Pakatagal na Nagkakamit kan Kapangganahan

“Kaipuhan nindo an pakatagal, tanganing, pakatapos na magibo nindo an kabotan nin Dios, maako man nindo an kaotoban kan panuga.”—HEBREO 10:36.

1. Taano ta kaipuhan an pakatagal para sa gabos na naglilingkod ki Jehova Dios ngonyan?

AN BILOG na kinaban na ini nasa kapangyarihan nin sarong sedisyosong dios. An dai naheheling na poon kaiyan, si Satanas na Diablo, isinisentro an gabos niang paghihingoa sa pagtumang ki Jehova asin paglaban sa pagkabindikar kan unibersal na soberaniya ni Jehova paagi sa Mesiyanikong Kahadean. Huli kaiyan dai malilikayan na an siisay man na magdusay kan saiyang sadiri sa Dios asin luminya sa lado Nia kun dapit sa isyu nin soberaniya daing ontok na tutumangon kan kinaban. (Juan 15:18-20; 1 Juan 5:19) Kun siring, an lambang saro sa sato dapat na andam an sadiri na magtagal sagkod na biyo nang madaog an kinaban na ini sa Armagedon. Tanganing makabilang sa mga ganador nin Dios na makadadaog sa kinaban paagi sa saindang pagtubod asin integridad, kaipuhan kitang magpadagos sagkod sa katapusan. (1 Juan 5:4) Paano daw niato magigibo iyan?

2, 3. Paano na si Jehova Dios asin si Jesu-Cristo an pinakadakulang mga halimbawa nin pakatagal?

² Enot, makakukua kita nin pampakosog sa duwang pambihirang halimbawa nin pakatagal. Siisay sinda? An saro si Jesu-Cristo, “an panganay sa gabos na linalang,” na maimbod na nagpapadagos sa paglilingkod sa Dios poon kan sia buhayon sa dai aram na panahon kan nakaagi. Sa saiyang pagkadesidido sa maimbod na paglilingkod sa Dios, si Jesus nagin halimbawa kan gabos na intelihenteng linalang na binuhay kasunod nia sa langit asin sa daga. (Colosas 1:15, 16) Minsan siring, an kadarudakulaing halimbawa nin pakatagal iyo si Jehova Dios, na haloy nang nagtagal sa pagrerebelde tumang sa saiyang unibersal na soberaniya asin ipagpapadagos iyan sagkod na sia humiro na tanganing husayon nin pangultimo an isyu nin soberaniya.

³ Si Jehova nagtagal sa arogan na paagi sa mga bagay na dian napapalabot an saiyang dignidad asin an saiyang pinakasensitibong mga personal na pagmate. Pinogolan nia an saiyang sadiri sa atubangan nin grabeng pagpaanggot asin pinangaladan an saiyang sadiri sa paghiro tumang sa mga naglanghad sa saiya—pati si Satanas na Diablo. Pinasasalamatan niato an pakatagal nin Dios asin an saiyang pagkaherak. Kun mayo ini, dai kutana kita nabuhay minsan sarong segundo. Tunay nanggad, pinatunayan ni Jehova Dios na sia daing kabaing paagi sa saiyang pakatagal.

4, 5. (a) Paano an ilustrasyon ni Pablo manongod sa paragibo nin koron nagpapaheling kan pakatagal asin pagkaherak nin Dios? (b) Paano mapatutunayan na dai nasayang an pagkaherak nin Dios?

