An mga Bendisyon sa Ministeryong Pagpapayunir
“An bendisyon ni Jehova—iyan an nakapayayaman, asin dai nia iyan dinadagdagan nin kakologan.”—TALINHAGA 10:22.
1, 2. (a) Paano ipinahayag nin sarong payunir an saiyang mga saboot manongod sa bilog na panahon na ministeryo? (b) Taano an mga payunir ta nasa kamugtakan na mas lubos na makaeksperyensia kan kagayagayahan sa paggibo nin mga disipulo?
“MAY maorog pa daw na kagayagayahan kisa sa pakaheling sa saro na saindong inaadalan na magin aktibong paraomaw ki Jehova? Nakaoogma asin nakapakokosog sa pagtubod na maheling kun gurano kapuersa kan Tataramon nin Dios sa pagmotibar sa mga tawo na gumibo nin mga pagbabago sa saindang buhay tanganing paogmahon si Jehova.” Iyan an isinurat nin sarong payunir na taga-Canada na labi nang 32 na taon sa bilog na panahon na ministeryo. Mapadapit sa saiyang ministeryong pagpapayunir, sia nagsabi: “Mayo na akong iba pang maimahinar na gibohon. Tunay nanggad na mayo akong maimahinar na ano man na magtatao nin kaparehong kagayagayahan.”
2 Minaoyon daw kamo na dakula an kagayagayahan sa pagkaigwa nin kabtang sa pagtabang sa saro sa dalan pasiring sa buhay? Siempre, bako sanang mga payunir an nakaeeksperyensia kan siring na kagayagayahan. An gabos na lingkod ni Jehova isinugo na ‘gumibo nin mga disipulo sa mga tawo,’ asin nagmamaigot sinda na gibohon iyan. (Mateo 28:19) Minsan siring, mantang dakol na oras an nagagamit kan mga payunir sa ministeryo sa langtad, parate na sinda nasa kamugtakan na mas lubos na makaeksperyensia kan mga kagayagayahan sa paggibo nin mga disipulo. Alagad igwa man nin iba pang balos an pagpapayunir. Kaolaya nindo an mga payunir, asin sasabihon ninda sa saindo na an pagpapayunir sarong marahayon na paagi na manamitan ‘an bendisyon ni Jehova na nakapayayaman.’—Talinhaga 10:22.
3. Ano an puedeng makaanimar sa sato mantang kita nagpapadagos sa paglilingkod ki Jehova?
3 Kasuarin pa sana, hinagad sa mga payunir hale sa laen-laen na parte kan kinaban na iladawan an mga bendisyon na naeksperyensiahan ninda sa bilog na panahon na ministeryo. Estudyaran niato an sinabi ninda. Pero, dai manluya an saindong boot kun limitado an saindong paglilingkod huli sa maluyang salud, paggurang, o iba pang mga kamugtakan. Girumdomon, an mahalaga maglingkod ki Jehova nin bilog na kalag, sa ano man na kapasidad. Pero, an pakadangog sa mga komento nin pirang payunir puedeng magpaorog kan saindong interes na lumaog sa nakakokontentong aktibidad na ini kun posible.
Hararom na mga Pagmate nin Satispaksion Asin Kagayagayahan
4, 5. (a) Taano an paghiras sa iba kan maogmang bareta ta sarong nakakokontentong eksperyensia? (b) Ano an saboot kan mga payunir manongod sa pakikikabtang nin bilog na panahon sa ministeryo?
4 “Igwang orog na kaogmahan sa pagtao kisa sa pag-ako,” an sabi ni Jesus. (Gibo 20:35) Iyo, an daing kapasloan na pagtao igwa nin mga balos. (Talinhaga 11:25) Nangorognang totoo ini pag-abot sa paghiras sa iba kan maogmang bareta. Tunay nanggad, may maorog pa daw na regalo na ikatatao niato sa kapwa kisa sa tabangan siang makua an kaaraman dapit sa Dios, na minagiya pasiring sa buhay na daing katapusan?—Juan 17:3.
