An Aldaw na Dapat Girumdomon

“Isinabi ko an mga bagay na ini sa saindo tanganing paagi sa sako magkaigwa kamo nin katoninongan. Sa kinaban magkakaigwa kamo nin kasakitan, alagad magmapuso kamo! Nadaog ko an kinaban.”​—JUAN 16:33.

1, 2. Anong sarong aldaw sa kasaysayan an nangingibabaw sa gabos na ibang aldaw, asin taano?

AN KINABAN ngonyan kadakol kan masasabi manongod sa katoninongan. Kan matapos an Guerra Mundial II, an katoninongan ikinonektar sa V-E Day asin V-J Day.a Taon-taon, ipinaiisip nin Navidad sa mga tawo an ‘katoninongan sa daga.’ (Lucas 2:14) Pero may sarong aldaw sa bilog na kasaysayan nin tawo na nangingibabaw sa gabos pang iba. Iyan an aldaw na itinaram ni Jesu-Cristo an mga tataramon na kinotar sa itaas. Sa labing duwang milyon na aldaw na ikinabuhay nin katawohan sa ibabaw kan daga, iyan an sarong aldaw na biyong luminiwat sa dalagan nin katawohan para sa daing sagkod na ikararahay kaiyan.

² An importanteng aldaw na iyan iyo an Nisan 14 sa Judiong kalendaryo. Kan taon 33 kan satong Komon na Kapanahonan, an Nisan 14 nagpoon sa pagsolnop nin aldaw kan Abril 1. Pag-olayan niato an mga pangyayari sa napakahalagang aldaw na iyan.

Nisan 14!

3. Paano ginamit ni Jesus an huring mga oras na ini?

³ Kan madurodiklom na, posibleng suminirang an magayonon na kabilogan nin bulan bilang pagirumdom na si Jehova an nagdedeterminar sa mga panahon asin kapanahonan. (Gibo 1:7) Asin ano an nangyayari sa kuwarto sa itaas na duman nagtiripon si Jesus asin an saiyang 12 apostol sa pagselebrar kan taonan na Paskua nin mga Judio? Mantang si Jesus nag-aandam ‘sa paghale digdi sa kinaban pasiring sa Ama, sia nagpapaheling nin pagkamoot sa saiyang mga sadiri sagkod sa katapusan.’ (Juan 13:1) Paano nia ipinaheling ini? Paagi sa pagtaram asin halimbawa, si Jesus nagpadagos na itanom sa saiyang mga disipulo an mga kuwalidad na matabang sainda na madaog an kinaban.

Pagsolog nin Kapakumbabaan Asin Pagkamoot

4. (a) Paano ipinaheling ni Jesus sa saiyang mga disipulo an sarong pundamental na kuwalidad? (b) Paano niato naaaraman na nanodan ni Pedro an halaga nin kapakumbabaan?

⁴ Kaipuhan na haleon pa kan mga apostol an kadikit na ambisyosong pag-imon asin kapalangkawan. Kaya si Jesus naghagkos nin tuwalya asin hinanawan an saindang mga bitis. Ini bakong pag-eksibir nin sagin kapakumbabaan, arog kan ginigibo sa Roma kan papa nin Kakristianohan taon-taon. Bako nanggad! An tunay na kapakumbabaan pagtao kan sadiri na gikan sa “kapakumbabaan nin pag-isip na ibinibilang an iba na mas halangkaw.” (Filipos 2:​2-5) Sa primero, dai nasabotan ni Pedro an punto, na nagsayumang pahanaw ki Jesus. Kan ikatanos, hinagad nia ki Jesus na hugasan an bilog niang hawak. (Juan 13:​1-10) Minsan siring, seguradong nanodan ni Pedro an leksion. Pakalihis nin mga taon, tama na an hatol nia sa iba. (1 Pedro 3:​8, 9; 5:5) Napakahalaga ngonyan na kita gabos magpaoripon para ki Cristo na may kapakumbabaan!​—Helingon man an Talinhaga 22:4; Mateo 23:​8-12.

