An Gabos Kaipuhan na Manimbag sa Dios
“An lambang saro sa sato maninimbag sa Dios para sa saiyang sadiri.”—ROMA 14:12.
1. Anong mga limitasyon an ibinugtak sa katalingkasan ni Adan asin Eva?
LINALANG ni Jehova Dios an enot niatong mga magurang, si Adan asin Eva, bilang mga libre ahente moral. Minsan ngani sinda mas hababa kisa sa mga anghel, sinda intelihenteng mga linalang na kayang gumibo nin madonong na mga desisyon. (Salmo 8:4, 5) Pero, an tao nin Dios na katalingkasan na iyan bakong lisensia na pumili kan gusto. Sinda may paninimbagan sa saindang Kaglalang, asin an pagigin may paninimbagan na ini abot sa gabos nindang gikan.
2. Sa dai na mahahaloy si Jehova magibo nin anong pagpanimbag, asin taano?
2 Ngonyan na harani na kita sa kulminasyon kan maraot na palakaw na ini nin mga bagay, si Jehova magibo nin pagpanimbag sa daga. (Ikomparar an Roma 9:28.) Sa dai na mahahaloy, an maraot na mga tawo kaipuhan na manimbag ki Jehova Dios para sa paghabon sa mga kayamanan kan daga, sa paglaglag sa buhay nin tawo, asin nangorogna sa paglamag sa saiyang mga lingkod.—Kapahayagan 6:10; 11:18.
3. Anong mga hapot an pag-oolayan niato?
3 Napapaatubang sa nakapapepensar na tinatanaw na ini, kapakipakinabang para sa sato na horophoropon an matanos na mga tratamiento ni Jehova sa saiyang mga linalang kan mga nakaagi. Paano personalmenteng makatatabang sa sato an Kasuratan na tumao nin maaakong paninimbag sa satong Kaglalang? Anong mga halimbawa an tibaad makatabang, asin mga arin an maninigo niatong likayan na arogon?
May Paninimbagan an mga Anghel
4. Paano niato naaaraman na pinapaninimbag nin Dios an mga anghel sa saindang mga gawe?
4 An anghel na mga linalang ni Jehova sa kalangitan may paninimbagan man sa saiya kapareho niato. Bago kan Baha kaidtong kaaldawan ni Noe, an ibang anghel suwayan na nagmateryalisar tangani na seksuwal na makidorog sa mga babae. Bilang mga libre ahente moral, puedeng gibohon kan espiritung mga linalang na ini an desisyon na ini, alagad pinapanimbag sinda nin Dios. Kan an suwayan na mga anghel bumalik sa rona nin mga espiritu, dai sinda tinogotan ni Jehova na bumalik sa saindang orihinal na katongdan. Sinasabi sa sato ni disipulo Judas na sinda ‘itinagama na may daing sagkod na mga gapos sa irarom nin mahibog na kadikloman para sa paghokom kan dakulang aldaw.’—Judas 6.
5. Anong pagbagsak an naeksperyensiahan ni Satanas asin kan saiyang mga demonyo, asin paano mahuhusay an papaninimbag para sa saindang pagrebelde?
5 An suwayan na mga anghel na ini, o demonyo, pinamamahalaan ni Satanas na Diablo. (Mateo 12:24-26) An maraot na anghel na ini nagrebelde tumang sa saiyang Kaglalang asin inangat an pagigin may diretso kan soberaniya ni Jehova. An satong mga magurang dinara ni Satanas sa pagkakasala, asin ini nagbunga kan saindang pagkagadan sa huri. (Genesis 3:1-7, 17-19) Minsan ngani tinogotan ni Jehova si Satanas na makaduman sa kalangitan sa laog nin kadikit na panahon pakalihis kaiyan, an libro sa Biblia na Kapahayagan naghula na sa itinalaan na panahon nin Dios, an maraot na sarong ini ihoholog sa palibot kan daga. Ipinaririsa nin ebidensia na ini nangyari dai nahaloy pakaresibi ni Jesu-Cristo kan kapangyarihan sa Kahadean kan 1914. Sa kahurihurihi, an Diablo asin an saiyang mga demonyo mapaduman sa daing katapusan na kalaglagan. Sa pagkaresolber sa katapustapusi kan isyu manongod sa soberaniya, nahusay man giraray sa makatanosan na paagi an papaninimbag para sa pagrebelde.—Job 1:6-12; 2:1-7; Kapahayagan 12:7-9; 20:10.
