Nagkukuyog daw Kamo sa mga Instruksion?
AN SARONG mamomoton na ama totokdoan an saiyang mga aki tanganing sinda magin mapanggana sa buhay asin maogma kun sinda nasa tama nang edad. Asin an mga aki na namomoot asin iginagalang an saindang mga magurang aakoon an instruksion na iyan ta aram ninda na iyan sa saindang ikararahay. Siring man, an satong mamomoton na Ama, si Jehova, nagtatao sa saiyang mga lingkod nin paggiya na nagtatao sainda nin kapangganahan asin kagayagayahan sa saindang buhay. Kun siring, mahalaga na kuyogon niato an instruksion na itinatao nin Dios paagi sa saiyang Tataramon, an Biblia, asin sa saiyang daganon na organisasyon.
Sa Laog kan Pamilya
May manlaenlaen na bagay na kita tinatawan nin instruksion. An saro sa laog kan pamilya. An pag-agom asin pamilya may banal na ginikanan. Sinasabi kan Biblia na kinasal nin Dios an enot na mag-agom asin sinabihan sindang mangaki. (Genesis 1:27, 28; 2:22-24) An Kaglalang nagtao nin instruksion sa gabos na miembro kan pamilya kun dapit sa saindang kanya-kanyang obligasyon. Halimbawa, an agom na lalaki asin ama iyo an payo kan pamilya, na nangangahulogan na sia may paninimbagan na magtagama nin instruksion, kakanon, gubing, istaran, proteksion, asin disiplina. Sia naggigibo man nin mahahalagang desisyon sa pamilya. Bilang agom na lalaki, maninigo siang magpaheling nin konsiderasyon sa saiyang agom asin igalang sia bilang lalagan na mapapasaon. (Efeso 5:22, 23; 1 Timoteo 5:8; 1 Pedro 3:7) An agom na babae maninigong magpasakop sa saiyang agom, asin magpaheling nin hararom na paggalang sa saiya, patin magin saiyang katabang asin komplemento. Asin sinasabi kan Kasuratan na an mga aki dapat na magin makinuyog sa saindang mga magurang.—Genesis 2:18; Efeso 6:1-3; 1 Pedro 3:1, 2.
Ano an nangyayari kun nalilingawan an mga instruksion na ini? Nangyayari an mga dai pagkakaoyon asin iriwal kun an lalaki kulang nin konsiderasyon sa saindang agom, asin an babae kakadikit kan paggalang sa pagkapayo kan lalaki. An totoo, an siring na mga bagay an dahelan kan pagkaburulag nin dakol na mag-agom. An kasumbikalan asin pagrerebelde nin mga aki nagdara nin makuring kamondoan sa dakol na magurang. Parate, dakula an paninimbagan kan mga magurang sa dai pagpadakula sa saindang mga aki sono sa tamang disiplina, sa siring pinaaanggot sinda.—Efeso 6:4.
Minsan ngani an mga social worker, sikologo, asin iba pa nagtao nin kadakoldakol na suhestion sa kun paano aatubangon an mga problema sa pamilya, mayo nin hatol na mas epektibo kisa instruksion na itinatao sa Biblia kan Kaglalang sa pamilya. An pagkuyog digdi nagtatao nin tunay na kaogmahan asin satispaksion.—Salmo 19:7-9.
Sa Kongregasyon
Maninigo niatong kuyogon an instruksion na itinatao kan Payo kan Kristianong kongregasyon, si Jesu-Cristo, paagi sa “maimbod asin madonong na oripon,” an nombradong pinakapaagihan kan organisasyon nin Dios digdi sa daga. (Mateo 24:45-47; Efeso 5:23) Tanganing magkaigwa nin katoninongan asin pagkasararo sa kongregasyon, an gabos na miembro dapat na gumawe kaoyon sa itinataong giya. Halimbawa, an mga nangengenot sa pagtotokdo sa kongregasyon asin sa pagtabang sa ibang tawo kaipuhan na mangapot sa direksion na inaako ninda sa organisasyon ni Jehova. Ini makakokontribuwir sa pagigin epektibo kan saindang gibohon. An mga instruksion tibaad sa kun paano makikikabtang sa paghuhulit, kun paano aatubangon an mga problema sa kongregasyon, kun paano magtatao nin hatol asin pagpakosog, kun paano rarangahon an mga nasasakitan, asin iba pa. Igwa man nin mga instruksion sa kun paano mag-aandam nin nakapagtotokdo asin nakapakokosog na mga pagtiripon para sa gabos na nakikiasosyar sa Kristianong kongregasyon.—Gibo 20:20; Roma 12:6-8; Galacia 6:1; 1 Tesalonica 3:1-3.
An kamagurangan, o mga paraataman, sa kongregasyon nangorognang maninigong tumao nin marahay na halimbawa sa bagay na ini. An Namamahalang Grupo nagtatao nin mga instruksion na maninigong kuyogon nin maingat asin maimbod kan kamagurangan. Maninigo nindang iangay asin iaplikar an mga instruksion sa lokal na mga kamugtakan. Dapat na girumdomon niato na an naggigiya sa Kristianong kongregasyon iyo si Jesu-Cristo. Sangkap an pagmansay nia sa mga pangangaipo kan gabos na kongregasyon sa bilog na kinaban, asin itinatao nia an kinakaipuhan na pagpakosog asin tabang. Kun siring, an kamagurangan dai maninigong mag-alangan na iaplikar an ano man na instruksion na inaako ninda sa teokratikong organisasyon nin Dios. Ini magseserbing marahay na halimbawa para sa gabos sa kada kongregasyon asin makatatabang sainda na magkasararo sa lambang saro asin sa iba pang kabtang kan Kristianong kasararoan nin magturugang sa bilog na daga.—Gibo 15:1-31; Hebreo 13:7; Kapahayagan 5:6.
Magayagayang mga Resulta
Kun an paratogdok nagtotogdok nin dakulang edipisyo, maingat niang kinukuyog an plano kan mga arkitekto tanganing magdanay an saiyang itinotogdok. Kan madahas na mga aldaw bago kan Baha, si Noe pinagbotan na magtogdok nin sarong dahong. Sinabi saiya kun paano iyan itotogdok asin kun siisay na mga tawo asin arin na mga hayop an ilalaog dian tanganing makaligtas sa nagdadangadang na Baha. Ano an reaksion ni Noe? An Biblia nagsasabi: “Ginibo ni Noe an sono sa gabos na ipinagboot sa saiya nin Dios. Siring nanggad kaiyan an saiyang ginibo.” Si Noe sana asin an mga kaiba nia sa dahong an nakaligtas sa Baha. (Genesis 6:5, 13-22; 7:23) Ngonyan, kita nabubuhay sa mga panahon na kaagid na gayo kan aldaw ni Noe, asin sa dahelan na ini paparaon nin Dios an gabos na maraot. Sinasabi sato kan Biblia kun ano an mga kaipuhan niatong gibohon kun boot niatong makabilang sa mga makaliligtas.—Mateo 24:37-39; 2 Pedro 3:5-7, 11.
Kun siring, akoon niatong may pag-apresyar asin gibohon an mga instruksion na itinatao ni Jehova paagi sa saiyang nasusurat na Tataramon asin sa saiyang daganon na organisasyon. An paggibo kaini magtatao sato nin kapangganahan asin kagayagayahan patin magliligtas man kan satong buhay.