5. Anong togon ni Jesus an nagpaheling kan halaga nin saro pang pundamental na kuwalidad?

⁵ An saro sa 12 dai nakinabang sa hatol ni Jesus. Ini si Judas Iscariote. Mantang nagpapadagos an pamanggihan nin Paskua, naribok an espiritu ni Jesus, ipinamidbid si Judas na iyo an mapasaloib sa saiya, asin pinahale sia. Pakalihis sana kaini na sinabihan ni Jesus an saiyang 11 maimbod na mga disipulo: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:​34, 35) Ini tunay na bagong togon, na ipinag-ilustrar kan mismong daing kaagid na halimbawa ni Jesus! Mantang nagdadangadang an oras kan saiyang kagadanan bilang atang, ipinaheling ni Jesus an pambihirang pagkamoot. Ginamit nia an kada mahalagang minuto sa pagtokdo asin pagpakosog sa mga disipulong idto. Dangan, idinoon nia an halaga nin pagkamoot, na sinasabi: “Ini an sakong togon, na kamo magkaminorootmootan siring kan pagkamoot ko sa saindo. Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.”​—Juan 15:​12, 13.

“An Dalan Asin an Katotoohan Patin an Buhay”

6. Anong pasohan an ibinugtak ni Jesus sa atubangan kan saiyang kadayupot na mga disipulo?

⁶ Sinabihan ni Jesus an maimbod na 11: “Dai mahadit an saindong puso. Tumubod kamo sa Dios, tumubod man kamo sa sako. Sa harong kan sakong Ama kadakol kan ontokan. Ta kun bako, sinabihan ko kutana kamo, huli ta ako maduman tanganing mag-andam nin lugar para sa saindo.” (Juan 14:​1, 2) An lugar na ini sa “kahadean kan kalangitan.” (Mateo 7:21) Sinasabi ni Jesus kun paano maaabot kan kadayupot na grupong ini nin maimbod na mga disipulo an saindang pasohan. Saiyang sinasabi: “Ako iyo an dalan asin an katotoohan patin an buhay. Mayo nin makaduduman sa Ama kun bakong huli sa sako.” (Juan 14:6) Ini aplikado man sa mga tawo na magkakamit nin buhay na daing katapusan sa daga.​—Kapahayagan 7:​9, 10; 21:​1-4.

7-9. Taano ta inapod ni Jesus an saiyang sadiri na “an dalan asin an katotoohan patin an buhay”?

⁷ Si Jesus “an dalan.” An solamenteng pagdolok sa Dios sa pamibi paagi ki Jesu-Cristo. Si Jesus mismo iginarantiya sa saiyang mga disipulo na itatao sainda kan Ama an ano man na hagadon ninda sa ngaran ni Jesus. (Juan 15:16) An mga pamibi na ipinanonongod sa mga ladawan o relihiyosong mga “santo” o pano nin mga Ave Maria asin paorootrong pangadiye​—mayo digdi an dinadangog asin inaako kan Ama. (Mateo 6:​5-8) Saro pa, dapit ki Jesus, mababasa niato sa Gibo 4:12: “Mayo na nin ibang ngaran sa sirong nin langit na itinao sa mga tawo na sukat makaligtas sa sato.”

⁸ Si Jesus “an katotoohan.” Si apostol Juan nagsabi manongod sa saiya: “An Tataramon nagin laman asin nag-erok sa tahaw niato, asin naheling niato an saiyang kamurawayan, kamurawayan na arog kan yaon sa bugtong na aki gikan sa ama; asin sia pano nin dai na kutana maninigong kabootan asin katotoohan.” (Juan 1:14) Si Jesus nagin katotoohan kan ginatos na hula sa Hebreong Kasuratan paagi sa pag-otob dian. (2 Corinto 1:20; Kapahayagan 19:10) Ipinahayag nia an katotoohan sa pakikipag-olay sa saiyang mga disipulo asin sa mga kadaklan na naghinanyog, sa saiyang pakidiskutiran sa parasaginsagin na klero, asin paagi sa saiyang nabubuhay na halimbawa.

⁹ Si Jesus “an buhay.” Bilang an Aki nin Dios, si Jesus nagsabi: “An nagtutubod sa Aki igwa nin buhay na daing katapusan; an nakikisuway sa Aki dai makakaheling nin buhay, kundi magdadanay sa saiya an kaanggotan nin Dios.” (Juan 3:36) An pagtubod sa atang ni Jesus minagiya pasiring sa buhay na daing katapusan​—inmortal na buhay sa langit para sa sarong “sadangoton na aripompon” nin linahidan na mga Kristiano asin buhay na daing sagkod sa sarong paraisong daga para sa sarong dakulang kadaklan nin “ibang karnero.”​—Lucas 12:32; 23:43; Juan 10:16.