May Paninimbagan an Aki nin Dios
6. Paano minamansay ni Jesus an saiyang pagigin may paninimbagan sa saiyang Ama?
6 Abaa karahay na halimbawa an itinao kan Aki nin Dios, si Jesu-Cristo! Bilang sangkap na tawo na kapantay ni Adan, si Jesus ogmahon na otobon an kabotan nin Dios. Naogma man siang papanimbagon para sa pag-otob sa ley ni Jehova. Mapadapit sa saiya, an salmista angay na marhay na naghula: “An paggibo kan boot mo, O Dios ko, iyo an naoogmahan ko, asin an saimong ley nasa kairaroman kan sakong sadiri.”—Salmo 40:8; Hebreo 10:6-9.
7. Kan namimibi kan banggi bago sia nagadan, taano ta nasabi ni Jesus an mga tataramon na nasusurat sa Juan 17:4, 5?
7 Sa ibong kan pano nin pagkaongis na pagtumang na naeksperyensiahan ni Jesus, inotob nia an kabotan nin Dios asin pinapagdanay an integridad sagkod sa kagadanan sa sarong hariging pasakitan. Paagi kaiyan binayadan nia an halagang pantubos tanganing mabalukat an katawohan sa nakagagadan na mga resulta kan kasalan ni Adan. (Mateo 20:28) Huli kaini, kan banggi bago sia nagadan, si Jesus nakapamibing may kompiansa: “Pinamuraway taka sa daga, na hinaman ko an trabaho na itinao mo sakong gibohon. Kaya ngonyan, Ama, pamurawaya ako sa kataed mo kan kamurawayan na dating yaon sa sako bago an kinaban.” (Juan 17:4, 5) Nasabi ni Jesus an mga tataramon na iyan sa saiyang Ama ta sia nakapapasar sa pagbalo nin pagigin may paninimbagan asin angay na akoon nin Dios.
8. (a) Paano ipinaheling ni Pablo na kaipuhan kitang manimbag ki Jehova Dios para sa satong sadiri? (b) Ano an makatatabang sato na akoon nin Dios?
8 Bakong arog kan sangkap na tawong si Jesu-Cristo, kita bakong sangkap. Pero, kita may paninimbagan sa Dios. Si apostol Pablo nagsabi: “Tadaw ta hinohokoman mo an saimong tugang? O tadaw man ta minemenus mo an saimong tugang? Huli ta kita gabos matindog sa atubangan kan trono nin paghokom nin Dios; huli ta nasusurat: ‘“Siring na ako nabubuhay,” an sabi ni Jehova, “sa sako maluhod an lambang tuhod, asin an lambang dila hayag na magtutuga sa Dios.”’ Kaya, kun siring, an lambang saro sa sato maninimbag sa Dios para sa saiyang sadiri.” (Roma 14:10-12) Tangani na magibo niato iyan asin akoon kita ni Jehova, sia mamomoton na nagtao sa sato kapwa nin konsensia asin kan saiyang ipinasabong na Tataramon, an Biblia, tanganing gumiya sa sato sa satong sinasabi asin ginigibo. (Roma 2:14, 15; 2 Timoteo 3:16, 17) An lubos na pag-aprobetsar sa espirituwal na mga probisyon ni Jehova asin pagsunod sa satong konsensia na sinanay sa Biblia matabang sa sato na akoon nin Dios. (Mateo 24:45-47) An banal na espiritu, o puersa aktiba, ni Jehova, dugang pang burabod nin kosog asin paggiya. Kun kita magawe kaoyon sa pagdirehir kan espiritu asin sa paggiya kan satong konsensia na sinanay sa Biblia, ipinaheheling niato na dai niato ‘binabasangbasang an Dios,’ na dapat niatong panimbagan kan gabos niatong gibo.—1 Tesalonica 4:3-8; 1 Pedro 3:16, 21.
