag-oswag sa gabos na kabtang kan ministeryo. Iyo nanggad, sunudon an sadol na ini na itinao ni Pablo ki Timoteo: “Magmahigos ka sa pampublikong pagbasa, sa pagsadol, sa pagtotokdo. Dai mo pagpabayaan an balaog na yaon sa saimo na itinao sa saimo paagi sa hula asin kan idoon kan grupo nin kamagurangan na lalaki an saindang kamot sa saimo. Maghorophorop ka sa mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.”—1 Timoteo 4:13-15.
8. Ano an makatatabang sa sarong magurang tanganing makatao nin marahay na sadol asin ihiras an nakakapayaman sa espirituwal sa mga pagtiripon?
8 Siertohon na nagpapadanay kamo nin marahay, mabungang iskedyul nin personal na pag-adal. Bilang sarong magurang, tama sanang laoman na magtatao kamo nin marahay na Makakasuratan na sadol. Tanganing masangkapan kamo para sa paninimbagan na ini, nabasa na daw nindong may paghorophorop an bilog na Biblia, tibaad sa kadakol na beses? (Talinhaga 15:28) Kumusta an saindong mga asignasyon sa plataporma? Iandam an mga ini nin marhay, may pamibing hagadon an tabang ni Jehova tanganing makatao kamo nin nagpapayaman sa espirituwal sa mga presente sa satong mga pagtiripon. An kamagurangan partikularmente maninigong ‘magtaram nin ano man na tataramon na marahay para sa pagpakosog, tanganing iyan makatao nin karahayan sa mga nagdadangog.’—Efeso 4:29; Roma 1:11.
9. Sono sa 2 Timoteo 4:2, ano an maninigong gibohon nin sarong magurang?
9 Bilang sarong magurang, sunudon an sadol ni Pablo: “Ihulit mo an tataramon, gibohon iyan na may pagkasibot sa marahay na panahon, sa masakit na panahon, magsagwe, magtuyaw, magsadol, sa bilog na pakatios asin abilidad sa pagtotokdo.” (2 Timoteo 4:2) Nahadit si Pablo manongod sa apostasiya huli ta an nagkapira sa kongregasyon ‘nag-iriwal dapit sa mga tataramon,’ nakilabot sa ‘mangmang na harapotan,’ asin ‘minatumang sa katotoohan.’ (2 Timoteo 2:14-18, 23-25; 3:8-13; 4:3, 4) Nakaeeksperyensia man nin masakit o marahay na panahon an kongregasyon, minsan siring, si Timoteo maninigong “maghulit kan tataramon.” Magpapakosog ini sa mga kapagtubod tanganing isikwal an apostasiya. Sa kaagid na paagi ngonyan, an kamagurangan maninigong maghulit kan nakatataros na Tataramon, o mensahe nin Dios, na nakakaabot sa puso, asin nagpapakosog sa pagsunod sa mga pamantayan ni Jehova.—Hebreo 4:12.
10. Taano ta maninigong makikabtang nin regular sa ministeryo sa langtad an sarong magurang kairiba kan mga miembro kan saiyang pamilya asin kan iba?
10 Tanganing makataram na may autoridad, an magurang maninigong mamuhay oyon sa Tataramon nin Dios. Alagad dai nia lubos na iniingatan an ipinaniwala sa saiya kun sia ‘naghuhulit kan tataramon’ sa plataporma sana sa laog kan kongregasyon. Sa iyo man sanang konteksto sinadol ni Pablo si Timoteo: “Giboha an gibohon nin sarong paraebanghelyo.” Tanganing ‘lubos na otobon an saimong ministeryo’ bilang sarong magurang, maninigo kamong maghulit kan Tataramon nin Dios “sa publiko asin sa harong-harong.” (2 Timoteo 4:5; Gibo 20:20, 21) Kun siring, makikabtang sa ministeryo sa langtad kairiba kan mga miembro kan saindong pamilya. Makakakontribuwer ini sa espirituwal na bogkos sa pag-oltanan nindo asin kan saindong agom na babae asin magtatao nin dakulang pakinabang sa saindong mga aki. Gumauit man nin nagkapirang panahon, sa pakikikabtang sa gibohon na paghuhulit kairiba kan ibang miembro kan kongregasyon. Nagpapakosog ini sa espirituwal na relasyon asin nagpapaoswag kan pagkamoot sa mga tugang. (Juan 13:34, 35) Siyempre pa, an magurang maninigong magmaigot na magin timbang sa pagbabanga kan mahalagang panahon sa pag-oltanan kan saiyang pamilya asin kan kongregasyon. An paggamit nin pakasabot maglilikay sa saiya sa paggamit nin dakol na gayong panahon sa saro, sa siring mapabayaan asin madanyaran an saro naman.