5 Bakong makangangalas, an mga nakikikabtang nin bilog na panahon sa ministeryo parateng nagkokomento dapit sa kagayagayahan asin hararom na pakamate nin satispaksion na nakukua ninda sa saindang ministeryo. “Aram ko na mayo nang ibang gibohon na puedeng magtao sa sako kan satispaksion na naggikan sa paghiras kan katotoohan sa iba,” an sabi nin sarong 64 anyos na payunir na taga-Britania. Ipinahayag nin sarong balo na taga-Zaire an nagin kahulogan para sa saiya kan pagpapayunir: “An paglilingkod bilang payunir sarong tunay na karangahan para sa sako pagkagadan kan sakong namomotan na agom. Mientras na mas parate akong nagluluwas sa paglilingkod tanganing tabangan an iba, mas bihira ko man na namamatean an makamomondong pagkagadan. Nagtutubod ako sa mga panuga ni Jehova asin permi kong iniisip kun paano ko matatabangan an sakong mga inaadalan na gumibo nin mga pagbabago sa saindang buhay. Pagkatapos kan kada aldaw, mahamis an torog ko, asin pano nin kagayagayahan an sakong puso.”
6. Anong espesyal na kagayagayahan an naeksperyensiahan nin nagkapirang payunir?
6 An nagkapira na dakol nang dekada na nagpapayunir nakamate kan espesyal na kagayagayahan nin paglilingkod sa puerang mga lugar, na nag-oorganisar nin mga kongregasyon, na pag-abot nin panahon nagin mga sirkito. Halimbawa, sa Abashiri, Hokkaido (an pinakaamihanan na isla sa Hapon), may sarong tugang na babae na 33 na taon nang payunir. Nagigirumdoman nia na sa saiyang enot na pansirkitong asamblea—para sa bilog na Hokkaido—70 sana an nag-atender. Asin ngonyan? Igwa na ngonyan nin 12 sirkito sa islang iyan, na may total na 12,000 na parahayag. Imahinara kun gurano an pagsopay nin kagayagayahan sa saiyang puso kun sia nag-aatender sa mga asamblea asin kombension kaiba an kadakol na kapwa parabalangibog kan Kahadean sa islang iyan!
7, 8. Anong kagayagayahan an naeksperyensiahan nin kadaklan na haloy nang payunir?
7 An iba pang haloy nang mga payunir nakamate kan kagayagayahan sa pakaheling sa mga inaadalan sa Biblia na nagpapabautismo dangan naghihingoang maabot an orog pang mga pribilehio nin paglilingkod. Sa Hapon nagigirumdoman nin sarong tugang na babae na naglingkod na sa siyam na laen-laen na destino sa pagpapayunir poon kan 1957 an pakapasakamot nin sarong magasin na Awake! sa sarong hoben na babae na nagtatrabaho sa bangko. Mayo pang siyam na bulan an hoben na babae nabautismohan. Kan huri naagom sia, asin sinda mag-agom nagin espesyal payunir. Kanigoan an kagayagayahan kan payunir na tugang na babae kan, sa saiyang ikatolong destino, an saiyang kongregasyon songkoon kan bagong paraataman sa sirkito asin kan saiyang agom—an saiyang inaadalan sa Biblia kaidto!
8 Bakong makangangalas na an mga ginibong karera an ministeryong pagpapayunir minamansay iyan bilang “sarong daing kaagid sa halagang pribilehio na dapat pakamahalon,” siring sa pagkapahayag kaiyan nin sarong 22 na taon nang payunir!
Ebidensia kan Pag-ataman ni Jehova
9. Bilang an Dakulang Paratao, ano an ipinanunuga ni Jehova sa saiyang mga lingkod, asin ano an kahulogan kaini para sa sato?
9 Si Jehova, an Dakulang Paratao, nanunuga na susuportaran an saiyang mga lingkod, na inaataman sinda sa espirituwal asin materyal. Marahay an pagkasabi ni Hadeng David kan suanoy: “Ako dati hoben na lalaki, naggurang man ako, alagad ta dai ako nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.” (Salmo 37:25) Siempre, an garantiyang ini nin Dios dai kita pinalilibre sa obligasyon na sustentohan sa materyal an satong pamilya, ni tinatawan kita kaiyan nin lisensia na mag-aprobetsar sa pagigin buka an palad kan satong Kristianong mga tugang. (1 Tesalonica 4:11, 12; 1 Timoteo 5:8) Pero, kun kita gikan sa boot na naggigibo nin mga pagsasakripisyo sa satong buhay tanganing mas lubos na makapaglingkod ki Jehova, nungka nia kitang babayaan.—Mateo 6:33.