May Paninimbagan Bilang mga Nasyon
9. Sairisay an mga Edomita, asin ano an nangyari sa sainda huli sa tratamiento ninda sa Israel?
9 Pinapaninimbag ni Jehova an mga nasyon. (Jeremias 25:12-14; Sofonias 3:6, 7) Helinga an suanoy na kahadean nin Edom, na yaon sa timog kan Gadan na Dagat asin amihanan kan Golpo nin Aqaba. An mga Edomita banwaan na Semitiko, na haraning paryente kan mga Israelita. Minsan ngani an apoon kan mga Edomita iyo an makoapo ni Abraham na si Esau, an mga Israelita dai tinogotan na umagi sa Edom sa “tinampo kan hade” mantang pasiring sa Dagang Panuga. (Bilang 20:14-21) Sa suminunod na mga siglo an pagkaanggot kan Edom nagin daing herak na pagkaongis sa Israel. Sa katapustapusi, kinaipuhan na panimbagan kan mga Edomita an pagsadol ninda sa mga Babilonyo na laglagon an Jerusalem kan 607 B.C.E. (Salmo 137:7) Kan ikaanom na siglo B.C.E., an Edom dinaog kan mga hukbo nin Babilonya sa pangengenot ni Hadeng Nabonido, asin iyan nagin daing tawo, arog kan ipinagboot ni Jehova.—Jeremias 49:20; Abdias 9-11.
10. Ano an iginawe kan mga Moabita sa mga Israelita, asin paano pinapanimbag nin Dios an Moab?
10 Arog man kaiyan an nangyari sa Moab. An kahadean na Moabita yaon sa amihanan kan Edom asin sirangan kan Gadan na Dagat. Bago luminaog sa Dagang Panuga an mga Israelita, an mga Moabita dai nagin mapag-istimar sa sainda, na minalataw na tinatawan sana sinda nin tinapay asin tubig para sa pinansial na pakinabang. (Deuteronomio 23:3, 4) Si Hadeng Balac nin Moab tinangdanan si propeta Balaam na isumpa an Israel, asin ginamit an mga babaeng Moabita na akiton an mga lalaking Israelita sa inmoralidad asin idolatriya. (Bilang 22:2-8; 25:1-9) Minsan siring, dai pinabayaan sana ni Jehova an pagkaongis kan Moab sa Israel. Arog kan ihinula, an Moab nagtios nin kagabaan sa kamot kan mga Babilonyo. (Jeremias 9:25, 26; Sofonias 2:8-11) Iyo, pinapanimbag nin Dios an Moab.
11. An Moab asin Amon nagin arog kan anong mga siudad, asin ano an ipinaririsa kan mga hula sa Biblia mapadapit sa presenteng maraot na palakaw nin mga bagay?
11 Bako sanang an Moab kundi pati an Amon kinaipuhan na manimbag sa Dios. Si Jehova naghula: “An Moab mismo magigin siring kan Sodoma, asin an mga aking lalaki ni Amon siring kan Gomorra, sarong lugar na nalakopan na nin langaton, asin kalot nin asin, asin sarong daing laog na kagabaan, sagkod pa ngani sa panahon na daing katapusan.” (Sofonias 2:9) An mga daga nin Moab asin Amon linaglag, kun paanong linaglag nin Dios an mga siudad nin Sodoma asin Gomorra. Sono sa Geological Society of London, hinihingako nin mga parasiyasat na nanompongan ninda an namugtakan kan nagabang Sodoma asin Gomorra sa sirangan na baybayon kan Gadan na Dagat. An ano man na masasarigan na ebidensia na tibaad lumataw pa sa bagay na ini masuportar sana sa mga hula sa Biblia na nagpaparisa na an presenteng maraot na palakaw nin mga bagay papaninimbagon man ni Jehova Dios.—2 Pedro 3:6-12.
12. Minsan an Israel kinaipuhan na manimbag sa Dios para sa mga kasalan kaiyan, ano an ihinula mapadapit sa sarong Judiong natatada?