⁴ Itinotokdo ni apostol Pablo kapwa an pakatagal asin an pagkaherak nin Dios kan sia magsabi: “Bako daw na an paragibo nin koron may kapangyarihan sa dalipay na gumibo gikan sa iyo man sanang masa nin sarong lalagan para sa kagalang-galang na kagamitan, saro pa para sa makasosopog na kagamitan? Ngonyan, kun an Dios, minsan ngani boot nang ipaheling an saiyang kaanggotan asin ipamidbid an saiyang kapangyarihan, nagtogot na may dakulang pakatios sa mga lalagan nin kaanggotan na angay sa kalaglagan, tanganing ipaaram nia an kayamanan kan saiyang kamurawayan sa mga lalagan nin pagkaherak, na patienot niang inandam para sa kamurawayan, arin na baga, kita, na saiyang inapod bako sanang sa tahaw nin mga Judio kundi sa tahaw man kan mga nasyon, maano man?”—Roma 9:21-24.

⁵ Arog kan ipinaheheling kan mga tataramon na ini, sa presenteng panahon na ini kan saiyang pakatagal, ipinagpapadagos ni Jehova an saiyang mamuraway na katuyohan asin nagpapaheling nin pagkaherak sa nagkapirang lalagan na tawo. Inaandam nia an mga lalagan na ini para sa daing katapusan na kamurawayan asin kun siring dinadaog an maraot na mga katuyohan kan saiyang dakulang paratumang, si Satanas na Diablo, asin kan gabos na kampon ni Satanas. Bakong gabos na tawo nagin mga lalagan nin kaanggotan, na maninigo sa kalaglagan. Marahay an ipinaheheling kaiyan manongod sa mapasensiang pakatagal kan Makakamhan sa gabos na Dios. Dai masasayang an saiyang pagkaherak. Iyan magbubunga nin (1) mamuraway na pamilyang pan-Kahadean sa kalangitan sakop kan namomotan na Aki ni Jehova, si Jesu-Cristo, asin (2) naomayan asin nasangkap na rasa nin mga linalang na tawo sa sarong paraisong daga, gabos eridero nin buhay na daing katapusan.

Pagtagal Sagkod sa Katapusan

6. (a) Taano ta dai makalilikay an mga Kristiano sa pagbalo sa pakatagal? (b) Ano an parateng kahulogan kan termino sa Griego para sa “pakatagal”?

⁶ Huli sa naghahalat na makangangalas na paglaom na iyan, an nakapakokosog na mga tataramon ni Jesus maninigong perming nag-aaningal sa satong talinga, arin na baga: “An makatagal sagkod sa katapusan iyo an maliligtas.” (Mateo 24:13) Mahalaga na pumoon nin marahay sa dalan nin Kristianong pagkadisipulo. Pero sa katapustapusi an mahalaga kun paano kita nagtagal, kun paano niato tinapos an pagdalagan. Idinoon ini ni apostol Pablo kan sia magsabi: “Kaipuhan nindo an pakatagal, tanganing, pakatapos na magibo nindo an kabotan nin Dios, maako man nindo an kaotoban kan panuga.” (Hebreo 10:36) An termino sa Griego na trinadusir digding “pakatagal” hy·po·mo·neʹ. Ini sa parate nangangahulogan nin mapuso, marigon, o mapasensiang pakatagal na dai nawawaran nin paglaom sa atubangan nin mga kaolangan, paglamag, pagbalo, asin sugot. Kun kita naglalaom na magkamit nin kaligtasan sa huri, kaipuhan kitang umagi sa pagbalo sa pakatagal bilang kabtang kan kinakaipuhan na pag-andam para sa kaligtasan na iyan.

7. Anong salang paghona an dapat niatong likayan, asin kiisay na halimbawa an makatatabang satong makatagal?

⁷ Dai niato maninigong dayaon an sadiri paagi sa nagpapaogma sa sadiring ideya na makapapasar kita sa pagbalo nin madali sana. Tanganing masimbag an mga isyu nin unibersal na soberaniya asin nin integridad nin tawo, dai ilinigtas ni Jehova an saiyang sadiri. Tinagalan nia an maraot na mga bagay dawa ngani kaya niang paraon iyan sa panale. Si Jesu-Cristo halimbawa man sa pagtagal. (1 Pedro 2:21; ikomparar an Roma 15:3-5.) Mantang nasa atubangan niato an mamuraway na mga halimbawang ini, segurado na andam man kitang magtagal sagkod sa katapusan.—Hebreo 12:2, 3.