10, 11. Gikan sa eksperyensia, ano an aram kan dakol na payunir manongod sa kakayahan ni Jehova na magsustento?
10 An mga payunir sa bilog na kinaban nakaaaram gikan sa eksperyensia na si Jehova nagsusustento sa mga nananarig sa saiyang mapag-ataman na mga kamot. Estudyare an nangyari sa sarong mag-agom na payunir na buminalyo sa sarong sadit na banwaan na mas dakula an pangangaipo para sa mga parahulit kan Kahadean. Pakalihis nin pirang bulan, bihira nang makakua nin sekular na trabaho, asin naubos an saindang saray na kuarta. Dangan nakaresibi sinda nin singil sa seguro sa auto na an kantidad $81. “Mayo kaming paagi na mabayadan iyan,” an paliwanag kan tugang na lalaki. “Odok na marhay an pamimibi mi kan bangging idto.” Kan sumunod na aldaw, nakaresibi sinda nin kard gikan sa sarong pamilya na nasasakitan man sa pinansial. An pamilya nakaresibi nin reembolsar sa ibinayad na buhis, an ipinaliwanag kan kard, asin huling mas dakula iyan kisa sa inaantisipar ninda, boot nindang ihiras an iba kaiyan sa mag-agom na payunir. May laog iyan na $81! “Nungka kong malilingawan an aldaw na idto—tuminirindog an mga barahibo ko sa loong!” an sabi kan payunir na tugang na lalaki. “Inapresyar ming marhay an pagigin buka an palad kan pamilyang ini.” Inaapresyar man ni Jehova an siring na kabootan, na karakteristiko kan espiritu nin pagkamatinao na ineenkaminar nia sa saiyang mga lingkod.—Talinhaga 19:17; Hebreo 13:16.
11 An dakol na payunir makasasaysay nin kaparehong mga eksperyensia. Hapota nindo sinda, asin sasabihon ninda sa saindo na nungka sindang “lubos na pinabayaan.” Sinasalingoy an labing 55 taon sa bilog na panahon na ministeryo, an sarong 72 anyos na payunir nagsasabi, “Nungka akong sinudya ni Jehova.”—Hebreo 13:5, 6.
“Sarong Ekselenteng Paagi na Magin Mas Dayupot ki Jehova”
12. Taano an pagbalangibog kan maogmang bareta ta sarong pambihirang pribilehio?
12 An bagay na ipinababalangibog sa sato ni Jehova an maogmang bareta kan saiyang Kahadean nagtatao sa sato nin pribilehio. Minamansay nia kita—minsan ngani kita bakong sangkap na mga tawo—bilang saiyang “mga katabang” sa nagliligtas-buhay na gibohon na ini. (1 Corinto 3:9; 1 Timoteo 4:16) Mantang ihinuhulit ta sa iba an manongod sa Kahadean nin Dios, mantang ibinabalangibog ta an katapusan nin karatan, mantang ipinaliliwanag ta sa mga tawo an saiyang makangangalas na pagkamoot sa pagtao nin pantubos, mantang binubuksan ta an saiyang buhay na Tataramon asin itinotokdo an mahalagang marhay na laog kaiyan sa sadiosan an pusong mga tawo, kita natural sanang nagigin mas dayupot sa satong Kaglalang, si Jehova.—Salmo 145:11; Juan 3:16; Hebreo 4:12.
13. Ano an sinasabi nin nagkapira manongod sa epekto kan saindang ministeryong pagpapayunir sa saindang relasyon ki Jehova?
