An Paglakop nin Pundamentalismo
PUNDAMENTALISMO—kaidtong pirang marikas na dekada na an nakaagi, ini saro sanang mobimiento nin minoriya sa laog nin Protestantismo. Abaang pagkaliwat kan mga bagay! Si Bruce B. Lawrence, sarong komentarista sa relihion, nagsurat na kaidtong 30 taon na an nakaagi, pipira an nakaheling nin patienot na sa katapusan kan ika-20 siglo, an pundamentalismoa magigin siring kaimportante asin pagkakabangkagan pa nganing tema kan media asin pagsiyasat nin mga unibersidad.
Pero, iyan an nangyari. An mga aksion nin mga pundamentalista dayaday na ipinagigirumdom kan mga bareta nin diaryo dapit sa madahas na mga demonstrasyon sa tinampo, paggadan, mga mobimiento kontra sa aborsion, politikal na mga pagmaniobra nin relihiosong mga grupo na nan-iimpluwensia sa publiko, asin pagsolo sa publiko nin mga libro na ibinibilang na mapanlanghad. An semanal na pinansial na peryodiko sa Italia na Mondo Economico nagsabi na haros sa gabos na lugar an pundamentalismo “nag-aatake na ginagamit an ngaran nin Dios.”
An mga pundamentalista parateng ipinaheheling na sobra asin panatiko, na nagpupundar nin mga pagkasapakat asin naggigibo nin sa teroristang mga pagsalakay. Ikinatatakot nin mga tawo an pagdakol nin mga grupo na siring baga kan Comunione e Liberazione sa Romanong Katolisismo, Gush Emunim sa Judaismo, asin an Kristianong Koalisyon sa Protestantismo nin Amerika del Norte. Taano ta naglalakop an pundamentalismo? Ano an nagmomotibar kaiyan? Iyan daw tibaad “an pamamalos nin Dios,” siring sa ipinaririsa kan sosyologong Pranses na si Gilles Kepel?
[Nota sa Ibaba]
a An pundamentalista saro na estriktong nangangapot sa tradisyonal, konserbatibo na relihiosong mga prinsipyo sa buhay. An kahulogan nin “pundamentalismo” mas lubos na ipaliliwanag sa sunod na artikulo.
[Pasasalamat para sa pinagkuanan kan retrato sa pahina 3]
Nina Berman/Sipa Press