12 Minsan an Israel pinahelingan ni Jehova nin dakulang pabor, iyan kinaipuhan na manimbag sa Dios para sa mga kasalan kaiyan. Kan si Jesu-Cristo pumaduman sa nasyon nin Israel, isinikwal sia kan kadaklan. Solamente sarong natatada an tuminubod asin nagin saiyang mga parasunod. Iinaplikar ni Pablo an nagkapirang hula sa Judiong natatadang ini kan sia sumurat: “Si Isaias nagkukurahaw dapit sa Israel: ‘Minsan an bilang kan mga aki ni Israel siring kadakol kan mga baybay sa dagat, an natatada sana an maliligtas. Huli ta si Jehova magibo nin pagpanimbag sa daga, na tataposon iyan asin pahahalipoton iyan.’ Siring man, kun paanong sinabi ni Isaias kaidtong enot: ‘Apuera sana kun si Jehova nin mga hukbo nagwalat nin sarong banhi sa sato, kita nagin kutanang arog kan Sodoma, asin ginibo kutana kitang arog kan Gomorra.’” (Roma 9:27-29; Isaias 1:9; 10:22, 23) Sinitar kan apostol an halimbawa kan 7,000 kaidtong panahon ni Elias na dai duminuko ki Baal, dangan sia nagsabi: “Kun siring, sa paaging ini, sa presente man na panahon may naglataw na sarong natatada sono sa pagpili huli sa dai na kutana maninigong kabootan.” (Roma 11:5) An natatadang iyan kompuesto nin mga indibiduwal na personal na may paninimbagan sa Dios.
Mga Halimbawa nin Personal na Pagigin May Paninimbagan
13. Ano an nangyari ki Cain kan papanimbagon sia nin Dios sa paggadan sa saiyang tugang na si Abel?
13 Sinisitar kan Biblia an dakol na kaso nin personal na pagigin may paninimbagan ki Jehova Dios. Helinga an panganay na aki ni Adan, si Cain, bilang halimbawa. Sia asin an tugang niang si Abel pareho nagdolot nin mga atang ki Jehova. An atang ni Abel naako nin Dios, alagad an ki Cain dai. Kan papanimbagon sa mabangis na paggadan sa saiyang tugang, si Cain daing simpatiyang nagsabi sa Dios: “Ano ako parabantay kan sakong tugang?” Huli sa saiyang mga kasalan, si Cain idinistiero sa “daga nin Pagkadulag na nasa sirangan nin Eden.” Mayo sia nin ipinaheling na sinserong pagsolsol sa saiyang krimen, na an pinagbasolan sana an maninigong padusa sa saiya.—Genesis 4:3-16.
14. Paano an personal na pagigin may paninimbagan sa Dios iinilustrar sa kaso kan halangkaw na saserdoteng si Eli asin kan saiyang mga aki?
14 An personal na pagigin may paninimbagan nin saro sa Dios iiniilustrar man sa nangyari sa halangkaw na saserdote nin Israel na si Eli. An mga aki nia, si Ofni asin Fineas, naglingkod bilang mga saserdoteng paradolot alagad “nagkasala nin inhustisya sa mga tawo, asin nin kadaihan nin galang sa Dios, asin mayo nin klase nin karatan na linikayan,” sabi kan historyador na si Josefo. Ining “mga lalaking daing kuenta” dai nagmidbid ki Jehova, guminibo nin lapastangan na gawe, asin nagkasala nin grabeng inmoralidad. (1 Samuel 1:3; 2:12-17, 22-25) Bilang saindang ama asin halangkaw na saserdote nin Israel, si Eli may obligasyon na disiplinahon sinda, alagad ta sinagwe nia sana sinda nin mabooton. Si Eli ‘tinawan nin onra an saiyang mga aking lalaki nin labi kisa ki Jehova.’ (1 Samuel 2:29) Duminatong an padusa sa pamilya ni Eli. An duwang aking lalaki nagadan kan iyo man sanang aldaw na nagadan an saindang ama, asin sa katapustapusi biyong naputol an saindang makasaserdoteng linya. Kaya nahusay an pagpanimbag.—1 Samuel 3:13, 14; 4:11, 17, 18.