13 An mga payunir dakol na oras an nagagamit kada bulan sa pag-adal asin pagtotokdo manongod ki Jehova. Paano ninda namamatean na ini nakaaapektar sa saindang relasyon sa Dios? “An pagpapayunir sarong ekselenteng paagi na magin mas dayupot ki Jehova,” an simbag nin sarong magurang sa kongregasyon sa Pransia na labi nang sampulong taon na payunir. An saro pang payunir sa nasyon na iyan, na 18 taon na sa bilog na panahon na ministeryo, nagsasabi: “An paglilingkod bilang payunir nagpapangyari sa sato na ‘namitan asin helingon na si Jehova marahay,’ na kada aldaw pinatatalubo an mas makosog na relasyon sa satong Kaglalang.” (Salmo 34:8) Iyan man an saboot nin sarong tugang na babae sa Britania na 30 taon nang payunir. “An pangangaipong manarig sa espiritu ni Jehova para sa paggiya sa sakong ministeryo mas nagpapadayupot sa sako sa saiya,” an sabi nia. “Talagang namatean ko na sa dakol na okasyon ginigiyahan ako kan espiritu ni Jehova pasiring sa sarong partikular na harong sa tamang panahon.”—Ikomparar an Gibo 16:6-10.
14. Paano nakikinabang an mga payunir sa aroaldaw na paggamit kan Biblia asin mga publikasyon na basado sa Biblia sa pagtokdo sa iba?
14 Nadiskobre nin dakol na payunir na an aroaldaw na paggamit kan Biblia asin mga publikasyon na basado sa Biblia tanganing ipaliwanag asin itokdo an mga katotoohan sa Kasuratan nakatatabang sa sainda na umoswag sa kaaraman sa Tataramon nin Dios. An 85 anyos na tugang na lalaki sa España na 31 taon nang payunir nagpapaliwanag: “An pagpapayunir nakatabang sa sako na magkaigwa nin hararom na kaaraman sa Biblia, kaaraman na ginamit ko sa pagtabang sa dakol na tawo na mamidbid si Jehova asin maaraman an saiyang mga katuyohan.” An sarong tugang na babae na taga-Britania na 23 na taon nang nagpapayunir nagsasabi: “An bilog na panahon na ministeryo nakatabang sa sako na pataluboon an ganadong apetito sa espirituwal na kakanon.” An pagpaliwanag sa iba kan “rason para sa saindong paglaom” makapakokosog sa saindong kombiksion mapadapit sa mga paniniwala na pinakamamahal nindo. (1 Pedro 3:15) Nagsabi an sarong payunir na taga-Australia: “Pinaooswag kan pagpapayunir an sakong pagtubod mantang ako nagpapahayag sa iba.”
15. Ano an andam na ginibo nin dakol tanganing makalaog sa ministeryong pagpapayunir asin magdanay dian, asin taano?
15 Malinaw nanggad, an payunir na mga ministrong ini kombensido na napili ninda an sarong porma nin paglilingkod na nagbubunga nin dai mabilang na bendisyon gikan ki Jehova. Bakong makangangalas na dakol an andam na gumibo nin mga pagliliwat sa saindang buhay, na isinasakripisyo pa ngani an sekular na karera asin materyal na mga kayamanan, tanganing lumaog sa ministeryong pagpapayunir asin magdanay dian!—Talinhaga 28:20.
An Puso daw Nindo Naghihimuyawot na Gumibo nin Dakol Pa?
16, 17. (a) Kun iniisip-isip nindo kun baga posible para sa saindo an pagpapayunir, ano an puede nindong gibohon? (b) Ano an saboot nin nagkapira kun dai sinda nakapapayunir?
16 Pakaestudyare sa sinasabi nin mga payunir manongod sa mga bendisyon sa ministeryong pagpapayunir, tibaad iniisip-isip nindo kun baga praktikal para sa saindo an pagpapayunir. Kun iyo, taano ta dai makipag-olay sa sarong payunir na nagin mapanggana sa bilog na panahon na ministeryo? Tibaad makatatabang man para sa saindo na makipag-olay sa saro sa kamagurangan sa kongregasyon, saro na midbid kamo—an saindong kamugtakan sa salud, an saindong mga limitasyon, asin an saindong mga paninimbagan sa pamilya. (Talinhaga 15:22) An realistikong mga komento nin iba tibaad makatabang sa saindo na pagturotimbangon nin maingat kun baga posible para sa saindo an pagpapayunir. (Ikomparar an Lucas 14:28.) Kun makapapayunir kamo, tunay nanggad na dakula an mga bendisyon na mapapasaindo.—Malaquias 3:10.