Kinakaipuhan na Kuwalipikasyon

8. Anong kuwalidad na kaipuhan niato gabos an ipinaheling ni apostol Pablo?

⁸ Mayo nin lingkod nin Dios, dawa kan suanoy, na ipinuwera sa pangangaipo na patunayan an saiyang integridad paagi sa pagtagal. An prominenteng marhay na mga tawo sa kasaysayan kan Biblia na nagmaimbod sagkod sa kagadanan asin nakuwalipikar sa buhay na daing katapusan sa kalangitan kinaipuhan na patunayan an saindang karigonan. Halimbawa, an dating Fariseo, si Saulo na taga-Tarso, nagsabi sa mga taga-Corinto: “Dai ako nahuhuri sa saindong labi-labi kadakulang mga apostol minsan sa sarong bagay, minsan ako mayong halaga. Sa katotoohan, an mga tanda nin pagkaapostol ginibo na dian sa tahaw nindo paagi sa gabos na pakatagal, asin paagi sa mga tanda asin mga ngangalasan patin mapangyaring mga gibo.” (2 Corinto 12:11, 12) Sa ibong kan gabat kan gibohon, pinahalagahan na gayo ni Pablo an saiyang ministeryo kaya tinagalan nia an dakol asin odok na naghingoa na dai iyan malanghadan.—2 Corinto 6:3, 4, 9.

9. (a) Paano nagpaheling nin pakatagal an linahidan na natatada, asin may anong resulta? (b) Ano an nagserbing pampakosog na kita magpadagos na maimbod sa banal na paglilingkod?

⁹ Sa mas modernong mga panahon, an linahidan na mga Kristiano na naglilingkod sa Dios bago an enot na guerra mundial nakaaram na an 1914 matanda sa katapusan kan Mga Panahon nin mga Hentil, asin an dakol sa sainda naglaom na akoon an saindang langitnon na balos kan dai malilingawan na taon na idto. Alagad ta ini dai nangyari. Arog kan ipinaheheling ngonyan nin mga katunayan, dinugangan pa sinda nin mga dekada nin taon. Sa dai linalaoman na pagpalawig na ini kan saindang daganon na buhay, sinda dinalisay kan kamot ni Jehova Dios. (Zacarias 13:9; Malaquias 3:2, 3) An padagos na pakatagal nagbunga kan saindang pagrahay. Bilang mga lingkod ni Jehova, naogma sindang apodon na banwaan na nagdadara kan saiyang ngaran. (Isaias 43:10-12; Gibo 15:14) Ngonyan, mantang ilinigtas sa duwang guerra mundial asin dakol pang saradit na ralaban, naoogma sindang tabangan sa pagpalakop kan maogmang bareta nin nagdadakol na dakulang kadaklan nin ibang karnero, na ngonyan labi nang apat na milyon an kabilangan. An espirituwal na paraiso ninda nakalakop na sa bilog na daga, minsan sa pinakahararayong isla kan dagat. An pinapaboran na tratamientong ini, na orog niatong inaapresyar mientras na naglalawig an satong buhay, nagserbing pampakosog na magpadagos na maimbod sa banal na paglilingkod sagkod na lubos na maotob an kabotan asin katuyohan ni Jehova.

10. Tanganing dai kita manluya, ano an regular na kaipuhan?

¹⁰ Mantang an balos sato depende sa satong karigonan, permi kitang nagkakaipo nin pagsadol sa napakahalagang bagay na ini. (1 Corinto 15:58; Colosas 1:23) Tanganing dai manluya an banwaan ni Jehova, kaipuhan kitang mapakosog nin dayaday na mangapot sa katotoohan asin sa napakahalagang pribilehiyo na ilakop an katotoohan, kun paano an bagong maorganisar na mga kongregasyon kan enot na siglo napakosog kan mga pagdalaw liwat ni Pablo asin Bernabe. (Gibo 14:21, 22) Magin logod marigon niatong desisyon asin determinasyon na, arog kan sabi ni apostol Juan, an katotoohan magdadanay sa sato, “asin iyan magdadanay sa sato sagkod lamang.”—2 Juan 2.