Pagtagal sa Paglamag

10. Taano ta kaipuhan niatong ‘daogon an kinaban,’ asin anong pagpakosog an itinao ni Jesus sa bagay na ini?

¹⁰ An mga naglalaom na mabuhay sa bagong palakaw ni Jehova kaipuhan na makipaglaban sa sarong kinaban na “namumugtak sa kapangyarihan kan maraot,” si Satanas na Diablo. (1 Juan 5:19) Nakapakokosog nanggad, kun siring, an mga tataramon ni Jesus sa Juan 15:​17-19! Sia nagsasabi: “An mga bagay na ini ipinagboboot ko sa saindo, na kamo magkaminorootmootan. Kun an kinaban naoongis sa saindo, aram na nindo na iyan naongis na nguna sa sako bago iyan naongis sa saindo. Kun kamo kabtang kan kinaban, an kinaban maoogma sa saiyang sadiri. Ngonyan huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo.” An tunay na mga Kristiano ikinaoongis sagkod sa taon na ini nin 1992, asin kanigoan an paggayagaya niato sa marahay na mga halimbawa kan mga nagpapadagos na manindogan nin marigon, na mapakumbabang nakanonompong nin kosog sa irarom kan makapangyarihan na kamot nin Dios! (1 Pedro 5:​6-10) Kita gabos makatatagal sa mga pagbalo paagi sa pagtubod ki Jesus, na tinatapos an saiyang paliwanag paagi sa nakaoogmang mga tataramon na ini: “Sa kinaban magkakaigwa kamo nin kasakitan, alagad magmapuso kamo! Nadaog ko an kinaban.”​—Juan 16:33.

Pag-introdusir nin Bagong Tipan

11. Ano an ihinula ni Jeremias manongod sa sarong bagong tipan?

¹¹ Kan bangging idto, pagkatapos kan selebrasyon nin Paskua, si Jesus nagtaram manongod sa sarong bagong tipan. Ini ihinula ni propeta Jeremias mga siglo bago kaidto, na sinasabi: “‘Uya! May maabot na mga aldaw,’ an sabi ni Jehova, ‘asin magibo ako nin bagong tipan sa harong ni Israel asin sa harong ni Juda . . . Ibubugtak ko an sakong pagboot sa sainda, asin sa saindang puso iyan isusurat ko. Asin ako magigin saindang Dios, asin sinda magigin sakong banwaan. . . . Ipatatawad ko an saindang sala, asin an saindang kasalan dai ko na gigirumdomon.’” (Jeremias 31:​31-34) Kan Nisan 14, 33 C.E., gigibohon an pag-atang na magibong balido sa bagong tipan na ini!

12. Paano pinonan ni Jesus an bagong tipan, asin ano an nagigibo kaiyan?

¹² Sinabihan ni Jesus an maimbod na 11 na minawot niang gayo na makaibanan sinda sa pagkakan kan Paskuang ini. Dangan kuminua sia nin tinapay, nagpasalamat, pinagputolputol iyan, asin itinao iyan sa sainda, na sinasabi: “Ini nangangahulogan kan sakong hawak na itatao manongod sa saindo. Padagos na gibohon nindo ini sa paggirumdom sa sako.” Sa kaparehong paagi, ipinasa nia sa sainda an sarong kopa nin pulang arak, na sinasabi: “An kopang ini nangangahulogan kan bagong tipan paagi sa sakong dugo, na pabubuloson manongod sa saindo.” (Lucas 22:​15, 19, 20) An bagong tipan nagkaepekto paagi sa “mahalagang dugo” ni Jesus, na mas magabat an halaga kisa dugo nin hayop na iwinirik sa paggibong balido kan tipan nin Pagboot nin Israel! (1 Pedro 1:19; Hebreo 9:​13, 14) An mga pinalaog sa bagong tipan nagkakamit nin lubos na kapatawadan sa mga kasalan. Kun siring, puwede sindang makuwalipikar na makabilang sa 144,000, na nag-aako nin daing katapusan na mana bilang espirituwal na Israel.​—Galacia 6:16; Hebreo 9:​15-18; 13:20; Kapahayagan 14:1.