17 Pero, kumusta man an dakol na fiel na parahayag kan Kahadean na mayo sa kamugtakan na makapayunir, minsan ngani tibaad hinihimuyawot ninda na gumibo nin dakol pa sa ministeryo? Estudyare, halimbawa, an mga saboot nin sarong tugang na Kristiana na nagmamaigot na padakulaon an saiyang apat na aki na daing katuwang. “Namomondo ako,” an sabi nia, “huli ta kaidto regular payunir ako, alagad ngonyan, huli sa sakong mga kamugtakan, dai na akong gayo makaluwas sa paglilingkod sa langtad na arog kan nagigibo ko kaidto.” Namomotan na marhay kan tugang na babaeng ini an saiyang mga aki asin boot niang sustentohan sinda. Kadungan kaiyan, naghihimuyawot siang gumibo nin dakol pa sa paghuhulit. “Namomotan ko an ministeryo,” an paliwanag nia. Kapareho kaiyan an mga saboot nin iba pang debotong mga Kristiano na pinahihiro kan pagkamoot sa Dios na magmawot na maglingkod ki Jehova ‘sa bilog nindang puso.’—Salmo 86:12.
18. (a) Ano an linalaoman sa sato ni Jehova? (b) Taano ta dai maninigong manluya an satong boot kun linilimitaran nin mga kamugtakan an satong magigibo?
18 Girumdomon na an linalaoman sa sato ni Jehova bilog na kalag na paglilingkod. An kadakolan kaini puedeng magkalaen nanggad sa lambang kalag. An nagkapira nahihimong liwaton an saindang mga aktibidad tanganing makapaglingkod bilang regular payunir. An dakol na iba pa nagpapalista bilang auxiliary payunir magsalang sa panapanahon o dagos-dagos, na naggagamit nin 60 oras kada bulan sa ministeryo. Minsan siring, an dakulang mayoriya kan banwaan ni Jehova idinudusay nin bilog na kalag an saindang sadiri sa paghuhulit asin pagtotokdo bilang mga parahayag sa kongregasyon. Kaya kun talagang nalilimitaran kamo huli sa maluyang salud, paggurang, mga paninimbagan sa pamilya, o iba pang mga kamugtakan, dai manluya an saindong boot. Basta itinatao nindo an saindong pinakamakakaya, an saindong paglilingkod mahalaga sa pagheling nin Dios, arog kan paglilingkod kan mga nasa bilog na panahon na ministeryo!
Ikapaheheling kan Gabos an Espiritu nin Pagpapayunir
19. Ano an espiritu nin pagpapayunir?
19 Maski ngani tibaad dai nindo mahihimong magpalista bilang payunir, ikapaheheling nindo an espiritu nin pagpapayunir. Ano an espiritu nin pagpapayunir? An luwas kan An Satong Ministeryo sa Kahadean kan Agosto 1988 (km-E 7/88) nagsabi: “Iyan puwedeng tawan kan kahulogan na pagkaigwa nin positibong kaisipan manongod sa pagboot na maghulit asin gumibo nin mga disipulo, pagigin lubos na dusay sa pagpaheling nin pagkamoot asin pagmakolog sa mga tawo, pagigin mapagsakripisyo sa sadiri, pakanompong nin kagayagayahan sa maingat na pagsunod sa Kagurangnan, asin pagkaogma sa espirituwal, bakong materyal na mga bagay.” Paano nindo ikapaheheling an espiritu nin pagpapayunir?
20. Paano ikapaheheling nin mga magurang an espiritu nin pagpapayunir?
20 Kun kamo sarong magurang na may mga aking sadit, puede nindong irekomendar sa sainda nin bilog na puso an karera bilang payunir. An positibong kaisipan nindo manongod sa ministeryo puedeng magtudok sa boot ninda kan pangangaipo na gibohon na pinakamahalaga sa saindang buhay an paglilingkod ki Jehova. Puede nindong imbitaran sa saindong harong an mga payunir asin nagbibiaheng paraataman pati an saindang agom tanganing makinabang an saindong mga aki sa mga halimbawa kan mga nakanompong nin kagayagayahan sa bilog na panahon na ministeryo. (Ikomparar an Hebreo 13:7.) Maski sa mga harong na nababanga huli sa relihion, matatabangan kan may pagtubod na mga magurang, paagi sa tataramon asin halimbawa, an saindang mga aki na gibohon na pasohan sa buhay an bilog na panahon na ministeryo.—2 Timoteo 1:5; 3:15.
