Bareta kan mga Parabalangibog kan Kahadean

An Nakaliliwat na Puersa kan Tataramon nin Dios

SA SADIRI niang pag-ako, sia kaidto “paralanghad asin paralamag patin parapakaraot.” (1 Timoteo 1:13) Alagad ta sia nagbakle! Dakulaon an pagkaliwat ni apostol Pablo kaya kan huri nakasabi sia: “Magin kamong mga paraarog sa sako, siring na ako paraarog ki Cristo.”​—1 Corinto 11:1.

Ngonyan, an ginatos na ribong sinserong parasamba sa bilog na kinaban naggigibo nin kaparehong mga pagliliwat. Ano an nagpapangyari sa sainda na gibohon iyan? Sinda nag-aako nin kaaraman sa Tataramon nin Dios asin iinaaplikar iyan sa saindang buhay. Itinatampok kan minasunod na eksperyensia an nakaliliwat na puersa kan Tataramon nin Dios.

Sa Slovenia may gurang nang mag-agom na solong nag-iistar sa luwas nin sarong baryo. An agom na lalaki, si Joz̆e, mga 60 anyos na asin grabe an problema sa alkoholismo. Pero, inaataman nia an saiyang agom na may helang, si Ljudmila. Sarong aldaw si Joz̆e dinolok nin duwang parabalangibog kan Kahadean. Pinalaog nia sa saiyang harong an mga Saksi, na duman nakamidbid ninda an saiyang agom. Kan madangog an mensahe kan Kahadean, duminalihig sa lalauogon ni Ljudmila an mga luha nin kagayagayahan. Nagustohan man ni Joz̆e an saiyang nadangog asin kadakol niang hapot. Pakapasakamot sa mag-agom nin nagkapirang babasahon sa Biblia, naghale na an mga Saksi.

Pakalihis nin sarong bulan nakabalik an mga Saksi, asin narisa ninda an librong Puwede Kamong Mabuhay Sagkod Lamang sa Paraiso Digdi sa Daga sa ibabaw kan lamesa. Kan hapoton kun saen nia iyan kinua, si Joz̆e nagsabi: “Naheling ko an sarong anunsio sa likod kan saro sa mga magasin na iwinalat nindo sa sako. Kaya nagsurat ako sa opisina nindo sa Zagreb asin naghagad ako kan libro.” Huli sa saiyang interes, inimbitaran siang umatender sa nagdadangadang na Memorial kan kagadanan ni Cristo na gigibohon sa Kingdom Hall. Sa kagayagayahan kan mga Saksi, nag-abot sia!

Dai nahaloy naponan an sarong pag-adal sa Biblia, asin marahay an pag-oswag. Halimbawa, kan ipaheling ki Joz̆e na “dai ka gumibo para sa saimo man sana nin inukit na imahen o . . . maghorohod sa sainda ni madara na maglingkod sa sainda,” tinipon nia tolos an gabos na relihiosong imahen na yaon sa harong, pati an mga retrato, asin iinapon iyan.​—Exodo 20:4, 5.

Napaninigoan an pagkapaha ni Joz̆e sa espirituwal na katotoohan. Pero iyo sana iyan ta may iba pa siang pagkapaha. Sa laog nin mga 18 taon, nakaiinom sia nin mga sampulong litro nin arak kada aldaw. Huli sa problema nia sa pag-inom, dai niang gayo iniintindi an saiyang personal na itsura. Alagad kan manodan na an punto-de-vista nin Dios sa salang paggamit sa alkohol, determinado siang magbakle.

Pinagmaigotan niang luway-luway na haleon an problema nia sa pag-inom, na irinerekord kun gurano kadakol kan naiinom nia aroaldaw. Dai nahaloy bako na siang oripon nin arak. Sa saiyang mga pag-adal sa Biblia, nanodan man nia na an tunay na mga Kristiano hinahagadan na papagdanayon an marahay na personal na kalinigan. Huli kaini, tinawan nia nin kuarta an mga Saksi asin sinabi: “Bueno, paduman kamo asin bakalon an ano man na gubing na kaipuhan ko tanganing magin presentable sa Kristianong mga pagtiripon asin sa paglilingkod sa langtad!” Nagbuelta an mga Saksi na may darang mga pan-irarom, medyas, sapatos, trobinais, amerikana, kurbata, asin portpolyo.

Pakapag-adal sa Biblia nin sarong taon, si Joz̆e asin Ljudmila nakualipikar na umiba sa mga Saksi sa paghuhulit sa harong-harong. Pakalihis nin tolong bulan sinimbolisaran ninda an saindang pagdusay sa Dios paagi sa pagpabautismo sa tubig sa sarong pandistritong kombension nin Mga Saksi ni Jehova. Sa ibong nin kagurangan asin maluyang salud, si Joz̆e regular na nakikabtang sa paghuhulit kan maogmang bareta asin kan huri, sagkod na sia nagadan kan Mayo nin 1995, fiel na naglingkod bilang ministeryal na lingkod sa kongregasyon. An positibong bunga na pinaluwas sa buhay kan mapakumbabang lalaking ini asin kan saiyang agom nagtatao nin patotoo sa nakaliliwat na puersa kan Tataramon nin Dios!