Naghahalat na May Marigon na Pakatagal

11. Ano an minalataw na paagi nin Dios sa saiyang mga lingkod, asin paano ini ipinag-ilustrar sa kaso ni Jose?

¹¹ Kaipuhan an panahon na matapos an pagbalo manongod sa sato. (Santiago 1:2-4) Maghalat! Maghalat! Maghalat! an minalataw na paagi nin Dios sa saiyang mga lingkod kan suanoy kan sinda binalo dapit sa saindang determinasyon na magpadagos sa pagtubod. Pero an paghalat, sa katapustapusi, perming pano nin balos para sa maimbod na mga lingkod na idto. Halimbawa, si Jose kinaipuhan na maghalat nin 13 taon bilang oripon asin bilanggo, pero dinalisay kan inagihan niang ini an saiyang pagkatawo.—Salmo 105:17-19.

12, 13. (a) Paano si Abraham nagin halimbawa nin maimbod na pakatagal? (b) Sa anong paagi na an pagtubod asin pakatagal ni Abraham iinaatubang na arogan niato?

¹² Si Abraham 75 anyos na kan apodon sia nin Dios na humale sa Ur kan mga Caldeo tanganing paduman sa Dagang Panuga. Mga 125 anyos na sia kaidto kan akoon nia an may kaibang sumpang pagpatunay sa panuga nin Dios—na nangyari pakatapos tolos na ipaheling ni Abraham an kosog kan saiyang pagtubod paagi sa pagdolot kan saiyang namomotan na aking si Isaac, na napondo sana kan pogolan nin anghel ni Jehova an saiyang kamot asin inolang an pag-atang. (Genesis 22:1-18) An 50 taon halawig na panahon para ki Abraham tanganing maghalat bilang parabaklay sa sarong dai midbid na daga, pero nagmaimbod sia nin 50 taon pa sagkod na sia magadan sa edad na 175. Sa bilog na panahon na iyan, si Abraham maimbod na saksi asin propeta ni Jehova Dios.—Salmo 105:9-15.

¹³ An pagtubod asin pakatagal ni Abraham iinaatubang na arogan kan gabos na lingkod nin Dios na boot na mag-ako kan ipinanugang mga bendisyon paagi ki Jesu-Cristo, an Banhi ni Abraham. (Hebreo 11:8-10, 17-19) Manongod saiya, mababasa niato sa Hebreo 6:11-15: “Minamawot niamo na an lambang saro sa saindo magpaheling kan kaparehong kahigosan tanganing magkaigwa kan biyong kasiertohan kan paglaom sagkod sa katapusan, tanganing dai kamo magin mga hugakon, kundi magin mga paraarog kan mga nagmamana sa mga panuga paagi sa pagtubod asin pakatagal. Huli ta kan an Dios manuga ki Abraham, huli ta dai nia ikapanunumpa an siisay man na orog na dakula, ipinanumpa nia an saiyang sadiri, na an sabi: ‘Sa katotoohan sa bendisyon bebendisyonan ta ka, asin sa pagpadakol padadakolon ta ka.’ Kaya pakatapos na si Abraham makapaheling nin pakatagal, nakamtan nia an panugang ini.”