11. Taano ta maninigong magmaigot an sarong magurang na paoswagon an saiyang kakayahan bilang sarong paratokdo?
11 Tanganing maingatan an ipinaniwala saindo bilang magurang, magmaigot na paoswagon an saindong kakayahan bilang sarong paratokdo. “Sia na nagtotokdo, magdanay sia sa saiyang pagtotokdo,” an sinabi ni Pablo, “o sia na nagsasadol, magdanay sia sa pagsadol.” (Roma 12:7, 8) Mantang an paratokdo nagtitindog sa atubang nin iba bilang sarong instruktor, igwa sinda nin katanosan na maglaom nin dakol sa saiya. Kun an sarong magurang magkasalang grabe sa saiyang pagtotokdo asin ini magin dahelan nin mga problema kan saiyang mga kapagtubod, nalilinya sia sa paghatol nin Dios. Iyo, an mga paratokdo “magkakamit nin orog kagabat na silot.” (Santiago 3:1, 2; Mateo 12:36, 37) Kaya an kamagurangan kaipuhan na magin seryosong mga estudyante kan Tataramon nin Dios asin maninigong iaplikar ini sa buhay. Dangan an saindang Makakasuratan na pagtotokdo, na may kairibang personal na pag-aplikar, aapresyaron nanggad kan mga kapagtubod. Magpoprotehir man ini sa kongregasyon tumang sa bakong marahay na impluwensia, kairiba na an apostasiya.
Likayan an mga Siod
12. Anong sadol an ipinublikar kaidto sa magasin na ini na makatatabang sa sarong magurang na likayan an salang paggamit kan dila?
12 Ingatan man an ipinaniwala saindo bilang magurang, paagi sa paglikay sa mga siod. An saro kaini iyo an salang paggamit kan dila bilang sarong paratokdo. An pangangaipo para sa pag-iingat sa bagay na ini haloy nang idinoon kan organisasyon ni Jehova. Bilang halimbawa, sa isyu kaini kan Mayo 15, 1897, ipinakipag-olay kan magasin na ini an Santiago 3:1-13 asin nagsabi espesyalmente manongod sa kamagurangan: “Kun igwa sinda nin mahusay na dila puwede ining magin paagi para sa dakol na bendisyon, na magdadara nin dakol sa Kagurangnan, sa katotoohan asin sa dalan nin katanosan; o, sa ibong na lado, kun nasasalakan nin sala, an dila puwedeng makagibo kan kadaklan na dai ikataram na danyos—danyos sa pagtubod, sa moral, sa marahay na mga gibo. Totoo nanggad ini, na an siisay man na naggagamit kan balaog nin pagtotokdo nagbubugtak sa saiya man sana sa dugang na paninimbagan sa pagheling nin Dios asin nin mga tawo. . . . An siisay man na nagigin burabod na pinaghahalean kan banal na Tataramon, na nagdadara nin bendisyon asin kaginhawahan asin kosog, maninigong siertohon na an mapait na tubig, falsong mga doktrina na magdadara nin sumpa, sarong danyos—na dai nagtataong onra sa Dios asin nakararaot sa saiyang Tataramon—maninigong dai ninda ikataram. Sa pagpili nin mga lider para sa mga pagtiripon an kuwalipikasyon sa ‘dila’, siring sa ipinaliwanag digdi dai maninigong malipasan. An nakakokolog magtaram kaipuhan na dai pilion, kundi solamenteng an mas mahoyo, an tama sana, na ‘nakabubusal’ sa saindang mga dila asin nagmamaigot na maingat na gayong ‘magtaram bilang mga tagapagtaram nin Dios.’ ” Mahalaga nanggad na gamiton nin sarong magurang an saiyang dila sa tamang paagi!
13. An kamagurangan nangangaipong magsagibo nin anong pag-iingat manongod sa pag-aling-aling?
13 An sobrang pag-aling-aling siod man na maninigong likayan. An pag-aling-aling maninigong nakagiginhawa asin nakakapakosog, bakong nakapanluluya asin nakaoolang sa sarong Kristiano. Dugang pa, an mga paraataman kaipuhan na “tamang-tama sana sa pag-uugale.” (1 Timoteo 3:2) Kun an pagigin tamang-tama sana an nagkokontrol kan saindong ginigibo manongod sa pag-aling-aling, mag-iingat ini saindo asin sa saindong pamilya asin magtatao nin marahay na halimbawa para sa kongregasyon. Masakit kamong makatao nin marahay na halimbawa kun, parate, minahale kamo para sa pag-aling-aling saporo nin semana mantang an saindong mga kapagtubod mahigos na gayong nakikikabtang sa ministeryo sa langtad. An maogmang bareta maninigong ihulit, asin an kamagurangan maninigong mangenot sa gibohon na ini bilang maigot na mga parabalangibog kan Kahadean.—Marcos 13:10; Tito 2:14.