15. Taano ta binalosan an aki ni Hadeng Saul na si Jonatan?
15 Biyong laen na halimbawa an itinao kan aki ni Hadeng Saul na si Jonatan. Dai nahaloy pakagadana ni David ki Goliat, “an mismong kalag ni Jonatan nagin dayupot sa kalag ni David,” asin guminibo sinda nin tipan nin pagkamagkatood. (1 Samuel 18:1, 3) Posible na namansayan ni Jonatan na an espiritu nin Dios mayo na ki Saul, alagad dai naiinaan an saiyang kaigotan para sa tunay na pagsamba. (1 Samuel 16:14) An pag-apresyar ni Jonatan sa autoridad ni David na itinao nin Dios nungka na luminuya. Narealisar ni Jonatan an saiyang pagigin may paninimbagan sa Dios, asin binalosan sia ni Jehova huli sa saiyang onorableng gawe paagi sa pagsierto na magpadagos sa laog nin dakol na kapag-arakian an saiyang linahe.—1 Cronica 8:33-40.
Pagigin May Paninimbagan sa Kristianong Kongregasyon
16. Siisay si Tito, asin taano ta masasabi na sia nagtao sa Dios nin marahay na paninimbag manongod sa saiyang sadiri?
16 An Kristianong Griegong Kasuratan may marahay na sinasabi manongod sa dakol na lalaki asin babae na nagtao nin marahay na paninimbag manongod sa saindang sadiri. Halimbawa, yaon an Griegong Kristiano na an ngaran Tito. Isinuherir na sia nagin Kristiano kaidtong enot na biahe ni Pablo bilang misyonero sa Chipre. Mantang posible na napaduman sa Jerusalem an mga Judio asin proselito hale sa Chipre kaidtong Pentecostes nin 33 C.E., posible na an Kristianismo nakaabot sa isla dai nahaloy pakalihis kaiyan. (Gibo 11:19) Minsan siring, si Tito nagin saro sa fiel na mga katabang ni Pablo. Inibanan nia si Pablo asin Bernabe sa pagbiahe pa-Jerusalem kaidtong mga 49 C.E., kan desisyonan an mahalagang marhay na isyu manongod sa pagturi. An bagay na si Tito dai tinuri orog na nagtao nin puersa sa argumento ni Pablo na an mga nakombertir sa Kristianismo dai maninigong magin sakop kan Ley ni Moises. (Galacia 2:1-3) An marahay na ministeryo ni Tito pinatutunayan sa Kasuratan, asin pinadarahan pa ngani sia ni Pablo nin sarong surat na ipinasabong nin Dios. (2 Corinto 7:6; Tito 1:1-4) Minalataw na sagkod sa mismong katapusan kan saiyang buhay sa daga, si Tito nagpadagos na tumao sa Dios nin marahay na paninimbag manongod sa saiyang sadiri.
17. Anong paninimbag an itinao ni Timoteo, asin paano kita puedeng maapektaran kan halimbawang ini?
17 Si Timoteo saro pang maigot na indibiduwal na nagtao ki Jehova Dios nin maaakong paninimbag manongod sa saiyang sadiri. Minsan ngani may mga problema sa salud si Timoteo, sia nagpaheling nin “pagtubod na dai nin pagsaginsagin” asin ‘naglingkod sa kaibanan ni Pablo sa pagpalakop kan maogmang bareta.’ Kun siring nasabi kan apostol sa mga kapwa Kristiano sa Filipos: “Mayo na ako nin iba na may kaisipan na arog kan [ki Timoteo] na mangangataman nin tunay sa mga bagay mapadapit sa saindo.” (2 Timoteo 1:5; Filipos 2:20, 22; 1 Timoteo 5:23) Sa atubangan nin mga kaluyahan nin tawo asin iba pang mga pagbalo, kita man puedeng magkaigwa nin pagtubod na daing pagsaginsagin asin makatatao sa Dios nin maaakong paninimbag manongod sa satong sadiri.