“Sa Paggirumdom sa Sako”

13. (a) Ano an maninigo niatong horophoropon sa panahon nin Memorial? (b) Siisay sana an maninigong makikabtang sa mga emblema, asin taano?

¹³ An ika-1,960 taonan na Memorial kan kagadanan ni Jesus matatagbo sa Abril 17, 1992. Mantang nagdadangadang an petsang iyan, marahay na horophoropon niato an gabos na nagibo kan sangkap na atang ni Jesus. An areglong ini nagpapamuraway sa kadonongan ni Jehova asin sa saiyang hararom na pagkamoot sa katawohan. An sangkap na integridad ni Jesus, sagkod sa makolog na kagadanan, nagbibindikar ki Jehova tumang sa angat ni Satanas na an Saiyang linalang na mga tawo may diperensia asin dai makapapasar sa pagbalo. (Job 1:​8-11; Talinhaga 27:11) Paagi sa saiyang atang na dugo, si Jesus naglingkod na tagapag-oltanan sa bagong tipan, an instrumento ni Jehova sa pagpili nin “rasang pinili, sarong makahadeng pagkasaserdote, banal na nasyon, banwaan para sa espesyal na pagkasadiri.” Mantang nasa daga pa, an mga ini ‘ipinahahayag an mga kamurawayan’ kan saindang Dios, si Jehova, na ‘nag-apod sa sainda hale sa kadikloman pasiring sa saiyang makangangalas na liwanag.’ (1 Pedro 2:9; ikomparar an Exodo 19:​5, 6.) Tama nanggad, sinda sana an nakikakabtang sa mga emblema nin Memorial kada taon.

14. Paano napayayaman an minilyon na nagmamasid?

¹⁴ Kan Memorial kan sarong taon, 10,650,158 an nag-atender sa bilog na daga, pero 8,850 sana​—mayo pang ikasampulong kabtang nin 1 porsiento—​an nakikabtang sa mga emblema. Kun siring, ano an pakinabang kan selebrasyon na ini sa minilyon na nagmamasid? May dakulaon na pakinabang! Minsan ngani dai nakikakabtang, napayayaman sinda sa espirituwal paagi sa pakikiasosyar na ini sa mahiwas na panglobong asosasyon na ini nin magturugang, mantang nadadangog ninda an gabos na makangangalas na bagay na ginigibo ni Jehova paagi sa atang kan saiyang Aki.

15. Paano nakikinabang sa atang ni Jesus an iba apuwera sa mga linahidan?

¹⁵ Dugang pa, sinasabi sato kan apostol sa 1 Juan 2:​1, 2: “Igwa kita nin parasorog sa Ama, si Jesu-Cristo, sarong matanos. Asin sia sarong pantubos na atang para sa satong mga kasalan, alagad bako sanang kan sa sato kundi siring man kan sa bilog na kinaban.” Iyo, an atang ni Jesus, mantang nagtatao nin pakinabang enot sa grupong Juan na pinalaog sa bagong tipan, nagpapangyari man sa kapatawadan kan mga kasalan kan “bilog na kinaban.” Iyan “pantubos na atang” sa kasalan kan gabos na iba pa sa kinaban nin katawohan na nagtutubod sa pinabolos na dugo ni Jesus, na nagbubukas sa sainda kan maogmang paglaom na buhay na daing sagkod sa sarong paraisong daga.​—Mateo 20:28.

“Sa Kahadean kan Sakong Ama”

16. (a) Minalataw na si Jesus asin an saiyang kairibang paramana nakikakabtang na ngonyan sa ano? (b) Ano an hinahagad ngonyan kapwa sa linahidan na natatada asin sa dakulang kadaklan?