14. Taano ta dai niato maninigong isipon na an pagbalo sa pakatagal daing katapusan asin na masakit kamtan an balos?

¹⁴ An linahidan na natatada 77 taon na an naheling na nakalihis poon kan katapusan kan Mga Panahon nin mga Hentil kan 1914, kan an iba sa sainda naglaom na pamurawayon an tunay na kongregasyon Kristiano sa langit. Dai niato aram kun gurano pa kalawig na maghahalat an natatada. Kun siring, maninigo daw kitang manluya asin isipon na daing katapusan an paghalat asin masakit kamtan na pasohan an balos? Dai! Iyan nungka na mabindikar sa soberaniya nin Dios o matao nin onra sa saiyang ngaran. Dai sia magkakaigwa nin katanosan sa atubangan kan kinaban kun itao na sa sato an kapangganahan asin an premyong buhay na daing katapusan. Gurano man an ilawig kan panahon, an natatada, kaiba an saindang maimbod na kairibang arog-karnero, determinadong maghalat na si Jehova humiro sa saiyang itinalaan na panahon. Sa pagpaheling nin siring na arogan na paghihingoa, inaarog ninda si Abraham.—Roma 8:23-25.

15. (a) Ano an sarabihon niato, asin sa anong mga inagihan niato na kita mapangganang tinabangan nin Dios? (b) Anong sadol ni Pablo an angay pa sagkod sa satong aldaw?

¹⁵ Kaya, sagkod ngonyan an sarabihon niato marigon na pagtagal sa pag-otob kan kabotan nin Dios. (Roma 2:6, 7) Kan nakaagi tinabangan nia kita sa pag-agi niato sa makuring mga kasakitan, kaiba an mga pagkabilanggo asin kampo de konsentrasyon, asin kita mapanggana niang ilinigtas sa ikamumuraway kan saiyang ngaran asin katuyohan.a Sa natatada pang panahon bago matapos an pagbalo sa sato, ipagpapadagos iyan na gibohon ni Jehova. An sadol ni Pablo angay pa sagkod sa satong aldaw: “Huli ta kaipuhan nindo an marigon na pagpapasensia asin pakatagal, tanganing magibo nindo asin lubos na mahaman an kabotan nin Dios, asin sa siring akoon asin madara patin lubos na kamtan an ipinanuga.”—Hebreo 10:36, The Amplified Bible; Roma 8:37.

16. Taano ta dai niato maninigong mansayon an satong pagdusay ki Jehova sa limitado sanang paagi o may mga kondisyon?

¹⁶ Sagkod na may ipinagigibo sato si Jehova sa tahaw kan maraot na kinaban na ini, kun siring, sa pag-arog sa halimbawa ni Jesus, boot niatong gibohon an gibohon na iyan sagkod na iyan matapos. (Juan 17:4) An pagdusay niato ki Jehova bako man na sa kondisyon na kita maglilingkod sa saiya sa halipot sanang panahon dangan maabot an Armagedon. An satong pagdusay sagkod lamang. An gibohon nin Dios para sa sato dai matatapos sa ralaban nin Armagedon. Minsan siring, pakatapos sana na mahaman niato an dapat na matapos bago an Armagedon na maheheling niato an makangangalas na mga bagay na madatong pakalihis kan dakulang ralaban na iyan. Dangan, apuwera sa maogmang pribilehiyo na padagos na otobon an saiyang gibohon, babalosan kita kan haloy nang linalaoman na mga bendisyon na saiyang ipinanuga.—Roma 8:32.

An Pagkamoot sa Dios Nakatatabang Sato na Magtagal

17, 18. (a) Sa mga panahon nin kasakitan, ano an makatatabang sato na magtagal na may pag-oyon nin Dios? (b) Ano an makatatabang sato na kamtan an kapangganahan, asin ano an dai niato sinasabi manongod sa natatadang panahon?

