Nagigirumdoman daw Nindo?

Inapresyar daw nindo an pagbasa kan bago pa sanang mga luwas kan An Torrengbantayan? Bueno, helinga kun kaya nindong simbagon an minasunod na mga hapot:

◻ An mga tataramon daw ni Jesus na, “Kun patawadon nindo an mga kasalan nin siisay man na mga tawo, an mga iyan napatawad na,” nangangahulogan na an mga Kristiano puedeng magpatawad nin mga kasalan? (Juan 20:23)

Mayo nin Makakasuratan na basehan sa pagkonklusyon na an mga Kristiano sa pankagabsan, o minsan an nombradong mga magurang sa kongregasyon, tinawan nin Dios nin autoridad na magpatawad nin mga kasalan. An konteksto kan mga tataramon ni Jesus garo nagpapaheling na an mga apostol nagtao sa sainda paagi sa paghiro kan banal na espiritu nin espesyal na autoridad na magpatawad o magpadanay nin mga kasalan. (Helingon an Gibo 5:​1-11; 2 Corinto 12:12.)​—4/15, pahina 28.

◻ Ano an pambihira manongod sa traduksion ni J. J. Stewart Perowne kan librong Salmo, na enot na ipinublikar kan 1864?

Sa saiyang traduksion pinagmaigotan ni Perowne na arogon na “marhay an pormang Hebreo, kapwa sa estilo kaiyan asin sa gramatika kan mga frase.” Sa paggibo kaiyan pinaboran nia an pagsulit kan ngaran nin Dios sa pormang “Jehovah” (sa Bicol, Jehova).​—4/15, pahina 31.

◻ Anong susundan an itinao ni Jesus sa saiyang mga parasunod kun manongod sa saindang relasyon sa mga gobyerno kan kinaban?

Si Jesus nagsabi: “Kun siring, itao nindo ki Cesar an mga bagay na ki Cesar, alagad sa Dios an mga bagay na sa Dios.” (Mateo 22:21) Sinabi man nia: “Kun an saro na nasa irarom nin autoridad kumua sa saimo sa paglilingkod sa rayong sarong milya, ibanan mo sia sa duwang milya.” (Mateo 5:41) Iiniilustrar digdi ni Jesus an prinsipyo nin boluntad na pagpasakop sa legal na mga kahagadan, baga man sa relasyon sa tawo o sa mga kahagadan nin gobyerno na kaoyon sa ley nin Dios. (Lucas 6:​27-31; Juan 17:​14, 15)​—5/1, pahina 12.

◻ Ano an boot sabihon kan ‘paglakaw sa katotoohan’? (Salmo 86:11)

Kaiba digdi an pagsunod sa mga kahagadan nin Dios asin paglilingkod sa saiya na fiel asin sinsero. (Salmo 25:​4, 5; Juan 4:​23, 24)​—5/15, pahina 18.

◻ Ano an nahaman kan pagsugo ni Jehova ki Jonas sa Ninive?

Mantang nangyayari an mga bagay, an aktibidad na paghuhulit ni Jonas sa Ninive nagpaheling kan kalaenan kan nagsolsol na mga taga-Ninive asin kan matagas an liog na mga Israelita, na biyong dai nin pagtubod asin kapakumbabaan. (Ikomparar an Deuteronomio 9:​6, 13; Jonas 3:​4-10.)​—5/15, pahina 28.

◻ Siisay an Halas asin siisay an “babae” na nasambitan sa Genesis 3:15?

An Halas bakong an hamak na halas kundi an saro na guminamit kaiyan, si Satanas na Diablo. (Kapahayagan 12:9) An “babae” bakong si Eva kundi an langitnon na organisasyon ni Jehova, an ina kan saiyang linahidan nin espiritung mga lingkod digdi sa daga. (Galacia 4:26)​—6/1, pahina 9.

◻ Paano an saro puedeng lumuwas sa Dakulang Babilonya asin makanompong nin kaligtasan? (Kapahayagan 18:4)

Sia kaipuhan na biyong sumiblag sa falsong relihiosong mga organisasyon asin pati sa saindang mga kostumbre asin sa espiritu na pinatatalubo ninda, dangan kaipuhan na hanapon nia an kaligtasan sa laog kan teokratikong organisasyon ni Jehova. (Efeso 5:​7-11)​—6/1, pahina 18.

◻ Taano an agila ta parateng nasasambitan sa Kasuratan?

Nasambitan kan mga kagsurat kan Biblia an mga karakteristiko kan agila tanganing isimbolo an mga bagay na arog baga nin kadonongan, proteksion nin Dios, asin rikas.​—6/15, pahina 8.

◻ An mga lingkod daw nin Dios ngonyan na may daganon na paglaom igwang espiritu nin Dios na arog kadakol kan nasa linahidan nin espiritung mga Kristiano?

Sa pundamental, an simbag iyo. An espiritu nin Dios makukua kan duwang grupo na may magkaparehong sokol, asin an kaaraman asin pakasabot pareho itinatao sa duwa.​—6/15, pahina 31.

◻ Taano ta kapakipakinabang para sa sato ngonyan na siyasaton an banal na paglilingkod na ginibo kan mga saserdote nin Israel sa templo sa Jerusalem?

Paagi sa paggibo kaiyan mas lubos niatong masasabotan an maheherakon na areglo na paagi kaiyan an makasalan na mga tawo ngonyan puedeng makapakipag-uli sa Dios. (Hebreo 10:1-7)​—7/1, pahina 8.

◻ Paano na an ikaduwang templo na itinogdok sa Jerusalem nagkaigwa nin kamurawayan na mas dakula kisa sa itinogdok ni Salomon?

An ikaduwang templo mas naghaloy nin 164 taon kisa sa templo ni Salomon. Mas dakol na parasamba hale sa mas dakol na kadagaan an nagtiripon sa mga patyo kaiyan. Orog na mahalaga, an ikaduwang templong ini nagkaigwa kan dakulang onra na an Aki nin Dios, si Jesu-Cristo, nagtokdo sa laog kan mga patyo kaiyan.​—7/1, pahina 12, 13.

◻ Kasuarin pinaluwas nin Dios an saiyang espirituwal na templo?

Ini kan 29 C.E. kan ipaheling nin Dios an saiyang pag-oyon sa pamibi ni Jesus sa pagpabautismo. (Mateo 3:​16, 17) An pag-oyon nin Dios sa pagpresentar kan hawak ni Jesus nangahulogan na, sa sarong espirituwal na sentido, luminataw na an altar na mas dakula kisa sa nagpunsionar sa templo sa Jerusalem.​—7/1, pahina 14, 15.

◻ Taano ta maninigo kitang magin mapagpatawad?

An pagpatawad sa nagkasala na naghagad nin dispensasyon mahalagang marhay tangani na mapagdanay niato an Kristianong pagkasararo. An kaanggotan asin pagtago nin raot nin boot makahahale kan satong katoninongan nin isip. Kun kita dai nagpapatawad, yaon an peligro na pag-abot nin aldaw dai na patawadon ni Jehova an satong mga kasalan. (Mateo 6:​14, 15)​—7/15, pahina 18.

◻ Paano magigin banal kaidto an mga Israelita?

An kabanalan posible sana paagi sa saindang pagkaigwa nin dayupot na relasyon ki Jehova, an banal na Dios, asin sa saindang dalisay na pagsamba sa saiya. Kaipuhan ninda an tamang kaaraman manongod sa “Kabanalbanaleng Saro” tanganing masamba sia sa kabanalan, sa pisikal asin espirituwal na kalinigan. (Talinhaga 2:​1-6; 9:​10)​—8/1, pahina 11.