¹⁶ Sa pagpadagos na pakosogon an saiyang mga apostol, itinokdo ni Jesus an aldaw na sa simbolikong paagi iinomon nia an bunga kan ubasan na bago kaiba kan saiyang mga disipulo sa Kahadean kan saiyang Ama. (Mateo 26:29) Sinabihan nia sinda: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.” (Lucas 22:​28-30) Mantang kinapotan ni Jesus an kapangyarihan sa Kahadean duman sa kalangitan kan 1914, puwede niatong ikonklusyon na an dakol na kairibang paramana ni Jesus, na natipon sa nag-aging mga siglo, binuhay na liwat, tanganing “tumukaw sa mga trono” kaiba nia. (1 Tesalonica 4:​15, 16) Marikas na nagdadangadang an aldaw na bubutasan kan mga anghel an “apat na doros” kan “dakulang kahorasaan”! Sa panahon na iyan, tapos na an pagtatak sa 144,000 na espirituwal na Israel asin an pagtipon sa minilyon kan dakulang kadaklan. Ini gabos dapat na magdanay sa integridad, arog ni Jesus, tanganing mag-ako kan premyong buhay na daing katapusan.​—Kapahayagan 2:10; 7:​1-4, 9.

17 asin kahon. (a) Kun an sarong linahidan isikwal bilang bakong maimbod, siisay an rasonableng sumalida sa saiya? (b) An mga artikulo sa Watchtower kan 1938 nagtatao nin anong interesanteng liwanag sa pagtogdok asin suminunod na paghiwas kan teokratikong organisasyon sa daga?

¹⁷ Ano kun may mga linahidan na dai makapagdanay sa integridad? Sa ultimo nang oras na ini, daing duwa-duwa na kadikit na sana an siring na mga bakong maimbod. Rasonable sana, an siisay man na pansalida magikan, bakong sa mga bagong mabautismohan, kundi sa mga nagdanay ki Jesus sa saiyang mga pagbalo paagi sa dakol na taon na maimbod na paglilingkod. An maliwanag na mga sinag nin espirituwal na liwanag na nag-abot paagi sa The Watchtower kan mga taon nin 1920 asin 1930 nagpaparisa na an pagtipon sa natatada sa mga linahidan haros tapos na kan panahon na idto. An mga ‘hinuhugasan an saindang gubing asin pinapuputi iyan sa dugo kan Kordero’ poon kaidto may laen man na magayagayang paglaom. Paagi ki Cristo, ginigiyahan sinda kan espiritu ni Jehova pasiring sa “mga burabod nin tubig nin buhay” sa Paraisong daga.​—Kapahayagan 7:​10, 14, 17.

Sarong Pamibi na Odok na Gayo

18. Anong mapuwersang mga leksion an nanonodan niato sa pamibi ni Jesus sa Juan kapitulo 17?

¹⁸ Tinapos ni Jesus an saiyang pakikitipon na Memorial sa saiyang mga disipulo paagi sa pagdolot kan odok na pamibi na nakatala sa Juan 17:​1-26. Enot ipinamibi nia na logod pamurawayon sia kan saiyang Ama mantang sia nagdadanay sa integridad sagkod sa katapusan. Sa paaging ini si Jehova mapamumuraway man, na an saiyang ngaran napakangbanal​—nahalean kan gabos na langhad. Huli ta tunay nanggad na pinatunayan kan sangkap na tawong si Jesus na an mga tawong linalang nin Dios puwedeng magin daing kanawayan, minsan sa irarom kan pinakamasakit na pagbalo. (Deuteronomio 32:​4, 5; Hebreo 4:15) Dugang pa, an kagadanan ni Jesus bilang atang nagbubukas nin makangangalas na oportunidad para sa mga aki ni Adan. Sabi ni Jesus: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” Kaipuhan nanggad na magkua nin tamang kaaraman manongod ki Jehova Dios asin sa saiyang Aki, an Kordero nin Dios, na itinao an saiyang buhay para sa pagbindikar ki Jehova asin sa kaligtasan nin katawohan! (Juan 1:29; 1 Pedro 2:​22-25) Inaapresyar daw nindo an pinakamamomoton na atang na iyan sagkod na idusay nindo an bilog nindong sadiri ki Jehova asin sa mahalagang paglilingkod sa saiya?