¹⁷ Seguro, kun depisil an mga panahon, tibaad ihapot niato: ‘Paano pa kita makatatagal?’ An simbag? Paagi sa pagkamoot sa Dios sa bilog niatong puso, isip, kalag, asin kosog. “An pagkamoot matinios asin maboot. An pagkamoot bakong maimon, iyan dai nagpapalangkaw, dai nagpapaabhaw. Iyan nagtitios kan gabos na bagay, nagtutubod kan gabos na bagay, naglalaom kan gabos na bagay, nagtatagal kan gabos na bagay. An pagkamoot dai nanggad nasusudya.” (1 Corinto 13:4, 7, 8) Apuwera sana kun kita magtatagal huli sa pagkamoot sa Dios, an satong pakatagal daing halaga. Pero kun titioson niato an magagabat na pasan huli sa satong kaimbodan ki Jehova, an satong pakatagal pinarararom an satong pagkamoot sa saiya. An pagkamoot sa Dios, sa saiyang Ama, an nagpangyari ki Jesus na magtagal. (Juan 14:30, 31; Hebreo 12:2) Kun an tunay niatong motibo pagkamoot sa Dios, an satong Ama, ano an dai niato kayang tagalan?

¹⁸ An marigon niatong pagkamoot ki Jehova Dios iyo an nagpangyari sato na magdanay na mapanggana sa kinaban sa napakadelikadong mga panahon na ini nin pagbalo. Asin si Jehova, paagi ki Jesu-Cristo, ipagpapadagos na itao sato an tabang na kaipuhan niato minsan gurano pa kahaloy na totogotan na magdanay an daan na palakaw na ini nin mga bagay. (1 Pedro 5:10) Siyempre, dai niato ihinuhula kun gurano pang panahon an natatada, asin dai kita nin sinasabing espisipikong petsa. Bahala na dian an Dakulang Paratalaan nin Panahon, si Jehova Dios.—Salmo 31:15.

19, 20. (a) Paano niato maninigong mansayon an kada minaaging aldaw na kita nagtatagal? (b) Anong kamangmangan an boot niatong likayan, asin taano?

¹⁹ Minsan siring, an kapag-arakian na ihinulang makaheheling asin makaeeksperyensia kan “pagtatapos kan palakaw nin mga bagay” nagkakaedad na. (Mateo 24:3, 32-35) Kaya nungka niatong lingawan na an kada aldaw na umagi na kita nagtatagal sarong aldaw na ina para ki Satanas asin sa saiyang mga demonyo tanganing ramogan an uniberso kan sainda mismong pag-eksister asin sarong aldaw na mas harani sa panahon na si Jehova dai na magtatagal sa pag-eksister nin “mga lalagan nin kaanggotan na angay sa kalaglagan.” (Roma 9:22) Sa dai na mahahaloy, kun matapos na an pakatios ni Jehova, ibububo nia an saiyang kaanggotan sa maraot na mga lalaki asin babae. Sa siring, ipahahayag nia an saiyang banal na paghabo sa saindang gawe, minsan ngani pinabayaan nia sindang magpadagos sa gabos na panahon na ini.

²⁰ Kanigoan na kamangmangan na kita pumondo sa satong mamomoton na mga paghihingoa na kamtan an mamuraway na premyo na iinaalok sa sato paagi ki Jesu-Cristo. Imbes, determinado kitang magpadagos na maimbod bilang mga Saksi ni Jehova sa pinakamahalagang panahon na ini na madali nang ibindikar ni Jehova an saiyang sadiri bilang Unibersal na Soberano.

[Nota sa Ibaba]

Ano an Isisimbag Nindo?

◻ Taano ta dai niato malilikayan na baloon an satong pakatagal?

◻ Anong salang paghona an boot niatong likayan?

◻ Tanganing malikayan an ano man na panluluya niato, ano an kaipuhan?

◻ Ano an sarabihon niato?

◻ Sa mga panahon nin kasakitan, ano an makatatabang sato na makatagal?

[Ritrato sa pahina 22]

An banwaan nin Dios, arog kan mga Saksing ini sa Port of Spain, Trinidad, perming andam na maghalat ki Jehova