14. (a) Anong Makakasuratan na mga halimbawa an nagtatampok kan pangangaipo para sa kamagurangan na mag-ingat tumang sa seksuwal na inmoralidad? (b) Anong paorootrong sadol manongod sa pagtabang sa espirituwal na mga tugang na babae an maninigong dai pagpalimanlimanan kan kamagurangan?
14 An seksuwal na inmoralidad saro pang siod na kaipuhan na likayan. An moral na pagkalapa kan kinaban puwedeng makaimpluwensia minsan sa sarong magurang kun dai nia isisikwal an mga sugot na ginagamit ni Satanas sa saiyang mga paghingoa na raoton an kaimbodan kan banwaan nin Dios. (Ikomparar an Mateo 4:1-11; 6:9, 13.) Girumdomon na an propetang si Balaam, na bakong mapanggana sa saiyang mga paghingoa na isumpa an mga Israelitas, nangatanosan na isusumpa sinda ni Jehova kun madadaya sindang makikabtang sa pagsamba sa sekso. Kaya tinokdoan ni Balaam an Moabitang hadeng si Balak “na magbugtak nin singkogan sa atubang kan mga aki ni Israel, na magkakan nin mga bagay na inatang sa mga idolo asin makaginibo nin pakikisaro.” Nalikayan daw ninda an siod na iyan? Dai, huli ta 24,000 na Israelitas an nagadan sa padusa na hale ki Jehova huli ta nagkaigwa sinda nin inmoral na relasyon sa Moabitang mga babae asin naghorohod sa saindang mga dios. (Kapahayagan 2:14; Bilang 25:1-9) Girumdomon man, na minsan si David, ‘sarong lalaki na nasosonoan kan puso nin Dios,’ nasingkog sa siod nin seksuwal na inmoralidad. (1 Samuel 13:14; 2 Samuel 11:2-4) Bilang sarong magurang kun siring, kuyugon an paorootrong sadol kan “maimbod na mayordomo” na nungka tabangan an sarong espirituwal na tugang na babae sa pribado kundi magkaigwa nin saro pang magurang na presente mantang nangangataman sa responsabilidad na ini.—Lucas 12:42.
15. Paano puwedeng makatabang an pamilya kan magurang sa saiya na malikayan an siod nin materyalismo?
15 An materyalismo saro pang siod na maninigong likayan nin sarong magurang. Makontento na sa mga kinakaipuhan, na nakaaaram na magtatao si Jehova nin igong probisyon. (Mateo 6:25-33; Hebreo 13:5) Patoodon an saindong pamilya na magin matipid, huli ta an pagigin waga sarong parahabon nin panahon asin nin paghahalean nin pangangaipo na magagamit tanganing makatabang sa pamilya, siring man sa pakikabtang sa ministeryo sa langtad, sa pagpakosog sa kongregasyon, asin sa pagpaoswag kan mga interes kan Kahadean. An sarong magurang nakikinabang sa kooperasyon kan saiyang pamilya sa bagay na ini asin nagpapasalamat na dai ninda pinipirit sia para sa mga bagay na sa aktuwal dai man kaipuhan. Sa katunayan, “orog karahay an kadikit na may takot ki Jehova ki sa kayamanan na may darang karibarawan.”—Talinhaga 15:16.
“Mag-ingat Kamo sa Saindong Sadiri”
16. Anong sadol an itinao ni Pablo sa mga paraataman sa Efeso?
16 Tanganing maingatan kan kamagurangan an ipinaniwala sainda, maninigo nindang iaplikar an sadol ni Pablo sa mga paraataman sa Efeso. Sinabihan nia sinda: “Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki. Aram ko na pakahale ko may malaog dian sa tahaw nindo na maringis na mga lobo asin dai magigin maboot sa aripompon, asin hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo. Kaya magpuka kamo, asin girumdomon nindo na sa laog nin tolong taon, banggi-aldaw, dai ako nag-ontok sa paghatol sa lambang saro na may luha.”—Gibo 20:28-31.
17, 18. Anong sadol an ipinublikar sa magasin na ini mga 80 taon na an nakaagi an padagos pang minaaplikar sa Kristianong kamagurangan?