21. (a) Paano niato gabos ikatatao an pagsuportar sa mga nagpapayunir? (b) Ano an magigibo kan kamagurangan tanganing parigonon an boot kan mga payunir?
21 Sa kongregasyon, ikapaheheling niato gabos an bilog na pusong pagsuportar sa mga nakapapayunir. Halimbawa, puede daw kamong maghingoa na umiba sa sarong payunir sa ministeryo, nangorogna sa mga panahon na an payunir tibaad naglilingkod na daing kaiba? Puedeng manompongan nanggad nindo na magkakaigwa nin “pagriribayan nin pagparigon sa boot.” (Roma 1:11, 12) Kun kamo magurang sa kongregasyon, mas dakol pa ngani kamong magigibo na maparigon an boot kan mga payunir. Kun nagmimiting an grupo nin kamagurangan, maninigo na regular nindang pag-olayan an mga pangangaipo kan mga payunir. Kun an sarong payunir nanluluya an boot o may mga problema, dai tolos-tolos isuherir na pumondo sia sa pagpapayunir. Minsan ngani tibaad kaipuhan an siring na suhestion sa nagkapirang kamugtakan, dai paglingawan na an pagpapayunir sarong mahal na marhay na pribilehio na tibaad pinakamamahal kan bilog na panahon na lingkod na iyan. Tibaad an kaipuhan sana dikit na pagparigon sa boot asin praktikal na hatol o tabang. An sangang opisina kan Sosyedad sa España nagsurat: “Kun an kamagurangan ineenkaminar an pagpapayunir, sinusuportaran an mga payunir sa ministeryo sa langtad, asin regular sindang sinosongko sa pagpapastor, an mga payunir orog na magayagaya, nakamamate na kapakipakinabang sinda, asin boot na magpadagos sa ibong nin mga balakid na tibaad maglataw.”
22. Sa kritikal na peryodong ini nin kasaysayan nin tawo, ano an maninigo na determinado niatong gibohon?
22 Nabubuhay kita sa sarong kritikal na peryodo sa kasaysayan nin tawo. Tinawan kita ni Jehova nin nagliligtas-buhay na gibohon na dapat hamanon. (Roma 10:13, 14) Baga man kita puedeng makikabtang sa gibohon na ini nin bilog na panahon bilang payunir o dai, ipaheling ta an espiritu nin pagpapayunir. Mag-apura kita asin magkaigwa kan espiritu nin pagsasakripisyo sa sadiri. Magin determinado kita na itao ki Jehova an hinahagad nia sa sato—an bilog na kalag na paglilingkod. Asin girumdomon niato na kun satong itinatao an gabos na ikatatao niato, baga man iyan kabaing kan duwang saradit na sinsilyo kan balo o kan mamahalon na pahamot ni Maria, an satong paglilingkod bilog na puso, asin mahal ni Jehova an satong bilog na kalag na paglilingkod!
Nagigirumdoman daw Nindo?
◻ Taano an bilog na panahon na ministeryo ta nagtatao nin pakamate nin satispaksion asin kagayagayahan?
◻ Gikan sa eksperyensia, ano an aram nin dakol na payunir manongod sa kakayahan ni Jehova na atamanon an saiyang mga lingkod?
◻ Namamatean kan mga payunir na an saindang ministeryo igwa nin anong mga epekto sa saindang relasyon ki Jehova?
◻ Paano nindo ikapaheheling an espiritu nin pagpapayunir?
[Retrato sa pahina 23]
An mga payunir nagkakamit nin dakulang kagayagayahan sa paggibo nin mga disipulo
[Retrato sa pahina 23]
An saindong mga aki makikinabang sa pakikiasosyar sa bilog na panahon na mga parabalangibog kan Kahadean
[Retrato sa pahina 23]
Maparirigon kan kamagurangan an boot kan mga payunir sa ministeryo sa langtad