19. Paano an natatada asin an dakulang kadaklan magkakamit nin mahalagang pagkasararo?

¹⁹ Dugang pa, ipinamibi ni Jesus sa saiyang Banal na Ama na bantayan Nia logod an mga disipulo mantang sinda nagpapatunay na sinda bakong kabtang kan kinaban, nangangapot sa Saiyang tataramon bilang katotoohan, asin nagdadanay sa mahalagang pakikisumaro sa Ama asin sa Aki. Bako daw na an pamibing ini makangangalas na sinimbag sagkod sa presenteng aldaw na ini mantang an linahidan na natatada asin an dakulang kadaklan sararong naglilingkod na binobogkos nin pagkamoot, mantang nagdadanay na neutral sa kinaban, sa kadahasan kaiyan, asin sa karatan kaiyan? Napakahalaga nanggad kan pantapos na mga tataramon ni Jesus sa saiyang Ama, si Jehova! “Ipinamidbid ko sa sainda an saimong ngaran asin ipamimidbid ko pa,” sabi ni Jesus, “tanganing an pagkamoot na ikinamoot mo sa sako mapasa sainda asin ako sa kasaro ninda.”​—Juan 17:​14, 16, 26.

20. Taano an Nisan 14, 33 C.E., ta tunay na iyo an aldaw na dapat girumdomon?

²⁰ Sa pagluwas sa hardin nin Getsemani, nagkaigwa pa si Jesus nin halipot, nakapakokosog na pakikiasosyar sa saiyang mga disipulo. Dangan nag-abot na an saiyang mga kaiwal! Dai ikaladawan nin mga tataramon an pisikal na mga pagsakit ni Jesus, an saiyang nakaroronot nin pusong kamondoan sa langhad na itinao ki Jehova, asin an saiyang pambihirang integridad sa gabos na iyan. Si Jesus nagtagal sagkod sa katapusan, kan bilog na banggi asin sa kadaklan na oras na maliwanag pa kan aldaw na idto. Ipinaheling nia nin malinaw na an saiyang Kahadean bakong kabtang kan kinaban. Asin sa ultimo niang hinangos, sia nagkurahaw: “Tapos na!” (Juan 18:​36, 37; 19:30) Kompleto na an pagkadaog nia sa kinaban. Tunay na an Nisan 14, 33 C.E., iyo an aldaw na dapat girumdomon!

[Nota sa Ibaba]

Ano an Isisimbag Nindo?

◻ Ano an itinokdo ni Jesus manongod sa kapakumbabaan asin pagkamoot?

◻ Paano si Jesus nagin “an dalan asin an katotoohan patin an buhay”?

◻ Ano an katuyohan kan bagong tipan?

◻ Anong pagkasararo asin pagkamoot an nasa linahidan na natatada asin dakulang kadaklan?

[Kahon sa pahina 20]

An Kadonongan kan Orog na Dakulang Salomon

An mga artikulong may titulong “Organization” sa luwas na Hunyo 1 asin Hunyo 15, 1938, kan The Watchtower nag-establisar kan pundamental na teokratikong areglo na sinusunod kan mga Saksi ni Jehova sagkod sa aldaw na ini. Tinapos kaiyan an pambihirang panahon nin doktrinal asin organisasyonal na mga pagliliwat na nagpoon kan 1919. (Isaias 60:17) Sa pagkokomparar kan 20-anyos na panahon na iyan sa 20 anyos na pagtogdok ni Salomon kan templo asin kan harong nin hade sa Jerusalem, sinabi kan The Watchtower: “Ipinaheheling kan Kasuratan na, pakalihis kan beinte anyos na programa nin pagtogdok ni Salomon . . . , ginibo nia an lakop sa nasyon na programa nin pagtogdok. (1 Hade 9:​10, 17-23; 2 Cron. 8:​1-10) Dangan uminabot an reyna nin Seba ‘hale sa kaporoporohi kan daga tanganing dangogon an kadonongan ni Salomon’. (Mat. 12:42; 1 Hade 10:​1-10; 2 Cron. 9:​1-9, 12) Ini nagsusuherir kan hapot na: Ano an natatagama sa haraning ngapit para sa banwaan ni Jehova sa daga? May bilog na kompiansa kitang maghahalat, asin hehelingon niato.” Dai napasala an kompiansang iyan. Sa irarom nin teokratikong organisasyon an mahiwas na pankinaban na espirituwal na programa nin pagtogdok tinipon an labi sa apat na milyon kan dakulang kadaklan. Arog kan reyna nin Seba, an mga ini nag-abot hale sa kaporoporohi kan daga tanganing dangogon an kadonongan kan Orog na Dakulang Salomon, si Cristo Jesus​—na ipinaaabot sa sainda paagi sa “maimbod asin madonong na oripon.”​—Mateo 24:​45-47.