17 Labi nang 80 taon an nakaagi, an The Watch Tower (Marso 1, 1909) kinotar an naeenot na sadol ni Pablo sa mga kapuwa magurang asin nagkomento: “An Kamagurangan saen man nangangaipong magkaigwa nin espesyal na pagkuyog; huli ta sa lambang pagbalo an pinakaorog na inoyonan asin an pinakaprominente igwa nin pinakamakuring mga pag-atake asin pagbalo. Kaya [si Santiago] nagsadol, ‘Dai maninigong magin paratokdo an kadaklan sa saindo, mga tugang, sa pakaaram na an tawo mag-aako nin orog na makuring pagbalo.’ Kami, siring man, nagsasadol sa gabos na Kamagurangan na dalisay sa puso, bakong paslo, na dai sinda magkaigwa nin ano man kundi pagkamoot asin marahay na pagmawot para sa bilog na katawohan, asin sinda magin paorog asin paorog na pano nin mga bunga asin biyaya kan banal na Espiritu, na magtaong atension man sa aripompon. Girumdomon, na an aripompon sadiri kan Kagurangnan asin igwa kamo nin paninimbagan sa Kagurangnan, siring man sainda. Girumdomon, na maninigo nindong bantayan an saindang kalag (mga interes) siring sa makikihusay sa Dakulang Pangenot na Pastor. Girumdomon, na an pangenot na bagay iyo an Pagkamoot, sa gabos; asin, mantang dai pinababayaan an mga doktrina, magtao nin espesyal na atension sa pagpaoswag kan Espiritu kan Kagurangnan sa tahaw kan manlaenlaen na miembro kan saiyang Hawak, tanganing sa siring sinda magin ‘angay sa mana kan mga banal sa liwanag,’ asin, sono sa Banal na kabotan, dai masingkog sa maraot na panahon na ini, kundi, pakatapos na magibo an gabos, makatindog na lubos ki Cristo, sa saiyang Hawak, saiyang mga Miembro, saiyang Kairibang mga Nagsakripisyo, sa saiyang Kairibang mga Paramana.”
18 An mga tataramon na idto itinaram sa linahidan nin espiritu na kamagurangan asin mga kapagtubod manongod sa pakasabot asin mga kamugtakan kan organisasyon ni Jehova kan mas amay na mga panahon na idto. Alagad, minaaplikar nanggad an sadol na iyan ngonyan! An saindang mga paglaom langitnon o daganon man, an Kristianong kamagurangan maninigong magtaong atension sa sainda man sana, ingatan an ipinaniwala sainda, asin mamomoton na pangatamanan an mga interes kan aripompon nin Dios.
Minaresulta sa Kagayagayahan an Pag-iingat kan Ipinaniwala Saindo
19, 20. Taano ta puwedeng sabihon na minaresulta sa kagayagayahan kun iniingatan kan kamagurangan an ipinaniwala sainda?
19 Kaogmahan—sa katunayan, odok sa boot na kagayagayahan—an magigin resulta huli sa pag-iingat kan ipinaniwala saindo bilang Kristianong magurang. Igwa nin kaogmahan sa pagsasagibo nin marhay kan saindong seryosong paninimbagan. Kaya magin maingat, perming mamibi, mahigos. Ingatan an ipinaniwala saindo bilang magurang asin maglaom sa ngapit sa panahon na puwede nindong sabihon, siring kan ginibo kan lalaki na may tintero kan sekretaryo: “Ginibo ko na an siring sa ipinagboot mo sa sako.”—Ezequiel 9:3, 4, 11.
20 Iyo, maglingkod na maimbod bilang magurang tanganing puwede man sabihon manongod saindo an siring sa sinabi manongod ki Noe: “Siring nanggad kaiyan an saiyang ginibo.” (Genesis 6:22) Huli sa siring na mahigos na paglilingkod, nakikinabang sa kadakol na paagi an kongregasyon. Orog sa gabos, natatawan nin onra si Jehova paagi kan makosog, aktibong mga kongregasyon na pinaglilingkodan kan maimbod na kamagurangan na nag-iingat kan ipinaniwala sainda. Alagad orog pa an kaipuhan tanganing, sa siring, sabihon saindo: “Marahay an ginibo mo, marahay na oripon!” (Lucas 19:17) Bilang magurang, kaipuhan man nindong trataron an aripompon nin Dios na may pagkamoot.
Ano an Sasabihon Nindo?
◻ Ano an dugang na ipinaniwala sa Kristianong kamagurangan?
◻ Anong positibong mga tangga an puwedeng gibohon nin magurang tanganing maingatan an ipinaniwala saiya?
◻ Tanganing maingatan an ipinaniwala saiya, anong mga siod an maninigong likayan nin sarong magurang?
◻ Taano ta minaresulta sa kagayagayahan kun iniingatan kan kamagurangan an ipinaniwala sainda?
[Ritrato sa pahina 8]
An Kristianong kamagurangan maninigong magin siring sa “taguan sa bagyo”
[Ritrato sa pahina 10]
Bilang sarong magurang, makikabtang nin regular sa ministeryo sa langtad kairiba kan mga miembro kan saindong pamilya asin kan iba
[Ritrato sa pahina 11]
Kun iniingatan nindo an ipinaniwala saindo bilang sarong magurang, makikinabang an kongregasyon sa kadakol na paagi