18. Siisay si Lidia, asin anong espiritu an ipinaheling nia?
18 Si Lidia sarong diosnon na babae na minalataw na nagtao sa Dios nin marahay na paninimbag manongod sa saiyang sadiri. Sia asin an kairiba nia sa harong kabilang sa enot na mga indibiduwal sa Europa na nag-ako kan Kristianismo huli sa aktibidad ni Pablo sa Filipos kaidtong mga 50 C.E. Taga-Tiatira, si Lidia posibleng sarong Judiang proselita, alagad tibaad pipira an Judio asin mayo nin sinagoga sa Filipos. Sia asin an iba pang debotadong babae nagtitiripon sa may salog kan kaolayon sinda ni Pablo. Bilang resulta, si Lidia nagin Kristiana asin nakombensir si Pablo saka an saiyang kairiba na umistar sa harong nia. (Gibo 16:12-15) An pagigin mapagpasakat na ipinaheling ni Lidia sagkod ngonyan tatak nin tunay na mga Kristiano.
19. Paagi sa anong marahay na mga gibo na si Dorcas nagtao sa Dios nin marahay na paninimbag manongod sa saiyang sadiri?
19 Si Dorcas saro pang babae na nagtao ki Jehova Dios nin marahay na paninimbag manongod sa saiyang sadiri. Kan sia magadan, si Pedro nagduman sa Jope bilang pagpaonra sa kahagadan nin mga disipulong tagaduman. An duwang lalaki na suminabat ki Pedro ‘dinara sia sa kuarto sa itaas; asin an gabos na babaeng balo uminatubang sa saiya na naghihibi asin ipinaheheling an dakol na pan-irarom na gubing asin pan-ibabaw na gubing na ginibo kaidto ni Dorcas kan sia nasa kaibanan ninda.’ Binuhay liwat si Dorcas. Alagad sia daw gigirumdomon sana huli sa saiyang mamomoton na pagkamatinao? Dai. Sia sarong “disipulo” asin seguradong nakikabtang man sa paggibo nin mga disipulo. An mga Kristiana man ngonyan “pano nin marahay na mga gibo asin mga paglimos.” Sinda ogmahon man na magkaigwa nin aktibong kabtang sa pagbalangibog kan maogmang bareta kan Kahadean asin paggibo nin mga disipulo.—Gibo 9:36-42; Mateo 24:14; 28:19, 20.
20. Anong mga hapot an ikahahapot niato sa satong sadiri?
20 An Biblia malinaw na nagpapaheling na an mga nasyon asin indibiduwal kaipuhan na manimbag sa Soberanong Kagurangnan na Jehova. (Sofonias 1:7) Kun kita dusay sa Dios, kun siring puede niatong ihapot sa satong sadiri, ‘Ano an pagheling ko sa sakong mga pribilehio asin responsibilidad na tao nin Dios? Anong klaseng paninimbag manongod sa sakong sadiri an itinatao ko ki Jehova Dios asin ki Jesu-Cristo?’
Ano an Saindong mga Simbag?
◻ Paano nindo patutunayan na an mga anghel asin an Aki nin Dios may paninimbagan ki Jehova?
◻ Ano an mga halimbawa sa Biblia na nagpapaheling na pinapaninimbag nin Dios an mga nasyon?
◻ Ano an sinasabi kan Biblia manongod sa personal na pagigin may paninimbagan sa Dios?
◻ Sairisay an nagkapirang indibiduwal sa tala kan Biblia na nagtao ki Jehova Dios nin marahay na paninimbag?
[Retrato sa pahina 10]
Si Jesu-Cristo nagtao sa saiyang langitnon na Ama nin marahay na paninimbag manongod sa saiyang sadiri
[Retrato sa pahina 15]
Arog ni Dorcas, an mga Kristiana ngonyan nagtatao ki Jehova Dios nin marahay na paninimbag manongod sa saindang sadiri
[Pasasalamat para sa pinagkuanan kan retrato sa pahina 13]
An Pagkagadan ni Abel/The Doré Bible Illustrations/Dover Publications, Inc.